Enhandhula

Kifuuse ky’abwetaavu nga Paulo bwe yaghandiikira Ekikunsu ky’Abaikiriza mu Kurisito Ab’e Korintho, “Mperaano nga dhira mu ebyo bye mwanpandiikiraku.” Nhiramu. Eisomo ery’endhawulo erigema ku bufumbo kabiri liteekwa okwinhonholwa mu magezi eino.

Obufumbo bw’atugheebwa, mu kisa kya Katonda, okutwala entegeka dhoonadhoona okuva mu kukubagania ebidhuubo tubite mu bwerufu nga tukozesa ebyaghandiikibwa ebyagaanibwa mu Kibono kya Katonda, ate tumanhe nti biziramu kubuusabuusa kwonakwona. Kale kinaaba n’obuyambi bwa Katonda, nti eisomo lino eizibu einho erigema ku bulamu bwaife obw’okunsi bidha kwinhonholwa. Obutaisania mu bufumbo kikaire nga obufumbo bwene bwe buli. By’aligho mu nnaku dha Musa, mu biseera ebya Musengwa waife era n’abatume era waire ni leero buno. Nairala mu mulembe guno gwe tulimu twagheebwa eby’okwiramu ebibuuzo byonabyona n’ebizibu ebigema ku isomo lino okuva mu Byaghandiikibwa Ebitukuvu. Ky’annaku ate kituufu, eby’okwiramu tibyagaanibwa byonabyona mu kenga ndala mwe tuyinza okuja twaba n’ebibuuzo byaife nga biriibwamu. Waire kiri kityo, bwe tulinga mu byaghandiikibwa eby’endhawulo tusobola okwagaana eby’okwiramu. Nga bwe kiri ku masoma gale agandi, tunoonia ebigema ku isomo eryo ebisansanire mu Baibuli yoonayoona ate twabigaita ghalala bulungi era omwo twafuna eby’okwiramu ebigwaniire.

Tuli mu kiseera eky’enkomerero ey’omulembe gw’Ekikunsu ky’Abaikiriza mu Kurisito ekisembayo omuli, n’Okwolekebwa kwa Mwoyo Mutukuvu, ebintu byonabyona bimanhibwa era byaizibwayo mu nsambo ni mu ntegeka eyasooka. Lata waife ow’omu igulu afaayo inho ku bulamu nti Aghaire okuwabula okutuufu yaatumulikira enjira enkaire enungi. Aidhi bukalamu okulumwa kwaife okw’omwoyo n’okwelumaluma okuli mu maka era afaayo ku baana Be mu nsambo bwe yandyenze balobe kutuukibwa ebintu ebibalumya ate n’okubakuuma, tutyo tusobole okumugheereza n’omwoyo ogw’eisanu aghazira kuzitogherwa. Olwekyo yatugha, nga Lata w’abaana be, ebintu eby’etaagibwa okunonereza.

Eisomo »Obufumbo n’Okubinga omukazi« Erya langirirwa William Branham nga 21^st Febuali, 1965, nga ebyaghandiikibwa ebitukuvu bwe bikoba, n’omusingi ogw’okufulumya ekitabo kino. Yalagirwa buterevu, nga Paulo, ni Musengwa, okwogera ku isomo »Obufumbo n’Okubinga omukazi« okuva mu byaghandiikibwa. Mu bibono bye mwene yafuna obunhiriri obw’endhawulo n’okugemagana kwabwo mu Kibono kyene. Yata obuzito obusinga ku mazima nti Okwolekebwa okw’amugheebwa nga kw’Akikunsu ky’Abaikiriza mu Kurisito, nga busobola okulingwaku nga kirala ku byama eb’ayolekebwa okuva ku kukakampulwa kw’obumanhiso omusanvu. Tutegeera nti Okwolekebwa kuno kinto ekyali nga tikimanhiibwa. Ow’oluganda Branham yali tayenda kwogera ku isomo lino kuba yali atiire nti ayinza okutegeerebwa obubi oba yaaleetagho okwawukana. Mu kulangirira kwe »Okuvaayo Okwokusatu« okwalangirirwa nga 30^th June, 1963, Yayogera ng’airaganhamu nti ghaligho ekintu ekyayogera y’ali, “»Gema olutambi olw’obufumbo n’Okubinga omukazi!« Bona. Musengwa ng’ayenze, ekyo bwe kisigala ku mwoyo gwange ate Musengwa bwandholeka ebintu kamaala ku ebyo, kale, mpinza okukigema ku lutambi, bona.” Yaakoba kabiri, “Mpinza okuja eri omulamuzi yaaluwulira – abandi ku baamateeka bano. Bona Musengwa kye yakoba ku bufumbo n’Okubinga omukazi.” (pg. 6).

Luvanhuma lwa Musengwa okumulagira okuja ghaigulu ku lusozi, eyo gye Yabonekera mu kireri eky’omu igulu n’okwolekebwa n’obufumbo kw’amugheebwa, nti yakobera abantu obukwenda mu isinzizo lye mu Jeffersonville. Okunogola: “Ghabaagho ekinkoba, »ja ghaigulu ku lusozi, ndidha kwogera n’iwe.« … N’abantu boonaboona mu kibuga baakiringirira ku lunaku olutangaavu aghazira bireri woonawoona, n’ekireri kino ekya yellow nga kirengedha, nga kiika ghansi oti kadumo ak’amaadhi kabiri kyairayo kyamala kyagazigha. Mukaagwa … Kityo bwe kyali kidholekebwa ekyo kye nja okukukobera buti. Kale otakisubwa.” (Obufumbo n’Okubinga omukazi pg. 47-48).

Twagaana ebibairengagho mu biseera ebyabita nga biiraganwamu n’okutuusa olwaleero. Abantu abenda okuwulira omulanzi, mu kiseera n’ekirala baamusuubira okwogera kye baikiriza n’ekyo amatu gaibwe kye genda okuwulira ate kino n’ekibairenga kyegeresebwa okuva einhuma eyo okutuusa ni ye buli eno. Ensambo edhindi enkaire edhasikirwa dhisobola okuba edh’ekiddiini einho, ate mu kiseera n’ekirala nga dhizira mu byaghandiikibwa. Abalanzi ebikumu ebina mu naku dha Ahabu baali ghansi w’omwoyo omuguya – waire nga bano baali balanzi ba Isiraeli – , Bwe baagezaaku okusiimia kyabazinga. Mika n’eyali omulanzi omutuufu owa Katonda. Eyo n’endhawulo eyamaani. Musengwa waife Yesu yayogera nti ghalibaagho abalanzi abaguya kamaala mu biseera eby’enkomerero. Era Yeena yakakasa nti Omulanzi Malaki yasuubiza; nti Omulanzi »Eliya« aliidha atereeze ebintu byonabyona (Matayo 17:11; Ebikolwa by’abatume 19:21), memale olunaku Musengwa olukologho ate olw’entiisa lutuuke. Ekibono buliidho kyaidhiranga Omulanzi omutuufu. K’asobola okwogera olunaku, omwezi n’omwaka (Hagai 2 vv. 1, 10, 18 a. o.). Ni leero kikali kituufu nga bwe kighandiikibwa, “Mu butuufu bwene ghazira Musengwa Katonda ky’akola mu kyama nga takyoleike bagheereza be abalanzi.” (Amosi 3:7).

Omugheereza eyatumibwa okweta Mika yakoba omusaadha wa Katonda, “… weena ogwaine olange nga beene bwe bakoze, ng’oyogera bikalamu.” (2 Ebyomubyanda 18:12b). Zedekia, omulanzi omukulu mu abo, yeekolera amaiga mu kyuma ekigumu inho, era yaayogerera ghaigulu, “ATYO BW’AKOBA MUSENGWA …” (v. 10). Ti kyali ATYO BW’AKOBA MUSENGWA OW’EIGYE, kyali “Atyo bw’akoba musengwa Zedekia.” Omusaadha wa Katonda, mu kusooka, yakoba nga bale abandi boonaboona bwe baali bogeire, ni Ahabu eyali eiririire einhuma yategeera nti ghaligho ekitali kituufu, yaayenda omulanzi, nga amwegheemba, “… bw’obanga ng’oli kwogera ninze mu liina lya Musengwa Katonda, ogwaine oyogere mazima gonka …” (v. 15b). Nga kino kiwoire Mika yalangirira Okwolekebwa kwe yali afune mu maiso g’abakyabazinga – Yohoshafati ni Ahabu. Oluvanhuma nga Yohoshafati amaze okuwulirisa abalanzi 400, ekibuuzo kye kyali nti oba wakaalighoku owundi mulala Katonda mw’ayinza okwogerera. Okwolekebwa kwaidha kuti, “Kale ni, wulira Musengwa Katonda by’akoba: Mboine Musengwa Katonda oyo ng’atyaime ku kityamo kye eky’obwakyabazinga, ng’eigye lyonalyona ery’omu igulu lyemereire ku luuyi lwe olw’omukono omusaadha ni ku lw’omugooda.” (v. 18).

Mika yenka n’eyali n’Ekibono kya Musengwa, n’Omwoyo omutuufu owa Katonda, y’ali n’ekyo ATYO BW’AKOBA MUSENGWA; abalanzi bale abandi baali n’omwoyo ogw’obuguya nga guli mu nsambo ey’eiddini. »Omuntu eyatumibwa okuva eri Katonda« bwayegeresa bale abande boonaboona kye bali kwogera aba nga Katonda akali kwogera kubitira mu ye. Kiri wonka bw’ayogera Okwolekebwa kwafunie, buliidho okutaisania n’amasomero gano ageegeresa eby’esikirano, aye nga buliidho kiisania era nga kigemagana n’obudhulizi obw’Ebyaghandiikibwa ebitukuvu, ekiri nti ni atyo bw’akoba Musengwa, okwo kwe tumanhira nti Musengwa Katonda ayogeire.

Ow’oluganda Branham yayogeranga ku byaghandiikibwa ebituufu ebisaanire ng’alaga Musengwa ky’amukobeire mu butuufu bw’akyo, ekyaleetera abaikiriza abandi okulowooza nti tiyeyongerayo, aye yasigala mu bigere eby’omulanzi ow’Omudagaano enkaire. Okulangirira kwe kwali, waire nga yageregeranianga mu n’Endagaano enkaire, mu butuufu irala kyali kyogera y’Ekikunsu ky’Abaikiriza mu Kurisito ekya Katonda mu luse luno. Katonda Ow’Endagaano enkaire Yeena ni Katonda ow’Endagaano empyaka. N’omulala nga bwe yali olw’aidho bw’ali olwaleero era bwaliba ebyanda n’ebyanda. Kisigala nga kituufu nti, “Ebyaghandiikibwa byonabyona byava mu buyinza bwa Katonda era byamuganulo mu kwegeresa …” (2 Timotheo 3:16).

Bwe tusoma mu Ndagaano empyaka, “Nga Ebyaghandiikibwa bwe bikoba …” oba “Nga bwe kyaghandiikibwa …” oba Ebyaghandiikibwa byonabyona bituukirire …”, n’ebindi, buli kiseera bino byogera ku Ndagaano enkaire. Endagaano empyaka yali yaakatoolereza okubaagho. Mu byasa ebibiri ebyasooka, Amawulire Amalungi n’embaluwa edh’aghandiikibwa y’Ebikunsu by’Abaikiriza mu Kurisito by’aligho. Paulo yakyogeraku mu mbaluwa ye eri Ekikunsu ky’Abaikiriza mu Kurisito eky’ Ekolosai, “Embaluwa eno bw’emala okubasomerwa, mubone nga esomerwa n’Ekikunsu ky’Abaikiriza mu Kurisito ekiri e laodikea.” (Ab’e Kolosai 4:16). 

Kyali ku nkomerero y’ekyasa kyokusatu ate mu kwinhama kw’ekyasa ekyokuna agho Eusebius ni Athanasius baasoloza embaluwa edho okudhikolamu ekitabo kye tweeta Endagaano empyaka, canon, ekitegeeza endagiriro, okufuga. Okukobera abantu ekibono, oba kwakolebwa ni Musengwa waife oba n’abatume, mu kusooka kwakolebwanga okuva mu Ndagaano enkaire “Olumaliirira yaabakoba ati: Bino n’ebibono byange bye nabakoberanga nga nkaali n’imwe, nti buli kintu kyonakyona ekyampandiikibwaku mu Mateeka ga Musa n’abalanzi ni mu Zabbuli kiri n’okutuukirizibwa. Agho yaigula emyoyo gaibwe okutegeera ebyaghandiikibwa…” (Luka 24:44-45). Musengwa waife yayogerera ghaigulu ati; “Kiisi andhikiriza ng’ebyaghandikibwa bwe bikoba…” (Yoanne 7:38). Ku Paulo Luka adhulira, “… era okuva enkyo okutuusa eigulo yaabainhonholanga era ng’abakobera eby’obwakyabazinga bwa Katonda. Yaafubanga okubaikirizisa Yesu nga adhuliza eby’omu Mateeka ga Musa n’ebyaghandiikibwa abalanzi.” (Ebikolwa by’abatume 28:23). Ebintu byonabyona ebigema ku ntegeka ey’obulokozi oba endhegeresa by’agaanibwa okuvira irala mu Matayo 1, mu Mawulire Amalungi, nga obumanhirivu bwa pentekote bukali kubaagho (Ebikolwa by’abatume 1), ku lunaku lwa pentekote (Ebikolwa by’abatume 2) era n’oluvanhuma, mu mbaluwa dhoonadhoona edh’abatume okutuukira irala ku mbaluwa ya Yuda. Omwo ebyaghandiikibwa eby’endebwa okuva mu Ndagaano enkaire by’agheebwa.

Endhegeresa edhitaisania na Kibono kya Katonda dha mu bi isaababi, oyo Paulo gwe yayogeraku mu 2 Ab’e Thessalonika 2. Katonda ebyanda n’ebyanda akuuma Ekibono Kye, Asiba ababe ku ekyo memale baghange okufuna emirala egy’eirala. Endhegeresa y’Endagaano dhituukaana inho ate nga byoleka kye biri, Ow’oluganda Branham bw’akozesa eby’okuboneraku, obumanhirivu obw’abo abaaligho Katonda be yakozesa mu Ndagaano enkaire, nti omusaadha abe nga atuukiriire mu bikolwa byonabyona ebirungi.

Endhegeresa eba y’amu Baibuli nga, byombi Endagaano enkaire n’Empyaka bwe byogerwaku, era nga biisania. Ku lw’esonga eno, amaddini ag’ekiKurisitaayo maakyamu inho kuba gaaleka omusingi ogw’endagaano enkaire. Mu kulangirira kwe ku Bufumbo n’Okwawukana, omusaadha wa Katonda atwewuunhisa n’okugeregerania okuboneka, okwo ab’omunda baidhi nti tiyandisoboire kubikozesa ku lulwe yenka. Mu buwombeefu bwe yakoba, “Kuba kino kibuuzo kya Baibuli, wateekwa okubaagho okwiribwamu okwa Baibuli.” Okwiramu okwa Baibuli okw’omu byaghandiikibwa ti kutuukaana na ndowooza y’abantu ab’ennaku dhino. Omwoyo ogw’omulembe guno gulikufuga buli ghantu ghansi w’ebendera ey’omwenkanokano ogw’abakazi. Okununulibwa okw’abakazi mu bwidhuvu “kuli munda” ate dhagaine oyo aleeta edhegeresa ey’Omubyaghandiikibwa eyaghaaku.