Emyaka Nkaaga Omu Buhereza Bwa MUKAMA

Ninyenda kwohereza endamutsyo kuruga aha mutima ahari imwe ab`eishe-emwe n`ab`eishe-emwe-kazi omu iziina rya MUKAMA waitu Yesu Kristo. Ndi kwanjura, ninyenda kukozesa ebigambo by`entumwa Paulo, owabiire atungire okutumwa kandi akeetwa omu buhereza, nk`oku kiri kushangwa omuri 1 Tim 1:12”

“Ninsiima Kristo Yesu MUKAMA waitu owampaire amaani, ahabw`okuba akanteekateekaho kuba omwesigwa, yampa omurimo gw`okumuheereza…”

Nk`oku muri kumanya, nkahayo amagara gangye owa MUKAMA ira omuri 1949 aha ruteerane rw`aba pentekooti omuri Hamburg. Omu kaire kamwe, nkaija kumanya obuhereza bw`omutaano  obw`ow`eishe-emwe Branham. Omuri 1955 nkatuunga omugisha gw`okwejumbira omu nteerane ze omuri Karlsruhe, Bugirimaani, aho naija kumumanya omu buntu omu kiganiiro kyaitu ky`okubanza.

Bwanyima y`emyaka 60 y`enyini, hati ndimu ningamba ogundi murundi aha ky`okutangaaza ekyabeireho aha rw`okubanza, okw`akana 2, 1962. Ningamba amazima omu maisho ga Ruhanga. Kikabaho butakashesire: kuruga aha mukono gwa buryo ogw`edirisa, MUKAMA Akagamba ebi bigambo” “Omuhereza wangye, akaire kawe ak`eki kari haihi kuhika. Ninyija kukwohereza omu mareembo agandi kuburiira Ekigambo kyangye.” Nk`emereza emikono yangye nagira nti, “MUKAMA, tibari kwiija kumpurikiriza…” MUKAMA Yagarukamu ati, “Omuhereza wangye, obunaku nibwiija kuhika obu bari kuhirikiriza. Biika ebyokurya, ahabw`okuba enjara mpaango eriyo naija. Obwo noija kwemerera aha gati y`abantu otyo ogabure eby`okurya…”

Omu kwa ikumin`ebiri 1962, nkatayaayira ow`eishe-emwe Branham omuri Jeffersonville. Omu kurabira omukworekwa okw`obwaruhanga, akaguma nagarukamu Ekigambo aha kiindi omu rujuungu eki MUKAMA yabaire andagiire kukora omu kwana ebiro 2 omu Bugirimaani. Ab`eishe-emwe baibiri Fred Sothman hamwe na Banks Wood nabo bakaba bariho kandi nibakijuriira. Atyo yanshoboreera, “Ebyokurya eby`okuza kubiika tibiri byokurya by`obutoosha, nk`oku obiire noteekateka, kwonka Ekigambo ekiraganisiibwe ahabw`obwiire obu, ekiri omu matebezo agakwatsirwe aha ntaambi. Kwonka b`otegyeriize kugabura ebyokurya okuhitsya obu oratuungye ebindi ebiri kweyongyeraho ahari byo.

Tweena nitumanya ngu ow`eishe-emwe Branham, nabi owaraganisiibwe (Malaki 4:5), akagambirwa omu kwamukaaga 11, 1933, “Nk`oku Yohaana Omubatiza yatumirwe kutebekanisa okwiija kwa Kristo okw`okubaanza, niwe nikwo watumwa n`obutumwa oburi kwiija kutebekanisa okwiija kwa Kristo okwa kabiri.” We wenyini akaguma nagurakamu nahamisiriza, “Tariinye, kureka obutumwa nibwiija kutebekanisa okwiija kwa Kristo okwa kabiri.” Ruhanga Akamukozesa kushuuruura enaama zoona hamwe n`okubiika ebyokurya by`Omwoyo. Omu kwa mukaaga 11, 1958, omuri Dallas, Texas, aha muheru gw`ekiganiiro kyaitu, akangira ati, “ow`eishe-emwe Frank, noija kugaruka Bugirimaani n`obutumwa obu.” Okwiha obwo n`okugumizamu, amatebezo ge gakaguma nigatwoherezebwa aha ntaambi kandi natandika kuzivunuura.

Omu mazima nk`oku MUKAMA yampare okutumwa, buzimazima nkikozire omu bwijwiire. Okwiiha aha kufa kw`ow`eishe-emwe Branham, ndangiriire Ekigambo kya Ruhanga omu nsi yoona. Omu ngyendo zangye z`okubuunzya engiri, nkaba nimburiira amatebezo abiri nari ashatu ekihango omu rurembo rumwe ntyo ngumizamu omu ruundi. Amaknisa g`aha byaaro gatyo gakaba gatandikwaho ab`eishe-emwe ababiire batuurayo.

Okwa kana 2, 1962, rikaba riri izooba eri MUKAMA Yamperireho okutumwa atyo yaanta omu buhereza Bwe. Omu rugyendo rw`emyaka 60, agumire naampa ebiragiro omu iraka oburi kukwaata aha buhereza bwangye. Ninyenda kukigamba gye ngu tikirambiireho omu kirooto, kwonka obutoosha ndikureeba. Nimbasa kugamba izooba, omwanya, hamwe n`eshaaha aha buri murundi. N`ahabw`ekyo, omu kwa mwenda 19, 1976, omuri Edmonton, akasheeshe ka Saande, MUKAMA Akagaamba ebigambo ebi omu iraka ry`okuragiira: “Omuhereza wangye, nakweemeka okurugiriira omuri Matayo 24:45-47 okugabura ebyokurya omu bunaku obuhikire.” Weena ori kushoma eky`ahandikirwe eki naija kushanga ogwo omushoroorongo ogwa 47 guri kugira guti, “…Ayamukwatsa(MUKAMA) ebi atungire byona.” Omu bwiire bwaitu, enaama yoona eya Ruhanga etushuruurirwe nk`oku etakashuuruurwaho ga. Nka Paulo, naanye nimbasa kujurira, “ahakuba tindatiinire kubagambira naama yoona eya Ruhanga.” (Ebyakozirwe 20:27). Omu mazima, buri mutwe gwa Bibuli ngukwatsireho omu matebezi gangye, ebitabo byangye hamwe n`amabaruha agari kwetoroora.  

Omuri Mat. 24 MUKAMA waitu taragwiire aha kucwekyerezibwa kwa hekalu, okutataana kw`aba Israeli, n`enfumu y`omutiini, hamwe n`okugaruka kwabo omu nsi yaabo (Orunyiriri rwa 32); Akagaruka yaragura aha kirikwiija kubaho omu bunaku bw`aha muheru, nk`entaro, enjara, ebiboonaboneso, emisisa, n`ebigwerereezi ebindi. Eki nikitwariramu omushororoongo gwa 14: “Kandi engiri egi ey`obukama eryagambwa omu nsi zoona okuba eky`okuhamya aha mahanga goona; obwo nibwo emperu erihika…” hamwe n`ekyahandikirwe omu mishororoongo 45 kuhika 47, okugamba, nk`okurangiriira kw`Ekigambo hamwe n`okugabura ebyokurya by`Omwoyo.

Omu mazima tukiri omubiro bya Bibuli, ebi MUKAMA wenyini yatumiiremu omuhereza we kandi nabi n`obutumwa kandi akamuragiira kuburira Ekigambo eky`ashurwiirwe kandi n`okugabura eby`okurya ebibiikirwe – emaanu esherekirwe. Obuhereza obu MUKAMA yampaire bwiniire kimwe akakwaate n`obuhereza bw`ow`eishe-emwe Branham, nk`oku obuhereza bwa Yoshua bwabiire bwine akakwaate n`obuhereza bwa Musa. Musa akebembera abantu kuruga omu buhuuku, nk`oku MUKAMA Yaraganiise Abrahamu omu Kutandika 15:13, kandi Yoshua yayebembera abantu okuza omu nsi eyaraganisiibwe. Turi abaana b`endagaano (Abagalatia 4:28) kandi nitwikiriza ekihandikirwe omuri 2 Abakorinso 1:20: “Ahakuba byona ebi Ruhanga yaaraganiise biba Eego omuriwe; kandi nikyo tugira omuriwe tuti, Amiina, ngu Ruhanga ahimbisibwe omuritwe.” Nitwikiriza kwona okuraganisa oku Ruhanga atuhaire omu Kigambo Kye kandi niwiija kureeba kandi tubitungye omu kuhikirira.

Kankigambe gye: tikiri aha row`eishe-emwe Branham kandi tari ow`eishe-emwe Frank, kureka kiri aha kuraganisa – Ekigambo ky`akaire aka. Wena ou Ruhanga arikutoorana ahabw`omurimo gwona namwetoraanira, namunoonga kwaaba kuri okutumwa okwiine akakwaate n`entebekanisa ya Ruhanga y`okujuna. Paulo tarashabire kweetwa; Ow`eishe-emwe Branham tarashabire kweetwa. Kwonka Ruhanga akakitebekanisa atyo kuruga omukutandika, kandi nikwo kyabaireho omu bwiire bwaitu. Eki MUKAMA waitu n`erizooba nikikikora: “Buzimazima nimbagambira nti: Oyakiira omuntu weena ou ntuma, biri niinye ayakiire; kandi onyakiira, biri ayakiire Ogwo owantumire.” (Yohaana 13:20). Abo boona abari kuhingura ebi Ruhanga Arikukora okurugiriira aha Kigambo Kye hona nabwe nibahingura Ruhanga batyo bombeka obugabe bwaabwo, nk`abandi boona omu nyikiriza.

Omuri 1962, MUKAMA yantuma, nkaba nyine emyaka nka 29, hati nyine nka 89 kandi nimbaasa kusiimimira emyaka miingi omu buhereza Bwe. Tinyine bujurizi buri kunkwataho, kureka ninjurira omu maisho ga Ruhanga Ynamuhanga aha kiine akakwaate n`okutumwa kandi n`eki MUKAMA Akozire omu mahanga ag`omunsi. Obutumwa obutahwaho obw`okujunwa hamwe n`enegyesa zoona eza Bibuli zirangiriirwe omu nsi yoona. MUKAMA Akagira, “… kandi muheru erya ija.” Itwe abari kwikiriza obutumwa obw`aha muheru nibabaasa kujurira ngu Ruhanga Atushuurwiire enaama zoona z`ekigambo, ez`entebekanisa y`okujuna kandi buri kimwe Kigarwiireho nk`oku kishmereire kuba kiri.

Ninkushaba ngu oshome eki ekyahandikirwe n`obwegyendesereza, hoona ekiine akakwate n`okutumwa kwangye: “… niyo kanisa; ei naagizirwe omuheereza waayo, nk`obukuru obu Ruhanga yampaire ahabwanyu oku buri, okumanyisiza kimwe eigambo kya Ruhanga, niyo naama eyaasherekirwe okwiha ira ryona n`obusingye bwona, kwonka hati emanyirwe abarikwera be. Nibo Ruhanga yaasiimire kumanyisa obutungi bw`ekitiinisa ky`enaama egi oku eri omu Banyamahanga; enaama egyo ni Kristo okuba omuriimwe, niwe matsiko g`ekitiinisa…” (Abakolosai 1:25-27).

Ruhanga Ayebembeire omu muriingo gw`okugira ngu okuraba omu ngyendo zangye z`okubunzya engiri omu myaka egi yoona, enkwatagana omu buntu eteirweho omu nsi yoona, kugira ngu hati, omu kuheereza aha mbeho nikubatsika omu ndimi zoona, abaikiriza boona ab`amazima nibabaasa kuhurira eki Omwoyo Aine kugambira amakanisa, Atyo abone kugarura Ekanisa Ye aha rugyendo rw`Ekigambo kye, nk`oku kyabiire kiri omu kutandika.

Omuri Mission Center omuri Krefeld, nikiija kuba kitakibasika kugiriiramu enterane omu muringo nigwo gumwe oku zabiire nizitebekanisibwa omu myaka 40 n`okureenga. Nanye ninza kuba ntakibaasa kukora engyend zangye z`obuheereza. Hati, ahu kirikubasika, abaikiriza boona mwerundaane omu kushaba kandi muhurikirize amatebezo, kandi hona ahu gari, nigiija kugira eki gaakora omu bi Ruhanga ariyo nakora omu kumaririza omurio gwe.

Nitusiima ahabwa MUKAMA ahabw`ab`eishe-emwe baitu abari kufayo ngu amatebezo aga gashohozibwa aha mbeho, kandi n`ahabwa ab`eishe-emwe abari kuvunuura omu ndimi eziindi, hamwe n`ahabwa ab`eishe-emwe abaheereza abari kugabura Ekigambo nikyo kimwe, eby`okurya eby`Omwoyo ebitiine katokoozi omu bantu boona. “Omuntu tatungwa by`okurya byonka, kureka n`Ekigambo kyona ekiruga omu kanwa ka Ruhanga.” (Mat.4:4). Omugisha ogw`okubanza ati guri ngu abo boona ab`ekanisa y`omugore beebembiirwe rukundo ya Ruhanga kurabira omu Mwoyo Arikweera omu kukwatanisa okw`obwa Ruhanga, kugira ngu buri muntu agire akakwaate na Ruhanga, atuungye okwetebekanisa kwe nka we hamwe n`okutunga okujunwa nk`omukutandika, atyo ategyereze okutwarwa (rapture) omu kwikirizana n`Ekigambo kyona ekya Ruhanga (Mat.4:4).

Ow`eishe-emwe Branham akozire ekicweka kye, nkozire ekicweka kyangye. MUKAMA wenyine naija kumaririira omurimo gwe ogw`okucubgura okurabira omu nkora eya maani ag`Omwoyo Arikwera omu kanisa y`omugore, kugira ngu ayetebekanise kubugana Kishweera (Mat. 25:10; Abatesalonika 4:15-18; 1 Abakorinso 15;51-58).

Nitureeba oku ebyahandikirwe ebya akaire aka biri kuhikiriira omu maisho gaitu, kandi nitubaasa kwimutsya emitwe yaitu, ahabw`okuba okucungurwa kw`emibiri yaitu kuri haihi.

“Omoyo n`Omugore nibagira bati: Ija! Orikuhurira agire ati: Ija!” (Okush. 22:17a). “Amiina. Eego, ija, MUKAMA Yesu.”

Ahabwogwo owatumirwe

Bro. Frank