ALIHIAMẸTỌ DE  
(A GUIDE)
1962-10-14

Na Oklunọ ni dona we, Nọvisunnu Nẹvil.

Yẹn sọ yín homẹhunnọ nado tin to agùn lọ mẹ to whèjai he. Kẹdẹdi didiọ de; bọ mì sọgan yín didiọnọ bo sọ yín alenọ na dona Owẹn afọnnu he lọ tọn. Podọ yẹn yín homẹhunnọ titegbe dọ E tin to ofi. Podọ yẹn lọsu sọ yín alenọ na Etọn wutu podọ nado hẹn Ẹn wá ofi; yẹn sọ yise dọ mì nọ yín ayajẹnọ nado dótó É. [Agùn lọ sọ dọmọ, “Niṣẹ”-Ed.] 

Dinvie, mì flin ehe dọ, ehelẹ wẹ núhe to devizọ́nwàtọ Klisti tọn lọ zédai. Bé mì mọdona? Yise wẹ jẹnukọn, enẹgodo yèdọ jijọdagbe. Podọ dinvie mì flin, dọ, Gbigbọ Wiwé ma sọgan ṣinyọn ota na ohọ̀ Jiwheyẹwhe tọn lọ adavo Gbigbọ Wiwé wàzọ́n gbọn onú helẹ dali. Sọlé hiẹ wà núdepope dó, bé mì mọdona dinvie? Onú helẹ wẹ núhe to Agbasa Klisti tọn dóai, mì mọdona! Dinvie, mì wọnji enẹ go blo, ehe lọ wẹ yín tintan, yèdọ enẹ he yín yise towe. Dogọ́ jijọdagbe po oyọ́nẹn po, po onú he pò lẹpo po, kaka apájlẹ pipé Klisti tọn lọ nido sọawúhia, whenẹnu wẹ Gbigbọ Wiwé na wá e ji bo tlẹ ẹ di Agbasa dopo. Onú helẹ pó dóna sọawúhia domọ. Enẹwutu wẹ Jesu dọ, dọmọ, “Gbọn sinsẹ́n yetọn dali wẹ mì na yọ́n yé te.” Sinsẹ́n, bé mì mọdona? Mì ma sọgan hẹ̀n sinsẹ́n matin hinhẹn onú helẹ pó tọn to mì mẹ. Podọ whenuena núhe lẹpo yí otẹn aihọn he tọn, podọ matin jijọ-di-Jiwheyẹwhe tọn, po onú mọtọnhunkọ lẹ po, whenẹnu wẹ mayise lẹpo na yín bibẹ́sẹ, podọ onú aihọn mẹ tọn lẹpo ko juwáyì, whenẹnu wẹ núdepope ma na tin ba adavo vọji yọ́yọ́ to Klisti mẹ. Whenẹnu wẹ Owé EFESUNU 4:30 tọn dọ, dọmọ, “Mì hẹn homẹgblena Gbigbọ Wiwé Jiwheyẹwhe tọn blo, mẹhe yè ko yí do dohia mì go jẹ ofligọ̀zángbè.” Yèdọ ohiadogona biọ Ahọludu Jiwheyẹwhe tọn mẹ! Dinvie, mì wọnji enẹ lọ go blo. Mì zé enẹ do ayiha mẹ dinvie, bo sọ basi ehelẹ jẹnukọn. Bé whenẹnu wẹ yè na dohia mì go gbọn Gbigbọ Wiwé dali, yèdọ Gbigbọ Wiwé he dohia mí go jẹ Agbasa lọ mẹ. Mọwẹ.  

Mí jlo nado hodẹ̀ na Nọviyọnnu Litu, sọn otò Ṣikago tọn mẹ, na asú etọn basi asidan gbọn moto dali bo tin to okúdònu. Podọ Nọviyọnnu mítọn he yè nọ ylọ Editi Laiti, mẹhe mí ko yọ́nẹn sọn azán dindẹn, tin to whègbè dinvie to awugble mẹ, bo jlo dọ ehe ni yín didọ hlan agùn lọ, na yé nido nọ̀pọ́ bo hodẹ̀ hlan ẹn dinvie. Podọ dinvie, mì gbọ mí dota mítọn lẹ do odò na mí ni hodẹ̀ na whenu pẹvi de.  

Otọ́ mítọn vivẹ Olọn mẹ tọn, mí pli lẹ́do (gbọn yise dali) Ofin Jiwheyẹwhe tọn, bo to lẹblanu Jiwheyẹwhe tọn biọ na okànbiọ helẹ, dọ, Nọviyọnnu Litu, mẹhe basi asidan gbọn moto dali, tin sẹpọ́ okú. Jiwheyẹwhe È, gọ́alọna ẹn. Na Gbigbọ Wiwé ni tin to adọzán etọn ji bo hẹn ẹn gọ̀wá na mí, Oklunọ É. Podọ Nọviyọnnu Editi Laiti pẹvi he tin to finẹ, yẹn hodẹ̀ hlan Jiwheyẹwhe dọ, Gbigbọ Wiwé ni tin to adọzán etọn ji tozán he mẹ bo sọ gọ̀ jijọho etọn wá whladopo dogọ́. Basi na mí Otọ́! Na Hiẹ ko dopagbè onú helẹ tọn, bọ mí sọ yise to yé mẹ. Podọ kẹdẹdilé mí to linlẹn dó to afọnnu he, dọ, jiyìyì ma yín núdepope hlan We, na Hiẹ tin di Mẹkiklo Daho de to aihọn lọ mẹ kẹdẹdilé e te to Olọn mẹ, na Hiẹ tin to mí de, podọ to ofi lẹpo, mọ Hiẹ sọ yín madopòdo. Podọ Otọ́ É, mí hodẹ̀ dọ Hiẹ ni ná gblọndo mítọn lẹ mí gbọn Oyín Jesu Klisti tọn mẹ. Niṣẹ! 

Mí yín homẹhunnọ talala nado tin to ofi whladopo dogọ́ to whèjai he. Yẹn sọ yọ́nẹn dọ yozò tin. Ehelẹ wẹ opli daho atọ̀n, bọ yẹn sọ yọ́nẹn dọ susu to mì mẹ jlo nado kùn moto gbọn aliho dindẹn ji sọn dinvie kaka jẹ afọnnu. Podọ sọn osọ he já, gbẹtọ susu to alọ dopolọ ji. Mọwẹ yẹn tindo kàndeji dọ, e yín whenu dagbe de hlan dopodopo mìtọn. E sọ yín asiko dagbe de hlan yẹn lọsu nado tin po mì po. Onú dopo gẽ wẹ mí ko biọ, na omẹ susu nasọ lẹ́gọ̀yì na ohọ̀ matin wutu, mí ma sọgan bẹ́ mí delẹ finyọ́n do ohọ̀ lẹ mẹ gba, na gohọ̀ miyọ́n tọn lọ ma sọgan hẹn enẹ gba. Dinvie, mí to tintẹnpọ́n nado tindo agùn he klo húmọ de, na whenuena mí wá tin to e mẹ, mí nido tindo ohọ̀ he mẹ gbẹtọ lẹ na sinai do.  

Podọ dinvie, kavi whedepopenu, mì tindo jlọjẹ nado wá tabẹnaki he mẹ, fie míwlẹ matindo zédai depope te adavo Klisti, fie osẹ́n de matin te adavo wanyinna, fie owé devo de matin te adavo Biblu. Podọ mẹplọ́ntọ mítọn Nọvisunnu Ọlman Nẹvil tin to ofi. Mí tindo togùn he gọ́na gbẹtọ susu 

he plidopọ́ di agùn susu sọn otò devodevo lẹ mẹ, yèdọ fie mì wá nado sẹ̀n Jiwheyẹwhe kẹdẹdi linlẹn ayiha mìwlọsu tọn lẹ tọn. To whelẹponu, mí nọ yín homẹhunnọ nado tin to mì de. Mọwẹ dọ mí nọ yín homẹhunnọ nado kẹalọyí mì. 

Podọ whedevonu, dẹnsọlé yẹn yọ́nẹn dó, nado tin hẹ mì, yèdọ godo he agùn lọ sọgbe. Podọ to enẹgodo, yẹn sọ jlo, dọ, to Owhèta Agùn lẹ tọn godo, mí sọ jlo nado yì Ohiadonu ṣinawe godo tọn lẹ ji, yèdọ Ohiadonu ṣinawe godo tọn lẹ to Owé Osọhia tọn mẹ, nado plọ́nnu do enẹ ji. 

Podọ dinvie, susu awutunọ lẹ tọn po mẹhe to tukla mẹ lẹ po wá, podọ to pipli helẹ mẹ, fie númimọ lẹ tin te, bo sọ sọawúhia na núkànbiọ mẹde titi tọn. Eyín yẹn wá biọ enẹ mẹ, bé whenẹnu yẹn ma sọ sọgan biọ vogbingbọn he tin to yé mẹ mẹ, podọ lala, e na sinyẹnawuna mi nado dọhó do enẹ ji. Podọ omẹ lẹpo yọ́nẹn dọ to opli azọ̀nhẹngbọ mítọn tọn lẹ mẹ, ehe mẹ Nọvisunnu Basa kavi mẹde ko dọyẹwhehó te, whenẹnu wẹ yẹn tọ́njẹgbonu bo hodẹ̀ na awutunọ lẹ, na enẹ yín huhlọn zinzán pẹvi de wutu. Podọ yẹn ko sọ hodẹ̀ hlan mẹdelẹ to ojlẹ pẹvi de mẹ wàyí, to enẹgodo ovi pẹvi de sọawúhia mi to ofi, mẹhe dọtẹ lẹ dọ, núde tin to godo etọn, yín jiji gbọn alọ de mẹ. To gbonujẹyì ṣie mẹ, yẹn mọ ẹn aisinsin to finẹ. Ovi lọ ma na tin to osẹ́kuku mẹ gbèdé, na e na jẹgangan. Nugbo, e na mọ azọ̀nhẹngbọ, mì mọdona! Yẹn mọdona enẹ. Mì mọ, yẹn tindo kàndeji nugbo de hlan enẹ. Enẹwutu, mí jlo nado tindo yise mítọn bo yise to Jiwheyẹwhe mẹ. 

Dopodopo mìtọn, podọ susu to mì mẹ yín ojonọ hlan dali ṣie, devizọ́nwàtọ lẹ po omẹ he pò lẹpo po. Eyín yẹn ma ṣihódọ, Nọvisunnu Kleisi tin to ofi. Bé e sọgbe domọ? Nọvisunnu Kleisi, yẹn dùahọ́ ovẹ̀vivẹ̀ tọn do we, na yẹn ma fọ́nṣite to ovizéwhlè nẹ whenu wutu. Yẹn sọgan tin to finẹ na opli opòdo osẹ̀ tọn, nado sọgbe. Bé e sọgbe domọ? Kaka jẹ otò Blumintin tọn mẹ. Nawẹ mì basi dó? E yọ́n. Yẹn lẹn dọ susu to nọvisunnu helẹ mẹ yín devizọ́nwàtọ. Bé hiẹ ma yín devizọ́nwàtọ? Mọwẹ. Oklunọ ni dona mì! Bé devizọ́nwàtọ nẹbi wẹ tin to gohọ̀ he mẹ? Mì gbọ mí ni mọ alọ mìtọn lẹ! E yọ́n, enẹ sọgbe. Mí yín homẹhunnọ nado tindo mì to ofi, yèdọ yínyín gigọfla to homẹhun mẹ. Na Jiwheyẹwhe ni dona mì janwệ! 

Dinvie, na mí nido yawu tọ́njẹgbonu, na mẹdelẹ to yé mẹhe jei otò Jọjia tọn mẹ lẹ mẹ, to otò Tẹnẹsi tọn mẹ, yèdọ to Niwu Yọki mẹ, to ofi lẹpo sọn whèjai he. Dinvie, mì kùn moto mìtọn lẹ po aipipa po to aliho mìtọn lẹ ji. Eyín mì to amlọngọsa bo ma jlo nado yì otẹli mẹ, mì tẹnpọ́n bo jlẹ moto mìtọn lẹ do núgo to apá dopo. Do ayi e go dọ, bèdé, gbèdé, ode mìtọn ni ma kùn moto to whenuena ewọ to amlọngọsa blo! Na onú ylankan de wẹ. Podọ, mì flin dọ, e ma yín mìwlẹ adavo dọ, mì ni pọ́n hlan kọmẹnu mìtọn lẹ. Bé mì mọdona? Na mì mọdona fie mì jei, ṣigba mì ma mọdona fie mẹhe to godo hlan mì jei gba, enẹwutu mì dóna dayi nọvisunnu mìtọn lẹ go. Enẹwutu, mì dóna tindo kàndeji dọ, mì to wunzẹn to whelẹponu, nado payi e go. 

Dinvie, yẹn jlo nado hia to whèjai he sọn Owé Mẹwiwé Johanu tọn tọn mẹ. Dinvie, Owéfọ pẹvi he mí hia bo sọ dlẹnalọdo, tin nado ná mí adọ̀ núhe mí to didọ tọn. Podọ to whelẹponu, whedepopenu he yẹn wleawú nado sọawúhia to agbà lọ ji, yẹn ma lẹnpọ́n whladopo lọsu nado dọhó de gba. Adavo dọ, yẹn ni nọte, bo nọ wunzẹn, bo plọ́nnú, bo sọ hodẹ̀ kaka jẹ whenuena yẹn mọ dọ, núde sọawúhia mi nado gọ́alọna gbẹtọ lẹ. Eyín yẹn ma sọgan gọ́alọna mẹde, bé whenẹnu e ma jẹ na mi nado ṣite to ofi gba, mì mọdona! Yẹn dóna tẹnpọ́n nado gọ́alọna omẹ! Podọ dinvie, to whèjai he, na susu to agùn mìtọn mẹ ko tọ́nyì sọn gblagbla mítọn mẹ to afọnnu he, bọ yé sọ gọ̀yì whègbè, yèdọ susu to yé mẹ. Ṣigba to whèjai he, yẹn dọ hlan mì dọ, eyín mì nọte to ofi mí na tẹnpọ́n nado dọhó ṣẹ́ju kande-atọ́n do núhe yẹn yọ́nẹn dọ, e sọgan gọ́alọna mí ji. Podọ mí na zé ehe lọ do Owé JOHANU 16:7-15 tọn ji, dọ: 

Gãnṣo nugbo wẹ yẹn dọ hlan mì; E tin jẹ na mi dọ yẹn ni yì: na eyín yẹn ma yì; Whẹ̀yídọtọ lọ ma na wá mìde gba: ṣigba eyín yẹn yì, yẹn na do e hlan mì. 

Podọ ewọ, whenuena e wá, e na gblewhẹ̀do aihọn to agọ̀jijẹ ylando tọn mẹ, dódó tọn, po owhẹ̀da tọn po:  

Ylando tọn, na yé ma yí mi sè wutu; 

Dódó tọn, na yẹn jei Otọ́ ṣie de wutu, bọ mì ma na mọ mi ba wutu; 

Owhẹ̀da tọn, na yẹn ko dáwhẹ̀na ahọvi aihọn he tọn wutu. 

Yẹn gbẹ́sọ tindo onú susu nado dọ hlan mì, ṣigba mìwlẹ ma sọgan hẹn yé to dinvie gba. 

Ṣigba whenuena ewọ, Gbigbọ nugbo tọn wá, ewọ na plán mì biọ nugbo lẹpo mẹ: na ewọ ma na dọhó sọn ede mẹ gba, ṣigba onú depope he e na sè, ehelẹ wẹ e na dọ: e nasọ lá onú he ja jijọgbè lẹpo hlan mì. 

Na, ewọ na pagigona mi; na e na dè sọn ṣie mẹ, bo na lá ẹ hlan mì. 

Onú he Otọ́ tindo lẹpo depope ṣie wẹ: enẹwutu wẹ yẹn dọ, ewọ na dè sọn ṣie mẹ bo na lá ẹ hlan mì. 

Dinvie, to Owé JOHANU 16:13 tọn mẹ, yè wlán ẹn dọ, “Ṣigba whenuena ewọ, Gbigbọ Nugbo tọn wá, Ewọ na plán mì biọ Nugbo lẹpo mẹ.” Etẹwẹ yè ylọ dọ Nugbo? Yèdọ Ohó lọ. “Na Ewọ na dọhó, Ewọ ma na dọhó sọn Ede titi mẹ gba; ṣigba núhe E sè wẹ E na dọ.” To ohógbè devo mẹ, Ewọ wẹ na yín Mẹhe na do onú lẹ hia dagbedagbe, bé mì mọdona? To Owé HEBLU 4:12 tọn mẹ, Biblu dọ, dọmọ, “Na Ohó Jiwheyẹwhe tọn tin to ogbẹ̀, é dohuhlọn, bo sọ dá hú ohi nùawenọ, é nọ sọ́ omẹ, yèdọ nado klán ayiha po gbigbọ po do võvo”. Bé mì mọdona? “Núhe E sè wẹ E na dọ, podọ Ewọ nasọ lá núhe ja jijọgbè lẹpo hlan mì.” Bé mì mọdona? Etẹwẹ to enẹ lọ na wà? Yèdọ Gbigbọ Wiwé Mẹhe na wá to Oyín Oklunọ Jesu tọn mẹ. 

Podọ to ṣẹ́ju pẹvi de mẹ, yẹn jlo nado dọ̀n linlẹn mìtọn wá ohógbè he yín “alihiamẹtọ” ji, yèdọ Alihiamẹtọ De. Mì mọdona dọ yẹn tindo dọ́pọ́n de dogbọn zùnkan tọn dali. Pinplántọ de, yèdọ mẹhe na doalihia mì. Mì tindo hudo alihiamẹtọ de tọn to whenuena mì ma mọdona ali ofi he mì jei tọn. Kẹdẹdi domọna po gbéyinyan po, podọ lilẹ́do aihọn pé, yẹn tindo jlọjẹ nado pé alihiamẹtọ lẹ. Podọ yẹn sọ yín pinplántọ dẽ titi tọn to otò Kololado tọn mẹ, na yẹn mọdona otò lọ wutu, bo to azọ́nwà pé, whenẹnu wẹ yẹn sọgan yín pinplán gbọn otò Kololado lọ tọn mẹ. 

Dinvie, mẹplántọ dóna yọ́n aliho lọ. Ewọ dóna mọdona fie é jei bo sọ yọ́n núhe é to wiwà, podọ lé ewọ na pénukun ogo we dó to aliho. Bé mì mọdona? Ewọ dóna yọ́nẹn dọ hiẹ ma dóna búali. Alihiamẹtọ yín mẹdèdòvo de. Otò lọ wẹ na dè omẹ lọ eyín ewọ yín pinplántọ nugbonugbo. Podọ dinvie, nado jẹ gbejizọnlin zùngbo mẹ tọn de ji, e sọgan yín fie hiẹ ma ko yì gbèdé, e ma yọ́n na hiẹ ṣokẹdẹ nado yì matin alihiamẹtọ de gba. Nugbonugbo, ofi delẹ tin he hiẹ ṣokẹdẹ ma sọgan yì matin pinplántọ de gba, na pọ́ndego de, yèdọ to otò Kanada tọn mẹ. Alihiamẹtọ lọ dóna zé ohia de do wéma towe ji. Alihiamẹtọ lọsu dóna zé ohia de do wéma ewlọsu titi tọn ji, podọ ewọ wẹ nasọ yín ogán towe. Eyín núde jọ̀ do ogo we to aliho, ewọ wẹ mẹhe na dógbè núhe jọ̀ lẹpo tọn. Ewọ dóna pénukun ogo we. Ewọ dóna dovivẹnu talala na hiẹ nikã búali. Ewọ dóna tindo kàndeji dọ, ewọ ma na do we hlan ali fie tọn hiẹ ma yọ́nẹn nado lẹ́gọ̀wá whégbè tọn ji gba. Podọ eyín hiẹ búali, ewọ dóna mọdona otò he mẹ ewọ na din we mọ te to whedepopenu. Ewọ dóna mọdona onú helẹ pó, yín e ma yín mọ, bé ewọ ma sọgan yín alihiamẹtọ de gba. 

Na onú helẹ tọn wutu, mí nọ tindo oylọ́ núvọjlado tọn to whedelẹnu, na otẹn pò dai de ma nado tin. Podọ to whenẹnu tẹnmẹ nọ jan sọmọ bọ yè ma sọgan zé we biọ moto mẹ, na enẹ tọn wutu, hiẹ dóna dóakọ́nna na asiko mẹplántọ aigbanù tọn. Ṣigba hiẹ ma sọgan wà mọ hẹ Alihiamẹtọ Jiwheyẹwhe tọn de gba, na Ewọ tin to awuwiwle mẹ to whelẹponu. 

Dinvie, eyín hiẹ ma wleawu onú nẹlẹ tọn, bọ hiẹ sọ jẹ gbejizọnlin ji biọ zùngbo mẹ, yèdọ fie hiẹ ma ko yì pọ́n, hiẹ na tin di mẹbúbú bo sọ yín mẹdindọ̀n. Ojlọjẹ dopo gẽ wẹ hiẹ tindo nado jẹgbonu wá sọn zùngbo mẹ, eyín zùngbo lọ ma dobu, bé whenẹnu hiẹ tindo jlọjẹ dopo gẽ nado tọ́njẹgbonu wá sọn finẹ. Ṣigba eyín zùngbo lọ dobu talala, bé whenẹnu hiẹ ma sọgan tọ́njẹgbonu wá gba. Lala, na aliho depope matin na hiẹ nido tọ́njẹgbonu wá gba, na hiẹ mọ dewe to aliho okú tọn ji wutu, to whenẹnu hiẹ yín mẹdindọ̀n. Dinvie, podọ hiẹ na dọ̀n eyín hiẹ matindo alihiamẹtọ he yọ́n otò lọ podọ lé ewọ na plán we jẹgbonu dó. 

Mì omẹ pó wẹ mọdona dogbọn ohójlawéma he mì hia to owhè he wáyì mẹ to otò Tuksọn tọn mẹ to Alizona mẹ, dogbọn Ponọ Yọpọvu nẹlẹ tọn dali. Yè plọ́n yé nado yọ́n lé yé na payi yédelẹ go dó, na yé yín ponọ yọpọvu lẹ wutu. Yé ma yín ponọ ahọlu tọn gba. Yé jẹ gbèjizọnlin ji biọ osó daho lẹ mẹ, ajiji wẹ ahún sú bọ ninọ̀mẹ lọ diọ. Podọ whenẹnu yé omẹ pó búali bo sọ dọ̀n, na yé ma yọ́n lé yé na tọ́njẹgbonu wá dó wutu. Mì mọdona? Yẹn ma sọ flin osọha yọpọsunnu he dọ̀n to osó lọ ji lẹ tọn gba, ṣogan yé tindo agàhún he yè do nọ fùnawhàn lẹ, bọ awhànfùntọ lẹ sọ sọawúhia, po onú mọtọnhunkọ lẹ po. Ṣigba yé búali bọ mẹdepope ma yọ́n fie yé te. Podọ yé ma sọgan payi yédelẹ go gba. Yé omẹ pó dọ̀n to kẹ̀nsu mẹ na yé ma mọdona yín e yín whèzẹtẹn yé jei kavi age, kavi whèyìhọ kavi ohù gba, yín e yín aga kavi odò, kavi nawẹ e te, onú lẹpo di onú dopolọ. 

Dinvie, alihiamẹtọ nọ mọdona fie ewọ tin te, to mahò asiko lọ pọ́n gba. Na ewọ mọdona núhe sọgbe nado wà. Mọwẹ ewọ sọ mọdona núhe é to wiwà. Ewọ mọdona onú lẹpo. E yọ́n nukunmẹ onú lẹpo tọn. Enẹwutu wẹ é sọgan nọ zinvlu mẹ bo nasọ mọdona núhe to jijọ̀. 

Na pọ́ndego de, mí mọ ohia mẹpinplán tọn de to ofi. Mì mọdona dọ, eyín mì sọgan mọ sùnwhlẹvu lẹ, mẹdepope sọgan dọ aliho he hiẹ jei eyín mì dóai sùnwhlẹvu lẹ go. Podọ mì nọ jlo nado pọ́n hlan sùnwhlẹvu nugbo de to whelẹponu. Sùnwhlẹvu nugbo dopo gẽ wẹ tin, yèdọ Sùnwhlẹvu Agewàji tọn. Mì mọdona? Yèdọ dopo gẽ he nọ̀nọ tẹndodopolọ mẹ. Enẹ nọte na Klisti, Mẹdopolọ he tin to osọ, egbé mọwẹ podọ kakadoi. Mẹhe pò lẹ sọgan to dindanpé, ṣigba Ewọ gbẹ́sọ to dopolọ yín. Agùn lẹ sọgan dè we tọ́njẹgbonu gbọn ali he ji, kavi mẹdelẹ gbọn ali devo ji; ṣigba e ma yín Ewọ gba, na dopolọ wẹ Ewọ to whelẹponu wutu. 

Podọ dinvie, eyín mì ma sọgan mọ Sùnwhlẹvu Agewàji tọn he, bọ sùnwhlẹvu depope ma ko sọawúhia, eyín mì ma dayi e go, dọ e di oklé whenu wẹ mì na búali bo sọ dọ̀n. Na pọ́ndego devo, mí sọgan mọ atin lẹ, podọ yè nọ dó atin agewàji tọn lẹ do aigba he fá ji, na atin he tin to hùwàji dali lẹ nọ mọ huhlọn owhè tọn hú atin agewàji tọn lẹ. Ṣigba eyín e wá jọ̀ bọ zinvlu do, bé mì ma sọgan mọ atin he tin to aigba fifá ji lẹ? Eyín mì sọgan miyọn nukun mìtọn lẹ bo zé alọ mìtọn lẹ dólé kaka alọvi mìtọn ode do yín piplá do awetọ go, whenẹnu wẹ mì na ṣẹ̀ lilẹ́do atin nệ ji afọ de bọdo awetọ go. Podọ whenuena mì jẹ otẹn fie tọn mẹ apà atin lọ tọn sinyẹn te, bo sọ gbà, enẹ wẹ hùwàji (yèdọ fie jẹhọn to yìnyìn te), whenẹnu wẹ mì sọgan dọhó ali fie tọn mì jei, yèdọ yín e yín age kavi ohù. Podọ to alọ mọtọnhunkọ mẹ, onú susu tin to finẹ, ṣigba mì tindo húdo alihiamẹtọ lẹ tọn nado yọ́n lé mì na basi onú nẹlẹ dó. Kẹdẹdilé gbẹtọ pã de sọgan fọ́nṣite to finẹ bo dọmọ, “Yẹn ma mọ vogbingbọn de to enẹ mẹ.” Bé mì mọdona? Mì tindo húdo nado yín mẹpinplọ́n gbọn alihiamẹ nệ lọ dali. 

Podọ yọpọsunnu nẹlẹ yín ponọ dẹpẹ lẹ matin mayise, yé sọgan mọdona lé yè nọ sìn okàn lẹ dopọ́ dó, kavi yọ́n lé yè nọ yí osé awe dopọ́ nado tá miyọ́n, po onú mọtọnhunkọ lẹpo po dó. Ṣigba nado yọ́n ali he mì na gbọn jẹgbonuyì, enẹ wẹ linlẹn he sọgbe lọ! Yé ma yọ́n ali gbonujẹyì yetọn tọn gba, enẹwutu wẹ yé omẹ pó do dọ̀n, na yé ma hẹn alihiamẹtọ de po yé po gba. 

To owhè awe he wáyì lẹ mẹ, to otò Kololado tọn mẹ, dawe he matindo linlẹn mọtọnhunkọ de, ṣẹ̀ osó ji aga yì ji, ewọ tindo visunnu owhè ṣinawe mẹ tọn de. Ewọ jlo nado hẹn ovi lọ na wẹnyinyan etọn tintan. Enẹwutu, yé hẹji yì osó lọ ji aga, bọ ovivu lọ dọ hlan otọ́ etọn dọmọ, “Otọ́ ṣie, agbọ to pipé mi.” 

Otọ́ etọn sọ gblọn dọ hlan ẹn dọmọ, “Hẹ nẹgbe ṣie, na mí ma ko hẹji yì vọ gba, podọ gbékanlin he mí to na wlé lẹ tin to aga.” Dawe nẹ lọ to jiyì bo jiyì, bo to jiyì bo ma sọ yọ́nẹn gba, na tòdaho mẹ nù de wẹ ewọ wutu. Na ewọ ma mọdona lé yè nọ yanwẹn dó kavi lé yè nọ hẹji dó gba. Enẹwutu, mẹdepope he mọdona zùnkanmẹ yọ́nẹn dọ gbékanlin lẹ ma nọ̀nọ osó ji aga gba. Yé ma nọ hẹjiyì aga gba. Ṣigba ogbọ́ lẹ wẹ nọ̀nọ aga finẹ bo ma yín gbékanlin he yè to mọyanna lẹ gba. Na gbékanlin nẹlẹ tọn, yé tin to odò fie yé sọgan mọ núdùdù te. Mọwẹ, ṣigba dawe he lẹn dọ, “ Eyín yẹn tẹnpọ́n bo hẹji biọ osé lẹ mẹ finẹ, yẹn na mọ gbékanlin daho de.” Ewọ ko mọ fọto gbékanlin he nọte to osó ji delẹ tọn, dọ ewọ sọ lẹn dọ finẹ wẹ é na mọ yé te. Enẹwutu, mì ma dayi ohó he hójlawéma yetọn lẹ to  

didọ go blo, ojé… lala, yín e ma yín mọ mì na kúdlọ! Onú dopo gẽ wẹ mì ni wà, dọ mì ni kẹalọyí alihamẹtọ de to fie mì tin te. 

Podọ dawe nẹ lọ sọ wá jẹ fide, bọ jikun sọ ṣẹ̀ jija. Bọ ewọ gbẹ́sọ to gbéyan kaka zinvlu do, mọwẹ é ma sọ yọ́n ali ba. Whenẹnu wẹ jẹhọn wá ota osó lẹ lọ tọn, ewọ sọ ṣẹ̀ wezundo. 

Mì dóna yọ́n lé mì na họngán dó, eyín jikun gbò mì kavi ozán kúdo mì. Onú devo de sọ tin, enẹ wẹ nado yọ́n lé mì na họngán dó! Yẹn ko hẹ́ atin lẹ ji aga bo ko sọ sán yé liai nado hlá ogbẹ̀ dai. Yẹn ko zé atín sánpo he yì awàgba ẹnẹ hunkọ tọn do abọ́ ṣie ji sọn otẹn de mẹ jẹ devo mẹ. Podọ yẹn sọ to mọ wà kaka huvẹ ṣẹ̀ hùhù mi ji, sọmọ bọ yẹn ma sọ sọgan wà núdepope ba! Podọ yẹn zé atin sanpò hóhó nẹlẹ do abọ́ ṣie ji, bo flọ́ miyọn do glọ́ yetọn bo sọ dike na yé ni hunzò. Podọ to ogàn dopo dojẹ ogan awetọ afọnnu tọn godo, yẹn sọ gọ̀ atin he pò lẹ do godo, bo bẹ́ yé do fie hunzò lọ nado hlá ogbẹ̀. Mì dóna mọdona lé yè nọ basi onú nẹlẹ dó. 

Dawe nẹ lọ ma mọdona núhe é to wiwà, na ewọ matindo mẹdepope nado plán ẹn. Podọ ewọ sọ zé ovisunnu etọn pẹvi do akọ́n etọn nù kaka ovi lọ do jai bo kú. Ewọ ma lẹn gba! Eyín ewọ ko hẹn alihiamẹtọ de wẹ, alihiamẹtọ lọ na ko hẹn ẹn gọ̀ sọn osó lọ ji aga to maho ojlẹ lọ pọ́n, bé mì mọdona? Ṣigba hlan ewọ, é nọte kaka zinvlu do bọ ewọ ma sọ sọgan mọ nukunnu ba. 

Enẹ wẹ tukla he pannukọn Yisenọ lẹ to egbé. Yé nọ dọngban kaka zinvlu do ṣinyọn yé, whenẹnu wẹ mì na mọ dọ yè ko jo mì do matin Pinplántọ. Alihiamẹtọ lọ! 

Etẹ, bé mì mọ mẹhe ko búali de pọ́n? Bé mẹde ko basi dọpọ́n nado hẹn mẹhe búali de gọ̀? Enẹ wẹ awublanu titegbe de he mì ma ko mọ pọ́n. Whenuena gbẹtọ de búali, ewọ nọ tin taidi fifiẹtọ de. Ewọ ma sọgan mọdona núhe é to wiwà gba. Mí mọ dawe de to zùngbomẹ to finẹ, he ko búali to atin lẹ ṣẹnṣẹn, podọ ewọ sọ lẹn dọ… Ewọ tindo aigba daho de, ṣigba ewọ tin to aigba jẹagọ̀ de ji fie é búali te, bo to lilẹ́pé. Podọ whenuena yè mọ ẹn to azán atọ̀n godo, ewọ to wezunhọn taidi gbẹtọ alẹnọ de, bo to awhádo ogbè lélé. Nùflo etọn lẹpo yín sinsán sẹ, podọ é sọ zé awhànfunnu etọn dlangbe, é ma sọ yọ́n núhe é na wà ba. Podọ whenuena nọvisunnu etọn mọ ẹn… Yé dóna wlé é bo sọ blá ẹ. Whenuena nọvisunnu etọn wá é de, é hoavun po é po taidi kanlin, é tẹnpọ́n nado hẹnadú i na ewọ ma yọ́n fie é te wutu. Etẹwutu wẹ e do yín mọ? Na é búali wutu. Podọ whenuena gbẹtọ de búali, ewọ nọ tin to ninọ̀mẹ wuwlu tọn de mẹ. Podọ ewọ ma sọ sọgan yọ́nẹn dọ é tin to ninọ̀mẹ mọtọnhunkọ de mẹ gba, na alibúbú etọn hẹn tukla he wá é ji bọ ewọ ma sọ yọ́n fie é te podọ núhe é to wiwà gba. 

Mọkẹdẹ wẹ hlan gbẹtọ de to whenuena é búali sọn Jiwheyẹwhe de! Ewọ na wà núhe é ma jlo nado wà lẹ. Ewọ na wà núhe yìji húgan linlẹn gbẹtọyínyín tọn. Podọ mẹhe búali sọn Jiwheyẹwhe de, kavi agùn he búali sọn Jiwheyẹwhe de, yèdọ agùn he ko tọ́nsọn nukọn Jiwheyẹwhe tọn, ehe tọ́nsọn aṣẹpipa Biblu Jiwheyẹwhe tọn tọn mẹ, na wà onú delẹ he mì ma dó nukun dọ mì na mọ to agùn Jiwheyẹwhe tọn mẹ to ojlẹ delẹ mẹ. Yé nọ yín adọkunnọ gbọn aihún alọslonamẹ tọn lẹ dali, podọ gbọn lotoli hiho dali, podọ núdepope he yé sọgan wà nado yín adọkunnọ. Mọwẹ yé sọgan plọ́n núdepope omẹ dó, bo sọ nọ dọ, mì gbọ mí ni tindo onú depope, bo nọ tindo mẹhe yín huhlọnnọ nado zán akuẹ to agùn mẹ, po onú mọtọnhunkọ lẹ po, bo nọ jó yé do nado juwáyì po onú nẹlẹ po. Nugbo wẹ. Yé nọ zé diakọni he ko wléalọ whladonu ẹnẹ kavi atọ́n do ohọ̀n ji, na yé nido luntọ́n gbọn enẹ dali, podọ nado dó pòdo na opli lọ. Podọ opòdo dopo gẽ wẹ mì dóna mọ, enẹ wẹ gbèmimá mìtọn hlan Jiwheyẹwhe. Dinvie, mì fọ́nṣite bo dọ Nugbo lọ! Mẹhe búali de tin to ninọ̀mẹ wuwlu tọn de mẹ, yèdọ alẹnọ de wẹ ewọ. 

Alihiamẹtọ tindo wuntuntun, bo sọ mọdona lé é na zinzọnlin dó podọ lé é na wà dó. To ojlẹ lẹpo mẹ, Jiwheyẹwhe nọ do plántọ de hlan omẹ Etọn lẹ. Jiwheyẹwhe ma gbọvọ́ gbèdé. É do Alihiamẹtọ de hlan, ṣigba mì dóna kẹalọyí alihiamẹtọ nẹ lọ. Bé mì mọdona? Mì dóna yí i sè. Mì dóna gbọn aliho he ji ewọ dọ mì ni gbọn. Eyín mì biọ zùngbo de mẹ, bọ alihiamẹtọ mìtọn dọ hlan mì dọ, “mì gbọ mí ni gbọn filé,” ṣogan bọ mì lẹn dọ mì na gbọn aliho devo, bé whenẹnu mì na búali. Jiwheyẹwhe do plántọ de hlan mí na ewọ nido plán mí, mí dóna hodo plántọ nẹ lọ. Yín e yín dọ mí tlẹ to núdepope lẹn, kavi mí mọ onú whẹjijọ tọn depope, kavi ehe yín mẹṣako tọn, yè ma ylọ mí nado dọ enẹ tọn gba, núhe mí na pọ́n hlan wẹ plántọ lọ kẹdẹ. 

To Alẹ̀nù Hóhó mẹ, Jiwheyẹwhe do yẹwhegán lẹ hlan. Yé yín alihiamẹtọ lẹ, na Ohó Oklunọ tọn nọ wá yẹwhegán lẹ de wutu. Alihiamẹtọ wẹ yé. Yé nọ plọ́n gbẹtọ lẹ kẹdẹdilé mí sè dó to osọ zánmẹ, dogbọn Isaia po Ozia tọn po dali. Yè plọ́n yé omẹ awelẹ bọ yéwlẹ sọ plọ́n gbẹtọ lẹ, bo sọ plán yé. Podọ dinvie, Jiwheyẹwhe nọ sẹ́ alihiamẹtọ Etọn lẹ do, na Ewọ ma nọ sọawúhia matin pinplántọ de to owhèta lẹpo po mẹ gba. To ojlẹ lẹpo mẹ, Jiwheyẹwhe tindo mẹhe nọte na Ẹn to aigba ji fi, yèdọ to owhèta lẹpo mẹ. 

Dinvie, to whedelẹnu, yé gbẹ́kọ pinplántọ lọ go, “to aliho he jẹagọ̀ de ji,” kẹdẹdilé mí nọ ylọ ẹ dó. Whenuena Jesu sọawúhia to aigba ji fi, bé mì ma flin dọ Jesu dọ hlan Falesi lẹ dọmọ, “Mì nukuntọnnọ alihiamẹtọ”? Yèdọ nukuntọnnọ alihiamẹtọ lẹ, mẹhe yín nukuntọnnọ hlan onú gbigbọ tọn lẹ. Bè mì mọdona? Dinvie, e jẹ dọ yéwlẹ ni yín alihiamẹtọ, yèdọ hlan gbẹtọ lẹ, nado plán gbẹtọ lẹ jẹ whlẹngan kọ̀n. Ṣigba Jesu dọ, dọmọ, “Mì nukuntọnnọ alihiamẹtọ!” Podọ É sọ dọmọ, “Mì jo yé do: alihiamẹtọ nukuntọnnọ wẹ yé, eyín nukuntọnnọ doalihia nukuntọnnọ, bé yé omẹ awelẹ ma na jai do odò mẹ wẹ?” Nukuntọnnọ alihiamẹtọ lẹ! Etẹ, nawẹ yè ko dọn aihọn biọ nukuntuntun mẹ dolé, yèdọ pinplán do nukuntuntun mẹ! Ewọ ma jlo dọ mì ni gánjẹ núyọ́nẹn mìtọn titi go gba. Jiwheyẹwhe ma jlo dọ mì ni gánjẹ núyọ́nẹn mìtọn kavi linlẹn mìtọn lẹ go, kavi linlẹn he gbẹtọ depope basi tọn go gba. 

Jiwheyẹwhe nọ do Alihiamẹtọ Etọn hlan, podọ Jiwheyẹwhe jlo dọ mì flin dọ enẹ wẹ Alihiamẹtọ he È dè lọ. Podọ mí dóna nọ flin Ewọ. To ofi, É dọ, dọmọ: “Yẹn ma na jó mì do gba, ṣigba Yẹn na hodẹ̀ hlan Otọ́, Ewọ nasọ ná mì Whẹ̀yídọtọ de.” Podọ Whẹ̀yídọtọ he lọ, whenuena Ewọ wá, Ewọ na plán mí biọ Nugbo lẹpo mẹ. Podọ Ohó Jiwheyẹwhe tọn wẹ Nugbo, podọ Ohó lọ sọ wẹ Klisti, “Yẹn wẹ Aliho lọ, Nugbo po Ogbẹ̀ po.” Ewọ wẹ Ohó lọ, yèdọ “To whẹ́whẹ́whenu wẹ Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwhe. Yè sọ lẹ́ Ohó lọ zùn agbasalan, É sọ nọ̀ mí ṣẹnṣẹn.” To whenẹnu eyín mí hodo Alihiamẹtọ nugbo lọ, yèdọ Gbigbọ Wiwé lọ, Ewọ wẹ na dọ núhe É mọ hlan mí, podọ núhe É sè, podọ É nasọ lá enẹ he ja jijọgbè lẹpo hlan mí. Niṣẹ. Bé whenẹnu mì tin to aliho lọ ji. Ewọ wẹ na do núhe já jijọgbè lẹ hia mì. 

Podọ eyín agùn lẹ gbẹ́kọ Enẹ lọ go to egbé, nawẹ mí sọgan tindo tódidó nado yì Olọnmẹ dó? Whenuena yè sẹ́ Gbigbọ Wiwé do mí di Alihiamẹtọ de, bé mí nasọ dè mẹde taidi yẹwhenọ de, kavi biṣopu de, kavi mẹhe dó agùn de, kavi mẹdepope nado plán mí to whenuena yè ko ná mí Gbigbọ Wiwé nado plán mí? 

Podọ Gbigbọ Wiwé nọ do Ohó lọ hia to whelẹponu. “Yẹn gbẹ́sọ tindo onú susu nadọ dọ hlan mì, ṣigba mìwlẹ ma sọgan hẹn yé to dinvie gba, ṣigba whenuena Ewọ, Gbigbọ nugbo tọn wá, Ewọ na plán mì biọ nugbo lẹpo mẹ.” Owhẹ̀jijọ nẹ tọn wutu wẹ hiadonu lẹ do sọawúhia. Podọ to opòdo Hiadonu Ṣinawetọ tọn, yè na dótana núdabla Jiwheyẹwhe tọn lọ, nado mọdona Mẹhe Jiwheyẹwhe yín po núhe É yín po, po lé É nọnọ̀ ogbẹ̀ dó po, po Ogbẹ̀zán Etọn po, podọ Jiwheyẹwheyínyín Etọn. Mì tindo jlọjẹ nado tin to ofi gbọn alọ lẹpo mẹ to ojlẹ nẹ mẹ, mì mọdona, na Jiwheyẹwhe nido hẹn mí wá apájlẹ pipé Etọn mẹ di visunnu po viyọnnu Etọn lẹpo, bo na lẹ̀ Agùn lọ wé gbọn Ohùn Jesu Klisti tọn mẹ. 

Dinvie, Alihiamẹtọ de, podọ Ewọ wẹ Alihiamẹtọ he Jiwheyẹwhe dè lọ. Dinvie, mí to zùngbo de mẹ gbọn lùntọ́n, bọ mí sọ to aliho mítọn ji jei fide, podọ mí ma sọ sọgan yì matin Alihiamẹtọ he. Podọ mẹdepope tin he sọgan wléawu alihiamẹtọ devo de tọn! Eyín mì wà mọ, Ewọ na sán mì sọn aliho. Na Alihiamẹtọ he lọ yọ́n aliho! É mọdona dopodopo aliho lẹ lọ tọn. Mọwẹ É sọ mọdona linlẹn he tin to ayiha mìtọn mẹ lẹ. É yọ́n mẹhe tin to ofi lẹpo. É yọ́n gbẹtọ na hunkọtọn mì yín bo sọ mọdona núhe mì ko wà lẹpo, podọ núhe kàn mì lẹpo. Ewọ wẹ Plántọ Jiwheyẹwhe tọn, yèdọ Gbigbọ Wiwé lọ, bo nasọ hùn onú lẹ dohia mì, bo nasọ dọ núhe É ko sè lẹ, bo sọ sọgan vọ́ ohó he mì ko dọ lẹ dọ. Niṣẹ. É na dọ núhe mì ko yín hlan mì, podọ núhe mì tindo, podọ fie mì jei. Enẹ wẹ Alihiamẹtọ de, yèdọ Pinplántọ nugbo de, podọ Ewọ lọ wẹ na plán mì biọ Nugbo lẹpo mẹ, podọ Ohó Etọn wẹ Nugbo. 

Dinvie, Gbigbọ Wiwé ma sọgan hẹn omẹ de nado dọ, “Niṣẹ” na zédai gbẹtọ tọn depope gba. Adavo nado ná kànndeji Ohó Jiwheyẹwhe tọn po “Niṣẹ” po, na mọwẹ. Gbigbọ ma sọgan plán we gbọn aliho devo de ji gba. Dinvie, onú jonọ lọ wẹ yín dọ, mí omẹ pó, po agùn daho titò mítọn lẹ tọn po, mí nọ dọ, dọmọ, dopodopo mítọn yín pinplán gbọn Gbigbọ Wiwé dali, podọ to finẹ, vogbingbọn susu tin to oklé po ozán po to mí omẹ pó mẹ. 

Ṣigba whenuena Paul, Falesi pẹvi nẹ mọ Gbigbọ Wiwé yí to whenuena Anania baptizi i, podọ é yì otò Alabia tọn mẹ bo nọ̀ finẹ họ̀ owhè atọ̀n, bo lẹ́gọ̀, bo ma sọ dindona núdepope to agùn lọ de na owhè wiẹnẹ, podọ whenuena é wá bo pé Pita, mẹhe yín ota to agùn Jelusalẹm tọn ji, yé mọ yédelẹ to Núplọ́nmẹ dopolọ mẹ. Etẹwutu? Yèdọ Gbigbọ Wiwé dopolọ! Whenuena Pita baptizi i to Oyín Jesu Klisti tọn mẹ, Paul lọsu wà onú dopolọ matin ohónámẹ gbẹtọ depope tọn gba. Fie Pita ná oplọ́n baptẹm Gbigbọ Wiwé tọn po klándowiwé tọn po, po onù he pò lẹpo po tọn te; Paul lọsu sọ wà mọdopolọ ga bo ma kàn núdepope biọ sọn agùn lọ de, na yé tindo Alihiamẹtọ dopolọ wutu. Bé whenẹnu nawẹ mí sọgan nọ̀ to egbé to ojlẹ he mẹ gbẹtọ lẹ to nugbo helẹ gbẹ́dai te? Whenuena Pita plọ́n agùn lọ aliho he ji e dóna nọ̀ to titò mẹ, Paul lọsu sọ tindo Núplọ́nmẹ dopolọ ga, na yé tindo Pinplántọ dopolọ wutu. 

Alihiamẹtọ lọ ma sọgan plán mẹde gbọn aliho de, podọ mẹdevo gbọn aliho devo de gba, kavi do mẹde hlan whèzẹtẹn dali podọ mẹdevo hlan whèyìhọ̀ dali gba. É na hẹn mì omẹ pó dopọ́. Podọ eyín mí jo míde hlan Gbigbọ Wiwé nado plán mí dopọ́, mí na yín dopo. Eyín mí ma dike Satani plán mí bo sọ dọ̀n mí gbọn aliho ylankan ji, mí na tindo ayiha dopo po linlẹn dopo po, po dopoyínyín po gbọn Gbigbọ dopolọ dali, yèdọ Gbigbọ Wiwé lọ he yín Alihiamẹtọ Jiwheyẹwhe tọn na plán mí gbọn Nugbo lẹpo mẹ. Mọwẹ. Ṣigba mì dóna hodo Alihiamẹtọ mìtọn. Mọwẹ. 

Mì pọ́n hlan Nikodẹmi, é tindo hùdo Alihiamẹtọ de tọn, ṣogan gbẹtọ zìnzìntọ de wẹ. Mẹplọ́ntọ de wẹ ewọ, yèdọ owhè kanwe mẹho. Ewọ yín dopo to Falesi lẹ kavi dopo to Ogán Yẹwhenọ lẹ tọn mẹ, yèdọ Hónamẹtọ, dopo to Piplimẹ Tòhódọtọ lẹ tọn mẹ. Ewọ yín dopo to omẹ gángán yetọn lẹ mẹ, yèdọ mẹplọ́ntọ de to Islaẹli mẹ, ogán de to núplọ́nmẹ lọ mẹ. Mì lẹnpọ́n, yèdọ ogán mẹplọ́ntọ de! Mọwẹ, é yọ́n osẹ́n lẹ, ṣigba whenuena e wà jẹ núyiwà vọ̀ji tọn ji, é dó hùdo Alihiamẹtọ tọn bọ huvẹ́ etọn sọ to hùhù i. É yọ́nẹn dọ núgbọnvo de dóna tin to finẹ. Ninọ̀mẹ etọn pannukọn Klisti do é hia to ozán nẹ mẹ. Ninọ̀mẹ é tọn nẹ lọ wẹ sọ do mẹhe pò lẹ tọn hia ga, ṣigba depope yetọn matindo adọ̀gbo he é tindo gba. Mẹdepope matin to yé mẹ he sọgan tọ́njẹgbonuwá kẹdẹdilé Nikodẹmi basi dó gba. Mì gbẹtọ lẹpo nọ dowhẹ̀ Nikodẹmi na é wá finẹ to ozánmẹ wutu. É jẹ finẹ. Yèdọ é wá. Yẹn yọ́nẹn dọ mẹdelẹ ma tlẹ sọgan wá to oklé kavi to ozánmẹ gba. Ṣigba é yì finẹ bo tindo hùdo Alihiamẹtọ de tọn, bo sọ dọmọ: “Mẹplọ́ntọ, míwlẹ,” sọn Ogán Yẹwhenọ lẹ tọn mẹ, “míwlẹ yọ́nẹn dọ, Mẹplọ́ntọ sọn Jiwheyẹwhe de wá wẹ hiẹ.” Etẹwutu wẹ é do yọ́nẹn? Na yè ko dè é wutu. Mì mọdona, é jlo nado mọdona núhe vọ̀ji yọ́yọ́ he lọ yín, bo yì Omẹ Dopo he jẹ lọ de, na Jiwheyẹwhe ko dè é dọ Ehe wẹ Alihiamẹtọ Etọn, yèdọ Jesu. Mì do ayi núhe é dọ go, dọ, “Mẹplọ́ntọ, míwlẹ yọ́nẹn dọ, Mẹplọ́ntọ sọn Jiwheyẹwhe de wá wẹ hiẹ: na mẹhe sọgan basi ohia he hiẹ to bibasi helẹ de matin, adavo Jiwheyẹwhe tin po é po.” 

E yín ṣiṣẹ̀ to finẹ dọ, Jiwheyẹwhe ogbẹ̀nọ lọ tin to Ewọ mẹ. Ehe É dọ, dọmọ: “Ohó he yẹn dọ hlan mì lẹ, yẹn ma dọ sọn dẽ de gba; ṣigba Otọ́ he nọnọ̀ yẹn mẹ wẹ wàzọ́n lẹ lọ. Nugbo, nugbo, wẹ yẹn dọ hlan mì, Ovi ma sọgan wà núde ededenu; adavo núhe É mọ Otọ́ wà: na núdepope he É wá, ehelẹ wẹ Ovi to wiwà mọ ga. Otọ́ ṣie wàzọ́n kaka jẹ dinvie, yẹn sọ wàzọ́n.” To Ohógbè devo mẹ, Jiwheyẹwhe do núhe É na wà hia Ẹ, É sọ basi yé. É ma wà núdepope kaka jẹ whenuena Jiwheyẹwhe dègbèna Ẹn nado wà. Niṣẹ. Enẹ wẹ nugbo titegbe he tin to e mẹ lọ. Eyín mí sọgan dedonukọn kavi nọte kaka jẹ whenuena Gbigbọ na hẹn mí nado basi núhe É dọ! Mọwẹ. Podọ kaka jẹ whenẹnu eyín mí ma jo mídelẹ hlan Klisti bọ Ewọ ma nado dán we pé kẹdẹdilé é wà hlan mi dó, ṣigba ota Etọn whinwhan pẹvi de kẹdẹ ko hẹn we nado sọgbe sọmọ bọ núdepope matin sọgan nado hẹn we dote gba, na hiẹ yọ́nẹn dọ enẹ wẹ ojlo Jiwheyẹwhe tọn. 

Ewọ tindo hùdo Alihiamẹtọ de tọn. Na Ewọ wẹ Alihiamẹtọ he yè dè lọ. É sọgan yín pinplán gbọn Alihiamẹtọ he lọ dali, na é yọ́nẹn dọ Alihiamẹ he lọ mọ gbọdemẹ yí sọn Jiwheyẹwhe de. É yọ́nẹn dọ otànhóhó he é ko litaina lẹ, yín e yín dọ gbọn Falesi lẹ, kavi Sadusi lẹ dali, podọ ehe húgan enẹlẹ, é ko sẹ̀n zédai nẹlẹ po yé po bo mọ dọ núdepope ma jọ. Ṣigba Dawe de wá sọawúhia gbaungba, to didọmọ, Ewọ lọ wẹ Messia he yè dopagbè Etọn to Biblu mẹ. Whenẹnu wẹ É lẹ́ bo wà azọ́n titegbe Jiwheyẹwhe tọn lẹ. Jesu dọmọ, “Eyín Yẹn ma wàzọ́n Otọ́ ṣie tọn lẹ, whenẹnu mì yí Mi sé blo. Ṣigba eyín mì ma sọgan yí Mi sè, mì yí azọ́n he Yẹn to wiwà lẹ sè, na yé to kunnudè na Mi.”  

Enẹwutu wẹ Nikodẹmi do dọ, dọmọ, “Labbi, míwlẹ yọ́nẹn dọ, Mẹplọ́ntọ sọn Jiwheyẹwhe de wá wẹ hiẹ: na mẹhe sọgan basi ohia he hiẹ to bibasi helẹ de matin, adavo Jiwheyẹwhe tin po É po.” Mì mọdona, sọlé é yín ogán onú lẹ tọn dó, é tindo hùdo Alihiamẹtọ de tọn. Ogán agùn etọn tọn wẹ ewọ. Gbẹtọ yẹyinọ de wẹ ewọ, bo tindo finọtẹn susu lẹ, bo sọ yín omẹ gángán de; matin mayise, mẹhe tin to otò lọ mẹ lẹpo nọ dibusi i. Ṣigba dogbọn ovọ̀ji tọn dali, é tindo hùdo Plántọ de tọn! Mọkẹwẹ hlan míwlẹ ga, mọwẹ, mí tindo hùdo Alihiamẹtọ de tọn. 

Kọnẹliọsi yín omẹ gángán de, yèdọ omẹ yẹyinọ de. Mẹhe dó agùn lẹ. É nọ dibusi Ju lẹ na é yọ́nẹn dọ sinsẹ̀n yetọn sọgbe. É nọ ná onú wamọnọ lẹ, bo sọ nọ hodẹ̀ egbésọ-egbésọ, ṣigba whenuena Gbigbọ Wiwé sọawúhia (Núde yín gigọ́na agùn lọ), é dó hùdo Alihiamẹtọ de tọn. Jiwhẹwhe do Gbigbọ Wiwé hlan ẹn. É do E hlan gbọn Pita mẹ, dọ, “Lé Pita to onú nẹlẹ dọ, Gbigbọ Wiwé jẹ do yé omẹ pó he to Ohó lọ sè ji.” Jiwheyẹwhe zán Alihiamẹtọ gbọn Pita mẹ. Gbigbọ Wiwé zán Pita, na Ewọ plán Kọnẹliọsi to aliho he jẹ ji. Podọ whenuena é ṣẹ̀ hódọ, Gbigbọ Wiwé jẹ do Kosi lẹ ji. Whenẹnu wẹ é dọ, dọmọ: “Omẹ depope sọgan gbẹ́ dọ yè ma na yí osìn do baptizi omẹ helẹ?” Mì mọ, Alihiamẹtọ lọ wẹ to hódọ to finẹ, e ma yín Pita gba. Na susu Kosi lẹ tọn yín, “mawé podọ dihonọ” hlan ẹn, bọ é ma tlẹ jlo nado yì gba. Ṣigba Alihiamẹtọ lọ dọ, dọmọ, “Yẹn do we hlan.” Whenuena mì jo mìde hlan Alihiamẹtọ lọ nado plán mì, mì na wà núhe mì ma lẹn dọ mì sọgan wà lẹ. Na e yọ́nwhanpẹ dólé nado yín pinplán gbọn Gbigbọ Wiwé dali! Na Ewọ wẹ Alihiamẹtọ lọ. Mọwẹ, E dọhó gbọn Pita mẹ bo dọ núhe E dóna wà lẹ hlan ẹn. Podọ whenuena yé omẹ pó mọ Gbigbọ Wiwé yí, é dọmọ, “Mí ma sọgan gbẹ̀ baptẹm osìn mẹ tọn, mì mọ dọ omẹ helẹ ko mọ Gbigbọ Wiwé yí kẹdẹdi míwlẹ to bibẹ́nu.” Yé sọ baptizi yé to Oyín OKLUNỌ JESU tọn mẹ. Dinvie, mẹnu wẹ do alihia ẹ nado wà mọ? Alihiamẹtọ he tin to ewọ mẹ lọ wẹ. Bé Jesu ma dọ hlan yé, dọ, “Mì lẹn núhe mì na dọ tọn pọ́n blo, na e ma yín mìwlẹ wẹ to ohó na dọ gba; adavo Otọ́ he nọnọ̀ mì mẹ wẹ to ohó helẹ dọ?” Niṣẹ. 

Ojọ Etiopiatọ lọ jẹte sọn Jelusalẹm wà. Mọwẹ Jiwheyẹwhe tindo Alihiamẹtọ de to aihọn mẹ to ojlẹ nẹ mẹ, yedọ Gbigbọ Wiwé lọ, podọ Ewọ tindo dawe de to gbonu finẹ he gọ́na Alihiamẹtọ nẹ. É ma tlẹ yín yẹwhehódọtọ de gba, yedọ diakọni de hunkọ wẹ ewọ. Mẹhe to azọ̀nhẹngbọ na azọ̀ntọ lẹ bo sọ to aovi lẹ yàn jẹgbonu, po vọfọ́n daho de po, mọwẹ ayajijẹ daho de tin to otò lọ mẹ. Gbẹtọ susu hú kanweko lẹdo é pé, ṣogan Alihiamẹtọ lọ dọmọ, “Enẹ lọ ko pé, gbọ mí ni lẹ́ gbọn ofi.” Mọwẹ é ma dọ̀nnú po É po gba. 

A gbẹ́ Ohó Alihiamẹtọ towe tọn blo. Hodo É. Yín e ma yín mọ, hiẹ na dọ̀n. Podọ flin dọ, whenuena hiẹ jo É do, azọ́n towe titi wà wẹ hiẹ te, enẹwutu mí jlo nado dọnsẹpọ́ Alihiamẹtọ lọ. 

Enẹwutu to aliho lọ ji, É dọmọ, “Filipi, jo awhànpa helẹ do dinvie bo tọ́njẹgbonuyì biọ zùngbo mẹ fie mẹdepope matin te. Ṣigba Yẹn do we hlan gbonu finẹ podọ hiẹ na mọ mẹde whenuena Yẹn hẹn we jẹ finẹ.” Do ayi e go dọ, ojọ doponọ he yín omẹ gángán ahọsi otò Etiopia tọn kẹdẹ tin to aliho. Podọ to aliho etọn ji jei, é to Owé Isaia tọn hia. Whenẹnu wẹ Alihiamẹtọ lọ dọ hlan Filipi dọmọ, “Yì bo kọ̀n dewe dopọ́ po kẹkẹ he po.” 

Filipi sọ dọ hlan ẹn, dọmọ: “Hiẹ tunwun onú he hiẹ to hihia?”

Ojọ lọ sọ dọmọ, “Nawẹ yẹn sọgan dó, adavo mẹde dèana mi?” Etẹ! Ṣigba Filipi tindo Alihiamẹtọ lọ. Niṣẹ. Podọ ewọ sọ ṣẹ̀ do Owé Wiwé dopolọ ji bo dọyẹwhehó Klisti tọn hlan ẹn. Niṣẹ. Yèdọ Pinplántọ de! É ma dọhó zédai lẹ tọn hlan ẹn gba, adavo Alihiamẹtọ lọ he yín Klisti! É sọ baptizi i to finẹ to osìn de mẹ. Mọwẹ e yín dó. Etẹ, nawẹ yẹn yinwanna ehe sọ!

Whenuena omẹ Isalẹli tọn lẹ tọ́nsọn Egipti nado yì aigba pagbè tọn lọ ji; to Owé EKSỌDUSI 13:21 tọn mẹ, Jiwheyẹwhe yọ́nẹn dọ yé ma ko tọ́nwhẹn gbọn aliho mọtọnhunkọ de ji pọ́n gba. Gbèjizọnlin awàgba kande gẽ tọn wẹ aliho lọ, ṣigba yé dó hùdo núde tọn nado yì po yé po. Na yé ko búali yetọn, enẹwutu wẹ Ewọ, yèdọ Jiwheyẹwhe do Alihiamẹtọ de hlan yé. Owé EKSỌDUSI 13:21 tọn yín dólé, dọ, “Oklunọ sọ to yìyì to nukọn na yé to okle to Dòtin Aslọ tọn de mẹ, nado do aliho hia yé; podọ to ozán mẹ to Dòtin Miyọn tọn de mẹ, nado ná hinhọ́n yé; na yé nido to yìyì…” nado plán yé jẹ aigba pagbè tọn nẹ lọ ji. Mọwẹ ovi Islaẹli tọn lẹ hodo Alihiamẹtọ lọ, he yín Dòtin Miyọn tọn to ozán mẹ, podọ Dòtin Aslọ tọn to okle. Whenuena E nọte, yéwlẹ nọ nọte ga. Podọ whenuena E dè do, yéwlẹ nọ dè do ga. Podọ whenuena É hẹn yé sẹpọ́ aigba lọ, bọ yé ma sọ jẹ nado hẹjiyì, É sọ hẹn yé lẹ́gọ̀ biọ zùngbo lọ mẹ. É ma sọ yì po yé po ba.

Mọwẹ e te po agùn egbé tọn po. Mayise matin ṣigba núhe akọ́ndonanú Jiwheyẹwhe tọn yín to egbé, kẹdẹdilé e te to azán Noe tọn lẹ mẹ, agùn na ko wá gbesisọ mẹ eyín yè ko gọ̀ onú lẹpo do otẹn yetọn lẹ mẹ. Ṣigba É dóna hẹn mí lẹ́do bo sọ lẹ́do.

To mayọ́nẹn Islsaẹli tọn mẹ, whenuena yé to awhádo bo mọ oṣiọ awhàngán Egipti tọn bo sọ mọ sisiọ do ohù mẹ osọ́ yetọn lẹ tọn, bọ osọ́ kẹkẹnọ Falo tọn lẹ yín tasọdona, whenẹnu wẹ yé mọ awhàngbigba yetọn yí, bọ Mọse tin to Gbigbọ mẹ bo sọ jihàn to Gbigbọ mẹ, mọ Miliami to wèdu to Gbigbọ mẹ, podọ viyọnnu Islaẹli tọn lẹ to wezùnhọn yì godo yì nukọn to ohù lọ godo, bo to awhádo bo sọ to wèdu, podọ azán pẹvi de wẹ pò na yé nido biọ otò pagbè tọn he yí owin po oyìnnọ po do to sisa mẹ. To mayọ́nẹn mẹ, owhè kande wẹ sọ pò to nukọnna yé, na yé ṣẹ̀ hunhlun do Jiwheyẹwhe po Alihiamẹtọ lọ po go ji.

Ninọ̀mẹ dopolọ mẹ wẹ mí to mí delẹ mọ te to egbé. Godo he yẹn tọ́nsọn fi, yẹn yì otò Ṣilẹvipọti tọn mẹ. Podọ to owhè kande-ao (50) he wáyì lẹ mẹ, Gbigbọ Wiwé jẹte to Azán he gbè yè to pẹdo hlan Jiwheyẹwhe te to otò Lusiana tọn mẹ. Nawẹ agùn lọ jai dó sọn asiko nẹ mẹ! Bé mì do ayi e go dọ, bibẹ́nu agùn Katoliki Lomunu tọn yín agùn gbigbọnọ? Nugbo wẹ. Mọwẹ. Na agùn gbigbọnọ de wẹ e yín dai, ṣigba ogán yẹyinọ lẹ biọ e mẹ bo diọ Owé Wiwé Jiwheyẹwhe tọn lẹ do otànhóhó yetọn lẹ mẹ, bo gọ́na zédai etọn lẹ, po núhe pò lẹpo po. Podọ mì pọ́n núhe yé to wiwà to dinvie, enẹlẹ depope matindo oyẹ Owé Wiwé tọn de gba. Yé diọ núde do otẹn devo tọn mẹ, yèdọ akla kinkan do Gbigbọ Wiwé tẹnmẹ. Podọ osìn kọ̀ndota do yinylọn do osìnmẹ tẹnmẹ. Yé diọ ohógbè he yín “Otọ́, Ovi po Gbigbọ Wiwé po” do “Oklunọ Jesu Klisti” tẹnmẹ. Yé diọ núyíwà daho Jiwheyẹwhe tọn he yín didoai hlan mí helẹ, bọ yé bo sọ dẹn do núplọ́nmẹ Owé Wiwé tọn.

Podọ to owhè kande-ao (50) he wáyì lẹ mẹ, Gbigbọ Wiwé jẹte to Otò Lusiana tọn mẹ, na eyín e nọte na owhè fọde (200), e na dẹ̀n dólé agùn Katoliki tọn te to egbé, eyín e gbẹ́sọ to tejẹ kẹdẹdi to owhè kande-ao (50) nẹlẹ mẹ, na yé to didè dogọ́ to asiko lẹpo mẹ to whelẹponu. Na yẹwhehodọtọ hóhó tọn lẹ ko yì wutu. To opli osla mẹ tọn lẹ mẹ, mẹdẹ ma sọ to yẹwhehódọtọ nẹlẹ tọn sè ba. Núhe mí tindo egbé lẹpo tọ́nsọn otò he yè ylọ to ogbè Glẹnsi tọn mẹ, dọ, “Holiwud” tọn mẹ, yọnnu lẹ to odà alọpãlopa lẹ basi bo to ṣokoto lẹ do, bo sọ to núsa do nukunmẹ yetọn lẹ, podọ onú devo lẹ ga, bo to yédelẹ ylọ dọ Yisenọ. Yé nọ to owè he yè ylọ dọ, “Ricky” du po gita lẹ po, bo to lilẹ́ to otẹn lọ mẹ, podọ yọnnu lẹ nọ do núfinfinyọn lẹ do taidi dọ yé to omẹ́, bo dè agbasa yetọn lẹ do gbonu, bo to yédelẹ sló to agbà wedudu tọn lọ ji, bo to yédelẹ ylọ dọ, Yisenọ.

Do ayi e go, hùdo núhe tọn mí tindo wẹ yẹwhehódọtọ hóhówhenu tọn lẹ, yèdọ mẹsẹ́do sọn Jiwheyẹwhe de lẹ, he na hẹn ohó núkọ́namẹ he na dè núyiwà aihọn tọn lẹ jẹgbonu sọn agùn mẹ. Enẹwutu, mí dóna gọ̀wá godo, yèdọ hlan Gbigbọ Wiwé po Miyọn he na fiọ núhe masọgbe lẹ sẹ̀, bo hẹn yẹwhehó hóhówhenu tọn wá, bo hẹn Olọn yì ji bo sọ hẹn lọnzòdo hunzò, podọ nado hẹn osó Ohó Jiwheyẹwhe tọn tọn diun. Mí dó hùdo yẹwhehó mọhunkọ lẹ tọn. Ṣigba, eyín hiẹ wà mọ to egbé, agùn towe na dèwe tọ́njẹgbonu.

To ojlẹ delẹ mẹ, agùnvi lẹ nọ plán yẹwhehótọ lẹ jẹagọ̀. Enẹwutu wẹ yẹn mado tindo agùn gbẹ́pipli de gba. Adavo sinsẹ̀nhọ̀ dopo gẽ he sọn Jiwheyẹwhe de. Fidepope he É do mi hlan wẹ yẹn nọ yì. Ohó depope he É dọ, enẹ wẹ yẹn nọ dọ ga. Mí ma jlo agùn gbẹ́pipli de gba. Eyín agùn he lọ dọhó agùn gbẹ́pipli de tọn, bé sọn whenẹnu mì hẹn mẹplọ́ntọ mìtọn bú. Yẹn ma sọ sọgan nọte to yéde na ṣẹ́ju atọ́n gba. Agùn depope he to ohó agùn gbẹ́pipli tọn dọ tin to okún yetọn mẹ, dinvie mì bo dọ hlan mi dogbọn agùn depope he to ohó gbẹ́pipli tọn dọ, eyín e ma ko biọ yé mẹ, mì bo sọ dọ hlan mi dogbọn agùn depope he ko biọ yé mẹ tọn dali, dọ e ko sọ fọ́n. Dinvie, yè do Gbigbọ Wiwé hlan nado plán agùn lọ, e ma yín gbẹ́pipli gbẹtọ lẹ tọn gba. Gbigbọ wẹ núyọ́nẹn lẹpo. Gbẹtọ lẹ nọ din yẹyi alọpãlọpa lẹ.

Jiwheyẹwhe dọ hlan yé dọ Ewọ na do Alihiamẹtọ de hlan yé, he na plán yé to aliho. Podọ dẹnsọlé yé jẹgodona Dòtin Miyọnnọ nẹ, yé omẹ pó tin to gbesisọ mẹ. É plán yé jẹ họ̀ngbo otò pagbè tọn lọ tọn ji, podọ to whenẹnu E nọ plán yé yì fidepope he É jlo. Whenẹnu Jọṣua, mẹhe yín awhànfuntọ daho nẹ, flin azán he gbè é dọ hlan yé dọ, “Mì klán mìde do wiwé, na to azán atọ̀ntọ gbè Jiwheyẹwhe na hùn aliho Jọdani tọn na mí nido dása jẹ godo dọn.” Dinvie, mì payi ohó he Jọṣua dọ hlan yé go (yẹn yinwanna ehe) to Owé Wiwé mẹ, é dọ hlan yé dọmọ: “Mì nọte godo sẹpọ́ Alki lọ, na mì ma ko gbọn ali he ji wáyì pọ́n wutu.”

Etẹ wẹ Alki nẹ lọ yín? Yèdọ Ohó lọ. Dinvie, mì ma dása yìjẹ aliho agùn gbẹ́pipli titò mìtọn lẹ tọn ji blo, mì nọte gũn to Ohó lọ godo, na mì ma ko gbọn aliho he ji wáyì pọ́n wutu. Podọ nọvisunnu lẹ, eyín ojlẹ de tin bọ agùn Yisenọ lẹ tọn nado dindona ede, bé dinvie wẹ. Na yè to opli daho de basi to otò Lomu tọn mẹ to dinvie, yè ko to titò alọpãlọpa lẹ basi, yèdọ núyiwà agùn lẹ tọn, whenuena agùn gbẹ́pipli titò helẹ tọn to núyiwà agùn lẹ tọn basi to kọ̀ndopọ́ mẹ nado basi ninọ̀mẹ kanlin lọ tọn, kẹdẹdilé Biblu dọ dó. Podọ mì mọdona ohó he mí dọ to afọnnu he to Owẹn lẹ lọ mẹ. Podọ mí tin to ofi bọ onú lẹpo tin to ohọ̀n ji sọmọ bọ gbẹtọ lẹpo jẹgodona zédai lẹ. Mì yawu nọte to Ohó lọ mẹ! Podọ Ohó lọ wẹ na hẹn mì luntọ́n, na Ohó lọ wẹ Klisti, podọ Klisti wẹ Jiwheyẹwhe, podọ Jiwheyẹwhe wẹ Gbigbọ Wiwé.

Enẹwutu, mì nọ̀ Ohó lọ mẹ! Mọwẹ! Mì nọ̀hẹ Alihiamẹtọ lọ. Mì nọ̀ godo Etọn. Mì ma jẹnukọnna Ẹn blo, ṣigba mì nọte to godo Etọn. Mì jo E do na Ewọ ni plán mì, mì plán Ẹn blo. Mì gbọ Ewọ ni plán mì.

Jọṣua dọ, dọmọ, “Dinvie, mì ma ko gbọn aliho he pọ́n, na mì ma mọdona núdepope dogbọn aliho he lọ tọn dali gba.”

Do ayi e go, enẹ lọ wẹ tukla egbé tọn. Na mì ma dó hùdo alihiamẹtọ devo de tọn nado plán mì gbọn aliho gblagada lọ ji gba wutu. Etẹ, na mì mọdona aliho lọ po onú devohe pò lẹpo po. Na mì mọdona aliho ylando tọn lẹpo. Na mì ko tin to ofi na azán dindẹn de wutu. Mì ma dó hùdo mẹdepope tọn nado dọ enẹ hlan mì gba, na mì mọdona aligli he mì na gbọnyì lẹ. Mọwẹ, mì mọdona onú popo dogbọn ylando tọn dali. Enẹwutu, mẹde ma dóna plọ́n mì dọ mì ni jẹajo gba; na mì ko mọdona enẹ wutu. Podọ mẹde ma dóna plọ́n mì lé yè nọ hodẹ̀do gbẹtọ dó gba; na mì ko sọ mọdona enẹ ga wutu. Mọ mẹdepope ma dóna plọ́n mì lé yè nọ wàylan helẹ dó gba, na e tin to atin lẹpo ji to ofi popo wutu.

Ṣigba mì flin, dọ, mì mẹhe yín Yisenọ lẹ ko dása enẹlẹ wáyì. Podọ dinvie, Aigba devo de ji wẹ mì tin te. Yèdọ mì ko mọ vọji. Na mì ko tin to Aigba Olọn tọn de ji. Yèdọ Aigba pagbè tọn lọ.

Mì sọgan pọ́n lẹ́do, na mì yọ́n aliho mìtọn he lẹ́do mì to ofi lẹ. O, Jiwheyẹwhe ṣie. Mì yọ́n lé yè nọ dãyihun owéhiho tọn lẹ dó. Podọ mì mọdona lé sisinukun nọ lẹ́ dó, podọ núhe e yín, po onú mọtọnhunkọ lẹpo po. Ṣigba whenuena e wá jẹ domọna klándowiwé po dódówà po huhlọn Jiwheyẹwhe tọn po dali, podọ lé Gbigbọ Wiwé nọ wàzọ́n dó po núhe E nọ wà lẹpo po tọn dali, mì dóna nọte to Ohó lọ godo, yèdọ Alihiamẹtọ lọ godo. Bé mí mọdona? Na mì ma ko gbọn aliho he pọ́n wutu.

E yọ́n, na mì nọ dọ, dọmọ: “Yẹn omẹ zìnzìntọ de, bo tindo kunnudè wéma wéhọ̀mẹ tọn lẹ.” Mì yawu wọnji sọn enẹ go. Mọwẹ.

“Yẹn ko yì fie yè nọ plọ́n yẹwhehódidọ te lẹ.” Mì yawu wọnji sọn enẹ go. Mọwẹ. Mì yawu nọ̀ godo Alihiamẹtọ lọ tọn. Mì gbọ na E ni jẹnukọnna mì! Na Ewọ yọ́n aliho lọ, hiẹ ma gba. Na mì ma ko gbọn aliho he ji pọ́n wutu. “E yọ́n”, na mì nọ dọ, dọmọ, “yé tindo Alihiamẹtọ lọ.”

Dinvie, mì pọ́n hlan eyín yé tindo E. Na Jesu dọ, dọmọ, “Ohia helẹ wẹ na hodo yé mẹhe gbọn aliho he ji lẹ. To Oyín ṣie mẹ, yé na nọ yàn aovi lẹ jẹgbonu, yé na nọ yí ogbè yọ́yọ́ lẹ do dọhó; kavi zé odàn lẹ do alọ mẹ; eyín yé sọ nù núhe doadi de, e ma na gbleawuna yé. Yé na zé alọ do azọ̀ntọ ji; yé nasọ jẹ gángán.” Susu to yé mẹ nọ gbẹ́ Ẹ, bo nọ mọ́ Ẹn, bo sọ nọ dọ, Ewọ ma tlẹ tindo gbọdemẹ de. Yín e yín mọ, bé yé ma hodo Alihiamẹtọ lọ gba. Ṣigba yé hodo zédai he gbẹtọ lẹ basi. Enẹwutu, mì yawu nọte to Ohó lọ mẹ, na mì ma ko gbọn aliho he ji pọ́n wutu, bé mì mọdona?

Ṣigba mì ko mọ vọji, bọ yè ko sọ vọ́ mì ji do klándowiwé mẹ. Mì ma ko gbọn aliho he ji pọ́n. Eyín mì na gbọn aliho he janwệ, mì dóna nọ̀ klándowiwé mẹ, na Aigba yọ́yọ́ de wẹ, podọ Ogbẹ̀ yọ́yọ́ de po gbẹtọ yọ́yọ́ lẹ po.

Mì sọgan yì sinsẹ̀nhọ̀mẹ bo mọ mẹde fọ́nṣite bo dawhá dọ, “Gigo hlan Jiwheyẹwhe! Halleluya!”

Etẹwutu, na mì na dọ, dọmọ, “O, Jiwheyẹwhe ṣie, yé ma ko wà ehe hunkọ gbèdé to sinsẹ̀nhọ̀ ṣie mẹ! Na enẹtọn wutu, yẹn na ṣite bo tọ́nyì!” Bé mì mọdona? Mì payi.

Dinvie, mì hodo Ohó lọ, bo gbọ na Alihiamẹtọ lọ ni plán mì. “Ewọ na plán mì biọ Nugbo lẹpo mẹ: E na do enẹ lọ hia mì. E nasọ lá núhe ja jijọ gbè lẹpo hlan mì,” yèdọ Alihiamẹtọ nugbo lọ. Podọ mì yì biṣọpu lẹ de blo; adavo Alihiamẹtọ lọ de. Mì yì mẹdepope de blo adavo Aihiamẹtọ lọ. Na Ewọ lọ wẹ yè do hlan nado plán mì. Ewọ lọ wẹ na wà ẹ. Na Jiwheyẹwhe ko ná mì Alihiamẹtọ de. Enẹwutu, mì kẹalọyí aliho he Jiwheyẹwhe dè lọ.

Tukla he tin to finẹ egbé wẹ yín dọ, gbẹtọ lẹ nọ wá sinsẹ̀nhọ̀mẹ bo nọ sinai na ṣẹ́ju pẹvi de, podọ núhe ma ko nọ jọ do yé go dai lẹ to jijọ.

Yẹn doyẹyigona nawe de sọn agùn he ma hunzò de mẹ, bọ yẹn hodẹ̀ hlan ẹn. Jiwheyẹwhe na hẹnazọ̀ngbọna nawe lọ. É ma mọdona ehe lọ gba. É ma tlẹ mọdona núdepope dogbọn ehe tọn dali gba. É biọ họ̀mẹ wá bo sọ dọmọ, yẹn ma mọdona ehe gba. Ṣigba yẹn dọ hlan ẹn, dọ, “Sẹwá bo pọ́n mi.” Ewọ yín gbẹtọ abọẹ-abọẹ he winyan nọ hù, ṣigba Alihiamẹtọ lọ gbẹ́sọ to didọ hlan ẹn, dọmọ: “Sẹwá.” É mọdona. Mọwẹ. Mì mọ, Jiwheyẹwhe tindo aliho he É dè de.

Bé mì ko do ayi tọ̀pápá he nọ gbọn ofi lẹpo kavi pápá whégbè tọn he jeyì ohùwaji dali go? Dinvie, mì flin dọ pápá pẹvi hóhó nẹ yín jiji to fide to otọ̀ ji aga. E ma mọdona whèzẹtẹn, kavi agéwaji kavi whèyìhọ̀ kavi ohùwaji dali gba. E ma mọdona núdepope ṣigba yè dó otọ̀ he ai to osó lẹ ji to otò Kanada tọn mẹ. E ma tọ́nsọn osìn lọ mẹ gbèdé, ṣigba yè ji i nado yín nukọntọ de. Pápá pẹvi asú nẹ yín jiji nado yín nukọntọ. Podọ jẹnukọn, to ozán dopo mẹ, osìn agó dahodaho delẹ jẹdo osó lẹ lọ ji aga. Etẹ wẹ jọ? Jẹhọn fifa de jẹte gbọn finẹ. To linlẹn mẹ, yẹn mọ ẹn bọ e to sisisọ, dọmọ, “Onọ ṣie, etẹ wẹ ehe sọ yín?” Mì mọ, e ma ko mọ jẹhọn fifa mọtọnhunkọ pọ́n. E wá do ayi e go dọ, tónù osìn lọ tọn ṣẹ̀ fifa bo lẹzùn osìn agó. Yè ji i nado yín pinplántọ pápá hatọ etọn lẹ tọn. To mayọ́nẹn de mẹ, núde sọ́ ẹ bọ e zlọ́n bo nọte to ṣẹnṣẹn osìn lọ tọn. Lé e jlo mì dó wẹ mì ni ylọ ẹ dọ. Ṣigba míwlẹ nọ ylọ dọ gbọdemẹ de, kavi mì sọgan ylọ enẹ lọ dọ núdepope he e yín. E nọ to yìyì to ṣẹnṣẹn osìn lọ tọn, bo nọ zé onù etọn do aga, bo to núdọ bo ylọ hatọ etọn lẹ. Podọ pápá he pò to osìn lọ mẹ lẹpo nọ tọ́nwá ede. Etẹwutu? Na yé yọ́n alihiamẹtọ yetọn gbọn ogbè yetọn dali.

“Na eyín opẹ̀n do ogbè he ma tátá, mẹnu wẹ na wléawu na ede dote hlan awhàn?” Nugbo wẹ. Mẹnu wẹ na wléawu na ede dote hlan awhàn eyín opẹ̀n do ogbè he ma tátá?

Na eyín pápá pẹvi nẹ dọ núhe ma tátá, bé pápá tẹ wẹ sọgan wléawu nado zlọ́n? Pápá pẹvi nẹ nọ zé onù etọn daga bo nọ dọnú. Podọ pápá he pò lẹpo nọ wá e de.Yéwlẹ die. Ofligọ̀ na hunkọ tọn wẹ yé tindo to ṣẹnṣẹn osìn lọ tọn finẹ, bo nọ to lilẹ́ hlan ofi podọ hlan odọn! Ojlẹ pẹvi de godo, yé nọ mọ dọ osìn agó lẹ lọ nọ ṣẹ̀ sisẹpọ́ yé, na ojlẹ sọ̀ na e nido yì. E nọ zé awà etọn lẹ bo zlọ́n sọn osìn lọ mẹ yì jẹhọn mẹ bo nọ lilẹ́ whla ẹnẹ kavi atọ́n hunkọ, bo dèdo otò Luwisiana tọn mẹ titegbe kẹdẹdilé e sọgan dó, mọ pápá he pò lẹpo to godo na ẹn. E sọawúhia po núdidọ po. Etẹwutu? Na alihiamẹtọ de wẹ ewọ wutu! Niṣẹ! Pápá lẹ yọ́n alihiamẹtọ yetọn, ṣigba agùn ma yọ́nẹn gba. Mọwẹ, na e mọdona núhe e dóna wà.

Mì payi tọ̀pápá hóhó nẹ he tin to otọ̀ otò Alaska tọn mẹ lẹ go! Dinvie, tọ̀pápá asú hóhó nọ tin to finẹ nado plán yé, bọ tọ̀pápá nẹlẹ pó dóna do ayi asú lọ go na e nido yín dagbe hlan yé. Yé dóna mọdona ohó núhe tọn asú lọ to didọ hlan yé. Bé mì hia enẹ to hójlawéma he yè nọ ylọ to ogbè Glẹnsi tọn mẹ, dọ, “Luk”, tadena ehe tọn yín, “Pọ́n” mẹ to owhè ẹnẹ hunkọ he ko wáyì lẹ mẹ, fie tọ̀pápá asú hóhó de ma mọdona núhe e to wiwà to ojlẹ de mẹ wáyì te, bo plán susu tọ̀pápá nẹlẹ tọn yì biọ otò Inglandi tọn mẹ? Mọwẹ. Podọ yé ma sọ yọ́nẹn dọ yé ma ko wá otò Inglandi tọn mẹ pọ́n. Etẹwutu? Na yé ma dayi alihiamẹtọ yetọn go wutu. Otọ̀pápá asú hóhó nẹ lọsu ma mọdona fie e jei gba. Podọ dinvie, yé tin to finẹ bo ma sọ sọgan lẹ́gọ̀ ba.

Enẹ wẹ núhe to jijọ to egbé po tọ̀pápá nẹlẹ po, na yé gbẹ́sọ to awulẹ. Yé nọ dọ, dọmọ, hójlawéma he yè nọ ylọ to ogbè Glẹnsi tọn mẹ, dọ, “Luk”, tadena ehe tọn yín, “Pọ́n” dọ, dọmọ, tọ̀pápá helẹ to awulẹ bo sọ to zinzlọ́n lẹ́do otò Inglandi tọn, ṣigba yé ma mọdona lé yé sọgan lẹ́gọ̀ dó gba. Mọwẹ e te ga po tọ̀pápá he yẹn yọ́nẹn to egbé lẹpo po dó. Mì tindo gbẹtọ susu po piplimẹ daho azán dindẹn tọn lẹ po, podọ yẹwhehódọtọ vọfọ́n tọn lẹ nado wá dọyẹwhehó na ojlẹ pẹde, ṣigba mì ma yọ́n fie mì jei gba. Mì nọ plí mìde sọn otẹn de mẹ jẹ devo mẹ, na mì tindo tọ̀pápá asú de nado plán mì biọ núyiwà agùn gbẹ́pipli titò tọn lẹ tọn mẹ; podọ e ma sọ yín do Ohó Jiwheyẹwhe tọn go, yèdọ do baptẹm Gbigbọ Wiwé tọn go gba. Podọ whenẹnu, mí nọ lẹ̀n núhe tọn wutu mí ma do tindo vọfọ́n to azán mítọn lẹ mẹ pọ́n. Bé mì mọdona? Mì dóna sè Awhágbè lọ! Podọ Awhágbè lọ wẹ Opẹ̀n Wẹndagbe tọn he to Wẹndagbe lọ fúfú jẹgbonu, yèdọ Ohó Jiwheyẹwhe tọn lọ. E ma yín zédai gba, mọ e ma sọ yín agùn gbẹ́pipli titò tọn gba; adavo Owé Wiwé he yín Gbigbọ Wiwé lọ. “Ohia helẹ wẹ na hodo yé mẹhe yise lẹ.” Bé mì mọdona? Podọ to finẹ, yé jẹ ali lọ ji.

To ojlẹ de mẹ wáyì, tọ̀pápá asú hóhó nẹ lọ bẹ́ tọ̀pápá susu biọ zinvlu mẹ, bọ yé omẹ pó gbàta yetọn lẹ do osó lẹ go, delẹ to yé mẹ kúṣiọ, podọ delẹ sọ kú ga. Mọwẹ! Yé dóna mọdona ogbè yetọn lọ. Eyín pápá hóhó pẹvi nẹ tindo awhágbè lọ bọ yé omẹ pó yọ́nẹn, bé whenẹnu yé na basi opli ofligọ̀ tọn, bo nọ yì ohùwaji dali. Etẹ wẹ yé nọ yì wá to ohùtó? Fie jẹhọn matin te.

Dinvie, eyín Jiwheyẹwhe ná núyọ́nẹn pápá de nado jẹlá sọn mimiyọn jẹhọn tọn mẹ, nawẹ É ma sọgan pégo nado ná agùn lọ dó? Eyín pápá sọgan tindo linlẹn mọtọnhunkọ, nẹmunẹmu wẹ hlan Gbigbọ Wiwé to agùn mẹ? E dóna plán mí sọn núyiwà lẹ po zédai lẹpo po, po núhe pò lẹpo po mẹ biọ gigo jawu baptẹm Gbigbọ Wiwé tọn mẹ. E nọ hẹn jijọdagbe po oyọ́nẹn po, po homẹfa po, po jijọ-di-Jiwheyẹwhe tọn po, po Gbigbọ Wiwé po wá. Enẹ wẹ Alihiamẹtọ nugbo lọ dóna plọ́nmẹ, na E ma na fúfú núdepope jẹgbonu adavo Wẹndagbe he yín Ohó Jiwheyẹwhe tọn lọ kẹdẹ. Mọwẹ, mì dó hùdo Alihiamẹtọ de tọn!

Núyọ́nẹntọ lẹ ma mọdona núdepope dogbọn Jiwheyẹwhe tọn dali gba. Na majikizọ́n wẹ yé nọ wà, yèdọ owọntọ lẹ. Yé tin to whèzẹtẹn dali. Mì yọ́nẹn dọ Biblu dọ, dọmọ, “Mí mọ Sunwhlẹvu Etọn to Whèzẹtẹn dali bo wá nado litaina Ẹn.” Yé tọ́nsọn whèyìhọ̀ bo pọ́n hlan whèzẹtẹn dali, bo mọ Sunwhlẹvu Etọn. Mí tin to whèzẹtẹn dali bo mọ Sunwhlẹvu Etọn hlan. Bé mì mọdona?

Yẹn sọgan lẹn lé dawe nẹlẹ to awuwlé nado yì dó. Yẹn sọgan lẹn lé asi dopo yetọn tọn sọgan dọ hlan asú etọn dó, dọ, “Hiẹ ko bẹ́ onú lẹpo plidopọ́, ṣigba fie wẹ núhe na do alihia we te?”

Ewọ dọ haln ẹn dọmọ, “Yẹn ma to na zán alipọ́nnú to ojlẹ he mẹ gba.”

Asi etọn sọ dọ hlan ẹn dọmọ, “Nawẹ hiẹ na gbọn osó lẹ ji dó?” Mì flin dọ, yé dóna dása Otọ̀ Taiglisi tọn bo jẹte gbọn omá lẹ ṣẹnṣẹn wáyì, podọ etẹwutu, na yé tindo gbejizọnlin owhè awe mẹ tọn nado basi to kẹtẹkẹtẹ yetọn lẹ ji. Nawẹ yé to na basi dó? Asi lọ dọ hlan ẹn, dọ, “E ma ylan, ṣigba hiẹ ma hẹn alipọ́nnú de gba.”

Ewọ sọ dọmọ, “Lala.”

Asi etọn sọ dọmọ, “Nawẹ hiẹ jei dó?”

“Yẹn jei gbọn aliho he Jiwheyẹwhe na dè na mi lọ ji. Sunwhlẹvu he tin to aga finẹ nado hẹn mi jẹ Ahọlu nẹ lọ de.” Mọwẹ.

“Mí mọ Sunwhlẹvu Etọn to whèzẹtẹn dali, bo jẹgodona Ẹn wá whèyìhọ̀ dali nado sẹ̀n Ẹn. Fie wẹ É te?” Yé hodo ali he Jiwheyẹwhe dè lọ. Yé tẹ́do zédai susu go to asiko delẹ mẹ. Yé biọ Jelusalẹm mẹ bo ṣẹ̀ yìgọ̀yìgọ̀ yì pé gbọn agbegbe lẹpo ji, bo mọ mẹhe dóaṣọ̀ dagbedagbe lẹ, bo to kinkànbiọ yé, dọmọ, “Fie wẹ É te? Fie wẹ yè ji Ahọlu Ju lẹ tọn te?” E yọ́n, Jelusalẹm wẹ ota lọ. Nugbo agùn daho lọ dóna mọdona núde dogbọn Etọn dali. “Fie wẹ É te? Fie wẹ yè ji Ahọlu Ju lẹ tọn te? Mí mọ Sunwhlẹvu Etọn to Whèzẹtẹn dali, enẹwutu wẹ mí wá nado litaina Ẹn. Fie wẹ É te?”

Etẹwutu wẹ yé yì mẹplọ́ntọ lẹ kavi yẹwhenọ daho lẹ de, mimọ dọ dopo to yé mẹ ma mọdona núde dogbọn Ewọ tọn dali? “Etẹwutu? Na yè ji Ahọlu Ju lẹ tọn De, fie wẹ É te?” Yé ma yọ́nẹn gba.

Ṣigba susu lẹngbọhọtọ delẹ tọn tin to gbonu finẹ to osó lẹ dali he to asiko yetọn lẹ zán, na yé ko wá aliho he Jiwheyẹwhe dè lọ ji wutu.

Mọwẹ yé nọte to finẹ dó, bọ Helodi sọ dọ hlan yé dọ, “Yẹn na dọ núhe mí dóna wà hlan mì, mí dóna basi piplimẹ ogán lẹ tọn de.” Mọwẹ yé ylọ Tòhódọtọ lẹ dó, bo kànbiọ eyín yé sè ohó de dogbọn Ewọ tọn dali. Yé sọ gblọn bo dọmọ, “Lala, mí ma mọdona núde dogbọn Ewọ tọn dali gba.”

Mọdopolọ wẹ e te to egbé ga. Yé ma mọdona núdepope dogbọn Alihiamẹtọ he lọ tọn dali kavi Gbigbọ Wiwé he nọ hẹnazọ̀ngbọ tọn dali, kavi Ehe nọ gọ́ omẹ, kavi Ehe nọ whlẹn omẹ bo sọ lẹ́gọ̀ja tọn dali gba. Alihiamẹtọ he dọ núhe to jijọ helẹ na mí, bọ mí tin to ofi to gblagbla yé omẹ pó tọn mẹ. Mẹhe nọ mọdona linlẹn ayiha mẹ tọn de; ṣigba yé ma mọdona núdepope dogbọn Enẹ lọ tọn dali gba, na yé nọ ylọ Enẹ lọ dọ alẹdida, kavi onú mọtọnhunkọ lẹ. Yé ma mọdona ohó he yé sọgan dọ dogbọn Enẹ lọ tọn dali gba.

Dinvie, mì mọ omẹ núyọ́nẹntọ nẹlẹ? Mì flin dọ, whenuena yé biọ otò Jelusalẹm tọn mẹ, Sunwhlẹvu lọ bú do yé. Podọ dẹnsọlé mì to pinpọ́n hlan zédai po titò gbẹtọ lẹ tọn po nado plán mì jẹ Jiwheyẹwhe de, alọgọ́ Jiwheyẹwhe tọn na jo mì do. Ṣigba whenuena agbọ́ etọn pé yé bọ yé jó zédai po gbẹ́pipli titò Ju lẹ tọn nẹ lẹpo po dai, bo tọ́njégbọnu yì sọn Jelusalẹm mẹ wẹ Sunwhlẹvu lọ sọawúhia yé whladopo dogọ́, bọ yé sọ gọ́na ayajijẹ daho. Mọwẹ yé sọ mọ Alihiamẹtọ lọ dó whladopo dogọ́! Etẹ, na e na yín dó eyín mì tọ́nsọn agùn hóhó he fá de mẹ bo biọ agùn dagbe he hùnzò de mẹ, bo mọ Alihiamẹtọ lọ to pinplán mì, vogbingbọn tẹwẹ ehe! Mọwẹ, “Mí mọ Sunwhlẹvu Etọn to whèzẹtẹn dali bo wá nado litaina Ẹn.”

Jọṣua dọ hlan yé dọmọ, “Dinvie, mì jẹgodona Alki lọ, na mì ma ko gbọn aliho he ji pọ́n.” Jiwheyẹwhe ma na dikena Alki lọ ni yì fidepope gba adavo ofi he sọgbe lọ. Omẹ lẹpo nọ hodo E, E bo sọ nù Jọdani tọ́n.

Mọdopolọ wẹ to egbé gbọn Gbigbọ Wiwé dali. Mọwẹ. Onú dopo he mí yọ́nẹn wẹ yín dọ, yín e yín Gbigbọ Wiwé wẹ kavi lala, mí nọ mọ awúsọhiamẹ Etọn, awúsọhiamẹ ṣiṣẹ̀ Ohó Jiwheyẹwhe tọn lẹ tọn.

To ojlẹ he wáyì de mẹ, susu to mẹmẹsunnu lẹ mẹ tindo ohùn po amì po, podọ enẹ lọ sọgbe eyín yé jlo nado wà mọ. Podọ enẹ lọ ma yín ṣiṣẹ̀ hlan mì gba. Adavo ṣiṣẹ̀ Owé Wiwé tọn de, mì mọ, dẹnsọlé e gbẹ́sọ to Ohó he Jiwheyẹwhe dọ hẹnṣẹ̀, enẹ lọ sọgbe. Yé nọ dọ, dọmọ: “Núhe tọn wutu wẹ mì do tindo Gbigbọ Wiwé, na amì to alọ mìtọn mẹ.” Dinvie, yẹn ma sọgan dọhó yì finẹ gba. Bé mì mọdona? Lala, na amì matindo núdepope nado wà po enẹ lọ po gba. Podọ eyín ohùn nẹ lọ sọgan hẹnazọ̀ngbọ bo sọ sọgan whlẹn omẹ, bé etẹwẹ na jọ do Ohùn Jesu Klisti tọn go? Eyín amì nẹ lọ nọ hẹnazọ̀ngbọ, nẹmunẹmu wẹ hihòpá Etọn? Bé mì mọdona?

Yẹn jlo dọ Alihiamẹtọ lọ ni wá, yèdọ Ehe na hẹn mì jẹ Nugbo Ohó lọ tọn kọ̀n, bọ whenẹnu mì na tindo núde to hòmẹ bo na wléawu dote nado yì. Mọwẹ, yèdọ awuwiwlé nado zlọ́n. Mọwẹ. Etẹwutu? Na Alihiamẹtọ lọ wẹ hẹn domọ na e nido yín nugbo.

 Yẹn ko ná Owéfọ lẹ lọ, ṣigba yẹn jlo nado hia dopo he. Ehe yín to Owé 2 PITA 1:21 tọn mẹ.

Na dọdai ma gbọn ojlo gbẹtọ tọn dali wá to hóhówhenu gba: ṣigba gbẹtọ lẹ dọhó sọn Jiwheyẹwhe de dilé yè dọ̀n yé yì do gbọn Gbigbọ Wiwé dali.

Nawẹ dọdai lọ wá gbọn? E ma yín gbọn ojlo gbẹtọ tọn, kavi zédai agùn gbẹ́pipli titònọ lẹ tọn dali gba; adavo gbọn ojlo Jiwheyẹwhe tọn dali, whenẹnu wẹ yè dọ̀n omẹ wiwé lẹ gbọn Gbigbọ Wiwé dali. To whelẹponu, Ewọ wẹ Alihiamẹtọ Jiwheyẹwhe tọn. Enẹ wẹ Gbigbọ Wiwé he tin to Dotin Miyọnnọ nẹ lọ mẹ, yèdọ Gbigbọ Wiwé lọ bọ gbẹtọ lẹpo sọ yọ́nẹn dọ Klisti wẹ Enẹ lọ. Mọse gbẹ́kọ sọn Egipti go, bo kẹalọyí ovlẹ Klisti tọn he húgan adọkun Egipti tọn lẹ. Klisti wẹ Omẹ dopo nẹ lọ. Whenuena Ju nọte to gbonu finẹ bo to didọ hlan Jesu dọmọ, “Owhè towe ma yì kande-ao, hiẹ ko sọ mọ Ablaham?”

Jesu sọ gblọn bo dọ hlan yé dọmọ, “Whẹpo yè ji Ablaham, YẸN TIN.” YẸN LỌ WẸ Mẹhe pé Mọse to Dòtin Miyọnnọ de mẹ to núkàn he to miyọn ji de mẹ. Mọwẹ. Ewọ lọ wẹ Jiwheyẹwhe diọzùn agbasalan. E ma yín omẹ atọ̀ntọ de gba; yèdọ Omẹ dopolọ wẹ wàzọ́n to ninọ̀mẹ alọpãlọpa mẹ. E ma yín yẹwhe atọ̀n gba; na Jiwheyẹwhe dopo gẽ wẹ tindo azọ́nwhé vòvo atọ̀n nẹlẹ. E sọgbe domọ.

Mọwẹ. Dinvie Owé Wiwé lọ. Whedepopenu he Jiwheyẹwhe dè aliho de, dagbe lọ wẹ É nọ dè. Whenuena Jiwheyẹwhe dè ali de nado ná huhlọn Agùn Etọn, É nọ dè aliho dagbe lọ. To ojipa Edẹni tọn mẹ, É zé Ohó Etọn na Adam po Evi po, dọmọ: “Eyín mì nọte to Ohó lọ mẹ, whenẹnu wẹ yè na whlá mì. Ṣigba eyín mì tọ́njẹgbonu sọn E mẹ, yèdọ gbẽgbè hiẹ dù sọn atin lọ mẹ te, enẹtọn mẹ hiẹ na kú dàndàn.” Jiwheyẹwhe ma nọ diọ zinzán Etọn gbèdé. Mọwẹ Satani lọsu ma sọ nọ diọ etọn gba; podọ lé Satani wà hlan Adam po Evi po dó to whenẹnu, mọwẹ é to wiwà hlan gbẹtọ egbé tọn lẹ dó ga. Etẹwutu? Na é nọ tẹnpọ́n nado wà mọ gbọn owhẹ̀jijọ ewlọsu tọn dali. “Dinvie, Satani nọ ná whẹ̀jijọ dọ, Jiwheyẹwhe ma na wà do Ohó he É dọ lọ ji gba. Enẹwutu wẹ é do dọ, dọmọ: Ojé, Jiwheyẹwhe ko dọmọ”, “ṣigba Jiwheyẹwhe wiwé ma na wà mọ dàndàn gba.” Nugbo wẹ yẹn dọ hlan mì, É na wà ẹ na É ko dọmọ, Yẹn na wà ẹ wutu!

Podọ enẹ wẹ ohó he gbẹtọ lẹ nọ dọ to egbé, dọ, “Ojé, hiẹ nọte dinvie! Hiẹ ma yí mi sè to dinvie, ṣigba eyín yẹn yì sinsẹ̀nhọ̀ mẹ bo ná madao ṣie, bo sọ wà ehe po enẹ po, bé Jiwheyẹwhe na dè mi dlan gbonu finẹ wẹ?” Adavo yè vọ́ gbẹtọ ji, ewọ ma tlẹ sọgan mọdona Ahọlu Jiwheyẹwhe tọn! Bé mì mọdona? Dinvie, mì dó sulu de matin to finẹ gba! Mì sọgan dọ, dọmọ: “Dawe wamọnọ hóhó lọ, kavi nawe wamọnọ hóhó lọ, yèdọ alindọn dagbe hóhó de.” Aliho dopo he ji yé sọgan gbọn nado mọ Jiwheyẹwhe wẹ yín dọ, yé ni mọ vọji. E ma sọ húgan mọ. Núdepope ma dù mi po yọpọvuyínyín yetọn po, kavi po mẹhoyínyín yetọn po, kavi po whanpẹ yetọn po, kavi po núdepope he yé wà po podọ zédai depope he yé sọgan hia lẹpo gba. Mì dóna yín mẹvọji kavi mì ma tlẹ tin to dòdónu lọ ji gba. Mọwẹ nugbo.

Mì mọ dọ, mì dó hùdo Alihiamẹtọ lọ tọn! Ewọ na plán mì biọ Nugbo lẹpo mẹ, podọ Ohó lọ wẹ Nugbo lọ. Ewọ na plán mì. Mọwẹ E nọ basi to whelẹponu. Jiwheyẹwhe ma nọ diọ núdepope gba, na Madopòdo wẹ Ẹ bọ É sọ mọdona núhe sọgbe lọ. Ewọ wẹ Mẹhe tin to ofi popo podọ Mẹhe mọdona onú popo, Ewọ sọ wẹ onú popo. Mọwẹ, Jiwheyẹwhe tin, enẹwutu É ma sọgan diọ gba. Mọwẹ.

Ewọ wẹ Mẹhe nọ hẹn aliho he ji É to mì plán gbọn lọ ṣẹ̀. Podọ Gbigbọ Wiwé he yín Alihiamẹtọ lọ wẹ Ṣiṣẹ̀ Ohó dopolọ he É to pinplọ́n mì lọ tọn. Enẹwutu, Alihiamẹtọ lọ plán Malku na é nido dọ, dọmọ, “Mì yì aihọn lẹpo mẹ, mì ni to yẹwhehó wẹndagbe tọn dọ hlan gbẹtọ lẹpo. Mẹhe yise bọ yè baptizi i, yè na whlẹn ẹn gán; ṣigba mẹhe ma yise wẹ yè na gblewhẹdo. Ohia helẹ wẹ na nọ hodo mẹhe yise lẹ: To Oyín ṣie mẹ yé na nọ yàn aovi lẹ jẹgbonu; yé na nọ yí ogbè yọ́yọ́ lẹ do dọhó; yé na zé odàn lẹ do alọ mẹ; eyín yé sọ nù onú he dóadi de, é ma na gbleawuna yé; yé na zé alọ do azọ̀ntọ ji, yé nasọ jẹ gángán.” Podọ Biblu dọ, dọmọ: “Mọwẹ yé jẹgbonu yì ofi lẹpo dó,” bo yín plinplán gbọn Gbigbọ Wiwé dali, mì mọdona, yèdọ “mì dọyẹwhehó Ohó lọ tọn po ohia helẹ po.” Etẹwẹ enẹ yín? Alihiamẹtọ lọ hẹn Enẹ lọ ṣẹ̀ dọ, Nugbo wẹ!

Enẹ wẹ núyiwà Jiwheyẹwhe tọn. Mọwẹ yè ko doai dó. Enẹ wẹ titò Etọn; Ewọ ma sọgan diọ sọn e mẹ gba, na Madopòdo wẹ Ẹ wutu. Niṣẹ. É ma sọgan diọ sọn e mẹ gba; na Ewọ wẹ Jiwheyẹwhe wutu. Yẹn sọgan diọ, na gbẹtọ wẹ yẹn. Hiẹ sọgan diọ; na sunnu de kavi yọnnu de wẹ hiẹ wutu. Ṣigba Jiwheyẹwhe ma sọgan diọ gbèdé. Yẹn tindo opòdo; mọ yẹn sọgan ṣinúwà kavi dọhó yìdò, mì omẹ pó sọgan wà mọ ga. Ṣigba Jiwheyẹwhe ma sọgan gba, na É gbẹ́sọ to Jiwheyẹwhe yín kakadoi. Podọ gbèmimá Etọn tintan sọgbè. Alọ he mẹ Jiwheyẹwhe nọ wànú gbọn to otẹn de mẹ, mọdopolọ wẹ É nọ wà dó to ofi lẹpo. Eyín yè ylọ Ẹ wá fide nado whlẹn ylandonọ de, É nọ whlẹn ẹn na núde tọn wutu. Whenuena ylandonọ de wá, Jiwheyẹwhe nọ wà onú dopolọ. Niṣẹ. Yẹn yinwanna Ẹn. Yẹn yise dọ Nugbo lọ wẹ.

Yẹn ko dó owhè kande-wiatọ̀n, bo to yẹwhehó Wẹndagbe lọ tọn dọ to ofi na owhè gbàn-nukun-atọ̀ndá, sọn whenẹnu yẹn ma mọ Ẹn dọ É gbọvọ gbèdé gba. Do ayi e go, yẹn ko mọ Ẹn bọ É yín whiwhlepọ́n gbọn aihọn lẹpo mẹ donu ṣinawe, to sinsẹ̀n lẹpo mẹ podọ to ofi he pò lẹpo, to nukun gbẹtọ fowe-kanwe-kò tọn mẹ to ojlẹ dopo de mẹ, podọ É ma sọ gbọvọ gbèdé gba. Dinvie, yẹn ma dọhó sọn owé devo de mẹ gba, adavo sọn Owé Wiwé lọ mẹ, dọ, yẹn yọ́nẹn dọ Jiwheyẹwhe nọ nọte na Ohó Etọn bo sọ nọ doyẹyigona Ẹn. Dinvie, eyín mì tindo zédai de, mì yawu payi e go. Ṣigba Gbigbọ nọ hodo Ohó Jiwheyẹwhe tọn.

To Owé JOHANU 1:1 tọn mẹ, yè wlán ẹn dọ, “Ewọ wẹ Ohó lọ. Ewọ wẹ Alihiamẹtọ lọ. To whẹ́whẹ́whenu wẹ Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwhe. Yè sọ lẹ́ Ohó lọ zùn agbasalan, É sọ nọ̀ mí ṣẹnṣẹn.” O Jiwheyẹwhe ṣie!

Yè plán Pita gbọn Gbigbọ Wiwé dali nado dọ to Owé OWALỌ 2:38 tọn mẹ, yèdọ lé yè sọgan mọ Gbigbọ Wiwé yí dó, dọmọ: “Mì lẹnvọjọ, na yè ni sọ baptizi dopodopo mìtọn to Oyín Jesu Klisti tọn mẹ na dèsẹ̀ ylando tọn, podọ sọn whenẹnu wẹ Gbigbọ Wiwé na ṣẹ̀ pinplán mì ji.” Mọwẹ, enẹ wẹ núhe mì dóna wà lọ. Jẹnukọn whẹ́, mì lẹnvọjọ sọn ylando mìtọn lẹ mẹ, sọn mayise mìtọn lẹ mẹ, yèdọ ehe hẹn mì ma nado yí onú helẹ sè. Mì lẹnvọjọ, to enẹgodo yè ni baptizi mì, podọ sọn whenẹnu wẹ Gbigbọ Wiwé na ṣẹ̀ pinplán mì ji. Mì mọ, enẹ wẹ azọ́n he mì dóna wà lọ. Azọ́n mìtọn wẹ nado lẹnvọjọ. Azọ́n mìtọn wẹ nado baptizi. Enẹgodo wẹ Gbigbọ Wiwé na yí azọ́n mẹpinplán tọn sọn finẹ yì, bo na plán mì sọn jijọdagbe mẹ biọ oyọ́nẹn mẹ, biọ owùnza mẹ, biọ hòmẹfa mẹ, podọ biọ jijọ-di-Jiwheyẹwhe tọn mẹ, biọ wanyinna mẹmẹsunnu mẹ, mọwẹ Gbigbọ Wiwé na do ohia mì go dó. Bé mì mọdona? Whenẹnu wẹ mì na yín apájlẹ Jiwheyẹwhe tọn he pégan, yèdọ sunnu nugbo Jiwheyẹwhe tọn lẹ, kavi yọnnu nugbo Jiwheyẹwhe tọn lẹ he yè ko doai do Klisti mẹ. Yẹn yinwanna enẹ, yèdọ didoai do Klisti mẹ.

Nugbo, mọwẹ Malku yín pinplán gbọn Gbigbọ Wiwé dali nado wlán Owé MALKU 16 tọn.

Podọ ga, Johanu yín pinplán gbọn Gbigbọ Wiwé dali to whenuena é wlán Owé OSỌHIA tọn. É yín pinplán gbọn Alihiamẹtọ lọ dali. Alihiamẹtọ lọ sọ plán ẹn nado dọ, dọmọ: “Eyín mẹdepope na dè dogọ́ onú helẹ, kavi dèpò sọn Ohó he tin to Owé dọdai tọn he mẹ, Jiwheyẹwhe na dè otẹn etọn sọn Owé Ogbẹ̀ tọn mẹ.”

Dinvie, nawẹ mì na zé núde do Ohó Jiwheyẹwhe tọn mẹ bo nasọ to didọ, dọ Gbigbọ Wiwé wẹ to pinplán mì dó? Enẹ matindo tùnmẹ de gba, bé enẹ lọ sọgbè wẹ? Lala. E ma sọgbè gba.

Ewọ wẹ Alihiamẹtọ ṣie gbọn ogbẹ̀ dali. Na É nọ plán mi biọ Ogbẹ̀ mẹ. Ewọ wẹ Mẹhe plán mi wá Ogbẹ̀ kọ̀n, podọ Ewọ sọ wẹ Ogbẹ̀ ṣie. Matin Ewọ yẹn matindo Ogbẹ̀ gba. Matin Ewọ yẹn ma sọ jlo núdevo depope gba. Ewọ wẹ onú popo to popo mẹ hlan mi. To gbẹ̀zán tukla ṣie tọn lẹpo mẹ, É nọ nọte na mi. É dona mi to osọ he wáyì, mọwẹ É sọ wà onú dopolọ to egbé ga. Etẹwẹ yẹn sọgan dónukun? Ewọ wẹ Omẹ dopolọ kakadoi, enẹwutu, mì pa Oyín Etọn! Niṣẹ. Mọwẹ. Lé É dopa etọn dó, mọwẹ É nasọ wà ẹ dó. Ewọ Ogbẹ̀ ṣie, Ewọ wẹ Alihiamẹtọ ṣie, yèdọ onú popo to popo mẹ. Yẹn ko dó adọgbo to Ewọ mẹ. Yẹn ko mọ whlepọ́n he sinyẹnawu susu. Mọwẹ yẹn sọ nọ dó adọgbo do É go to fidepope he yẹn yì dó. Yẹn sọ jlo dọ mì ni wà mọ ga. Mì yọnnu lẹ emi, eyín mì to avọ̀yàn, mì dèji do É go. Eyín mì sọ biọ tòmẹ yì, mì dèji do É go.

To ojlẹ dopo de mẹ, yẹn lẹn dọ yẹn yín wẹnyàntọ dagbe de to gblagbla owhlẹ lẹ tọn mẹ, mì mọdona, dọ yẹn nọ yànmọna kanlin lẹ susu. Yẹn lẹn dọ, “Yẹn ma sọgan búali gba na mì ma sọgan ba mi po. Indiannu apáde wẹ onọ ṣie, podọ yẹn sọ yinwanna enẹ lọ. O Jiwheyẹwhe ṣie! Mì ma sọgan ba mi po to gblagbla owhlẹ lẹ tọn mẹ gba, na yẹn mọdona fie yẹn tin te wutu.”

Mì ma sọgan dè mi sọn gbejizọnlin he yẹn po asi ṣie po bẹ́ mẹ gba, na yẹn di mẹkiklọ pẹvi de hlan asi ṣie, whenẹnu wẹ yẹn dọ hlan ẹn dọ, “Mẹyinwanna ṣie, hiẹ mọdona dọ e na yọ́n na mí nido wlealọ to azán kònukun-atọ̀ntọ owhèsùn aotọ tọn mẹ.” Na enẹ wẹ azán he Oklunọ dè na mi nado basi i.

Podọ, yẹn lẹn dọ, “Dinvie, na gbejizọnlin yẹn po asi ṣie po tọn, yẹn ko sẹ̀ akwẹ ṣie lẹ dó, bọ yẹn nasọ hẹn asi ṣie yì fie asisà otọ̀ tọn nọ to núdọ te, ehe yè nọ ylọ dọ, “Niagahla Fọs”, podọ mí nasọ yì osó he yè nọ ylọ dọ, “Adihlọndaki” ji, nado yànwẹnna ojlẹ pẹvi de.” Bé mì mọdona? Mọwẹ yẹn plán asi ṣie po ovi ṣie Billy po, he yín ovi pẹvi de. Podọ yẹn dóna hẹn asi ṣie tọ́nwhẹn na gbejizọnlin mítọn, enẹ lọ sọ yín gbejizọnlin wẹnyinyàn tọn de ga, mì mọ. Mọwẹ yẹn lẹn dó dọ, enẹ wẹ núhe sọgbè na yẹn nido wà lọ. Podọ mọwẹ yẹn hẹn ẹn hẹjiyì dó.

Yẹn sọ wlánwé hlan Dawe he yè nọ ylọ dọ, Dẹntọni, he nọ họ́ zunkàn lẹ. Mí sọ dèdo yì Osó he yín, Hulikanu tọn ji. Podọ yẹn sọ dọmọ, “Dawe Dẹntọni, yẹn ja aga finẹ, na yẹn jlo nado hù beliali delẹ po hiẹ po to whèjai he.”

Ewọ sọ dọmọ, “ E yọ́n, Billy, wá poun.” Mọwẹ é dọ, dọmọ, “Yẹn na nọte to aga finẹ to azán lẽ gbè.” Do ayi e go, yẹn po asi ṣie po jẹ finẹ to afọnnufũ to azán de gbè, po ovi ṣie Billy po, podọ mọwẹ yè sọ sú ohọ̀n owhé lọ tọn dó. Ohọ̀ de sọ tin to godo owhlẹ lẹ tọn finẹ.

Fie yẹn po Nọvisunu Flẹdi Sọtimanu po yì to madẹnmẹ podọ mí sọ nọ̀ finẹ. Yẹn sọ mọ Gbigbọ Wiwé to ote finẹ, Hinhọ́n wabuẹ he to yìyì to nukàn lọ mẹ, bọ Flẹdi sọ nọte to finẹ. Gbigbọ Wiwé lọ sọ dọ hlan mi, dọmọ, “Sẹwá de, Yẹn jlo nado dọhó hlan we.” Bo sọ dọmọ, “Payi, na yé dó omọ̀ de dai hlan we to osọ he ja.” É sọ dọmọ, “Nọ wunzẹn!” Nọvisunnu Flẹdi, bé e ma yín mọwẹ? Podọ yẹn sọ yì dọ hlan gbẹtọ kanwe-kò hunkọ to ozán nẹ mẹ, to otò Vẹmọnti tọn mẹ to finẹ, mọwẹ yẹn sọ dọmọ, “Yè dó omọ̀ de dai na mi; yẹn sọ jei nado pọ́n. Yẹn ma yọ́n fie e te gba.” Podọ to ozán he bọdo e go mẹ, E sọawúhia, bo dọ hlan mi dọ, “Omọ̀ he yè dó dai na we lọ die.” Mọwẹ. Ṣigba Gbigbọ Wiwé plán mi gbọn núhe yẹn sọgan wà lẹ dali. O Jiwheyẹwhe ṣie, enẹ lọ sọgbè! O Jiwheyẹwhe ṣie, podọ susu to mì mẹ mọdona núhe e yín. Yẹn matindo whenu susu nado dọ hlan mì gba.

E to ote to finẹ to whenuena aihọn lọ mẹ ṣẹ̀ fifa ji to azán lọ gbè. Dawe Dẹntọni nẹ to awuwle nado sọawúhia to azán he bọdo e go mẹ, yẹn sọ dọmọ, “Mẹyinwanna ṣie, hiẹ yọ́nẹn dọ, e na yọ́n eyín yẹn sọgan wlé gbékanlin kanylantọ daho de nado hẹn ẹn gọ̀yì whégbè.” Yẹn sọ dọmọ, “Yẹn dóna whlá akwẹ helẹ dai na dinvie wẹ mí wlealọ.” Podọ yẹn sọ dọmọ, “Mí dóna tindo núdùdù avivọ whenu mítọn tọn eyín yẹn sọgan yànwẹnna kanlin lẹ to egbé.”

Podọ asi ṣie sọ dọmọ, “E yọ́n Billy, yì poun!” É sọ dọmọ, “Dinvie, flin dọ, yẹn ma ko sọawúhia to atin helẹ mẹ pọ́n.” Asi ṣie sọ tin to awàgba kòatọ́n hunkọ to osó lẹ lọ ji aga, mì mọ, podọ é sọ dọmọ: “Yẹn ma mọdona núdepope dogbọn ehetọn dali gba.”

Yẹn sọ dọmọ, “Dinvie, mì sọgan flin dọ, yẹn hù beliali atọ̀n to owhè awe he ko wáyì lẹ mẹ. Enẹ lọ wẹ to godo osó lọ ji aga finẹ.” Podọ yẹn sọ dọmọ, “Dinvie, yẹn na wlé gbékanlin kanylantọ daho de po beliali de po,” bo dọmọ, “whenẹnu wẹ mí na tindo núdùdù avivọ whenu mítọn tọn.” Enẹ lọ yọ́n, mì mọdona. (Podọ mí sọ bẹ́ atinsinsẹ́n mítọn lẹ po nake po na avivọ nẹ lọ; ovi ṣie Billy yì bo sà yé, podọ yẹn po asi ṣie Mẹda po bẹ́ ehe pò lẹ to whèjai de to whenuena yẹn lẹ́gọ̀ja.) Whenẹnu wẹ yẹn dọmọ, “Yẹn na yì zé osò ṣie bo jẹgbonu yì.” Yẹn sọ dọmọ, “Yẹn na yì wlé beliali dopo, na susu tin to gbonu finẹ wutu.” Yẹn sọ dọmọ, “Hiẹ mọdona, enẹwutu, yẹn na yì bo wlé dopo.” Podọ yẹn sọ dọmọ, “Yẹn na lẹ́gọ̀ to madẹnmẹ.”

Ewọ sọ dọmọ, “E yọ́n.”

Whenuena yẹn jẹgbonu yì, ojlẹ lọ sọ sinyẹnawu. Mì omẹ he sọn otò Niwu Hamṣiẹ tọn mẹ, kaka jẹ otò Niwu Inglandi tọn mẹ lẹ, sọgan mọdona núhe e yín to whenuena zinvlu ṣẹ̀ dido, kavi fidevo depope to gblagbla osó lẹ tọn mẹ, to whenẹnu mì ma sọ sọgan yọ́n fie mì tin te ba. Mọwẹ. Mì ma tlẹ sọgan mọ hlan alọ mìtọn lọsu. Mọwẹ yẹn jẹgbonu yì gbọn atin sinsán pẹvi delẹ mẹ di mẹhe jei odò, yèdọ gbọn aliho bibó de mẹ bo sọ tọ́nwá aga. Podọ yẹn sọ dayi ohla yũ de go, mọwẹ mì nọ ylọ dọ to ofi to otò lọ mẹ. Ṣigba hlan míwlẹ, yèdọ mí mẹhe tin to Whèyìhọ̀ dali lẹ, nọ ylọ ẹ dọ, asé kanylantọ gbémẹ tọn. To aga finẹ, yé nọ ylọ ẹ dọ, kinnikinni osó ji tọn. Kanlin dopolọ janwẹ. Asé dopolọ, he dite sọ awàgba ṣinẹnẹ, gbigblo etọn yì awàgba kantọ̀n-gbàn hunkọ, he sọgan họ̀ akwẹ he yè nọ ylọ dọ, “pounsi fọde” hunkọ. E dása aliho lọ, bọ sọ yẹn wleawu nado lẹ́ dẽ dó po osò ṣie po to whlẹndo de mẹ, ṣigba e ma pé nado dè osò lọ do e gba.

Yẹn dowezun biọ osó lẹ mẹ to aga finẹ, bo to mọyànna ohla he lọ, bo to ayipa omá he mẹ e ko họnbú go, bé mì mọdona? Yẹn sọgan sègbè etọn. Ṣigba e tindo afọ ẹnẹ. Na yẹn yọ́nẹn dọ e ma yín kanlin afọ-awenọ de gba, afọ ẹnẹ wẹ e tindo. Yẹn sọ yọ́nẹn dọ e ma yín beliali de gba, na beliali nọ dawhá po hòmẹgble po. Podọ e nasọ họnbú dẹdẹ, yèdọ asé lọ, domọ. Podọ beliali de hẹnadú afọ etọn whenuena e to zọnlinzin. Mọwẹ yẹn yọ́nẹn dó dọ, asé nẹ lọ wẹ e na yín. Podọ e sọ họnbú to alà atin de tọn godo bọ yẹn ma sọ sọgan mọ ẹn, whẹpo yẹn mọ ẹn, e ko yì.

Yẹn sọ dayi omá he e dotukla lẹ go, mì mọ, to aga osó lọ tọn podọ to odò etọn dolé, yẹn ma sọ dayi aslọ nẹ he nọ sọawúhia to ojlẹ lẹpo mẹ go gba, mì mọ, yèdọ ehe dozinvlu. Yẹn sọ họnyì odò gbọn aigba daho he tin to gblagbla osó lẹ tọn mẹ de mẹ, bo sọ tọ́njẹgbonu yì jẹ Mẹgángán delẹ mẹ bo to godojẹ na asé he lọ. Na yẹn lẹn dọ, “Yẹn na wlé e to madẹnmẹ wutu.” E sọ wá jọ, whenuena yẹn mọ tẹnmẹ de, bo sọ họnyì otẹn he yìji de mẹ, bo pọ́n lẹ́do ofi lẹpo to whlẹndo mẹ, to tódidó de mẹ dọ yẹn na mọ ẹn; bo to tódó e dagbedagbe, bo jẹte yì bo sọ họnbú devo. Mì sọgan sè awhágbè núdidọ tọn, to aliho he to nukọnna mi ji kẹdẹdilé yẹn tọ́njei gbonu dó. Mì mọ, na e to atin hẹ́ to whenẹnu yẹn ma sọ sọgan hodo e. Mì mọ, e dó oyọ́nẹn, bo to atin hẹ́ bo sọ to zinzlọn sọn atin de ji jẹ devo ji. Whenẹnu e yọ́nẹn dọ yẹn ma sọgan hodo e ba. Ojé, yẹn lẹn dọ, “O Jiwheyẹwhe ṣie, e sọgan yín to alọ depope mẹ!”

Yẹn sọ dèdo aga, bo mọ whinwhan beliali tọn, yèdọ beliali asú de. Yẹn lẹn dọ, “Yẹn na wlé e dinvie, enẹ lọ sọgbè!” Yẹn sọ mọ whinwhan lọ whladopo dogọ́, podọ yẹn sọ dèdo nukọn pẹde dogọ́, bọ yẹn sọ dayi ohó alọpãlọpa lẹpo go. Yẹn ma sọ sọgan mọ núdepope ba; bo lẹ́gọ̀yì odò gbọn awà awetọ osó lọ tọn ji. Podọ sọn whenẹnu, yẹn ṣẹ̀ ayipa, na zinvlu lọ tọn wutu. Podọ yẹn sọ mọ whinwhan lọ whladopo dogọ́, na e tin to jẹhọn mẹ to fide wutu. Yẹn sọ dọmọ, “Lala. Dinvie, etẹwẹ jọ, na jẹhọn ja gbọn aliho he ji. Bọ Beliali lọ po whinwhan etọn po ja sọn odò gbọn aliho nẹ ji, podọ yẹn sọ dása dinvie bọ jẹhọn lọ sọ tọ́n gbọn aliho devo ji ja. Mọwẹ yẹn dóna gọ̀yì fie yẹn sè owán beliali lọ tọn te tintan, bo sọ ṣẹ̀ sọn finẹ.”

Podọ to aliho ṣie ji nado gọ̀yì whégbè, yẹn sọ dása otọ̀ de, bo mọ whinwhan nukàn lẹ tọn. Podọ whenuena yẹn dása, yẹn mọ onú yũ de. Yẹn lẹn dọ, “Finẹ wẹ e te.” Yẹn sọ dlán ofló yì agà bo sọ dè osò do e mẹ, to plaun de mẹ, bo ṣite gũn. Podọ, whenuena e yín mọ, yèdọ gbékanlin daho de, kiklo daho de. Yẹn sọ lẹn dọ, “Enẹ wẹ núhe yẹn to jijlo dai, to alọ lẹpo mẹ.” Yẹn sọ dè osò do gbékanlin lọ.

Yẹn lẹn dọ, “E yọ́n!” Yẹn dè alọ ṣie bo yí ohí ṣie, bo sọ gọ̀ ẹ do godo. Podọ yẹn sọ dọmọ, “Mì pa Jiwheyẹwhe! A basi Oklunọ Jesu, na Hiẹ ko ná mi núdùdù avivọ whenu ṣie tọn wutu. Mì na opẹ hlan Jiwheyẹwhe!” Podọ yẹn sọ yí osò ṣie, bo sọ lẹn dọ, “Dinvie, yẹn nasọ gọ̀ gbọn aliho he tin to osó lẹ ṣẹnṣẹn lọ.” Yẹn dọmọ, “Pọ́n fi visunnu ṣie, na zinvlu to awúsọhia. E yọ́n na mi nado tọ́nsọn ofi bo gọ̀yì asi ṣie Mẹda de.” Yẹn sọ dọmọ, “Yẹn dóna domẹwhenu e mẹ.”

Dẹnsọlé yẹn to aga yì gbọn aliho he tin to ṣẹnṣẹn osó lẹ tọn mẹ, bo ma bọagbó vẹsi ṣie daho vệ lọ tọn, yẹn sọ to wezundo to gblagbla osó lẹ lọ tọn mẹ dolé, bo to lilẹ́pe. Do ayi e go, onú tintan he mì na yọ́nẹn lọ wẹ yín dọ, yẹn lẹn to dẽ mẹ dọ, “O Jiwheyẹwhe ṣie, fie wẹ yẹn tin te?” Na jẹhọn ko doalọte, bọ atin lẹ họ́ do yénọzo lẹ ji. Yẹn lẹnpọ́n dọ, “Fie wẹ yẹn na lẹ́ gbọn?” Yẹn yọ́nẹn dọ, yẹn jei gbọn Osó Hulikanu ji. Ṣigba e jọ bọ yẹn nọte, bo jẹdẹ́n. Yẹn sọ lẹn dọ, “Etẹwẹ to jijọ to ofi? Na yẹn ko yì na ṣẹ́ju ogbàn kavi ṣẹ́ju kande-atọ́n hunkọ, bọ yẹn sọ diọ ada na dẽ na yẹn ma sọgan mọ otẹn lọ wutu.” Yẹn sọ pọ́n hlan aga, bọ gbékanlin de yín pipla do atin go to finẹ. Yẹn ko tin to otẹn dopolọ mẹ. Yẹn sọ lẹn dọ, “Nugbo, etẹwẹ yẹn na wà?”

Nugbo, yẹn dèdo nukọn. Yẹn sọ lẹn dọ, “Yẹn na wà ẹ to asiko he mẹ, ṣigba yẹn ma payi e go gba.” Yẹn sọ pọ́n whinwhan pẹvi dopodopo to ofi lẹpo. Podọ to pinpọ́n mẹ, yẹn gbẹ́sọ to dindin i. Aslọ nẹlẹ sọ ṣẹ̀ wiwà, yẹn sọ yọ́nẹn dọ osìn agó lẹ tin to aliho, zinvlu sọ ṣẹ̀ dido, whenẹnu wẹ yẹn ṣẹ̀ ayipa e go. Na yẹn lẹn dọ, “Yẹn na yì nukọn pẹvi de,” yẹn sọ ṣẹ̀ nukọnyì. Podọ yẹn sọ lẹn dọ, “Nugbo, ehe yín onú jonọ, taidi dọ yẹn ko tin to otẹn he mẹ dai.” Yẹn sọ pọ́n, gbékanlin ṣie yín pipla to finẹ. Bé mì mọdona?

Bé mì mọdona núhe yẹn to didọ? Omẹ Indiana tọn lẹ nọ ylọ ẹ dọ, “zọnlin okú tọn.” Pọ́n, mí to zọnlinzin to ohùkan de mẹ bo sọ to lilẹ́. Yẹn lẹn dọ, alihiamẹtọ he ma sọgan búali de wẹ. Núde matin nado dọ hlan mi to atin lẹ mẹ dọ, ehe wẹ aliho ṣie gba. Bé mì mọdona?

Podọ yẹn sọ gọ̀yì godo. Yẹn sọ dọmọ, “Yẹn ma sọgan basi núṣiwà he gba.” Podọ yẹn sọ gọ̀yì godo.

Yẹn sọ dèdo gbọn gblagbla osó lẹ tọn mẹ, whenẹnu wẹ jẹhọn sọ ṣẹ̀ yinyin. O Jiwheyẹwhe ṣie, yèdọ osìn agó lẹ tin to ofi lẹpo! Ofi popo dibla dozinvlu. Podọ yẹn sọ yọ́nẹn dọ Mẹda na kú to ozán nẹ mẹ to zùngbo mẹ, na ewọ ma yọ́n lé é na pénukun ede go dó gba. Podọ visunnu ṣie Billy ko dó owhè atọ̀n kavi ẹnẹ hunkọ, yèdọ yọpọvu pẹvi de wẹ ewọ. Podọ yẹn sọ lẹn dọ, “Etẹwẹ yé sọgan wà?” Nugbo, yẹn yì ofi dindẹn bo hò atin jùjù he matindo adọ̀ delẹ, yẹn sọ lẹn dọ, “Yẹn tin to ofi gblagada de, podọ yẹn ma sọ sọgan mọ núdepope gba, na zinvlu ko wá wutu.” Dinvie, yẹn na to yìyì.

Yẹn ko din tẹnmẹ de na dẽ bo nọte to finẹ, dọ bé mẹde tin to dẽ finẹ. Yẹn nọte to finẹ kaka zinvlu do juwáyì, yèdọ na azán de kavi awetọ bo tọ́njẹgbonu wá sọn ofi lọ. Yẹn hù gbékanlin lọ, bo já ẹ bo yì dù, bo sọ wọnji sọn enẹ go. Ṣigba mì ma sọgan wà mọ gba, whenuena asi mìtọn po ovi mìtọn lẹ po tin to dindọ̀n gbenu to atin lẹ ṣẹnṣẹn. Bé mì mọdona?

Dinvie, yẹn ṣẹ̀ linlẹn dọ, “Etẹwẹ yẹn sọgan wà?” Mọwẹ yẹn sẹ̀yì nukọn pẹvi de dogọ́, bo sọ lẹn dọ, “Dinvie, mì nọte. Whenuena yẹn dása agbadò he tin to osó lẹ lọ ṣẹnṣẹn, wẹ jẹhọn to yìnyìn, bo do ayi e go yẹn dóna gbọn aliho he wáyì. Mọwẹ yẹn gbọn aliho lọ yì dó.” Podọ yẹn wá búali to ṣẹnṣẹn Atin dahodaho he tin to finẹ lẹ tọn, bo ma sọ mọdona fie yẹn tin te ba. Yẹn sọ dọmọ, “Ojé!” Mọwẹ yẹn sọ wlu to dẽ mẹ bo ṣẹ̀ fifiẹ ji dó. Yẹn sọ lẹn dọ, “Bill nọte ojlẹ pẹvi de na hiẹ ma ko dọ̀n gba,” to tintẹnpọ́n mẹ nado ná huhlọn dẽ. Hiẹ ma sọgan dohuhlọn ẹn. Lala, lala. Na gbẹtọ hòmẹ tọn nẹ na gbẹ́ to didọ hlan we dọ, hiẹ ṣinuwà.

Mì sọgan tẹnpọ́n nado dọ, dọmọ: “Yè ko whlẹn mi na yẹn nọ yì sinsẹ̀n wutu.” Mì dibú blo, ṣigba eyín mì dọngban jẹ okú whenu, whenẹnu wẹ mì na mọ dọ vogbingbọn tin to finẹ. Mọwẹ ayiha mìtọn na dọ hlan mì. Na gbẹtọ mìtọn hòmẹ tọn na dọ hlan mì dọ, mì ṣinúwà. Bé mì mọdona? Mọwẹ mì ni yọ́nẹn dó dọ, eyín mì kú mì ma sọgan mọ Jiwheyẹwhe gba. Kẹdẹdilé mí ko mọ Ẹn dó to osọzán mẹ, yèdọ Angẹli wiwé lẹ lọsu dóna ṣinyọn onú do nukunmẹ yetọn lẹ nado nọte to nukọn Etọn. Bé nawẹ mì sọgan nọte to nukọn Etọn matin Ohùn Jesu Klisti tọn na nukunmẹ ṣinyọnnú dó?

Yẹn lẹn dọ, “Yẹn na nu i tọ́n.” Yẹn sọ dèdo nukọn. Mọwẹ yẹn mọ dó dọ, yẹn ṣẹ̀ ogbè Núde tọn sè ji. Podọ whenẹnu, yẹn ṣẹ̀ fifiẹ ji dó. Yẹn sọ dọmọ, “Dinvie, eyín yẹn wà enẹ, yẹn na dọ̀n.” Mọwẹ gbẹtọ depope he búali nọ wà dó to whelẹponu, é nọ to yìyìpe to atin lẹ mẹ. Whenẹnu wẹ é na zé osò etọn bo dè do ewlọsu; kavi bo zlọn biọ odò de mẹ, bo wẹ́n afọ etọn, podọ é na mlọnayi bo kú to finẹ. Mọwẹ yẹn lẹn dó dọ, “Etẹwẹ yẹn na wà?” Whenẹnu wẹ yẹn dèdo nukọn.

Yẹn gbẹ́sọ to ogbè Núde tọn sè, he to didọmọ, “Yẹn wẹ Alọgọ alọnu-alọnu tọn to tukla whenu.” Yẹn gbẹ́sọ to nukọnyì.

Yẹn sọ lẹn dọ, “Dinvie, yẹn sè ogbè de didọ hlan mi dọ, yẹn na jẹ otẹn lọ mẹ to madẹnmẹ.” Yẹn gbẹ́sọ to nukọnyì. Podọ yẹn to yìyì bo to whékun po hòmẹhunhun po, mì mọdona. Yẹn sọ lẹn dọ, “Dinvie, yẹn ma búali gba. Ovisunnu, mọwẹ hiẹ na yọ́n fie hiẹ te! Etẹwẹ jọ do ogo we? Hiẹ ma sọgan dọ̀n gba. Na hiẹ yín wẹnyàntọ dagbe de wutu, a ma sọgan dọ̀n gba.” Po adọgbo de po, mì mọdona, yẹn dohuhlọn dẽ nado nutọ́n.

Hiẹ ma sọgan dohuhlọn de we gba. Na to aliho lọ ji finẹ to odò, podọ to alọ lilẹ́ tọn de mẹ, hiẹ sọgan dọmọ, “Ovisunnu, hiẹ ko bú, podọ hiẹ sọ yọ́nẹn. Ṣigba hiẹ ko búali.”

Yẹn gbẹ́sọ to nukọnyì, bo to didọmọ, “Pọ́n, yẹn ma búali gba! Na yẹn na nọ̀ jijọho. Podọ whenẹnu wẹ yẹn sọ mọ aliho he yẹn gbọn lọ, yẹn sọ tọ́njẹgbonu.” Onú lẹ na taidi ayihun to nukun mìtọn mẹ, na jẹhọn lọ ko dóalọte wutu. Podọ osìn agó lẹ sọ ṣẹ̀ jija do aigba di jikun, yèdọ osìn agó pẹvipẹvi lẹ he mí nọ ylọ dọ, “hò hlan aigba.” Yẹn sọ flin, “Asi ṣie po visunnu po!” Yẹn sọ dọ, “Ojé! Jiwheyẹwhe È!”

Lé yẹn sọ vọ́ Ogbè Nẹ lọ sè, É dọmọ, “Yẹn wẹ Alọgọ alọnu-alọnu tọn to tukla whenu.” Podọ to whenẹnu yẹn yín devizọ́nwàtọ Owẹn lọ tọn de, bo nọ to yẹwhehódọ to gohọ̀ he mẹ.

Podọ yẹn lẹn dọ, “Etẹwẹ yẹn sọgan wà dinvie?” Yẹn nọte bo pọ́n hlan ofi lẹpo, do ayi e go zinvlu kẹdẹ wẹ. Enẹ lọ wẹ. Núde ma sọ sọgan yín bibasi ba. Whenẹnu wẹ yẹn lẹn dọ, “Etẹwẹ yẹn sọgan wà?” Do ayi e go, yẹn dọmọ, “Dawe, yẹn ma sọ jẹ nado nọ̀gbẹ̀ ba, na yẹn ko deji do dẽ go húgan. Yẹn lẹn dọ wẹnyàntọ de wẹ yẹn, ṣigba lala.”

Podọ nọvisunnu, yẹn nọ deji do Gbigbọ Wiwé go to whelẹponu. To osò didè mẹ, yẹn ko basi kàndai de. Podọ di whèhùtọ de, yẹn gbọagbà, ṣigba yẹn deji do É go. Nado do sòpẹn do osò mẹ, yẹn gbọagbà, ṣigba É hẹn mi nado basi kandai de dogbọn enẹtọn dali to aihọn lọ mẹ. Bé mì mọdona? Yẹn nọ dèsò do gbékanlin na gadidi nùọtọ̀n-kanwekò kavi fẹnẹ hunkọ. Yẹn dèsò bo sọ hù gbànatọ́n bo ma gbọawupo na dopo. Eyín mì jlo, mì sọgan dindona to fidepope. Bé mì mọdona? E ma yín yẹn, ṣigba Ewọ Mẹhe go yẹn gboadọdo wẹ.

Finẹ wẹ yẹn te bo lẹn dọ, “Etẹwẹ yẹn sọgan wà? Etẹwẹ yẹn sọgan wà?”

Do ayi e go, yẹn flin núhe Ogbè lọ dọ, dọmọ: “Yẹn wẹ Alọgọ alọnu-alọnu tọn to tukla whenu.”

Yẹn sọ lẹn dọ, “Bé Jiwheyẹwhe wẹ to Hódọ hlan mi?” Whenẹnu wẹ yẹn hùn gbakun ṣie. Gbakun he yẹn do nọ tọ́nwhẹn, ehe yè yí duku vệ pẹvi de sìn lẹ́do. Yẹn zé e dai bo dè awugbo ṣie, na e ko fá. Podọ yẹn bọ awugbo ṣie dai, bo wléawuna osò ṣie pannukọn apáwhé atin de tọn. Whenẹnu wẹ yẹn dọ, dọmọ: “Otọ́ Olọn tọn, dinvie yẹn to wuwlu to dẽ mẹ na yẹn to ogbè de sè he to hódọ hẹ mi. Bé Hiẹ wẹ?” Yẹn dọmọ, “Oklunọ, yẹn na yígbè hlan We dọ, yẹn ma yín wẹnyàntọ gba. Yẹn ma mọ aliho nado tọ́n. A dóna gọalọna mi. Yẹn ma jẹ nado nọ̀gbẹ̀ bo wà núhe yẹn ko wà lẹ ba gba, nado wá ofi podọ nado to linlẹn dọ, yẹn mọdona onú susu ma nado búali gba. Yẹn dóhudo Towe Oklunọ È. Yọnnu dagbe de wẹ asi ṣie. Ovi ṣie, ovisunnu ṣie, na onọ etọn ko yì, podọ ewọ sọ to tintẹnpọ́n nado yín onọ de hlan ẹn, dinvie sọ yẹn wlealọ hẹ ẹ. Podọ ewọ sọ sọawúhia po ovi pẹvi de po, to gblagbla atin lẹ tọn mẹ, yé omẹ awelẹ pó na kú to ozán he mẹ wẹ? Podọ jẹhọn nẹ lọ ko sọ yì odò, yé ma sọ sọgan mọdona lé yé na nọ̀gbẹ̀ dó. Yé na kú to ozán he mẹ? Enẹwutu Jiwheyẹwhe È, A dike yé ni kú blo. Mọ A sọ dike yé dọ̀n blo! Na yẹn ko búali Jiwheyẹwhe È! Yẹn ma mọ aliho nado tọ́n gba. Bé Hiẹ ma na jale bo gọalọna mi wẹ? Podọ joylando ṣie na mi na aliho dẽ titi tọn! Yẹn ma sọgan wà núde to Hiẹ mẹ vo, na Hiẹ wẹ Alihiamẹtọ ṣie. Oklunọ È, gọalọna mi!”

Whenẹnu wẹ yẹn fọ́nṣite bo dọmọ, “Niṣẹ,” bo yí duku ṣie po awugbo ṣie po, bo gọ̀ gbakun ṣie do ota bo sọ zé osò ṣie. Yẹn sọ dọmọ, “Do ayi ego, yẹn na dó dẽ do aliho dagbe ji na yẹn nido yọ́n lé yẹn na yì dó, yèdọ do wuntuntun dagbe ṣie mẹ; bọ yẹn nasọ yì titegbe gbọn aliho dopo gẽ ji, na yẹn to zọnlinzin lẹ́do ofi de, yẹn ma sọ yọ́n ofi lọ gba. Ṣigba yẹn na gbọn aliho he Hiẹ na dọ hlan mi ji, Oklunọ Jiwheyẹwhe, Alihiamẹtọ ṣie È.”

Yẹn ṣẹ̀ zọnlinzin ji gbọn aliho he. Yẹn sọ dọmọ, “Ewọ die, podọ yẹn dóna hẹn dẽ yise to e mẹ. Yẹn jei gbọn aliho he. Yẹn na gbọn aliho he titegbe. Yẹn ma na gbọn aliho devo gba, adavo ehe lọ. Yẹn yọ́nẹn dọ yẹn to gbesisọ mẹ. Enẹwutu, yẹn na gbọn aliho he.” Eyín yẹn ko gbọn aliho nẹ yì, yẹn na mọ dẽ to otò Kanada tọn mẹ. Bé mì mọdona?

Do ayi e go, yẹn mọ dọ Núde jẹdo abọ́ ṣie ji, yèdọ alọ he taidi alọ gbẹtọ tọn de, podọ to whenẹnu yẹn l ẹ́godo to whlẹndomẹ nado pọ́n. Omẹ depope matin to ote to finẹ gba. Whenẹnu wẹ yẹn lẹn dọ, “Etẹwẹ enẹ yín?” Dinvie, Biblu tin to nukọn ṣie fi. Jiwheyẹwhe Alihiamẹtọ podọ Whẹ̀datọ ṣie, tin to ofi ga. Whenẹnu wẹ yẹn pọ́n hlan aga. Do ayi e go, to godo aliho he ji tọn, zinvlu nẹ lọ họ́nwun gblegede sọmọ bọ yẹn do sọgan mọ hlan atọhọ̀ he tin to aga Osó Hulikani tọn. Podọ nado jẹte sọn e ji, di ninọ̀mẹ dagbe wẹnyinyàn ṣie tọn, yẹn ṣẹ̀ tejẹ sọn e ji, to whenẹnu ozán ko pọ́ kúkú. Whenẹnu wẹ yẹn yawu lẹ́godo bo dèdo dolé. Podọ yẹn sọ hùn gbakun ṣie bo zé alọ ṣie lẹ, bo to didọmọ, “Do alihia mi Jiwheyẹwhe È, na Hiẹ wẹ Alihiamẹtọ ṣie.”

 Mọwẹ yẹn dèdo dó. Yẹn dóna dèdo po huhlọn ná dẽ po, po onú mọhunkọ tọn lẹ po. Podọ to ehelẹ po godo, do ayi e go whenuena zinvlu dó, gbékanlin lẹ to linlọn to nukọn ṣie, po onú nẹlẹ pó po. Yẹn ma sọ sọgan lẹn núde hú nado hẹn dẽ to aliho dopolọ ji hlan osó lọ dali.

Podọ lé yẹn yọ́nẹn dó dọ eyín yẹn sọgan hẹ aga, Dawe Dẹntọni po yẹn po tẹnpọ́n nado dè aliho. Mí plá telefonu kán lọ sọn Osó Hulikani tọn lọ kọ̀n gbọn aliho, na awàgba atọ̀ndá kavi ẹnẹ hunkọ, yèdọ jẹ oslá lọ mẹ. Podọ mọwẹ e yì dó titegbe, ṣigba dogbọn osìn agó he tin to finẹ lẹ tọn dali, mì ma sọgan dọ. Bé mì mọdona? Mọwẹ jẹhọn sọ to yìnyìn dó po núhe pò lẹ po, zinvlu po jija osìn agó tọn lẹpo po, sọmọ bọ mì ma sọgan yọ́n fie mì te. Do ayi e go, onú dopo he yẹn yọ́nẹn nado wà, to godo he zinvlu do wẹ nado to yìyì to aliho dopolọ ji, yèdọ jẹ osó lọ kọ̀n. Na e jẹ dọ yẹn ni hẹ aga osó lọ tọn, na atọhọ̀ osó lọ tọn tin to aga etọn, mọwẹ yẹn dóna zinzọnlin dó na awàgba ṣidopo nado jẹ e kọ̀n. Mì lẹnpọ́n, zinvlu nẹ he to wunhọ́n to godo dẹnsọ awàgba ṣidopo, podọ nado dása odò dopo whẹpo yẹn nido sọgan jẹ osó lọ kọ̀n!

Enẹwutu yẹn diọ ada na osò ṣie do alọ he mẹ, bo zé ehe lọ do aga, na yẹn ko plá okàn lọ do atin lẹ go di nado yì titegbe, yèdọ telefonu kàn lọ jẹ azọ́nwhé etọn lọ kọ̀n, mọwẹ é sọgan dọhó hlan asi etọn, podọ ylọ sọn finẹ, sọn osó lọ kọ̀n. Do ayi e go, whenuena yẹn jei nado gọalọna ẹn jẹ odò, e jai. Podọ mọwẹ yẹn zé alọ ṣie daga dolé, bo to didọmọ, “Ojé, Jiwheyẹwhe È, basi na alọ ṣie ni jẹ okàn nẹ lọ go.” Lé yẹn to zọnlinzin awà vẹ́ mi, mọwẹ agbọ sọ pé mi dó, sọmọ bọ yẹn ma sọ sọgan hẹnnú go gligli, bọ yẹn dóna jó okàn lọ do. Do ayi e go, yẹn diọ osò lọ sọn alọ de mẹ jẹ awetọ mẹ; yẹn sọ gọ̀ afọ awe do godo, to whenẹnu yẹn zé alọ ṣie lọ daga bo ṣẹ̀ zọnlinzin ji, bo to zọnlinzin. Whenẹnu wẹ zinvlu ṣẹ̀ dido bọ jẹhọn sọ to yìnyìn. Yẹn ko hẹn núde go, bo dọmọ, “Mọwẹ! Lala, e ma yín mọ gba.” Podọ mì ma dike na telefonu kàn lọ ni dè ogbè he ma sọgbè de tọ́n blo.

Do ayi ego, yèdọ to ojlẹ pẹde godo, whenuena agbọ́ ṣẹ̀ pipe mi ji, wẹ alọ ṣie jẹ núde go. Ojé! Yè ko din mi mọ to whenuena yẹn búaliho. Yẹn hẹn telefonu kàn lọ go. Mọwẹ yẹn sọ zé osò ṣie dai dó, bo hùn gbakun ṣie sọn ota ṣie ji bo gbọṣi finẹ. Whenẹnu wẹ yẹn dọmọ, “O Jiwheyẹwhe ṣie, nawẹ e yín hòmẹhunhun sọ̀ to whenuena yè din mẹhe búali mọ!” Podọ yẹn sọ dọmọ, “Kaka jẹ opòdo okàn lọ, yẹn ma na tún i gba. Na yẹn hẹn e go. Na e na plán mi jẹ fie mẹvivẹ ṣie lẹpo te to aigba he ji. Yèdọ asi ṣie po ovi ṣie po ma yọ́n fie yẹn tin te to nugbo de mẹ gba, podọ yé ma yọ́n lé yé sọgan támiyọn dó gba, bo ma sọ mọdona núhe yé na wà, mọwẹ jẹhọn sọ to yìnyìn dó, podọ onú lẹ to zinzlọn bo sọ to tejẹ sọn atin ji.” Yẹn ma tlẹ sọgan jó okàn lọ do gba. Do ayi e go, yẹn sọ hẹn e go kaka jẹ fie mẹvivẹ ṣie lẹ te to aigba ji.

Do ayi e go, dọpọ́n ylankan de wẹ ehe lọ, podọ dọpọ́n daho de nado din aliho ṣie luntọ́n, ṣigba enẹ ma tlẹ jẹ ofi de gba. Podọ to gbèdopo, yẹn búali to ylando mẹ bo to dindanpe gbọn agùn lẹ mẹ, bo to tintẹnpọ́n nado din Núde mọ. Mọwẹ yẹn yì opli de dó to yé mẹhe yise to kọlilẹ́wá awetọ Klisti tọn mẹ to Azán-Ṣinawetọ gbè, bọ yé sọ dọ hlan mi, dọmọ: “Yìn Gbọjẹzán lọ bo dóalọtena olàn dùdù.” Podọ ga, yẹn sọ yì agùn Baptisti tọn ji, nado dọ jẹnukọn, agùn Baptisti tọn dọ, “Fọ́n bo dọ hlan yé dọ, eyín hiẹ yise to Jesu Klisti Ovi Jiwheyẹwhe tọn mẹ, yẹn na baptizi we, mọwẹ.” Núdepope matin to finẹ gba. Ṣigba to azán dopo de gbè, yẹn tọ́njẹgbonu biọ akán gbigba delẹ mẹ bo bẹ́ alọ ṣie lẹ daga, whenẹnu wẹ alọ ṣie lẹ hẹn Núde go; kavi yẹn ni dọ, dọ Núde hẹn ogo é. Yèdọ Okàn Ogbẹ̀nọ de he yín Alihiamẹtọ lọ. Mọwẹ É hẹn mi dó kaka jẹ ofi, yẹn ma sọ to alọ ṣie na dèsẹ sọn Okàn lọ go gba. Podọ alọ ṣie gbẹ́sọ to É go. Enẹwutu, zédai lẹ po titò gbẹtọ tọn lẹ po sọgan wà núdepope he yé jlo, yẹn na gbẹ́sọ tẹ́do Alihiamẹtọ lọ go. Na núhe tin to aigba ji lẹpo kavi ehe to Olọn mẹ lẹ, yín onú họakwẹ de hlan mi, podọ yé omẹ pó tin to Okàn he lọ mẹ. Na É ko hẹn mi kaka wá jẹ ofi to jijọho mẹ, enẹwutu yẹn na dotundo Ewọ go to aliho he pò lẹpo mẹ. “Whenuena Ewọ Gbigbọ Wiwé lọ wá, É na plán mì bo nasọ doalihia mì biọ nugbo lẹpo mẹ…”

Họntọn ṣie lẹ emi, E hẹn mi wá jẹ fie yẹn tin te to egbé. Mọwẹ E sọ hẹn mi yín núhe yẹn yín. Enẹwutu wẹ e na yín ayajẹnu de hlan mi nado do E hia mì. Yèdọ Alihiamẹtọ lọ kẹdẹ wẹ yẹn mọdona, yín e yín to aigba ji fi kavi to aga dọn. Ewọ wẹ yín Alihiamẹtọ ṣie to whenuena yẹn yì nukàn mẹ. Ewọ dopolọ sọ wẹ Alihiamẹtọ ṣie to whenuena yẹn yì whèvihù gbè. Podọ Ewọ wẹ Alihiamẹtọ ṣie to whenuena yẹn dọhó hlan omẹ de. Podọ whenuena yẹn to yẹwhehódọ Ewọ wẹ Alihiamẹtọ ṣie. Ewọ wẹ Alihiamẹtọ ṣie to whenuena yẹn damlọn.

Podọ whenuena yẹn wá jẹ kúdònu, É na nọte to otọ̀ tó. Na É na hẹn mi gbọn aliho ji. “Yẹn ma obú na di na oylan de, na Hiẹ tin to dẽ. Aglọ Towe po opò Towe po; yé hòmẹmiọnna mi bo nasọ hẹn mi dása otọ̀ lọ.”

Mì gbọ mí ni hodẹ̀.

Otọ́ Olọn tọn, Yẹn dopẹna We na Alihiamẹtọ lọ, Mẹhe to pinplán mi. Otọ́ È to whedelẹnu, yẹn ma nọ sè ogbè Etọn to dẽ gba, na obú nọ di mi. Yẹn jlo dọ Ewọ ni nọ dọnsẹpọ́ mi na yẹn ma yọ́n whenuena yẹn na biọ osìn lọ mẹ gba. Enẹwutu yẹn jlo dọ É ni nọnọ̀ dẽ. A jo mi do gbèdé blo, Oklunọ ṣie! Na yẹn ma sọgan dọhó, mọ yẹn ma sọgan dọyẹwhehó, kavi yẹn ma sọgan yànwẹn to zunkàn mẹ, kavi yẹn ma sọgan hùwhèvi to otọ̀ tó, podọ yẹn ma sọgan kùn mọto ṣie gba, na núdepope matin he yẹn sọgan wà to Hiẹ mẹ vo gba. Hiẹ wẹ Alihiamẹtọ ṣie. Nawẹ yẹn yín hòmẹhunnọ nado dọ to agùn he mẹ to whèjai he dó dọ, Hiẹ yín Alihiamẹtọ ṣie to onú lẹpo mẹ, podọ lé Hiẹ hẹn mi gọ̀wá whégbè dó!

 Yẹn lẹnnúpọ́n to azán de gbè wáyì; e ma húgan owhè pẹde wáyì gba, whenuena yẹn nọte to ofi to aliho he ji, podọ na hẹnnumẹ ṣie lẹ wá núhe jẹagọ de dai, bọ mẹdepope ma sọgan dọhó hlan mi. E wá pò yẹn ṣokẹdẹ nado sẹ̀n. Na mẹdepope ma sọ jlo nado wà núde dopọ́ po yẹn po gba. Yé nọ dọ, dọmọ: “Otọ́ ṣie nọ nùahanmú.” Podọ Oklunọ sọ mọ dọ mẹdepope ma sọ to hódọ hẹ mi ba. Ṣogan, yẹn yinwanna gbẹtọ lẹpo. Ṣigba to azán dopo gbè yẹn hẹn Okàn lọ go! Dinvie, Oklunọ È, yẹn lẹn dọ yẹn na biọ zungbó lọ mẹ nado gbọjẹ pẹde. Etẹwẹ hẹn mi wà mọ? E ma yín gbẹtọyínyín ṣie, kavi e ma yín wépinplọ́n ṣie gba; na yẹn yín ode. Ṣigba Hiẹ wẹ Oklunọ. Hiẹ Oklunọ È, A hẹn mi lẹzùn agbatọnọ to onú helẹ mẹ blo, ṣigba Hiẹ sọ hẹn mi hù whèvi daho lọ, na Hiẹ yọ́nẹn dọ yẹn ko dójlo nado basi i. Hiẹ ko ná mi otọ́ lẹ po onọ lẹ po, podọ mẹmẹsunnu lẹ po mẹmẹyọnnu lẹ po. Hiẹ ko sọ ná mi jijọho ṣie. Hiẹ sọ ná mi asi de, bo sọ ná mi whẹndo. Oklunọ È, Hiẹ wẹ Alihiamẹtọ ṣie. Gbọ yẹn ni hẹn alọ Towe go, A sọ dike yẹn búali gbèdé blo. Eyín agbọ́pe alọ ṣie tintan, yẹn nasọ diọ awetọ. Enẹwutu Oklunọ È, gọalọna mi.

Podọ dinvie, na dopodopo mìtọn he tin to ofi ni hẹn Okàn Ogbẹ̀nọ doponẹ lọ go, Oklunọ Gbigbọ Wiwé he yín Ogbẹ̀ mítọn, yèdọ Mẹhe yín Ogbẹ̀námẹtọ lọ. Podọ na É nido plán mí omẹ pó jẹ Aigba ayajẹnọ nẹ lọ ji, fie tuklajijẹ ogbẹ̀ he tọn po azọ́nwiwà mítọn to aigba ji po na dóalọte te, podọ to whenẹnu yọnhopipo ma na tin ba, gbẹtọ madogannọ de ma na tin finẹ ba, mọ ozán tukla tọn de ma na tin ba, avi po odẹ̀hiho po ma na tin ba, mọkẹdẹ wẹ omẹ ylọ wá agbà nukọn ma na tin ba gba, ṣigba mí na lẹzùn jọunjọja to finẹ kakadoi, bọ azọ̀nylankan po awubla po ma na tin ba gba. Mọ oylan ma nasọ tin ba, podọ mí nasọ nọ̀gbẹ̀ to dódó Jiwheyẹwhe tọn mẹ to owhèta he já lẹpo mẹ, kaka jẹ madopòdo mẹ. Basi na mí, Otọ́ È.

Podọ dinvie, Otọ́ È, eyín mẹdepope tin to ofi to ozán he mẹ he ma ko hẹn Okàn Ogbẹ̀ tọn lọ go, na yé ni din In mọ to dinvie. Podọ Gbigbọ Wiwé he yín Alihiamẹtọ… Podọ yẹn sọgan dọ sọn ayiha ṣie mẹ po alọ ṣie po do Ohó Towe ji, na Ewọ ṣokẹdẹ wẹ nugbonọ. Na yẹn jẹagọ to onú susu mẹ. Ṣigba Ewọ wẹ nugbonọ. Enẹwutu Oklunọ È, gbọ É ni tin po yẹn po bo gbọ yẹn ni tin po Ewọ po ga. Podọ na mẹhe pò to ofi lẹ, he mayọ́n Ẹn to whèjai he, gbọ na yé ni hẹn alọ Etọn he ma nọ diọ gbèdé go, na yé nido yín pinplán kakadoi.

Podọ to azán de gbè, mí na wá jẹ otọ̀ lọ tó, bọ avivi na tin to afọnnu azán lọ tọn ga. Ohù hóhó lọ nasọ to gbigbó gángán. Whenẹnu wẹ Jọdani hóhó lọ na to fútúfútúyẹ̀n, bọ okú nasọ to ogbẹ̀ finyọn sọn mí mẹ. Ṣigba Jiwheyẹwhe È, yẹn ma nasọ dibú gba. Na yẹn ko dọwhẹ̀ etọn sọn asiko dindin mẹ wáyì. Yẹn jlo na dè awhàngbakun lọ, kẹdẹdi awhànfuntọ de, yẹn na lilẹ́, bo pọ́n hlan fie Okàn lọ ko do alihia mi jẹ. Bo pọ́n zùngbo he mẹ yẹn tọ́nsọn wá, podọ owunkàn lẹ, podọ osé didá he ko dalàn ogo é lẹ, ṣigba to popolẹpo mẹ yẹn tẹ́do Okàn lọ go janwẹ. Kẹdẹdilé Hiẹ ko dọ dó, mọwẹ hànpatọ lọ dọ dó ga, dọ, “Mẹdelẹ gbọn osìnmẹ wáyì, podọ mẹdelẹ gbọn osìngigọ́ mẹ wáyì, mẹdevo lẹ gbọn tukla sisósisó mẹ wáyì, ṣigba yé omẹ pó gbọn Ohùn lọ mẹ wáyì.” Podọ yẹn jlo nado yí Ehe, yèdọ Ohi Nùawenọ hóhó lọ, ehe ko whlá mi to aliho lọ ji, bo sọ gọ̀ Ẹ do apà Etọn mẹ, bo dawhá jẹgbonu, dọmọ: “Otọ́ È, do ohún lọ hlan mi to afọnnu he, na yẹn já whégbè.” Oklunọ È, Hiẹ na tin to finẹ. Na Hiẹ ko dopa Etọn wutu. Hiẹ ma sọgan jai sọn e mẹ.

Dona omẹ dopodopo he tin to ofi to dinvie lẹ. Podọ eyín yé ma yọ́n lé yé sọgan hẹn Okàn he lọ go dó, podọ eyín yé ma ko doalọ Ego pọn, to dinvie na alọ wiwé lẹ ni yí aga, alọ he dohudo lẹ, podọ alọ he to díndín I lẹ, podọ na yé ni doalọ Okàn ogbẹ̀nọ tọn he na plán yé yì ojlo ayiha yetọn lẹ tọn kọ̀n, jijoho pipé de podọ ojlo pipé de po, podọ gbọjẹ to Klisti mẹ.

Po ota mítọn lẹ po to odo, bé alọ delẹ tin to finẹ he na yín zizé doaga, bo na dọmọ, “Gbọ na yẹn… Hẹn alọ ṣie go”? E yọ́n, Jiwheyẹwhe ni dona mì.

Whenuena aliho lọ to zinvlu do, mẹvivẹ Oklunọ È, dọnsẹpọ́ mi,

Whenuena ogbẹ̀ ṣie ko pọyìyì;

Yẹn na nọte to otọ̀ lọ tó, hiali afọ ṣie, bo hẹn alọ ṣie go,

Hẹn alọ ṣie go, mẹvivẹ Oklunọ È, bo hiali mi.

Bé mẹdevo lẹ tin to finẹ nado zé alọ yetọn lẹ daga, bo dọmọ, “Oklunọ È, yẹn jlo na dó dọpọ́n alọdómẹgo Okàn ogbẹ̀nọ tọn lọ to whèjai he. Yẹn jlo na dó dọpọ́n dọ Klisti ko jona ylando ṣie lẹpo na mi, podọ yẹn sọ jlo nado lẹzùn núdidá yọ́yọ́ de sọn ojlẹ he mẹ zọnmi”? Na Jiwheyẹwhe ni dona mì. Bé mẹdevo de sọgan dọ, dọmọ: “Oklunọ È, gbọ ma dóalọ ogo We. Na yẹn ni wọnji dẽ go”? Na Jiwheyẹwhe ni dona mì, nọviyọnnu. “Gbọ na yẹn ni wọnji dẽ go, bo din I mọ to Hiẹ mẹ Oklunọ.” Na Jiwheyẹwhe ni dona mì. Podọ na Jiwheyẹwhe ni dona mì. Mọwẹ. “Oklunọ È, gbọ na yẹn ni wọnji dẽ go. Dikena yẹn ni wọnji dẽ go.” Na Jiwheyẹwhe ni dona mì, nọvisunnu. Na Jiwheyẹwhe ni dona mì, nọviyọnnu. “Dikena yẹn ni wọnji sọn núyọ́nẹn ṣie lẹpo go.” Na Jiwheyẹwhe ni dona mì nọviyọnnu. Mì ma gànjẹ núyiwà gbẹtọ tọn lẹ go blo. Adavo dọ, mì ni hodo Alihiamẹtọ lọ, na Ewọ na plán mì biọ Nugbo lẹpo mẹ. “Plán mi, Oklunọ Jesu È plán mi.” Na Jiwheyẹwhe ni dona mì to godo finẹ. Ojé, yè ko zé alọ susu daga, bo to tenọpọ́n whlẹngan.

Agbà lọ tin to ofi, ṣigba mí ma sọgan ylọ omẹ lẹ wá e kọ̀n, na gbẹtọ lẹ ko sinayin lẹ́do e pé. Ṣigba É tin to finẹ. Mì yọ́nẹn dagbedagbe, dọ, whenuena mì zé alọ mìtọn lẹ daga, núde jọ to ayiha mìtọn mẹ. Enẹwutu wẹ Jesu dọ, dọmọ: “Mẹdepope he sè Ohó ṣie bo sọ yise to Ewọ he do mi hlan mẹ, tindo Ogbẹ̀ madopòdo.” Bé mì mọdona? Do ayi e go, dòtọ̀ baptẹm tọn he gọ́na osìn tin to ofi. Enẹwutu, whenu susu na tin na baptẹm. Mì gbọ mí ni hodẹ̀.

Otọ́ mítọn he tin to Olọn mẹ, owẹn pẹvi he tọ́njẹgbonu to whèjai he gbọn ogbè sinsinyẹn de dali, yẹn sọ lẹn dọ Gbigbọ Wiwé ko tọ́njẹgbonu bo yì fie e jẹ dọ É ni yì. Podọ Oklunọ È, gbẹtọ susu tin to ofi whèjai he, gbẹtọ di fọtọ̀n kavi okò hunkọ zé alọ yetọn lẹ daga dọ, yé dó hudo Alihiamẹtọ lọ tọn. Whenẹnu wẹ yé mọ dọ, yé ko klọ yédelẹ. Yé to tintẹnpọ́n nado dọ, dọmọ: “Yẹn tin to gbèsisọ mẹ,” ṣigba to sisósisó ayiha yetọn lẹ tọn mẹ, yé yọ́nẹn dọ yé ma sọgbè gba. Enẹwutu wẹ yé do jlo na dó dọpọ́n Towe Oklunọ. Yé jlo Alihiamẹtọ lọ. Mọ yé sọ jlo nado biọ E mẹ. Hiẹ ma yín Omẹ pẹvi gba. Do ayi e go, yé jlo nado biọ gbejizọnlin lọ mẹ. Yé ma mọdona lé yé sọgan biọ e mẹ dó gba. Mọ mẹdepope ma sọ mọdona lé e na plán yé biọ e mẹ dó gba; adavo Hiẹ Dopo kẹdẹ. Yé ja na Alihiamẹtọ he Jiwheyẹwhe ko dè lọ, yèdọ Gbigbọ Wiwé lọ. Enẹwutu wẹ yé do zé alọ yetọn lẹ daga.

O Gbigbọ Wiwé podọ Alihiamẹtọ È, jẹdo yé ji bo jona ylando yetọn lẹ. Podọ jona núṣiwà yetọn lẹ. To whèjai he, hẹn yé biọ Agbasa Klisti tọn mẹ, yèdọ fie yé sọgan mọ miyọn Jiwheyẹwhe tọn to dindanpé gbọn Okàn he na plán yé jẹ Jọdani bo dása Jọdani jẹ Otò pagbè tọn lọ mẹ. Enẹwutu, na yé ni jẹgodona Ohó lọ. Na Ohó lọ dọ, dọmọ: “Mì lẹnvọjọ, na yè ni baptizi dopodopo mìtọn to Oyín Jesu Klisti tọn mẹ.” Na yé ni ma basi i to Oyín devo de tọn mẹ blo. Na yé ni hodo Ohó lọ, na Ewọ lọ kẹdẹ wẹ na yín Alihiamẹtọ yetọn. Enẹ wẹ aliho he ji mí na gbọn kaka jẹ whenuena mí hẹn Alihiamẹtọ lọ go. Basi na mí Oklunọ È. Na yé ni yín Towe. Dinvie, yé tin to alọ Towe lẹ mẹ, kẹdẹdi awhàngbatọ lẹ bọ mẹde ma sọgan dọn yé sún sọn alọ Towe lẹ mẹ gba. Yẹn yise dọ, Hiẹ na kẹalọyí yé di mẹfligọ̀ lẹ. Yẹn mọ dọ, yé zé alọ yetọn lẹ daga, na yé ma tlẹ sọgan wà mọ adavo Gbigbọ Wiwé dọhó hlan yé. Enẹ wẹ Hiẹ, Mẹhe yín Gbigbọ Wiwé podọ Alihiamẹtọ lọ.

Do ayi e go, yé mọ dọ ojlẹ lọ to sisẹpọ́ bọ avivi to aigba ji ṣinyọn, zédai dahodaho lẹ po onú lẹ po to pipli dopọ́ lẹ po, mọ agùn lẹ loṣu sọ to núwà dopọ́, bo sọ to dopoyín. Podọ Jiwheyẹwhe È, ehe yé to tintẹnpọ́n nado dọ, “Yé omẹ he tindo onú gbọnvo lẹ dóna tọ́nsọn ofi nado yì otò Alaska tọn mẹ.” Podọ núhe yé to gbèdè pannukọn lẹ, ma yín onú yọ́yọ́ de hlan mí gba, na Alihiamẹtọ Daho lọ ko do enẹ lọ hia mí to aliho Ohó lọ tọn mẹ. Dinvie, mí ṣẹ̀ zọnlinzin gbọn apáwhé Etọn ji.

Jiwheyẹwhe Otọ́ È, Hiẹ ko dọhó hlan yé to whèjai he, yẹn sọ gọ̀ yé do alọ Towe mẹ dinvie taidi alè Ohó lọ tọn. To Oyín Jesu tọn mẹ.

Dinvie kẹdẹdilé mí dota mítọn lẹ do odò dó, Otọ́ È, duku lẹ tin to agbà lọ ji, yèdọ ehe tin na awutunọ lẹ po yọpọvu flinflin lẹ po, po onọ delẹ po, podọ nọviyọnnu delẹ po nọvisunnu delẹ po ga; podọ ehe yín aliglọnnú devo lẹ po ga to yé mẹ. Podọ dinvie, yẹn dọn yé sẹbọdo dẽ go. Dinvie, mí hia to Biblu mẹ dọ, yé dè duku po kẹyẹ po sọn agbasa Paul tọn go bo do hẹnazọ̀ngbọna azọ̀ntọ lẹ, bo sọ yàn gbigbọ mawé sọn yé he tindo gbigbọ mawé lẹpo mẹ gbọn yé dali. Dinvie Oklunọ È, mí yọ́nẹn dọ gbẹtọ wẹ Paul, yèdọ gbẹtọ poun de. Ṣigba amìsisá Gbigbọ Wiwé tọn he tin to é ji wẹ klán duku lẹ lọ do wiwé, podọ omẹ lẹ yise dọ apọsteli Towe wẹ ewọ. Dinvie, yè ko yí Paul sọn mí de, ṣigba Alihiamẹtọ lọ ma wẹ gba, na É gbẹ́sọ tin to ofi wutu. Podọ yẹn sọ hodẹ̀ Jiwheyẹwhe È, dọ Hiẹ ni dona duku helẹ, podọ na Alihiamẹtọ lọ ni plán yé jẹ otẹn lọ mẹ, yèdọ biọ mẹdezewhè mlẹnmlẹn mẹ.

Mí sọ hia dogọ́ dọ, whenuena Islaẹli to hihodo Alihiamẹtọ yetọn, do ayi e go whenuena yé wá jẹ Ohù Vệ tó, to nukọnyìyì mẹ yè hẹn yé dote; podọ Alihiamẹtọ yetọn jẹnukọn. Etẹwẹ lò? Nado dogigo Etọn hia. Do ayi e go, whenuena tódidó lẹpo vọ, whenẹnu wẹ Jiwheyẹwhe dèkọ̀pọ́n yé gbọn Dòtin Miyọnnọ nẹ lọ mẹ, mọwẹ obú daho de jẹ ohù vệ hóhó podọ kúkú nẹ lọ ji dó bọ e sọ jóagọyì godo, lé wẹ ali tọ́n dó gbọn finẹ yì na ovi Islaẹli tọn lẹ jẹ aigba pagbè tọn ji.

Nugbonugbo Oklunọ È, A gbẹ́sọ to Jiwheyẹwhe dopolọ yín tẹgbệ. Omẹ helẹ sọgan yín Yisenọ, kavi sọgbè to aliho azọ́n yetọn lẹ tọn mẹ, ṣigba yè dọn yé biọ núglọ fie awutu ko ján yé dote te. Enẹwutu, dinvie dèkọ̀pọ́n yé hlan gbọn Ohùn Jesu tọn mẹ to whèjai he, na obú ni jẹ Aovi ji, na é ni họnyì godo, podọ na ovi Towe lẹ nido sọgan gbọn aigba pagbè azọ̀nhẹngbọ yetọn tọn ji yì. Basi na mí Otọ́. Yẹn do azọ̀nhẹngbọ hlan sọn agbasalan ṣie go biọ agbasalan yetọn lẹ mẹ to Oyín Jesu Klisti tọn mẹ.

Yẹn zé togùn he daga to nukọn Towe, podọ gbọn yise dali yẹn zé yé biọ Agbà gigonọ Jiwheyẹwhe tọn mẹ biọ Olọn mẹ aga. Na ojlo azọ̀n tọn lẹpo, podọ núdepope he yé tindo jẹagọ, kavi núdepope he jẹagọ to gbẹ̀zán yetọn lẹ mẹ to fidepope, Jiwheyẹwhe È, súnsún yé sẹ, bo yí yé do basi Towe titi tọn. Jiwheyẹwhe È, hẹn azọ̀ngbọna yé. Podọ na Huhlọn he zé Jesu tite sọn yọdòmẹ ni diọ agbasa kúkú yetọn lẹ bo hẹn yé yín núdidá yọ́yọ́ to Klisti mẹ. Ná yé jijọho po hlọnhlọn po nado sẹ̀n We.

Flin mi Oklunọ È, na devi Towe wẹ yẹn. Gọ́alọna mi nado nọte to hùdo odẹ̀ tọn mẹ. Yẹn sọ hodẹ̀ dọ Gbigbọ Wiwé na plán mí bo sọ yí mí zán, bo sọ hlẹali mí kaka jẹ azán he gbè mí na pé Jesu Klisti te nukun na nukun, to Wiwá gigonọ Etọn tọn mẹ to whenuena mí na pé É to jẹhọn mẹ nado yì Alọwle hùnwhẹ kọ̀n. Mí biọ ehelẹ pó to Oyín Klisti tọn mẹ. Niṣẹ.

Yẹn yinwanna Ẹn, … (Hiẹ ló?)
Na Ewọ whẹ́whẹ́ wẹ yinwanna mi
Bo ko súahọ́ fligọ̀ ṣie tọn
To atin Kalvali tọn ji.

Dinvie, eyín mì ma sọgan yinwanna mìnọzo, yèdọ mẹhe to mì mọ lẹ, nawẹ mì sọgan yinwanna Ewọ Mẹhe mì ma mọ dó? Enẹwutu dinvie, whenuena mí na to ohàn Yẹn yinwanna Ẹn tọn lọ ji, mì gbọ mí ni ná alọ wanyin tọn mínọzo lẹ.

Yẹn yinwanna Ẹn, …

[Nọvisunnu Branham ná alọ mẹhe sinai lẹ́do é lẹ-Ed.] Na Jiwheyẹwhe nì dona mì, Nọvisunnu Nẹvili. [Agùn lọ gbẹ́sọ to hànji.]

To atin Kalvali tọn ji.

Dinvie, mì gbọ mí ni zé alọ mítọn lẹ daga hlan Ẹn.

Yẹn yinwanna Ẹn, yẹn yinwanna Ẹn
Na Ewọ whẹ́whẹ́ wẹ yinwanna mi
Bo ko súahọ́ fligọ̀ ṣie tọn
To atin Kalvali tọn ji.

Di ohàn dagbe de, bé mì jlo nado sè de? Yẹn yọ́nẹn dọ mí tindo ohàn wẹndagbe tọn plántọ de to ofi sọn otò indianapolisi tọn mẹ. Yẹn yise dọ é nọ jihàn to Sinsẹ̀nhọ̀ Kadu tọn mẹ. Bé e ma yín mọwẹ? Mọwẹ. Gohọ̀ Kadu tọn wẹ sinsẹ̀nhọ̀ etọn. Bé mì flin mẹhe yè nọ ylọ dọ nọviyọnnu E. Howaldi Kadu? Na Jiwheyẹwhe ni ná gbọjẹ alidọn etọn. Ohẹ he nọ jihàn to aga, nawe he yẹn yinwanna nado nọ tùntóai hlan whenuena é to ohàn ji, húgan mẹdepope he yẹn ko sè ohàn etọn to gbẹ̀zán ṣie lẹpo mẹ, yèdọ asi Kadu tọn, he nọ jihàn dọ, “Whẹpo mì tọ́njẹgbonu sọn abò mìtọn mẹ to afọnnu he, bé mì lẹn nado hodẹ̀ to Oyín Klisti Whlẹngantọ mítọn tọn mẹ, kẹdẹdi Awọyínú de to egbé?”

Nado dása aliho lẹ to afọnnu de, to abò pẹvi hóhó awe delẹ mẹ, yẹn fọ́n bo dèdo nado támiyọn. Adò lọ ma yí miyọn. Whenuena yẹn sọ tẹnpọ́n nado ná ẹn miyọn, jẹhọn fọ́n bo fúfú núde jẹgbonu biọ nukun ṣie mẹ. Podọ e sọ miyọnawu, mọwẹ yẹn sọ fá. Aigba lẹpo sọ fá bọ yẹn ma sọ do afọpa; bo to tintẹnpọ́n nado támiyọn lọ, zòhunhun pẹvi de sọ jẹdo e ji. Yẹn po Mẹda po wlealọ e ma dẹn. Yẹn sọ tin to aisinsin finẹ bo to tintẹnpọ́n nado támiyọn ṣigba atin hóhó he tin to finẹ ko fá bo ma sọ sọgan ji miyọn ba, mọwẹ yẹn wá to linlẹn dó, dọ, “Yẹn na tẹnpọ́n whladopo dogọ́.” Na yẹn dóna yì azọ́nmẹ, whenẹnu wẹ yẹn fúfú adò hóhó nẹ lọ dólé. Yẹn sọ fọ́n bo yì tá hladio. Bọ nawe lọ ṣẹ̀ hànji ji, dọ: “Whẹpo mì tọ́njẹgbonu sọn abò mìtọn mẹ to afọnnu he, bé mì lẹn nado hodẹ̀,” to tẹndodoponẹ mẹ, yẹn jẹklo to aigba, “To Oyín Klisti Whlẹngantọ mítọn tọn mẹ, kẹdẹdi Awọyínú de to egbé?” Ojé, yẹn yinwanna nado sè whenuena nawe lọ to hànji!

Whedelẹnu, whenuena yẹn dása otọ̀ lọ, yẹn yise dọ yẹn na sè dọ, asi Kadu tọn tin to aisinsin finẹ. Mì yọ́nẹn dọ to whelẹponu, yẹn nọ dlẹnalọdo é. Podọ to awa osìn he tọn dali, Atin Amàmúkikọ tọn de tin finẹ, mì mọdona, yèdọ Atin Ogbẹ̀ tọn lọ. Podọ to awa awetọ osìn lọ tọn ji, ogbẹ́ Angẹli hànjitọ lẹ tọn tin to finẹ bo to hànji to okle po ozán po, na ozán matin to finẹ, yé na to hànji to gbèpo gbè, mì mọ. Yẹn na ná tẹnmẹ dẽ bo na ganjẹ bo sọ dótó ohàn lọ. Yẹn yise dọ yẹn na dótó asi Kadu tọn whenuena é na to hànji to finẹ.

Na Jiwheyẹwhe ni dona nọvisunnu mítọn. Yẹn ma flin oyín nọvisunnu lọ tọn gba. Nawẹ oyín etọn, nọvisunnu? [Nọvisunnu de dọ, “Nẹdi Wulmanu.”-Ed.] Nọvisunnu Nẹdi Wulmanu na jihàn na mì dinvie. Nọvisunnu Wulmanu, mí yín hòmẹhunnọ nado mọ mì to ofi to whèjai he. [Nọvisunnu Wulmanu jihàn he yè nọ ylọ dọ, Sinsẹ̀n Ayiha Ṣie Tọn.]