‹‹Jesu Klisti dopolọ to osọ, to egbé, mọwẹ yèdọ kakadoi››

(Heblu 13:8).

Owé he yè to mimápe lọ

Osùn ẹnẹtọ owhè fõ e lán fọtọ̀ntọ (2015) mẹ

Yẹn yí núdọdomẹ vivẹ de do dọnúdo nọvisunnu po nọviyọnnu lẹ he tin to nukun mẹ aigba ji tọn lẹpo po to Oyín Oklunọ Jesu Klisti tọn mẹ, po Owéfọ HEBLU 9:28 tọn po, dọmọ:

‹‹Mọwẹ yè yí Klisti do sánvọ́ whladopo nado zé ylando mẹsusu tọn hẹn: podọ hlan yé he sọ to nukundó: aliho nẹlẹ wẹ é na sọawúhia whlawetọ jẹla sọn ylando hlan whlẹngan.››

Do ayi e go, wiwá Klisti tọn awetọ lọ wẹ kọlẹ́wá Etọn pagbe tọn lọ (JOHANU 14:1-3). É na wá na mẹfligọ̀ he to nukundo É lẹ. Na Ewọ na wá na yé he to awuwiwle mẹ: ‹‹… yé mẹhe wléawu lẹ biọ họ̀mẹ hẹ ẹ yì alọwle hùnwhẹ kọ̀n›› (MATIU 25:10). Do ayi É lẹ́gọ̀ja na mẹfligọ̀ he yinwanna awúsọhia Etọn lẹ. Podọ ‹‹yé he yinwanna awúsọhia etọn lẹ›› na yí jẹgbakun dódó tọn he yè ko dopagbe etọn (2 TIMỌTI 4:8).

Kọlẹ́wá Klisti ko sẹpọ́. Enẹwutu, onú vivẹ lọ wẹ yín dọ yè ni mọ ninọ̀mẹ atọ̀n helẹ to dopodopo mítọn lẹ mẹ, he yín ehelẹ: tintan wẹ yín nado nọtepọ́n Ẹn; awetọ lọ wẹ nado wléawu dai, podọ atọ̀ntọ lọ wẹ yín nado yinwanna kọlẹ́wá Etọn. Do ayi e go, mí tin to asiko yiylọ tọ́njẹgbonu tọn mẹ kẹdẹdi Owé 2 KỌLINTINU 6:17-18 tọn he dọmọ: ‹‹Enẹwutu wẹ Oklunọ, dọmọ: Mì tọ́nsọn ṣẹnṣẹn yetọn, bo nọ̀ ola.›› Dinvie, dọ̀ndopọ́ dọdai ojlẹ godo mẹ tọn lẹ tọn ko yín ṣiṣẹ̀ to nukun mítọn lẹ mẹ. Ehe lọ wẹ ojlẹ ehe tọn Oklunọ dọ, dọmọ: ‹‹Whenuena onú helẹ na ṣẹ̀ jijọ, … mí ni yọ́nẹn dọ, ahọludu Jiwheyẹwhe tọn to dindọ̀nsẹpọ́›› (LUKU 21:28-36). Podọ gbọn ojọmiọn dali, mí tindo alihiamẹ Biblu tọn gbọn Ohó dọdai tọn lọ dali, podọ mí sọ sọgan mọ hlan ohia ojlẹ lẹ tọn hézéhézé to ofi popo. Do ayi e go, awhágbè gbigbọ mẹ tọn nado fọ́n yisenọ Biblu mẹ tọn lẹpo sọn amlọn mẹ ko to núdọ to dinvie to aigba lẹpo ji, bo sọ to sinsinyẹn deji, dọmọ: “Pọ́n asisúnọ ja! Mì fọ́n! Mì wléawu! Mì tọ́nyì pè É!›› (MATIU 25:1-10).

Dinvie, owẹn lọ wẹ jẹnukọnna wiwá Klisti tọn awetọ lọ. Do ayi e go, yisenọ lẹ wẹ awhli he jlá ozòwhán yetọn lẹ dó. Na awhli nuyọ́ntọ lẹ tọn, e ma yín nado tindo ozòwhán kẹdẹ gba, nado dọ, enẹ wẹ hinhọ́n lọ, yèdọ ehe yín nukunnumọjẹnúgo lọ, ṣigba na yéwlẹ tọn núvivẹ lọ wẹ yín dọ, awúwiwlé pipé gbọn yise dali po yise po, podọ nado yín gigọ́na amì Gbigbọ tọn lọ. Do ayi e go, ohànpatọ de pahàn do ohúnhàn etọn gbigbọnọ mẹ dólé, dọmọ: “Mẹplọ́ntọ Wiwé È, to popolẹpo mẹ, gọ́ núzinzán lẹ na huhlọn Towe kẹdẹ…” Dinvie, gbọn núyiwà Gbigbọ tọn dali wẹ kọ̀ndopọ́ Asivu he tin to aigba ji lọ po Asisúnọ olọn mẹ tọn lọ po na sọawúhia to wanyi pipé de mẹ bo sọ tin to gbèsisọ pipé de mẹ po Ohó Jiwheyẹwhe tọn po.