OTẸN HE JIWHEYẸWHE DÈ NA YÈ NIDO NỌ SẸ̀N ẸN

(GOD’S PROVIDED PLACE OF WORSHIP)

1965-04-25

Mì gbọ mí ni do ota mítọn lẹ odò na ojlẹ pẹvi de. Mẹvivẹ Otọ́ Olọn tọn È, mí hiajẹ hézéhézé dọ ehe yín jlọjẹ de nado sọawúhia to ofi to otò Los Anjelẹsi tọn mẹ, podọ to gblagbla Mẹdidè he yè ko ylọ sọn ayihọn lọ mẹ, yèdọ ovi Jiwheyẹwhe tọn lẹ he yè klàn dòvo, to ojlẹ daho he mẹ mí tin te, to oglọ́ tódidó awúsọhiamẹ Mẹyinwanna mítọn tọn mẹ, Mẹhe yín Oklunọ Jesu, to ojlẹ lẹpo mẹ. Mí dopẹna We to ayiha mítọn mẹ na ehe tọn wutu, na mí yise dọ Ewọ na wá to whẹndo mítọn mẹ. Mí to dindin In to egbé. Eyín Ewọ matin to ofi to egbé, mí nasọ tin to ofi to osọ ga, podọ mí sọ yise dọ mí na mọ Ẹn.

Enẹwutu, Mẹvivẹ Jiwheyẹwhe È, mí hodẹ̀ dọ opli he ni yín opli dèdòvo de. Na e ni yín ojlẹ de dọ, e ni basi kàndai nukọnyìyì Agùn lọ tọn, dọ enẹ lọ ni yín winwlán do Owé Towe lẹ mẹ to Madopòdo mẹ. Otọ́ È, dohuhlọn madogán mítọn he mí ko zédai do nukọn Towe lẹpo. Na mí mọdona dọ mẹgbọagbà pete wẹ mí yín eyín mí matindo Hiẹ, enẹwutu mí dóna tindo Hiẹ Oklunọ È, eyín mí sọgan yì nukọn dómọ. Podọ mí ma jlo ehe na gigo mítọn titi gba, adavo na gigo Hiẹ tọn. E nẹ wẹ ojlo ayiha mítọn tọn, nado mọ Jesu to gigoyí to omẹ Etọn lẹ ṣẹnṣẹn. Na Hiẹ nido dohuhlọn yise omẹ nẹlẹ tọn, Oklunọ È, podọ to ojlẹ he mẹ avùn lọ na dóhuhlọn titegbe, na mí nido biọ e mẹ gbọn vọfọ́n he tin to ṣẹnṣẹn mítọn dali, whenẹnu mí nido tọ́nsọn e mẹ bo gbọjẹ. Dinvie, mí hodẹ̀ dọ Hiẹ ni basi onú helẹ pó na mí, na ehelẹ pó wẹ mí biọ to Oyín Jesu tọn mẹ. Niṣẹ. (Mì bo sinai).

Nọvisunnu Ṣakalian, po Nọviyọnnu Yati po, podọ hlan họ́ntọn Oklunọ mítọn Jesu Klisti tọn lẹ, yẹn yín homẹhunnọ na jlọjẹ he yẹn tindo nado tin to otò Los Anjelẹsi tọn mẹ whladopo dogọ́, podọ nado dọyẹwhehó gigonọ Jesu he mí omẹ pó tọ́nwá ofi nado wá plọ́nnú do e ji te. Eyín huhlọn mítọn ...

[Omẹ de dọhó hlan Nọvisunnu Branham dogbọn miklo tọn dali–Ed.] Mọwẹ, mẹdaho. Núyiwà vivẹ titegbe de wẹ ehe. Domọ, onú helẹ ma sọgbè gba. [Omẹ delẹ dọ lé yè sọgan basi miklo do.] Mọwẹ, e ma sọgan wàzọ́n do mọ gba. Dinvie, e dogbè dagbe.

Do ayi e go, yẹn yín omẹ pẹvi he tindo ogbè pẹvi de, ṣigba yẹn tindo Owẹn daho de sọn Oklunọ lọ de. Podọ yẹn sọ tindo nukundiọsọmẹ sọn Satani de, na yẹn ma nado hẹn Owẹn lọ wá gba, ṣigba mí na biọ e mẹ to alọ depope mẹ. Mí yise dọ osẹ̀ he na yín osẹ̀ dagbe de hlan mí omẹ pó.

E sọ wà jọ dọ whenuena yẹn tin to aisinsin, bo ma hò to ayiha ṣie mẹ, bo to linlẹn dogbọn Nọvisunnu Toma Yati he kú tọn dali, dọ whlasusu é dọhó sọn agbà dopo he lọ ji, yèdọ devizọ́nwatọ daho Klisti tọn.

Yẹn yọ́n Nọvisunnu Yati. Na é nọ dohuhlọn mi to whedepopenu he yẹn yì é de nado dọhó hẹ ẹ. Whenuena yẹn to yẹwhehódọ to jọunja ṣie mẹ, yẹn flin dọ, é nọ ... owé etọn tọ́n, he yè ylọ dọ, Awà Azọ̀nhẹngbọ tọn. Yẹn yinwanna oyín owé lọ tọn, Awà Azọ̀nhẹngbọ tọn.

Podọ mí yín hòmẹhunnọ nado tin to tẹmpli he mẹ, na ehe tin na sinsẹ̀n Klisti tọn. Na Jiwheyẹwhe ni dona asúṣiọsi Etọn lẹ, podọ mì omẹ pó he ... Mọwẹ, Yẹn yọ́nẹn dọ hiẹ lọsu tindo hùdo é tọn. Yẹn tindo hùdo núyiwà etọn lẹ tọn. Whenuena yẹn sé dọ é ko yì, yẹn gbẹ́sọ to ogbè etọn sè. É gbẹ́sọ tindo ogbè dagbe huhlọnnọ de to whenuena é tin to whinwhẹ́n mẹ, bo sọ tindo owẹn de sọn Jiwheyẹwhe de. Mọwẹ oflin gbẹ̀zán etọn tọn sọ tin to ayiha mì omẹ pó tọn mẹ dó. Podọ dogọ́, to devizọ́n lọ mẹ, fie é do awhànpa nẹlẹ po hlan, po onú mọhunkọ tọn po, wẹndagbe lọ gbẹ́sọ to nukọnyì, na Toma Yati tọn wutu. Na alindọn etọn ni tin to jijọho mẹ kaka jẹ whenuena mí na pé é to aigba gigonọ ji fie okú kavi yọnhó matin te! Mí tin to ofi nado dèdonukọn kaka jẹ whenuena ojlẹ mítọn na sọ̀ kavi fọ́nsọnku daho to whenuena Jesu na wá bẹ́ mí omẹ pó. 

Dinvie, yẹn mọdona dọ mí tindo sinsẹ̀n to ofi to whèjai he. Podọ yè sọ dọ hlan mi to ojlẹ pẹvi de mẹ wáyì dọ, mí tindo sinsẹ̀n to ofi to whèjai he, enẹwutu yẹn na dowezun dolé yẹn sọgan yì dó.

Na yẹn tindo whèjai Sẹ̀godo tọn, po whèjai Osẹ̀ jẹ azán etọn awetọ gbè tọn po, po whèjai Osẹ̀ jẹ azán etọn atọ̀ntọ gbè tọn po, po azán he pò lẹpo po to osẹ̀ he mẹ, enẹwutu yẹn yise dọ Oklunọ na dona mí. Na mí na hodẹ̀na awutunọ lẹ wutu. Mí na dọyẹwhehó Klisti tọn yín e yín ojlo Etọn, yèdọ gbọn huhlọn fọ́nsọnkú Etọn he É na ná mí nado basi i mẹ. Podọ núdepope he É ná mí nado wà, enẹ wẹ mí jlo nado basi po ayiha mítọn lẹpo po. Yẹn sọ yise dọ É na dona mí eyín mí sã ko yí I sè.

Podọ dinvie, whẹpo mí nado hùn Owé lọ bo hia Ẹ, yẹn jlo nado dọhó hlan Ẹn whadopo dogọ́, to whenuena mí do ota mítọn lẹ odò bo yín abọẹnọ to dinvie, bo sọ yise dọ wuwlu lẹpo ko dóalọte. Mí mọ dọ, Yisenọ lẹpo yọ́nẹn dọ, kẹ̀ntọ lọ, yèdọ kẹ̀ntọ mítọn to azọ́nwà to alọ lẹpo mẹ. Ṣigba, whenuena onú mọhunkọ tọn lẹ sọawúhia, mì ṣi abọẹ. Na Jiwheyẹwhe yọ́n núhe enẹ lẹpo yín. Mì mọ, mì sã ṣinai abọẹ, É sọgan to núdewà, ehe hiẹ ma sọgan mọdona gba. Enẹwutu, mì gbọ mí ni dọhó hlan Ẹn.

Otọ̀ È, mí hodẹ̀ to dinvie dọ Hiẹ na hòwhìwhẹ́ ohù lọ, enẹwutu Oklunọ Madopòdo Jesu ni wá zinzọ́nlin to Ohó Etọn mẹ to dinvie, na Ewọ ni do Ohó Etọn hia mí. Podọ to ninọ̀mẹ yọ́yọ́ olọn mẹ tọn de mẹ, po huhlọn Etọn po, podọ awúsọhiamẹ Etọn. Mí biọ ehe, kẹdẹdilé mí to na hia Ohó Etọn dó, na to egbé Ohó lọ nido tindo ogbẹ̀ to ayiha mítọn lẹ mẹ, na mí nido sọgan yọ́n Ewọ to huhlọn fọ́nsọnkú Etọn tọn mẹ. Na mí biọ onú helẹ pó to Oyín Jesu tọn mẹ. Niṣẹ.

Dinvie yẹn jlo nado hia Owé DEUTELONỌMI 16:1-6 tọn. 

Dayi osùn Abibi tọn lọ go, bo nọ payi juwayi lọ go hlan Oklunọ lọ Jiwheyẹwhe towe: na osùn Abibi tọn lọ mẹ OKLUNỌ lọ Jiwheyẹwhe towe hẹn we jẹgbonu sọn aigba Egipti tọn lọ ji wá to ozánmẹ. Hiẹ na sánvọ́ juwayi lọ hlan Oklunọ lọ Jiwheyẹwhe towe, sọn kanlinpa lọ po kanlinpo lọ po mẹ, to otẹn he Oklunọ na dè mẹ nado hẹn oyín etọn nado nọnọ̀ finẹ. Hiẹ ma na yí akla otọ́nnọ do dù i gba; azán ṣinawe hiẹ na dù i po akla madotọ́nnọ po, yèdọ akla nukunbibia tọn; na hiẹ jẹgbonu sọn aigba Egipti tọn lọ ji wá to plapla ji: na hiẹ nido nọ flin azán lọ gbè whenuena hiẹ jẹgbonu sọn aigba Egipti tọn lọ ji wá to azán ogbẹ̀ towe tọn lẹpo mẹ. Otọ́n ma na yín mimọ to finẹ to agboji towe lẹpo mẹ azán ṣinawe gba; mọ depope sọn olàn lọ mẹ, he hiẹ do sánvọ̀ to azán tintán lọ gbè to whèjai, ma na pò to ozán lọ mẹ kaka jẹ afọnnu lọ gba. Hiẹ sọgan nọ ma sánvọ̀ juwayi lọ to depope họ̀ngbo towe lẹ tọn hòmẹ, he Oklunọ lọ Jiwheyẹwhe towe na we: adavo to otẹn he Oklunọ lọ Jiwheyẹwhe towe na dè nado hẹn oyín etọn nado nọnọ̀ e mẹ mẹ, finẹ hiẹ na sánvọ̀ juwayi lọ tọn te to whèjai, to odò yìyì owhè tọn ji, to osã he mì jẹgbonu sọn Egipti mẹ wá lọ ji.

[Dinvie yọpọvu lẹ to awhádo to agùn lọ mẹ] taidi dọ mí tin to tuklá devo de mẹ. Yẹn sọ doyise dọ, yẹn na dáwhá húmọ na onú mọhunkọ lẹ tọn wutu. Bé mì mọdona?

Ehe yín ohóta gbọnvo de, ehe ji yẹn jlo nado dọhó dó na whenu vude to whèjai he, ehe yín: Otẹn he Jiwheyẹwhe dè na yè ni do nọ sẹ̀n Ẹn.

Dinvie, ehe yín onú gbọnvo de. Ṣigba kẹdẹdilé yẹn ko dọ dó jẹnukọn wáyì, dọ, Jiwheyẹwhe nọ sinai to ninọ̀mẹ gbọnvo lẹ mẹ podọ otẹn gbọnvo lẹ, bo sọ nọ wàzọ́n dabla lẹ, na Ewọ yín Núdabla wutu. Mẹdepope he yise to Ewọ mẹ, nọ zán zinzán he gbọnvo lẹ. Na onú susu wẹ tin he mí sọgan dọ dogbọn nújawu Etọn lẹ tọn dali. Ṣigba yẹn mọdona enẹ lẹpo, dọ, mẹnu wẹ sọgan mọdona Ẹn dọ Ewọ yín Núdabla, bo sọ nọ wà núdabla lẹ to whedelẹnu to asiko nújawu tọn whenu? Enẹwutu, mí yise to egbé dọ, Jiwheyẹwhe na dona ehelẹ, he yín hihia Ohó Etọn tọn, podọ ohóta he yẹn dè nado dọhó do e ji hlan mì tọn dali.

Dinvie, núhe yẹn lẹn dọ e nọ hẹn tukla wá tofi, wẹ yín dọ, yè dè núyitọ lẹ sẹ sọn otẹn yetọn mẹ, bo sọ súalihodo yé na yé ma nado sè ogbè miklo tọn. Enẹwutu, eyín yé ma basi dagbedagbe mìwlẹ ma na sè ogbé ṣie dagbedagbe gba. Ṣigba, na Jiwheyẹwhe ni basi na otó mítọn lẹ dọ mí nido sọgan sè dagbedagbe.

Na owhẹjijọ he wutu yẹn jlo nado dọhó do ohóta he ji, podọ e sọ yín asiko dagbe de nado basi i to Gigọ́ opli Wẹndagbejlatọ lẹ tọn mẹ, eyín susu agùn lẹ tọn kavi susu to yé mẹ sọawúhia to awhànpa he mẹ, yèdọ agùn gbẹ́pipli titònọ lẹ.

Do ayi e go, whlasusu wẹ yẹn sọ nọ mọ dọ, gbẹtọ lẹ nọ pé yé to aliho lẹ tó, podọ to aliho daho lẹ ji, podọ to agàhún lẹ mẹ, podọ to otlẹn lẹ mẹ, podọ to mọto lẹ mẹ, yẹn nọ kànbiọ yé dọ, “Bé Yisenọ wẹ mì yín?”

Dopo to yé mẹ, dọmọ, “Mẹtodistinọ wẹ yẹn. Mẹdevo sọ dọ, Baptist wẹ yẹn, kavi Plẹsbitelianu, kavi Lutẹlianu, kavi Pẹntikọstinu wẹ yẹn,” kavi onú di mọtọnhunkọ lẹ.

Omẹ dopodopo tindo agùn gbẹ́pipli he mẹ é dojlo nado do ede hia te. Podọ e sọ yín núhe sọgbe nado do mẹde hia gbọn agùn gbẹ́pipli de dali, ṣogan apáwhé ylankan he tin to e mẹ wẹ yín dọ, omẹ dopodopo nọ lẹn dọ, piplimẹ mọtọnhunkọ lẹ ṣokẹdẹ wẹ jei Olọn mẹ, podọ ehe lọ ṣokẹdẹ wẹ Jiwheyẹwhe na kẹalọyí, lala, piplimẹ gbẹtọ de tọn wẹ enẹ yín. Yẹn lẹn dọ whèjai ehe wẹ na yín asiko dagbe de nado ná gblọndo ohó nẹlẹ pó tọn. [Agùn lọ sọ hòasipẹ-Ed.] E sọgan yín dọ enẹ wutu wẹ Satani do to azọ́nwà do miklo lẹ ji. Mì yọ́nẹn dọ núhe gbẹtọ basi lẹpo ma nọ yì nukọn gba, ṣigba núhe Jiwheyẹwhe basi lẹpo wẹ nọ nọte kakadoi. Enẹwutu, na mí nido tindo ojlẹ dagbe nado basi i, podọ otẹn dagbe nado basi i, na enẹwutu Jiwheyẹwhe ni gọ́alọna mí gbọn ojọmiọn Etọn dali nado basi i, mí to vivẹnudo nado dọhó gbọn e dali.

Dinvie, ohóta he jẹgbonu wá sọn Owé Deutelonomi tọn mẹ. Podọ yẹn sọ tindo Owéfọ winwlán devo lẹ to ofi.

Ehe yọ́n na zinzán ji wẹ yẹn to hódọ do, ṣigba whenuena yẹn jó kóatọ́ntọ do whlãwetọ, e lẹzùn awúsinyẹnnú pẹvi de na mi nado flin popo lẹpo. Whenẹnu wẹ yẹn biọ abò mẹ bo hodẹ̀. Podọ whenuena É ṣẹ̀ Owéfọ lẹ lọ dohia mi ji, wẹ yẹn wlán yé dai, podọ e sọgan yín to wéma de mẹ dinvie, po e po, na ayiha ṣie hodo É to lé É ko nọnọ̀ dai.

Ohógó Deutelonomi tọn to ogbè Glẹki tọn mẹ yín tadena dọ, “osẹ́n awetọ,” yèdọ ohógó Deutelonomi tọn lọ. Podọ Jiwheyẹwhe sọ tindo osẹ́n awe.

Podọ dopo to yé mẹ wẹ osẹ́n okú tọn, yèdọ nado vẹtolina Ohó Etọn. Enẹwutu, mí mọ dọ, whenuena Evi vẹtolina Ohó Etọn, wẹ e do hẹn okú wá. Enẹ wẹ dopo to osẹ́n Etọn lẹ mẹ, “Gbẽgbe hiẹ dù enẹtọn mẹ hiẹ na kú dàndàn.”

Podọ É sọ tindo osẹ́n devo, ehe yín osẹ́n Ogbẹ̀ tọn na tónúsisè, eyín mì ma wà onú mọtọnhunkọ. Etẹwutu, na mì na nọ̀gbẹ̀ eyín sètónúna Ohó Etọn.

E hẹn onú awe wá linlẹn ṣie mẹ, enẹ wẹ yín dọ, nado sètónúna Ohó Etọn kavi vẹtolina Ohó Etọn.

Dopo to osẹ́n helẹ mẹ yín niná to Osó Sinai tọn ji. Awetọ lọ ... Enẹ wẹ osẹ́n okú tọn. Yè ná osẹ́n awetọ lọ to Osó Kalvali tọn ji, fie yè ná osẹ́n Ogbẹ̀ tọn lọ te gbọn Klisti Jesu mẹ.

Mọwẹ É sọ tindo alẹ̀nù awe dó.

É basi alẹ̀nù de hẹ Adam, mẹhe yín gbẹtọ tintan aigba ji tọn. Podọ alẹ̀nù nẹ lọ sọ tindo osẹ́n lẹ, enẹ wẹ yín dọ, “Eyín hiẹ wà lé po lé po, Yẹn nasọ wà lé po lé po.” Enẹwutu, Adam dóna wà núde nado hẹn alẹ̀nù he lọ lódo to Jiwheyẹwhe nukọn. Éwọ dóna zinzọnlin gbọn ali Jiwheyẹwhe tọn lẹ ji, bo sọ do ayi Ohó Etọn lẹ go, bo ma nado sọgan hẹngble depope to Ohó lẹ lọ mẹ gba.

Podọ É sọ basi alẹ̀nù devo, enẹ wẹ ehe É basi hẹ Ablaham. Alẹ̀nù he lọ matindo osẹ́n gba. Jiwheyẹwhe basi alẹ̀nù lọ hẹ Ablaham, bọ núdepope ma yín bibla do e go lala gba. Yèdọ matin osẹ́n! E ma yín “Yẹn jlo” kavi “Yẹn ko wà ẹ dote!”

Dinvie, enẹ wẹ osẹ́n he dali Yisenọ lẹ dóna nọ̀gbẹ̀ gbọn. Na e ma yín núhe mí wà hlan mínọzo lẹ gba, adavo núhe Éwọ wà hlan mí. Yè ko yí Klisti do sánvọ́ dote. E ma yín dọ, “E na wá wà ẹ gba.” Na Éwọ ko wà ẹ dote! Yèdọ azọ́nwà dótana. Na É nọ̀gbẹ̀, bo kú, bo fọ́n, bo hẹji yì Olọn mẹ, bo sọ gọ̀wá to ninọ̀mẹ Gbigbọ Wiwé tọn mẹ. Enẹwutu wẹ e do yín azọ́nwà dótana po Jiwheyẹwhe po. Klisti, Mẹhe ma yọ́n ylando, lẹzùn ylandonọ ṣie; É yí otẹn ṣie na yẹn nido nọ̀ otẹn Ewọ tọn mẹ. Na yẹn tin to Ewọ mẹ to Kalvali to whenuena É kú. To finẹ, yẹn dóna kú po É po nado nọ̀gbẹ̀. Na osẹ́n ylando tọn podọ okú tọn tin to agbasalan lọ mẹ, enẹwutu wẹ mì dóna kú nado gbọwhẹ̀ hẹ Ẹ.

Dinvie, mí tindo ohó he mí sọgan yí zán lẹpo, owéfọ huhlọnnọ helẹ, ehe mí mọdona susu yetọn, podọ akuẹhihọ Owé Wiwé lọ tọn. Ṣigba to whèjai he, mí pannukọn ehe, dọ, to nukunta ehe lẹpo tọn, É dọ dọ ofi dopo de tin, yèdọ fie É na pé mì te to nukunta núyiwà mítọn alọpãlọpa lẹpo tọn mẹ. Mí tindo sinsẹ̀n Ju lẹ tọn. Mọwẹ mí sọ tindo sinsẹ̀n Mọhamẹdi tọn dó. Mí sọ tindo zédai alọpãlọpa po agùn titònọ lẹ po, po onú he pò lẹpo po, ṣogan Jiwheyẹwhe dọ dọ ofie Éwọ na pé mí te de tin. Do ayi e go, otẹn nẹlẹ pó, yèdọ dopodopo yetọn lẹ dọ, dọ, “É nọ pé mí to agùn mítọn mẹ. Podọ eyín hiẹ ma yín dopo to agùn mítọn mẹ, É ma to na pé we gba. Enẹwutu, hiẹ dóna yín dopo to awhànpa he mẹ, kavi yín e ma yín mọ, É ma na pé we to finẹ gba. Kavi É ma na pé we to ofi devo de, adavo to finẹ.”

Dinvie, mí mọ to ofi dọ, É tindo tẹnmẹ dopo de, yèdọ dopo gẽ. “Finẹ wẹ hiẹ na sánvọ́ lọ te to otẹn he OKLUNỌ lọ Jiwheyẹwhe Towe na dè lọ mẹ.” Dinvie, É tindo otẹn didè de nado pé ovi sinsẹ̀nnọ lẹ, podọ yé ma sọ dóna sánvọ́ to ofi devo depope adavo to otẹn dopo nẹ lọ mẹ. Otẹn devo depope ma sọgan wàzọ́n gba. Enẹwutu, É tindo otẹn dopo de, yèdọ fie É sọgan pé yé te. Podọ ofi dopo de gẽ wẹ É nọ pé sinsẹ̀nnọ lẹ te.

Podọ eyín núgbo wẹ, mí dóna payi nado din otẹn nẹ lọ. Yẹn lẹn dọ É to dàndàn mẹ na mí, dọ, di mẹhe to kúkú, bo tin togbẹ̀ to agbasa kúkú he mẹ, bo togbẹ̀ to whèta kúkú he mẹ, bo togbẹ̀ to akọta kúkú he mẹ to oyẹ okú tọn glọ́.

Do ayi e go, aihọn he dóna wá opòdo to madẹnmẹ. E ma na nọte dẹn gba. Na ylando sù sọmọ bọ tódidó de ma sọ tin ba. Na tódidó de matin na aihọn he gba.

Enẹwutu, yẹn yise dọ Gbigbọ Wiwé to yìyì pé gbọn ofi lẹpo, bo sọ to ehe po enẹ po din, na ojlẹ ko yì susu wutu. Yè ko sọ lá Wẹndagbe lọ pé gbọn akọta lẹpo mẹ. Alọtundomẹ po onú devo lẹpo po ko hódó É, ṣogan Wẹndagbe lọ ko yì nukọn to alọ dopolọ mẹ.

Podọ dinvie, to azán pòdo tọn gbè, mí mọ onú helẹ pò to jijọ dolé yé te, enẹwutu wẹ avasè daho de do tin to mẹdidè Jiwheyẹwhe tọn lẹ mẹ, nado din núhe sọgbè. E to dàndàn mẹ na mí nido mọdona enẹ. Dinvie, e ma yín núyiwà gbẹtọ de tọn, adavo nado mọdona núhe yín Nugbo, núhe Biblu dọ wẹ Nugbo lọ. Na whenu ko yì susu do mí, podọ egbé, ehe sọgan yín azán lọ, enẹwutu, mì gbọ mí ni zé núhe Jiwheyẹwhe dọ do vivẹ mẹ.

Do ayi e go, whenuena Jiwheyẹwhe dọhó, É ma nọ gbọawupo sọn e mẹ gba. E dóna nọ̀ lé É dọ ẹ dó. É ma sọgan dọhó de, bo nasọ wá dọmọ, “Yẹn ma dọ mọ gba.” Mì mọdona dọ, madopòdo wẹ Ewọ. Nado dọ, É mọdona bibẹ́nu. Na míwlẹ nọ dọ núhe mí lẹn dọ e yọ́n, bo sọ nọ diọ ohó mítọn lẹ to ojlẹ pẹvi de godo. Ṣigba Jiwheyẹwhe ma sọgan wà mọ gba, na enẹwutu wẹ É gbẹ́sọ to Jiwheyẹwhe yín. Enẹwutu, yín É yín madopòdo, É ma na wà mọ gba, na Ewọ sọgbè to Ohó Etọn lẹpo mẹ. É ma nọ dọhó de poun adavo dọ e yín Madopòdo. Madopòdo yínyín Etọn lẹpo tin po É po to bibẹ́nu, linlẹn Etọn lẹpo po núyiwà Etọn lẹ po po wẹ to yédelẹ dohia to aihọn egbé tọn mẹ.

Mì do a yi e go dọ, É ko dè otẹn de, otẹn dopo de fietọn mẹ É na pé ovi yisenọ lẹ te. Ofi devo depope ma sọ tin gba.

Do ayi e go, Jesu dọ to whenuena É tin to aigba ji fi, to whenuena É to hódọ hlan gbẹtọ susu he yín sinsẹ̀ntọ lẹ, yèdọ omẹ dagbe lẹ, he yín jọwamọnọ lẹ, omẹ awuvivinọ Jiwheyẹwhe tọn lẹ, ṣigba Jesu dọ hlan yé dọmọ, “Yaya wẹ mì to gbégbona Mi,” bo sọ to gbèdai gbẹtọ lẹ tọn plọ́n omẹ di Núplọ́nmẹ yetọn lẹ. Mì sọ flin dọ, omẹ nẹlẹ yín sinsẹ̀nnọ podọ awuvivinọ na Jiwheyẹwhe tọn. Yẹn yise dọ, eyín mí na hia mẹhe yín awuvivinọ egbé tọn lẹ, kavi azán nẹ tọn lẹ, yé na yín awuvivinọ hú lé míwlẹ te. Yé dẹn do mí titegbe! Eyín mí na dọ dogbọn osẹ́n po otànhóhó lẹ po, po onú lẹpo tọn dali, yé tin togbẹ̀ gbọn enẹlẹ dali. Yé yín awuvivinọ hlan Jiwheyẹwhe, bọ yé sọ yí Jiwheyẹwhe sè. Ṣigba Jesu he yín Jiwheyẹwhe sọawúhia to agbasalan mẹ to mí ṣẹnṣẹn, dọmọ, “Yaya wẹ mì to gbégbona Mi.” Dinvie, É ma dọ, dọ yé ma to sinsẹ̀n Ẹn gba. Yé to sinsẹ̀n Ẹn, ṣigba yaya wẹ. 

Enẹwutu núdepope to ovọmẹ yín onú he ma sọgbe, e ma sọ yín onú dagbe de gba, mì ma sọgan wà ẹ na mì to whenu mìtọn gú wutu, mì to gbigbọ mìtọn hẹn gú, mì to huhlọn mìtọn hẹn gú, kakajẹ whenuena mì na yọ́n onú he mì to wiwà.

Nugbo, eyín Jiwheyẹwhe na dó nukun pipégan gbẹtọ lẹ tọn, kẹdẹdilé Jesu dọ do, na yè wlán dọ, “ Enẹwutu mìwlẹ ni yín mẹpipé dilé Otọ́ mìtọn he tin to olọn mẹ yín mẹpipé do” núsisọ́ de dóna tin to fide. Podọ É sọ dọ, dọmọ, “Yẹn na dè otẹn de fie gbẹtọ lẹ na nọ sẹ̀n Mi te. Ofi devo de matin fie Yẹn na pé yé te.” Podọ, dinvie, finẹ wẹ dóna yín nọtẹn lọ, podọ mí dóna dín In mọ to fie É tin te bo sọ domọnẹ yí finnẹ. Podọ yẹn sọ lẹndọ mí dóna lẹ̀gọ̀ do finẹ, pláun, whenuena mí mọ otẹn lọ, bo na sọ gbẹ́ onú devo lẹ dayi.

Dinvie, mì do a yi e go, Jesu dọ to Owé wiwé dopolọ mẹ ehe yẹn to hihia. Otánhó gbẹtọ lẹ tọn to whenẹnu yín núvọ́tọ. Mí ma sọgan gánjẹ onú nẹ lẹ go gba. Mí tindo hudo delẹ to fide, fie É dè na mí, na mí nido sọgan wá bọ sinsẹ̀n mítọn nado yín alọkẹyí. Dinvie, mì do a yi e go, jijẹlá sọn otẹn nẹ lọ mẹ, yèdọ nugbonọ depope he hiẹ yín, podọ zédoaitọ agùn depope tọn he hiẹ yín, hiẹ gbẹ́sọ to sinsẹ̀n basi to ovọ mẹ.

Yẹn yọ́n ẹn dọ awhágbè lẹ to nudọ to toho lẹ mẹ. Ṣigba ohọ̀dido lọ to awúwlé nado wá vivọnu, mí ma jlo dọ ohọ̀ lọ ni sisọ́ gba. Mì gbọ mí ni zé wẹndagbelilá daga, whenẹnu, whenuena gbẹtọ lẹ pé mì to alihotó, kavi fidepope mì te, mì yisenọ lẹ, na mì nido ná yé gblọndo dagbe.

To ojlẹ nẹ lọ mẹ whenuena yé to didọ, dọ, “oje! ehe wẹ enẹ. Podọ yẹn sọ mọ enẹlẹ wà ehe, podọ ehe wà ehe.” Nugbonugbo, onú he lẹpo ko yín jijọ. Ṣigba otẹn de tin finẹ he ko yín awuwléna gbọn Jiwheyẹwhe ṣokẹdẹ dali, podọ finẹ lọ ṣokẹdẹ wẹ Jiwheyẹwhe nọ pé sinsẹ̀ntọ lẹ te.

Mì do a yi Deutenọlomi ota fọtọnnukundopo afọ etọn awetọ lọgo, he yè wlán dọ, “Mì ni nọ sẹ̀n Ẹn to otẹn he Yẹn ko dè mẹ.” Otẹn tẹwẹ? Otẹn he to didohia dọ, Jiwheyẹwhe tindo nọtẹn de fie gbẹtọ lẹ na nọ wá sẹ̀n Ẹn te. Otẹn devo lẹ ovọ wẹ. “Podọ to otẹn dopolọ he lọ mẹ,” É dọ, dọmọ, “Yẹn ko dè otẹn he nado zé Oyín ṣie do finẹ. Yẹn na dè otẹn de podọ Yẹn na zé Oyín ṣie do e mẹ, to otẹn he mẹ wẹ yè na nọ sẹ̀n Ẹn te.”

Dinvie, ehe to didohia dọ otẹn dopo de tin, he yín didè gbọn Jiwheyẹwhe dali, e ma sọgan yín otẹn mìwlẹ tọn gba. Mí ma dojlo nado dè otẹn de na míde gba, na Ewọ ko dè e dote. Dinvie, nú he Jiwheyẹwhe dè lẹ yín jijlọ. Yẹn sọgan dè onú he ma jlọ, mọdopolọ wẹ hiẹ lọsu ga, ṣigba Jiwheyẹwhe ma sọgan dè majlọ gba, ṣigba jijlọ wẹ É nọ dè. To onú lẹ po godo, Ewọ kẹdẹ wẹ yè na nọ sẹ̀n Ẹn. Podọ É tindo otẹn fihe É jlo dọ sinsẹ́ntọ Etọn lẹ na nọ plí te, podọ mí dóna pé É to finẹ, enẹ wẹ otẹn dopolọ fie É nọnọ̀; otẹn dopo nẹ lọ mẹ wẹ Ewọ na sè ogbè towe te.

Do ayi e go to ofi ga, dọ, “Otẹn he Yẹn dè na yè nido nọ sẹ̀n Mi te mẹ wẹ, Yẹn na zé Oyín Ṣie do.”

Ojé, mì gbọ mí ni din Owé Wiwé lẹ mọ na otẹn nẹ lọ fihe Ewọ zé Oyín Etọn do. Dinvie, mí tindo oyẹ lẹ po pọ́ndego lẹ po, yèdọ gbọn Biblu mẹ, bọ mí sọ yọ́nẹn dogbọn otẹn vòvo he mẹ É pé gbẹtọ lẹ gbọn, ṣigba e ma yín otẹn nẹ lọ mẹ wẹ É na pé yé te to egbé gba. Na yé ko to oyẹ núde tọn basi poun wẹ, ṣigba É to awúwle nado wá jẹ otẹn nugbo he mẹ É na pé gbẹtọ lẹ te, yèdọ Agùn he mẹ É na pé yé te. Podọ otẹn dopo de tin, Agùn de tin, Ehe Jiwheyẹwhe ko dòpa Etọn nado pé gbẹtọ lẹ to otẹn he lọ mẹ, bo nasọ sè odẹ̀ yetọn lẹ, yèdọ eyín yé sọgan wá otẹn he lọ mẹ bo sẹ̀n Ẹn.

Dinvie, mí mọ dọ, omẹ susu nọ to didọ dọ, yé tindo otẹn lọ, dọ, Oyín Jiwheyẹwhe tọn tin to otẹn yetọn mẹ. Ṣigba, mì mọdona dọ, yé zé Oyín Jiwheyẹwhe tọn do finẹ wẹ. Do ayi e go dọ, vògbigbọn de tin to ṣẹnṣẹn ohógbè he yín, Jiwheyẹwhe zé Oyín Etọn do finẹ po mẹde ni zé Oyín Etọn do finẹ tọn po mẹ. Bé mì mọdona? Enẹwutu, mí dóna flin dọ, Jiwheyẹwhe wẹ dọ dọ Yẹn na zé Oyín ṣie do e mẹ. Na yè wlán ẹn dọ, “Yẹn na zé Oyín zé Oyín ṣie do otẹn he mẹ.Podọ enẹ wẹ otẹn he Yẹn dè lọ, bo ko sọ dè, na gbẹtọ lẹ nido nọ sẹ̀n to e mẹ.”

Ehe lọ hẹn mí dinvie nado pọ́n hlan oyẹ ojlẹ he lọ tọn lẹ, yèdọ hẹn mí nado pọ́n hlan Klisti. Alẹ̀nù Hóhó lẹpo wẹ oyẹ Jesu tọn. To Egypti, ozán nẹ he mẹ yè dóna hù lẹngbọvu juwáyì tọn lọ na whiwhla gbẹtọ lẹ tọn, mí mọ dọ Jiwheyẹwhe tindo otẹn dopo de, yèdọ osẹ́n dopo de. Maho lé hiẹ whè sọ, kavi lé hiẹ yín yẹwhenọ dẹnsọ, kavi mẹplọ́ntọ de, kavi núdepope he hiẹ yín, hiẹ dóna tin to otẹn dopo he lọ mẹ. Mẹhe tin to gbonu otẹn lọ tọn lẹpo wẹ dọ̀n. Enẹwutu, hiẹ dóna tin to otẹn dopo he lọ mẹ, yèdọ otẹn he É dè lọ.

Dinvie, mí sọgan zán whenu susu to whèjai he, nado to didọ enẹ he mí ko mọdona, dolé Klisti ko ná avasè dó. Lé yè dóna penukun Lẹngbọ avọ́sinsán tọn he lọ go dó, yèdọ Lẹngbọ-sunnu he madó apà, lé yè dóna hù I gbọn agùnmẹho lẹ dali dó, podọ lé yè sọgan sá ohùn lọ do ohọ̀n go dó, ehelẹ pó to alọdlẹndo wiwá Klisti tọn. Podọ to oglọ́ ohùn he yè kọ̀n dai he tọn, wẹ Jiwheyẹwhe pé sinsẹ̀nnọ lẹ te to whenuena angẹli Vàsúdotọ lọ dángbọn aigba lọ ji.

Dinvie, yẹn yise dọ, mí ko wléawu nado jẹgbonuyì sọn Egypti tọn mẹ, dopo to azán helẹ mẹ, bo na biọ Aigba pagbè he tọn lọ mẹ. Podọ ojlẹ ko sọ̀ na mí nido biọ otẹn nugbo lọ mẹ, bo dóalọtena yìgọ̀-yìgọ̀ helẹ pó, dọ, “Plẹsbitelianu wẹ yẹn. Mẹtodistinu wẹ yẹn. Baptistinu wẹ yẹn. Yẹn wẹ Ehe. Yẹn wẹ enẹ kavi devo.” Mì tọ́nsọn ṣẹnṣẹn yetọn, bo din fie otẹn he lọ te, na okú tin to ofi lẹpo gbọnvòna otẹn he É dè lọ. Enẹwutu, eyín mí ma tin to otẹn he É dè mẹ, bé whenẹnu okú wẹ opòdo etọn. Ṣigba ofi he É dè, okú ma sọgan wá finẹ gba.

Eyín mì do ayi Lẹngbọ avọ́sinsán tọn lọ go, okú ko dlá finẹ pọ́n. Okú ko wá otẹn he mẹ, na Lẹngbọ lọ ko kú wutu. Okú ko dlá finẹ lọ pọ́n. Podọ fie okú ko dlápọ́n wẹ Jiwheyẹwhe dopa dọ e na yín otẹn Etọn. Enẹwutu, to pinpọ́n hlan Ẹn mẹ, mí mọdona núhe Lẹngbọ avọ́sinsán tọn lọ yín dinvie, podọ núhe otẹn ogbẹ̀ tọn lọ yín to ojlẹ nẹ mẹ.

Dinvie, na yẹn tọn, ehe dóalọte na núdindọn lẹpo. To pinpọ́n hlan Klisti, Mẹhe yín Lẹngbọ avọ́sinsán tọn lọ, enẹ lọ jẹagọ̀dó agùn gbẹ́pipli lẹpo, po zédai lẹpo po, po titò yetọn lẹpo po, po núyiwà agùn tọn lẹpo po. Na e gbẹ́ onú lẹpo. Mọwẹ, na mí mọ to ofi dọ, to pinpọ́n hlan Ewọ mẹ, wẹ Ohó Jiwheyẹwhe tọn he yè ma ṣaka tin te. Enẹwutu wẹ Owé JOHANU 1 tọn do dọ, dọmọ, “To whẹ́whẹ́whenu wẹ Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwhe, podọ yè sọ lẹ́ Ohó lọ zùn agbasalan, É sọ nọ̀ mí ṣẹnṣẹn.” Enẹwutu, Ewọ lọ wẹ Ohó Jiwheyẹwhe tọn he yè ma ṣaka, yèdọ Ehe lẹzùn agbasalan, bo sọawúhia.

Podọ to númimọ he mẹ, mí ma sọgan zé enẹ jlẹdó agùn depope go to aihọn lọ mẹ to egbé gba, yèdọ do agùn titò lẹ go. Mí ma sọgan zé enẹ lọ jlẹdó otẹn mọtọnhunkọ depope go gba, na e ma sọgan yín mọ gba. Eyín mí zé Oyín Klisti tọn do gohọ̀ depope mẹ, mí nọ ylọ ẹ dọ, agùn “Klisti” tọn lẹ, podọ ehe, kavi enẹ kavi devo lẹ. Enẹ ma yín mọ gba. E ma yín mọ gbọn alọ depope mẹ gba. Ṣigba, whenuena Jiwheyẹwhe zé Oyín Etọn do núde mẹ, enẹ lọ wẹ onú he É nọ wà.

Dinvie, núdepope matin to Biblu mẹ he yè sọgan zé jlẹdo gbẹ́pipli ojlẹ mítọn mẹ tọn go gba, adavo Babilọni. Na Babilọni ṣokẹdẹ wẹ yín jijlẹdo gbẹ́pipli ojlẹ mítọn mẹ tọn go, yèdọ bẹ́plidopọ́ sinsẹ̀nnọ lẹ tọn, na Nimlọdi po dopoyínyín sinsẹ̀nnọ lẹ tọn po wẹ dó e ai. Enẹ wẹ núhe zédai po agùn gbẹ́pipli titònọ mítọn lẹ tọn to wiwà to egbé, yédọ hinhẹn gbẹtọ lẹ wá dopoyínyín mẹ gánnu-gánnu, dọ, “Eyín hiẹ ma yín ehe tọn, bé hiẹ na tọ́njẹgbonu!” Podọ yé na wá hẹn mí gánnu-gánnu nado biọ dopoyínyín de mẹ, kẹdẹdilé mí to linlẹn to dinvie. Podọ enẹ wẹ vivẹnu dido ohónamẹ gbẹtọ de tọn, ṣigba e ma to ote na nọ̀ gba. Na e ma yín ojlo Jiwheyẹwhe tọn wutu. Mọ e ma sọ yín titò Jiwheyẹwhe tọn, depope he gbẹtọ na dọ, dọ mọwẹ, e ma yín mọ gba. E ma sọgan yín mọ gba. Mọ e ma tlẹ sọgan yín bibasi gba. Enẹwutu, Jiwheyẹwhe ma sọgan zé Oyín Etọn do onú mọtọnhunkọ mẹ he gbẹ́kọ Ohó Etọn mẹ go gba. Nawẹ Jiwheyẹwhe sọgan nọ̀ núhe gbẹ́kọ Ohó Etọn mẹ go dó? Mì ma sọgan wà mọ gba.

Enẹwutu, mí mọ dọ, yè ma bla ẹ do agùn depope go gba, e ma yín Mẹtodisti, kavi Baptist, kavi Plẹsbitelian, kavi Pẹntikọsti, kavi Katoliki, kavi agùn Glẹkinu lẹ tọn, kavi núdepope he e yín. Na enẹlẹ depope ma ko yín otẹn Jiwheyẹwhe tọn gba.

Dinvie, mì gbọ na Jiwheyẹwhe, Mẹhe dopagbè he ni tọ́njẹgbonu wá bo do e hia, mọwẹ. Mọwẹ yè nọ wà ẹ dó. Na Ewọ gbẹ́sọ to Jiwheyẹwhe yín! Eyín É ko yín Jiwheyẹwhe dai, É na gbẹ́sọ to Jiwheyẹwhe yín zọnmi!

Dinvie, mí mọ sinsẹ̀n he yè hẹn gánnu-gánnu, ehe to pinpọ́n mẹ, lé yè to tintẹnpọ́n nado hẹn awhànpa flinflin lẹpo wá núhe yè ylọ dọ, “dopoyínyín daho de mẹ.” Susu to yé mẹ yise to ehe mẹ, podọ mẹdevo lẹ to enẹ mẹ; mọ mẹdelẹ gbẹ́ ehe, bo sọ gbẹ́ enẹ. Enẹwutu, Biblu dọ, dọmọ, “Bé omẹ awe na zinzọnlin to opọ́, adavo yé ha?” E ma sọgan wàzọ́n gbèdé.

Enẹwutu, mí dóna tin to gbènọpọ́ mẹ. Podọ gbènọpọ́ to etẹ mẹ? E ma yín gbènọpọ́ hẹ mẹnọzo gba, adavo nado nọpọ́ po Ohó lọ po, yèdọ po Jiwheyẹwhe po. Enẹ lọ mẹ wẹ mí dóna dó gbènọpọ́ te.

Dinvie, mí mọ dọ, dopoyín gánnu-gánnu yín didohia gbọn gbẹtọ delẹ tọn dali to Babilọni mẹ. Jiwheyẹwhe ma sọgan zé Oyín Etọn do onú mọtọnhunkọ mẹ gba. Na É ma ko wà enẹ pọ́n, mọ É ma sọ to na wà ẹ gba. Sọlé yé tẹnpọ́n bo zé oyín yetọn lẹ do e mẹ dó, bo sọ zé Oyín Jiwheyẹwhe tọn do e mẹ ga, ṣigba e ma yín mọ gba.

Enẹwutu, mí dóna mọdona fie É zé Oyín Etọn do, na finẹ wẹ otẹn dopo gẽ he É dè na Yisenọ lẹ nido nọ wá, po ovi yisenọ lẹ tọn po, nado wá sẹ̀n Ẹn to otẹn he lọ mẹ. Etẹwẹ otẹn he lọ yín?

Dinvie, nado dọ, mí sọgan yí Biblu lọ blébu nado dọ núhe yẹn jlo na dọ lẹpo. Na otẹn he É dè lọ tin to Klisti mẹ, yèdọ to Jesu Klisti mẹ. Ewọ lọ wẹ, yèdọ Ovi Etọn lọ; Jesu Klisti Ovi Jiwheyẹwhe tọn lọ.

Nugbo hiẹ sọgan dọ, dọ, “Owé Wiwé dọ to ofi lọ dọ, Ewọ na dè otẹn lọ, podọ ga dọ, É nasọ zé ‘Oyín’ Etọn do otẹn lọ mẹ.”

Mọwẹ, ovi nọ yinwanna nado nọ hẹn oyín otọ́ etọn tọn. Na pọ́ndego de, yè nọ ylọ mi dọ Branham, na otọ́ ṣie wẹ Branham wutu.

Do ayi e go, Jesu dọmọ, Ewọ wá to Oyín Otọ́ Etọn tọn mẹ. Na yè wlán ẹn to Owé JOHANU 5:43 tọn mẹ, dọ, “Yẹn wá to Oyín Otọ́ Ṣie tọn mẹ, mì ma sọ yí Mi,” enẹwutu, finẹ wẹ Jiwheyẹwhe zé Oyín Etọn do, yèdọ to oglọ́ avọ́sinsán Ovi Etọn Titi tọn mẹ! Enẹ lọ kẹdẹ wẹ otẹn he Jiwheyẹwhe dè. Podọ finẹ lọ wẹ gbẹtọ lẹ dóna pé Jiwheyẹwhe te, yèdọ to Klisti mẹ. Finẹ lọ wẹ otẹn he É dè lọ. E ma yín agùn titònọ de, kavi zédai de, kavi onú devo de gba, na Jiwheyẹwhe ko dopagbè dọ, Jesu mẹ kẹdẹ wẹ Ewọ na pé mí te. Na otẹn nẹ lọ kẹdẹ mẹ wẹ Oyín Etọn te.

Mí sọ sè dọ Jesu dọ to Owéfọ he yẹn to hihia he mẹ, yèdọ to Owé JOHANU 5:43 lọ tọn mẹ, dọmọ, “Eyín mẹdevo wá to oyín ede tọn mẹ, ewọ wẹ mì na yí.” Mí sọgan biọ zédai de mẹ, bọ “mẹdevo” sọgan biọ agùn titònọ lẹ mẹ, omẹ nẹ lọ wẹ mì na kẹalọyí; ṣigba eyín mì kẹalọyí Jesu, vògbingbọn na tin. “Mẹdevo na wá, bo dọ, dọ, Mẹtodisti tọn wẹ ‘yẹn’, Baptist tọn wẹ yẹn, podọ Plẹsbitelian tọn wẹ yẹn,’yé omẹ pó wẹ mì na kẹalọyí. Ṣigba Yẹn wá to Oyín Otọ́ Ṣie tọn mẹ, bo to núhe Otọ́ lọ dọ Yẹn na wà lẹ wà, ṣogan mì ma kẹalọyí Mi gba.” É dọmọ, “Johanu wá, bo tindo kunnudidè daho de, ṣigba Yẹn tindo kunnudidè he yìji hú Johanu tọn to Jiwheyẹwhe mẹ. Na núhe Otọ́ lọ ko yí na Mi nado wà, enẹ lọ wẹ Yẹn wà,” yèdọ Ohó he yè wlán dogbọn Ewọ tọn dali lẹpo, podọ núhe É na yín to azán nẹ gbè. Na Ewọ ...

Do ayi e go, Oyín Etọn wẹ Jiwheyẹwhe. Ṣigba Jiwheyẹwhe tindo azọ́nyínkọ susu lẹ. Azọ́nyínkọ wẹ Jiwheyẹwhe, Ewọ lọ wẹ yè nọ ylọ dọ, Jehova-jireh, Jehova-rafa, Jehova-manaseh. Ewọ wẹ yè sọ ylọ dọ, Amà Whẹkànnọ, Amà he tindo Owán Gbingblin, Sunwhlẹvu Afọnnu tọn; Alfa, Omẹga, Nukọntọ po Godotọ po; enẹgodo, Otọ́, Ovi, Gbigbọ Wiwé; azọ́nyínkọ wẹ ehelẹ pó.

Ṣigba Oyín Etọn, yèdọ Oyín Jiwheyẹwhe tọn wẹ “Jesu Klisti,” Mẹyíamìsisádodè lọ. Enẹ wẹ Oyín Etọn. É tindo azọ́nyínkọ susu, ṣigba Oyín dopo gẽ, enẹwutu “Na Oyín de matin to Olọn glọ́ he yè námẹ to gbẹtọ mẹ he yè nado whlẹn mí gán.” Mí mọdona dọ, nugbo wẹ Enẹ.

Podọ ga, avàsè de wẹ ehe, dọ, “Whenuena omẹ devo de na wá to oyín ede tọn mẹ, yèdọ to oyín ‘Mẹtodisti tọn, kavi Baptist tọn, kavi Plẹsbielian tọn, kavi Pẹntikọsti tọn mẹ,’ po oyín devo lẹ po, mì nọ ékẹalọyí i. Mì sọ nọ sọgbe hẹ ẹ.” Ṣigba yé gbẹ́ Klisti dai bo sọ zin odò. Mọwẹ yé sọ zin Enẹ lọsu dó odò dó.

Yẹnwhegán lọ dọ, dọmọ! Enẹwutu, mì gbọ mí ni din Oyín Etọn pẹde dogọ́. Na yẹwhegán lọ dọmọ, “Yè na ylọ Oyín Etọn dọ ‘Emmanuẹl.’” Dinvie, Isaia dọ enẹ lọ to Owé ISAIA 7 tọn mẹ. Podọ ga, to Owé MATIU 1:22-23 tọn mẹ, dọmọ, “Onú helẹ pó sọ jọ, na ehe yè ko dọ sọn Oklunọ de gbọn onù yẹwhegán lọ tọn mẹ nido di, dọ, ... ‘Yè na nọ ylọ Oyín Etọn dọ Emmanuẹl, tadena ehe tọn yín, “Jiwheyẹwhe tin to mí de.”’”

Emmanuẹl, po Oyín Etọn Jesu po, yèdọ Jiwheyẹwhe tin to mí de, po Oyín Otọ́ Etọn tọn po. É wá to Oyín Otọ́ Etọn tọn mẹ. Finẹ wẹ Jiwheyẹwhe zé Oyín Etọn do, yèdọ to Ovi Etọn tọn mẹ. Finẹ lọ wẹ otẹn dopolọ he É dè na yè nido nọ Sẹ̀n Ẹn. Otẹn dopo gẽ he mẹ Jiwheyẹwhe sọgan pé mí te, wẹ yín to Ovi Etọn he yè dohia di Lẹngbọ avọ́sinsán tọn lọ tọn mẹ. Sọn bibẹ́nu Alẹ̀nù Hóhó tọn mẹ jẹ vivọnu, omẹ lẹpo hẹn onú mọtọnhunkọ wá otẹn nẹ lọ kẹdẹ mẹ, na ohùn avọ́sinsán tọn lọ kẹdẹ mẹ wẹ Jiwheyẹwhe pé yé te. Enẹ lọ wẹ otẹn dopolọ gẽ he É pé yé te, podọ to otẹn dopolọ gẽ mẹ wẹ É na sọ pé míwle te to egbé; e ma yín to oyín zédai de tọn mẹ, kavi to oyín agùn titò de tọn mẹ, kavi to oyín agùn de tọn mẹ, kavi to oyín piplimẹ de tọn mẹ, kavi to oyín agbègbè ji tọn de mẹ gba, adavo to Oyín “Jesu Klisti” tọn mẹ!

Yẹn tindo dọpọ́n enẹ tọn to whenuena yẹn tin to yọpọvu. Mọwẹ yẹn sọ nọ sè dogbọn lé gbigbọ Mawe nọ wànú dó tọn dali. Yẹn sọ yọ́nẹn dọ eyín Jiwheyẹwhe de tin, bé Lẹgba de sọ tin ga, na Biblu dọ, dọ, Lẹgba de tin. Podọ ewọ, yẹn lẹn dọ, é sè dogbọn gbigbọnọ helẹ tọn dali. Yẹn yì mẹdelẹ de to yé mẹ, bo mọdona dọ lalanọ wẹ yé, núde matin to finẹ gba, yé taidi mẹhe ylọ yédelẹ dọ yisenọ lẹ. Ṣigba mẹdelẹ to yé mẹ he yín nugbonọ.

Podọ yẹn tin to piplimẹ de to azán de mẹ, fie devizọ́nwàtọ de po yẹn po yì mọ yé te. Yé zé jlẹnú bo zé tafo daga sọn aigba, bo tindo kọfo he yè do nọ nùahàn he yè nọ ylọ dọ, wiski lẹ́do tafo lọ pé; podọ yé dán tafo nẹ lọ pé yì godo, yì nukọn. Podọ gita de sọ to zinzlọn gbọn ohọ̀ lọ mẹ; podọ gbọn avọ̀ gbẹtọ lẹ tọn ji. E ko tindo ehe to abò mẹ. Bo dọmọ, to ojlẹ he mẹ, omẹ lọ sọ dọ, dọmọ “bé mẹde tin to ofi he sọgan dọn tafo he lọ wá aigba.”

Whenẹnu wẹ dawe awe delẹ dọmọ, “Mí na hẹn ẹn wá odò.” Yé sọ tẹ́do afọ tafo lọ tọn go nado dọn ẹn wá odò dolé. E ma sọ sọgan wá odò gba. Ojé, tafo lọ sọ dọ̀n yé dlán aigba.

Enẹwutu, hiẹ sinai to finẹ yaya blo eyín hiẹ yín wẹndagbejlatọ he sọawúhia to wẹndagbejijla whenu, onú dopo gẽ he go hiẹ dóna payi wẹ yín linlẹn Lẹgba tọn. Eyín mì pọ́n hlan gbẹtọ he to dudlu pé lẹ, mì na mọ hlan Lẹgba. Ṣigba Lẹgba tin. Nugbo, é tin.

Podọ gbẹtọ lẹ to Lẹgba sẹ̀n, bo ma tlẹ mọdona núhe wà yé te. Mọwẹ yé to Lẹgba sẹ̀n to agùn lẹ mẹ dó, “Yé to gbèdai yetọn lẹ plọ́nmẹ di Núplọ́nmẹ gbẹtọ lẹ tọn, di zédai lẹ po otànhóhó lẹ po.”

Nawe yọnnu de húnhún alọ hlan mi, bo dọmọ, “Yè dọ hlan mì dọ, yẹwhenọ de wẹ hiẹ.”

 Yẹn sọ dọmọ, “Mọwẹ.”

Ewọ sọ dọmọ, “Etẹwẹ hiẹ lẹn do ehe lọ go?”

 Yẹn gblọn bo dọmọ, “Lẹgba wẹ.”

É sọ dọ hlan mi, dọmọ, “Eyín hiẹ tindo huhlọn susu hẹn tafo lọ wá odò.”

Yẹn sọ dọmọ, “Yẹn matindo huhlọn depope gba. Lala, yẹn matindo huhlọn de, ṣigba yẹn tin to ofi na Omẹ de.”

Yẹn sọ dọmọ, “Oklunọ Jesu, Hiẹ dọ to Owé MALKU 16 tọn mẹ, dọ, ‘To Oyín Ṣie mẹ, yé na nọ yàn aovi lẹ jẹgbonu.’” Yẹn sọ dọmọ, “Dinvie, gbọ na devi Towe ni mọdona lé awhàn tin to nukọn etọn dó!”

Yẹn dọmọ, “Yẹn degbè dọ to oyín ‘Agùn wiwé lọ tọn mẹ,’ na tafo he lọ ni wá odò,” tafo lọ sọ nọte gũn to aga finẹ. Yẹn sọ dọmọ, ‘Yẹn sọ degbè dọ to oyín Otọ́ tọn, po Ovi tọn po, po Gbigbọ Wiwé tọn po mẹ, hiẹ tafo he ni wá odò,” e sọ nọte gũn domọ. Dinvie, yẹn sọ dọmọ, “Yẹn degbè dọ, to Oyín ‘Jesu Klisti’ tọn mẹ, hiẹ tafo he lọ ni wá odò,” e sọ gbà hànyan-hànyan do aigba!

“To Oyín Ṣie mẹ, yé na yàn aovi lẹ jẹgbonu!” Enẹ wẹ Oyín Otọ́ lọ tọn. Na Ewọ zé Oyín Etọn do Jesu Klisti mẹ. Podọ to Ewọ mẹ wẹ Jiwheyẹwhe nọ pé gbẹtọ lẹ te, na yé nido sẹ̀n Ẹn. Ewọ mẹ wẹ É nọnọ̀ nado yàn gbigbọ mawé lẹ jẹgbonu. Ewọ lọ mẹ wẹ É nọnọ̀ nado hẹnazọ̀ngbọ. Ewọ lọ mẹ wẹ É nọnọ̀ nado whlẹn omẹ gán. Ewọ mẹ wẹ É nọnọ̀ nado whlẹn omẹ, bo sọ nọ gọ́ omẹ po Gbigbọ Wiwé po. Enẹ wẹ otẹn Jiwheyẹwhe tọn nado nọ pé gbẹtọ lẹ na sinsẹ̀n. Dinvie, mí mọdona dọ, Jesu dọ ga, dọmọ ... Ohó lọ, tùnmẹ Oyín Jesu tọn tọn, wẹ yín dọ, “Jehova-Whlẹngantọ,” Jehova-Whlẹngantọ lọ.

Do ayi e go, dọ, “Hiẹ sọgan nọ ma sánvọ́ juwáyì lọ to depope họ̀ngbo towe lẹ tọn hòmẹ, he OKLUNỌ lọ Jiwheyẹwhe towe ná we. To depope họ̀ngbo lọ tọn mẹ, hiẹ ma sọgan sẹ̀n Ẹn to finẹ gba,” Jiwheyẹwhe dọ ẹ to Owé DEUTELONOMI 16:5 tọn mẹ. “Hiẹ sọgan nọ ma sánvọ́ juwáyì lọ to depope họ̀ngbo towe lẹ tọn hòmẹ, he OKLUNỌ lọ Jiwheyẹwhe towe ná we. Na É ná onú helẹ we na whlépọ́n lẹ tọn wutu.” Mí na mọdona enẹ lọ to osẹ́ he ja mẹ eyínOklunọ jlo, bo pọ́n eyín Jiwheyẹwhe hẹn Ohó Etọn go kavi lala. Do ayi e go, Ewọ na we họ̀ngbo lẹ, ṣigba hiẹ ma na sẹ̀n Oklunọ lọ to depope họ̀ngbo nẹlẹ tọn ji gba, na Oklunọ lọ Jiwheyẹwhe towe ma na pé we to finẹ gba.

Ṣigba Oklunọ lọ Jiwheyẹwhe towe ko dè họ̀ngbo dopo gẽ. Ewọ ko dè Ohọ̀n lọ. Ṣigba Jesu ko dọ to Owé JOHANU ota 10 tọn mẹ dọ, “Yẹn wẹ ohọ̀n lẹngbọ tọn. Yẹn wẹ ohọ̀n nẹ lọ.” Ewọ wẹ Jihova- whlẹngántọ lọ.

Dinvie mí sọgan zán ganhiho susu do ohó lọ ji, bo na ná tunmẹ etọn. Yẹn sọ dógándeji dọ mì ko mọdona, gbọn onú wàlọ mìtọn lẹ dali wẹ mì na ná gblọndo nugbo podọ hlan Ohó lọ. Enẹwutu mí ma na sọ yì nukọn húmọ gba, hiẹ sọgan kẹ́alọ yí ohó lọ lé hiẹ jlo do. Fidepopé hiẹ sọn wá, eyín ohó lọ yín nugbo, E na jẹdo ohùnkàn pipòtọ ohó lọ tọn ji. Hiẹ ma sọgan hẹn Biblu nado dọ onú dopo to ofi dopo de, podọ onú devo jẹagọdó onú he É dọ jẹnukọn lọ gba. Ṣigba e dóna yín onú dopolọ to whelẹponu.

Yẹn tindo owéfọ susu do onú helẹ ji, yẹn mọdọ gánmẹ lọ yì. Podọ nọviyọnnu mítọn po yé omẹ he pò lẹ po tindo sinsẹ̀n to whèjai he, mí sọ jlo nado hódẹ̀ na awutunọ lẹ, enẹwutu, billy, bé hiẹ ko tindo kati odẹ̀ lẹ tọn.

[Mẹde dọmọ, “sinsẹ̀n whèjai tọn matin”] e yọ́n, e yọ́n, [Agùn lọ sọ hòpẹ] Mí sọ yise dọ Oklunọ na dona nawe he ná ehe tọn wutu, gbọ mí ni tindo asiko he.

Dóhia magbọvọ susu wẹ to didóhia dọ Jesu wẹ otẹn lọ. Ewọ wẹ Ohọ̀ngbo lọ, Ewọ wẹ Oyín lọ, podọ Ewọ wẹ aliho dopo gẽ he Jiwheyẹwhe dè nado pé gbẹtọ na sinsẹ̀n. Ewọ wẹ Aliho lọ, nugbo po ogbẹ̀ po; ohọ̀ngbo lọ, ohọ̀n lọ; Alfa, Omẹga, Bibẹ́nu podọ vivọ̀nu; Ewọ wẹ atindido whanpẹnọ lọ, podọ Ewọ wẹ Sunwlẹvu afọ́nnu tọn; Nukọntọ podọ godotọ; Ewọ popo to popo mẹ, Ewọ wẹ adọ Davidi tọn podọ Ovisunnu Davidi tọn, hinhọ́n sisẹ́ lọ podọ sunwlẹvu afọ́nnu tọn lọ, to Ewọ mẹ wẹ gigọ́ Jiwheyẹwhe yínyín Jiwheyẹwhe tọn lẹpo te, to agbasa mẹ, to ofi he mí yín ovisunnu po oviyọnnu Jiwheyẹwhe tọn lẹ po te, to Jiwheyẹwhe yínyín Jiwheyẹwhe tọn mẹ. mọwẹ. Kẹdẹdi ovisunnu lẹ podọ oviyọnnu lẹpo, mí tin to hẹnnu lọ mẹ, eyín hiẹ tin to finẹ.

Dinvie nawẹ mí sọgan biọ otẹn daho nẹ mẹ do nado sẹ̀n Ẹn? Enẹwẹ ohókànbiọ lọ. Nawẹ mí nọ biọ otẹn lọ mẹ do, eyín Jesu wẹ otẹn lọ? Ewọ wẹ Oyín Jiwheyẹwhe tọn. Ewọ wẹ otẹn fie yè nọ sẹ̀n Jiwheyẹwhe te. Podọ Ewọ wẹ ohọ̀n dopo lẹngbọ tọn. Podọ to whenẹnu mí jlo nado dinpọ́n lé mí sọgan biọ e mẹ gbọn.

Dinvie, eyín hiẹ tin to ohọ̀n lọ mẹ, hiẹ biọ e mẹ taidi hẹnnu, kẹdẹdilé mí dọ do to azán devo he ko wáyì lẹ tọn... kavi nùdùdù lẹngbọ lẹ tọn, kavi dogbọn nùdùdù lẹngbọvu pẹvi lẹ tọn dali, dọ, Jiwheyẹwhe ma na sú ohọ̀n kakajẹ whenuena lẹngbọ godo tọn lọ nado biọ e mẹ. Eyín hiẹ biọ e mẹ, to whenẹnu hiẹ na tin di hẹnnu lọ. Hiẹ yín hẹnnu Jiwheyẹwhe tọn to whenuena hiẹ wá Jiwheyẹwhe de. Ṣigba hiẹ ma sọgan yín hẹnnu Jiwheyẹwhe tọn bo sọ to agùn plẹsibaitelianu lẹ tọn yín gba, kavi agùn Mẹtodisi tọn, kavi agùn Baptizi tọn, podọ agùn Pẹntekọsi tọn yín gba. E ma sọgan yín mọ gba. Hiẹ dóna biọ Jesu Klisti mẹ.

“E yọ́n,” mì sọgan dọ, dọ, “mì tin to e mẹ,” Mí na pọ́n eyín mì tin to e mẹ.

Dinvie mì gbọ mì ni pọ́n onú he Owé wiwé dọ, mí ni pọ́n to Owé 1KỌLẸTINU 12: 13 Biblu dọ, dọ, “Na gbigbọ dopo mẹ wẹ yè gbọn baptizi mí omẹ pó do agbasa dopo mẹ.” Yè baptizi mí do agbasa Klisti tọn mẹ, gbọn Gbigbọ Wiwé dopo dali. mí ma na yín hínwhán, mí nọ biọ agbasa Jesu Klisti tọn lọ mẹ gbọn baptẹm Gbigb Wiwé tọn dali.”

Nawẹ hiẹ na nọ̀ finẹ dẹnsọ, kakajẹ whenuena hiẹ ṣinuwà? Owé EFESUNU 4:30 tọn dọ, dọmọ: “Mì hẹn homẹgblena Gbigbọ Wiwé Jiwheyẹwhe tọn blo, mẹhe yè ko yí do dohia mì go jẹ ofligọ̀zángbè.” Ehe wẹ Ohó he É dọ, hiẹ sọgan dọnnu hẹ Ẹ, e ma yín yẹn. Yẹn to Owé lọ hia, e yọnwhanpẹ. “Yè dohia mì go jẹ ofligọ̀zángbè” kakajẹ azán he gbè Jesu na lẹ̀kọwá nado plán we. Enẹwutu lẹnnupọ́n dó ohó he lọ ji.!

Sọn whenẹnu hiẹ ma sọ yín dewe tọn ba, hiẹ ko yín núdidáyọ́yọ́, na ohógo Glẹki tọn to didohia, dọ, “Núdidá yọ́yọ́” de. Na hiẹ ko yín núhe yè vọ́ dá. Whenẹnu wẹ huhlọn Jiwheyẹwhe tọn na wá oji we, bọ hiẹ nasọ lẹzùn núdidá, yèdọ núdidá yọ́yọ́ de; ehe na hẹn onú titegbe lẹ po onú gbigbọnọ lẹ po, po núhe pò lẹpo po wá tónúsisè mẹ na Ohó Jiwheyẹwhe tọn. E ma yín gbọn aliho devo de ji gba!

Nawẹ hiẹ sọgan dọ dó dọ, hiẹ yín yisenọ bo sọ vẹtolina dopo to Ohó Jiwheyẹwhe tọn lẹ lọ tọn mẹ? Mẹdepope he vẹtoli to dopo apáde osẹ́n lẹ lọ tọn mẹ, ewọ ko ylanwhẹ to popo lẹpo mẹ. Yèdọ depope he omẹ lọ yín! Na Jesu dọ, dọmọ, “Gbẹtọ ma togbẹ̀ gbọn akla dopo kẹdẹ sinmẹ gba, ṣigba gbọn Ohó dopodopo he tọ́nsọn onù Jiwheyẹwhe tọn mẹ dali.” E ma yín apáde Ohó lọ tọn gba, ṣigba adavo blébu Ohó lọ tọn! Enẹ lọ wẹ É dọ to Owé OSỌHIA 22 tọn mẹ, dọ, “Mẹdepope he na dè po sọn Owé dọdai tọn he lọ mẹ, kavi dè dogọ́ Ohó lọ, yè na dè otẹn etọn sẹ̀ sọn Owé Ogbẹ̀ tọn mẹ.” E ma yín mítọn na mí nido dè po kavi dè dogọ́ Ohó lọ gba. Adavo na míwle nido dọ núhe É dọ.

To Owé 1 KỌLINTINU 12 tọn mẹ, É dọmọ, “Na Gbigbọ dopo mẹ wẹ yè gbọn baptizi mí omẹ pó do agbasa dopo mẹ.”

Dinvie, whenuena mí tin to agbasa he mẹ, yè wlán ẹn to Owé LOMUNU 8:1 tọn mẹ, dọmọ, “Whẹgbledo de matin na yé he tin to Klisti Jesu mẹ lẹ, he ma to zọnlinzin di agbasalan tọn, adavo di gbigbọ tọn.” Na otẹn de tin, fie whẹgbledomẹ de ma tin te. Hiẹ sọgan yín agùn Mẹtodisti tọn, kavi Plẹsbitelianu tọn, kavi Baptist tọn, depope he yé yín; ṣigba eyín hiẹ tin Klisti mẹ, hiẹ lẹzùn núdidá yọ́yọ́, podọ whẹgbledo de ma na tin to oji we to fidepope gba. Enẹ wẹ opétẹn Jiwheyẹwhe tọn. Finẹ wẹ Jiwheyẹwhe nọ pé sinsẹ̀ntọ lẹ te. Fide tin ehe mẹ yè hia we jẹ di núdidá yọ́yọ́, na hiẹ ko kú sọn onú aihọn tọn lẹ mẹ wutu. Enẹwutu, hiẹ tin togbẹ̀ to Ewọ mẹ. Na awúsọhiamẹ Jiwheyẹwhe Ogbẹ̀nọ tọn na tin po hiẹ po, yèdọ sọn azán de jẹ azán de.

É togbẹ̀ to yé mẹ gbọn owhèta lẹpo dali. Owhèta dopodopo he wá lẹ sọn bibẹ́nu jẹ vivọnu, whenuena gbẹtọ de jlo nado pé Jiwheyẹwhe bo wá otẹn fie É dè tọn to winwlán Ohó Etọn tọn mẹ na azán egbé tọn, Jiwheyẹwhe nọ hẹn gbẹtọ mọtọnhunkọ nado lẹzùn núdidá yọ́yọ́, bọ whẹgbledo de matin na ewọ gba. Mì do ayi Job go.

Bé yẹn dotukla mì dolé yẹn to hódọ dó to miklo mẹ wẹ? Yẹn miọnhòmẹna mì dogbọn enẹtọn dali. Na yẹn lọsu to sisè lé miklo lọ to núdọ dó.

Ṣigba mì do ayi Job go, bo ma ho gbẹtọ sọha he tẹnpọ́n nado gblewhẹdo é lẹ pọ́n, yé omẹ sọha he dọ, dọ, é wàylan lẹ tọn, ṣigba é payi osẹ́n Jiwheyẹwge tọn lẹ go, gbọn avọ́ núniná mimẹ nẹ lọ dali. Enẹwutu, é yọ́nẹn dọ yè sùwhẹna ẹn, na é yìn osẹ́n Jiwheyẹwhe tọn lẹ wutu. Mọwẹ yè sùwhẹna ẹn dó, na é wà núhe Jiwheyẹwhe jlo dọ é ni wà lẹ wutu.

Awúsọhia gbẹ̀te Jiwheyẹwhe tọn nọ na hinhọ́n azán, podọ azán lẹpo, yèdọ sọn okú zédai tọn lẹ mẹ, do Ogbẹ̀ mẹ podọ do Ohó azán lọ tọn lẹ tọn mẹ. Dinvie, Jiwheyẹwhe tindo núhe É nọ wà lẹ.

Kẹdẹdi jinukún pẹvi de, dilé yẹn ko dọ dó to afọnnu he wáyì lẹ mẹ to afọnnu núdùdù whenu, dọ, whenuena linkún de wá hinhọ́nnu, e nọ ṣẹ̀ whinwhẹ́n. Na e nọ nù sọn asisà Jiwheyẹwhe tọn mẹ wutu, bo nọ to jiyì kaka e nado jẹ dotẹn jinukún tọn mẹ.

Dinvie, mí mọdona dọ, whenuena mí wá Klisti de, mọdoplọ wẹ mí nọ whẹ́n dó, na mí nọ whẹ́n to ojọmiọn mẹ podọ to ohónámẹ Jiwheyẹwhe tọn tọn mẹ.

Do ayi e go, titò he Jiwheyẹwhe basi na owhèta lẹpo wẹ Ohó Etọn. Na Ovi Etọn wá bo do opagbè dopodopo he yè ko dopa etọn na owhèta Etọn. Yẹwhegán lẹpo sọawúhia to asiko didè lọ mẹ, yéwlẹ wẹ Ohó Jiwheyẹwhe tọn he togbẹ̀ to aihọn mẹ. Yéwlẹ wẹ Ohó lọ. Enẹwutu wẹ Jesu do dọmọ, yéwlẹ wẹ “yẹwhe lẹ.” Jesu ylọ yẹwhegán nẹlẹ dọ, “yẹwhe lẹ.”

Dawe de wá dẽ to opli godo tọn he yẹn basi mẹ, é dọmọ, “Hiẹ gbọagba núyọ́nẹn tọn.”

Yẹn dọmọ, “Yẹn ma jlo nado tindo ode gba.” Yẹn sọ dọmọ, “Na Ohó lọ ma nọ wá núyọ́nẹntọ aihọn he tọn lẹ de gba; ṣigba núyọ́nẹntọ aihọn tọn lẹ wẹ nọ yì Ede.” Bé mì mọdona? Yẹn sọ dọmọ, “Núyọ́nẹn nọ wá núyọ́nẹntọ lẹ de, ṣigba ohó onú devo tọn wẹ mí to didọ.”

Dinvie, mí mọ enẹ lọ to owhèta dopodopo mẹ, dọ, whenuena Jiwheyẹwhe dọhó de, ohó lọ nọ wá ṣiṣẹ̀ mẹ, ofi wẹ dawe lọ sọawúhia te bo hẹn ohó nẹ lọ ṣẹ̀, podọ fie lọ wẹ gbẹtọ yetọn lẹ sọawúhia te bo sọ nọ̀gbẹ̀ gbọn e dali. Enẹ wẹ nado dọ, dọ, Jiwheyẹwhe Lọsu wẹ to ogbẹ̀ to yé mẹ, na enẹ wẹ gblọndo Ohó Etọn tọn.

Dinvie, otẹn didè Jiwheyẹwhe tọn dopo gẽ lọ po titò Etọn dopo gẽ lọ po to egbé, wẹ yín to Ovi Etọn mẹ gbọn Ohó Etọn mẹ hlan owhèta ehe, nado nọ̀gbẹ̀ gbọn Gbigbọn Ogbẹ̀nọ Etọn tọn dali.

Dinvie, mí tindo wéhọ̀mẹ núyọ́nẹn tọn dahodaho lẹ ...

Enẹwutu, Jesu dọ to Owé JOHANU 4 tọn mẹ, dọmọ, “Ojlẹ lọ ja, dinvie sọ wẹ, whenuena Jiwheyẹwhe to Gbigbọyín, whenẹnu wẹ sinsẹ̀ntọ nugbonọ lẹ na sẹ̀n Otọ́ to Gbigbọ po Nugbo po mẹ.” Dinvie, mẹdelẹ tindo Gbigbọ, ṣigba yé ma tindo Nugbo lọ gba. Mẹdevolẹ sọ tindo Nugbo, ṣigba yé matindo Gbigbọ lọ gba.

E tin taidi dọ, mí tindo mọto daho awe delẹ, bọ mí jei fide to mọto daho awe he tindo ninọ̀mẹ dopo lẹ lọ mẹ, mí sisẹ́ yé jẹgbonu, bọ mí sọ do amì mọto awelẹ mẹ. Núdidọ dopo to mọto lẹ lọ mẹ tọn ma yọ́n na sisè. Ṣogan hiẹ to nukọnyì bo to didọmọ, “Aisinnu lẹ yọ́nwhànpẹ, bọ penẹfọ mọto lọ tọn lẹ tin to whànpẹ mẹ. Podọ hiẹ sọ sinai to godo nado damlọn. Ṣogan hiẹ tindo onú susu nado wà dó dopo mọto lẹ lọ tọn go, bé hiẹ mọdona? Na mọto awelẹ tindo azọ́nwànú he sọgbè, ṣigba dopo to yé mẹ dóhuhlọn bo to azọ́nwà dagbedagbe. Bé hiẹ mọdona? Hiẹ sọgan mọdona azọ́nwànú lẹ, ṣigba e dó azọ́nwànú he na hẹn mọto lẹ lọ nado wàzọ́n dagbedagbe.

Podọ enẹ wẹ tukla núhe tin na agùn to egbé. Mí gọ́na núyọ́nẹn kẹdẹ, ṣigba huhlọn matin. Mọwẹ. Bé mì mọdona?

To ohógbè devo lẹ mẹ, mí dóna tindo zòhùnhùn amì lọ tọn, yín e ma yín mọ zòhùnhùn ma na tin, na enẹ wẹ aliho lọ.

Depope he yè plọ́n mí dó, podọ lé mí na yise dó, podọ depope he mí na dọ dó dọ, Biblu yín nugbo, bọ mí sọ yise dọ, nugbo wẹ popo lẹpo, mí dóna tindo zòhùnhùn nado jẹ finẹ, yèdọ zòhùnhùn he na sisẹ́ Ohó lọ nado ṣẹ̀ azọ́nwà. E dóna tindo enẹ lọ. Eyín mì ma tindo e, agùn lọ ma na yì nukọn taidi mọto lọ he ṣite gũn, hiẹ lọsu nasọ tin to finẹ gũn bo ma na yì nukọn. Ṣigba depope he mì na dọ, “E wà lẹblanu, ṣigba yẹn yise to dopodopo Ohó nẹ lẹ lọ tọn mẹ.” Hiẹ dóna tindo núde he na ná zòhùnhùn we nado hẹn we hùnzò to kanwe-kò ji, podọ na Agùn daho Jiwheyẹwhe tọn nido to nukọnyì. E dóna tindo huhlọn azọ́nwiwà tọn to maṣinu lẹ lọ mẹ. Enẹwutu, núde ma wa azọ́nwànú maṣinu lẹ lọ tọn gba, ṣigba huhlọn whedo yé.

Yẹn sọ lẹn dọ enẹ wẹ tukla he agùn lọ tindo to egbé, na mí gbọagba huhlọn daho nẹ lọ tọn nado hẹn Ohó lọ dóhuhlọn to azán he lọ gbè.

Maltẹn Lutẹ tindo azọ́nwànú lẹ podọ huhlọn azọ́nwánú lẹ tọn to azán etọn lẹ mẹ. Johanu Wẹsle lọsu sọ tindo to azán etọn lẹ mẹ. Mọwẹ hlan Pẹntikọsti mẹ lẹ ga to azán yetọn lẹ mẹ.

Nawẹ azán míwlẹ tọn te? Na ehe wẹ azán devo! Agùn lọ dóna wá whinwhẹ́n patapata mẹ to awúwiwle mẹ nado pé Klisti, po awúsọhiamẹ opagbè dona dopodopo tọn he É dopa yetọn lẹpo to Owé Wiwé mẹ, he to azọ́nwà to Agbasa daho dopo nẹ lọ mẹ fie Ewọ ko dopagbè nado pé gbẹtọ lẹ te, podọ nado nọ sẹ̀n Ẹn to Agùn daho Etọn mẹ.

Ṣigba, hiẹ mọdona, na mí nọ do ovi mítọn lẹ hlan wéhọ̀mẹ, mí nọ plọ́n owéhihia po núwinwlán po, po kọ̀ntawiwà, po otàn yẹwhegán lẹ tọn lẹ po, po onú lẹpo po. Mọwẹ, adavo hiẹ tindo núhe jẹgodona ẹn!

Ojé, hiẹ sọgan dọmọ, “Yẹn nọ dawhá bo sọ nọ dogbè hunkọhunkọ.” Enẹ lọ yọ́n, na yẹn lọsu dóyise to enẹ lọ mẹ ga, ṣigba enẹ ma yín núhe hó yẹn to didọ to dinvie gba. Bé hiẹ mọdona? Hiẹ nọ dọ, dọ, “Plank-plank, boomp-boomp,” taidi mọto hóhó he to tintẹnpọ́n nado yízò. Podọ hiẹ dókàndeji dọ, “Mọwẹ, na yẹn yise to ehe mẹ, yẹn sọ yise to enẹ mẹ ga. Ṣigba whenuena e wá jẹ azán yetọn lẹ mẹ, yé nọ dọmọ, ojé, ohó he sinyẹnawu talala de wẹ ehe.”

Agùn dóna tindo huhlọn, kanwe-kò do kanwe-kò ji, dọ eyín huhlọn dagbe miyọn tọn tin to oglọ́ nệ, e na ná miyọn Opagbèhó dopodopo Jiwheyẹwhe tọn tọn. Mọwẹ.

Enẹ wẹ tukla he mí tindo to egbé, na mí ko wá vivọnu. Enẹwutu, mí jlo nado dóyisena enẹ.

Yẹn dọhó de dogbọn enẹtọn dali. “Nugbo, yẹn ma sọ flin ba.” Ṣigba Biblu dọmọ, enẹ wẹ tadéna lọ! Eyín Jiwheyẹwhe dọ Ẹ, e dóna wá ṣiṣẹ̀ mẹ. Ṣigba eyín míwlẹ wẹ, e ma na wá ṣiṣẹ̀ mẹ gba. Podọ eyín enẹ wẹ Jiwheyẹwhe degbèna mí ni wà, mí dóna wà ẹ. Enẹwutu, mì nọte to finẹ kaka jẹ whenuena Jiwheyẹwhe na hẹn ẹn wá ṣiṣẹ̀ mẹ, podọ whenẹnu hiẹ na ṣẹ̀ zọnlinzin, bé hiẹ mọdona? Podọ eyín hiẹ ma basi mọ, bé azọ́nwànú lẹ lọ na gble. Enẹwutu, mí dohùdo onú gbọnvo de tọn, yèdọ miyọn he na to mí plán tọn.

Do ayi e go, e ma yín Ewọ nọ sọawúhia to Gbigbọ Wiwé mẹ kẹdẹ mẹ nado plọ́n mí Ohó Etọn gba, ṣigba Ewọ nọ sọawúhia to Ohó lọ mẹ ga. Dinvie, do ayi ego dọ, yẹwhegán lẹ dóyise to Ohó lọ mẹ. Yé kẹalọyí Ohó lọ. Podọ Jiwheyẹwhe Gbigbọ Wiwé lọ nọ wá biọ yé mẹ nado na huhlọn opagbè nệ, podọ nado hẹn ẹn wá ṣiṣẹ̀ mẹ. O Jiwheyẹwhe ṣie! Mẹnu wẹ na gblewhẹdo enẹ lọ?

Na Jesu dọmọ, “Mẹnu wẹ na yí ylando dogblewhẹdo Mi?” Na ‘mayise’ wẹ ylando wutu. Núdepope he Jiwheyẹwhe wlán podọ núdepope he yẹwhegán lẹ dọ, ‘YẸN NA YÍN’ wẹ Gblọndo lọ. Núhe yé dọ Yẹn na wà, wẹ Yẹn wà.’” Na Ewọ di yẹwhegán de, di Visunnu gbẹtọ tọn. Na enẹ wẹ núhe É yín, podọ núhe É dọ Ewọ na yín wẹ Ewọ yín. Etẹwutu? Enẹwutu, huhlọn lọ tin to finẹ nado ná zòhùnhùn azọ́nwànú lẹ. Ewọ wẹ Azọ́nwánú lọ, yèdọ Ovi lọ Lọsu na Ede, podọ Otọ́ Ṣie wẹ Huhlọn lọ. “E ma yín Yẹn wẹ to azọ́n lẹ lọ wà gba, adavo Otọ́ Ṣie he tin to Yẹn mẹ. Na É dè huhlọn lọ tọ́njẹgbonu nado hẹn onú lẹ dèdo nukọn. É nọ hẹn ẹn wá ṣiṣẹ̀ mẹ.”

“Whenuena Yẹn dọhó de...” Kẹdẹdilé Samuẹl ko dọ do hlan gbẹtọ lẹ to asiko de mẹ, “Bé Yẹn ko dọhó de na mì to Oyín Oklunọ tọn mẹ, ṣigba bọ E ma wá ṣiṣẹ̀ mẹ?” Bé mì mọdona? “Whetẹnu wẹ yẹn dọhó de, bọ ohó lọ ma wá ṣiṣẹ̀ mẹ?”

“Ã, hiẹ, ohó he hiẹ ko dọ hlan mí lẹ po ko wá ṣiṣẹ̀ mẹ, “ṣigba mí jlo ahọlu to alọ depope mẹ.”

Mọkẹdẹ wẹ e te to egbé. Gbẹtọ lẹ nọ jlo nado hẹn owhẹjijọ pẹvi yetọn lẹ go. Yé jlo nado hẹn zédai yetọn lẹ go. Yé jlo nado hẹn e go. Ṣigba whenuena yè dọhó do gbọn vọ́fọ́n tọn dali to asiko mítọn mẹ, nawẹ mí sọgan tindo vọ́fọ́n do to whenuena onú lẹ po yín finfandopọ to aliho lọ ji? Amì lọ lẹ́zun osìn po onú devo lẹ po, yé dọ́n núklọnu lọ po onú devo lẹ po fandopọ.

Yẹn to zọnlinjija whègbè to azán de ji, yẹn sè yè to ohódọ dogbọn núklọnu alọpã de tọn dali, dọ, “Hiẹ ma do hudo nado klọ nudapanu lọ gba, onú dopo he hiẹ dóna wà wẹ yín dọ, hiẹ na zé núdapanu lọ do núklọnu lọ ji.”

Yẹn lẹn dọ, “Yẹn jei nado yín awhànfuntọ to owhé ṣie gbè.” Yẹn yì bo sọ tindo apótin núsẹwhè tọn de.

Yẹn sọ dọ hlan asi ṣie dọ, “Hiẹ ni biọ họ̀mẹ yì, na yẹn ni klọ́ núdapanu lẹ lọ.”

Yẹn lẹn dọ, “Yé yọpọsunnu nẹlẹ pó yọ́n núhe hó yé to didọ dogbọn núyọ́nẹn yetọn lẹ dali. Yẹn na dohia ẹ dolé kaka jẹ whenuena é na mọdona ehe lọ, etẹwẹ yẹn to wiwà? Nado zé do e ji podọ na é nido sinai to e ji, enẹ núhe hiẹ dóna wà lẹpo.”

Na yọpọvu lẹ ko dù azìn lẹ lọ na núdùdù afọnnu tọn. Podọ yẹn sọ kọ̀n núklọ́nú lọ do e mẹ. E sọ gọ́na azìn kẹdẹ. Mọwẹ. Enẹwutu, yẹn ma sọ dóyisena núdepope he yẹn sè to televizọn mẹ ba, lala. 

Enẹwutu wẹ yẹn ma do dóyisena núyiwà he gbẹtọ basi lẹ depope ma sọgan nọte gba. Dinvie, Jiwheyẹwhe ko dè aliho dopo de. Aliho lọ ma yín agùn Mẹtodisti tọn, kavi Baptist tọn, kavi Plẹsbitelian tọn gba; ṣigba Jesu Klisti wẹ aliho lọ, yèdọ gbọn Jiji yọ́yọ́ de to yisedóna Biblu dali. Enẹ wẹ aliho he Jiwheyẹwhe dè, podọ aliho dopo gẽ he É tindo wẹ yín to Jesu Klisti Ovisunnu Etọn mẹ. Podọ Ovi lọ mẹ wẹ É zé Oyín Etọn do. Yèdọ Etọn! Oyín Jiwheyẹwhe tọn wẹ Jesu, na Ewọ wá to Oyín Otọ́ Etọn tọn mẹ. Podọ enẹ lọ wẹ Oyín Jiwheyẹwhe tọn, na Ewọ wẹ Jiwheyẹwhe wutu.

Do ayi e go dinvie, whenuena huhlọn daho Jiwheyẹwhe tọn wá ovisunnu Jiwheyẹwhe tọn de ji, e nọ yín ogbẹ̀ hlan ẹn, to whenẹnu Gbigbọ Ogbẹ̀ tọn nọ biọ ewọ mẹ. Etẹwẹ e nọ wà to whenẹnu ló? E nọ hẹn yé sinai to otẹn he tin to Olọn lẹ mẹ, dinvie. E ma yín dọ, “Yé na wá tin to finẹ gba.” Ṣigba mí ko tin to finẹ dote. Mọwẹ mí ko sọ fọ́n dogbẹ̀ dote, huhlọn po azọ́nwànú lẹ po ko ṣẹ̀ azọ́nwá nado fọ́n mí dogbẹ̀, podọ mí sọ togbẹ̀ to Nukọn Jiwheyẹwhe tọn fie Gbigbọ Etọn te. Podọ mí sọ sinai to opọ́ to otẹn he tin to Olọn lẹ mẹ to Klisti Jesu mẹ; aisintẹn tin to Klisti Jesu mẹ, aisintẹn daho nẹ he gọ́na huhlọn dote, wẹ na fọ́n we sọn oṣiọ lẹ mẹ dogbẹ̀. Dinvie, mí yín apáde etọn. Eyín hiẹ sọ yín apáde Asivu lọ tọn, hiẹ tin to É mẹ, na Asivu lọ yín apáde Asisúnọ lọ tọn wutu, bé hiẹ mọdona? Enẹwutu, mí mọdona dọ, eyín núdopolọ podọ Asivu lọ dóna wà kẹdẹdi núhe yè dè É na to azán he mẹ. Na Asivu lọ ma dóna yín Laodikea gba, enẹ wẹ nado dọ, dọ e ma miọn e ma sọ hùnzò. Ṣigba Asivu lọ dóna gọ́na miyọn Jiwheyẹwhe tọn, na Ewọ nido to nukọnyì to Gbigbọ Jiwheyẹwhe tọn tọn mẹ.

Enẹwutu, mí to pinpọ́n hlan ofi nado mọdona. Dinvie, to ojlẹ dopo he mẹ e wà ẹ te, enẹ wẹ nado dọ, dọ, e hó mí; podọ whenuena mí ko kú whladopo to ylando po osẹ́nmẹjijẹ lẹpo po mẹ, dinvie mí sọ fọ́n dogbẹ̀ dopọ́ to Ohó Etọn mẹ to owhèta he lọ mẹ.

Dinvie, mí gbọ mí ni gọ̀yì godo bo lẹn asiko hóhó lẹ tọn pọ́n, dogbọn omẹ de he fọ́n dogbẹ̀ gbọn Ohó he lọ dali; whẹpo mí nado hodẹ̀na awutunọ lẹ, mì gbọ mí ni pọ́n owalọ omẹ hóhó lẹ tọn.

Dinvie, mì ni pọ́n mẹhe yí Ohó Jiwheyẹwhe tọn lẹpo hẹn to Alẹ̀nù Hóhó mẹ, mẹhe yè nọ ylọ dọ Enọku. Na ewọ nọ̀gbẹ̀ gbọn Ohó Jiwheyẹwhe tọn dali, bọ ewọ sọ tindo kunnudidè de dọ, “É hẹn hòmẹ̀ Jiwheyẹwhe tọn hùn.” Núdepope matin he Enọku wà adavo núhe Jiwheyẹwhe degbèna.

E na yín núhùnhòmẹ̀na mi eyín Enọku susu na ko tin to ofi to whèjai he, dọ, eyín hiẹ mọdona dọ e tin to Ohó Jiwheyẹwhe tọn mẹ. Bé yọnnu nẹmu wẹ tin to mì mẹ to ofi he dọ̀n odà yetọn lẹ, bo sọgan ylọ yédelẹ dọ Enọku, mì pọ́n, mì pọ́n, bo sọ yọ́nẹn dọ Jiwheyẹwhe gblewhẹdo zinzán nẹ lọ? Bé sunnu nẹmu wẹ tin to ofi he yígbèna yọnnu lẹ nado wà mọ, bo sọ sọgan ylọ yédelẹ dọ Enọku? O, Jiwheyẹwhe ṣie! Enẹ yín núdevo, nawẹ omẹ fọtọ́n- fọtọ́n lẹ tọn na yín dó? Podọ mí ko kú to whenuena mí to didọmọ, “Agùn ehe tọn wẹ mí, podọ enẹ tọn wẹ mí.” Dinvie, hiẹ sọgan yín enẹ tọn, ṣigba ... kaka hiẹ nido biọ otẹn he Jiwheyẹwhe dè lọ mẹ! Podọ hiẹ ma sọgan biọ finẹ adavo hiẹ ni yín apáde Ohó lọ tọn. Podọ nado yín apáde Etọn, hiẹ na lẹzùn blébu Ohó lọ tọn, bo na yín mẹglọ́nọ na Ohó lẹ lọ. Do ayi e go, mí tindo ehe Biblu ylọ dọ, “Ohó Jiwheyẹwhe tọn” to ofi, podọ mọwẹ, ehe wẹ Ohó Jiwheyẹwhe tọn.

Dinvie, mí mọdona dọ, Enọku wá aliho he Jiwheyẹwhe dè nẹ lọ ji, po Ohó Etọn po, bo zinzọnlin hẹ Jiwheyẹwhe họ owhè fowe-kanwe-kò, bo sọ hẹn hòmẹ̀ Etọn hùn. Podọ mí sọ mọdona dọ, azọ́nwànú lẹ sọgbè to Ewọ mẹ, sọmọ bọ whenuena zòhùnhùn ṣẹ̀ azọ́nwà to azọ́nwànú lẹ mẹ, É zé é sẹ́ sọn aihọn mẹ. Na ewọ biọ agàhún tintan mẹ yì Olọn mẹ. Bo to azọ́nwà dopọ́ to azọ́nwànú po huhlọn Jiwheyẹwhe tọn po mẹ, dọ, “Enọku ma sọ tin ba,” na Jiwheyẹwhe zé é sẹ́ sọn aihọn mẹ, matin okú. Mọwẹ. Na é ko zinzọnlin to aliho he Jiwheyẹwhe dè ji wutu.

Onú dopolọ wẹ mí mọdona dogbọn Elija dali. Elija hóhó whenu tọn degbè whlasusu titegbe do osẹ̀nsádo nukunmẹ, po odà pipa Jezabẹli tọn po, po onú mọtọnhunkọ lẹpo po he yé zán to ojlẹ nẹ mẹ; do ayi e go, dawe hóhó nẹ zán gbẹ̀zán etọn lẹpo to whẹgbledo ylando to gblagbla yọnnu lẹ tọn mẹ, na yé tindo yọnnu Jezabẹli de to finẹ nado gọ̀kọ̀na yé.

Kẹdẹdi Hollywudu mìtọn he tin to ofi, yèdọ fie aṣọ̀didò alọpãlọpa lẹ po fimu lẹ po nọ tọ́nsọn, bo nọ wlé yọnnu lẹpo to goyíyí yetọn mẹ to gbonu finẹ. Do ayi ego, Jezabẹli gbẹ́sọ tin togbẹ̀, mọ mì sọgan mọ dọ, é gbẹ́sọ tin togbẹ̀ to whenuena mì pọ́n lẹ́do míde. Podọ ga, é gbẹ́sọ tin to aṣẹpipa daho de glọ́.

Dinvie, mí mọdona dọ, dawe hóhó he yín yẹwhegán nẹ, ko hodẹ̀do onú nẹ lọ po núhe pò lẹpo po, bo tin to gbèsisọ mẹ hẹ ojlo Jiwheyẹwhe tọn. Podọ whenuena agbọpe pipòtọ yẹwhehódọtọ lẹ tọn, ewọ nọte to Ohó lọ mẹ.

E sọ wá jọ, dọ whenuena agbọpe é wẹ Jiwheyẹwhe do kẹkẹ hlan sọn Olọn mẹ, po osọ́ miyọnnọ lẹ po nado zé é yì agà. Do ayi e go, é gọ́na huhlọn fọ́nsọnkú titegbe de tọn! Mì lẹnpọ́n dinvie dọ, po Ohó Jiwheyẹwhe tọn po to ayiha etọn mẹ, é lẹzùn mẹhe gọ́na huhlọn fọ́nsọnkú tọn he fọ́n ẹn dogbẹ̀!

Yè wlán ẹn to Owé LOMUNU 8:11 tọn mẹ dọ, “Podọ eyín Gbigbọ omẹ he zé Jesu tite sọn oṣiọ lẹ mẹ tọn nọnọ̀ mì mẹ, Ewọ omẹ he zé Jesu tite sọn oṣiọ lẹ mẹ na gbọn Gbigbọ Etọn he nọnọ̀ mì mẹ dali diọ agbasa kúkú mìtọn do ogbẹ̀.”

Diọ ẹ do ogbẹ̀! Etẹwẹ tùnmẹ diọdogbẹ̀ tọn? Ohógbè Glẹki tọn tùnmẹ dọ, “nado gọ̀do ogbẹ̀ to okú godo.” Halleluya. Enẹwutu, họ̀ngbo sinsẹ̀n tọn de tin. Enẹ wẹ nado sẹ̀n to Gbigbọ po Nugbo po mẹ, yèdọ huhlọn po azọ́nwànú po dopọ́. Bé mì mọdona ohó he yẹn to didọ?

“Podọ eyín Gbigbọ omẹ he zé Jesu tite sọn oṣiọ lẹ mẹ tọn nọnọ̀ mì mẹ, Ewọ omẹ he zé Jesu tite sọn oṣiọ lẹ mẹ na gbọn Gbigbọ Etọn he nọnọ̀ mì mẹ dali diọ, yèdọ nado gọ̀ agbasa kúkú mìtọn lẹ do ogbẹ̀, na Ewọ ko tindo Ogbẹ̀ dote.” Podọ whenuena, E biọ agbasa mìtọn mẹ, Ewọ na hẹn agbasa mìtọn blébu wá taliai mẹ na Ẹn. Taliai mẹ na etẹ? Na Ohó Jiwheyẹwhe tọn. “Eyín E nọnọ̀ mì mẹ ...”

Hiẹ sọgan dọ hlan mi dọmọ, “Enẹ lọ jọ to azán he wáyì lẹ mẹ. Podọ Owé MALKU 16 tọn ma yín nugbo gba, podọ linlẹn Pẹntikọsti tọn he yín baptẹm Gbigbọ Wiwé tọn ga.” Enẹ ma yín Gbigbọ Jiwheyẹwhe tọn to hiẹ mẹ gba. Depope he yè plọ́n we dó ma kàn mi gba, enẹ he tin to hiẹ mẹ ma yín Gbigbọ Jiwheyẹwhe tọn gba. Hiẹ sọ sọgan dọmọ, “Ehe tọn wẹ onọ ṣie, po otọ́ ṣie po, po nọvisunnu ṣie po to owhè he wáyì lẹ mẹ.” Núdepope he hiẹ jlo nado dọ gbọn hẹnnumẹ towe lẹ tọn, po núhe pò lẹ po tọn dali, enẹ sọgan yín yetọn nugbo; ṣigba e ma yín hiẹ tọn gba, mì mọ, na hiẹ dóna wá Klisti Jesu de to azán he gbè, na opagbe he tin hlan owhèta he.

Dinvie, mí mọdona dọ huhlọn fọ́nsọnkú tọn daho he zé Enọku, e zé diọ ẹ do ogbẹ̀ bo zé é yì Owhé matin okú.

E zé Elija, bo diọ ẹ do ogbẹ̀ kaka jẹ whenuena é yì Owhé matin okú.

Mí sọ mọdona dọ, mẹhe jẹgodona ẹn wẹ Eliṣa, apájlẹ ehe tọn yín Klisti po Agùn po tọn. Elija wà nújawu ẹnẹ, (4) podọ Eliṣa sọ wà ṣinatọ̀n. (8) É tindo yẹndawe huhlọn etọn tọn, kẹdẹdilé yè kọ̀n jẹgbonu do Agùn lọ ji dó. E sọ wá jọ to godo whenuena dawe de kú, bọ yè zé é dlan do ohú etọn ji, dawe nẹ lọ sọ gọ̀wá ogbẹ̀. Huhlọn fọ́nsọnkú tọn nẹ tin to yọdomẹ po é po.

E tin to finẹ to whelẹponu, whenuena hiẹ tindo huhlọn fọ́nsọnkú Jiwheyẹwhe tọn tọn nẹ, hiẹ nasọ yín didiọdogbẹ̀ hẹ Ẹ dinvie.

Do ayi e go dinvie, to Klisti mẹ, olan sọn olan Etọn mẹ wẹ mí, podọ ohú sọn ohú Etọn lẹ mẹ. Whenuena Jiwheyẹwhe linu Klisti to Kalvali, yè linu In na yẹn po hiẹ po wutu. Enẹwutu, olan sọn olan Etọn mẹ, podọ ohú sọn ohú Etọn lẹ mẹ, agbasa sọn agbasa Etọn mẹ, Oyín sọn Oyín Etọn mẹ, yèdọ Asivu Etọn wẹ mí. Enẹwutu, mí tin to Ewọ mẹ, olan Etọn po ohú Etọn po wẹ mí.

Podọ Jiwheyẹwhe ko sọ fọ́n mí dogbẹ̀ nugbonugbo. Huhlọn ogbẹ̀ tọn lọ he fọ́n mí dogbẹ̀ sọn ylando mẹ, bo sọ diọ mí, E ko fọ́n mí dogbẹ̀ to Klisti Jesu mẹ, ehe yín, dọ, fọ́nsọnkú Etọn hẹn mí wá whinwhẹn gigọ̀ de mẹ.

Dinvie, do ayi e go, mí nọ kú to oyín míde tọn mẹ, bo ko sọ yín didi, bo ko sọ yín finfọ́n to Ewọ mẹ. Pọ́n, mí ma sọ yín míde tọn gba. Adavo ehe yín, “Oyín daho Jesu Klisti tọn” ehe tọn Biblu dọ, to Owé EFESUNU 3:15 tọn mẹ dọ, “Mẹhe mẹ yè ylọ oyín whédo he tin to olọn mẹ po aihọn mẹ lẹpo po tọn te.” Finẹ wẹ Jiwheyẹwhe zé Oyín Etọn do. Enẹ wẹ Oyín hẹnnu olọn mẹ tọn tọn podọ aihọn mẹ tọn ga.

Podọ mí tin to Jesu Klisti mẹ gbọn baptẹm Gbigbọ Wiwé tọn dali, e ma yín gbọn osìn mẹ gba; ṣigba gbọn Gbigbọ lọ dali wẹ mí yín bibaptizi dò Agbasa dopo mẹ, ehe yín Klisti, sinsẹ̀ntẹn lọ. To whenẹnu biọ finẹ, na mí ko tin to otẹn he lọ mẹ, e taidi kàndeji azọ́n wéma de tọn.

Hiẹ sọgan dọ, dọ, “Yẹn họ̀ aigba de.” Aigba lọ ma sọgan yín towe kakajẹ whenuena hiẹ tindo wémakàndeji tọn de. E yín hiẹ tindo wémakàndeji tọn lọ, enẹ to didohia dọ, onú depope he gbọn aigba lọ dali lẹpo ko yín bibasi.

Podọ whenẹnu, whenuena hiẹ lẹ̀zun yisenọ bo ko sọ yí Jesu Klisti kẹdẹdi whlẹngántọ towe, to whenẹnu Jiwheyẹwhe nọ dohlan kàndejiwéma de, he to didohia dọ, ylando depope he otọ́ towe kavi onọ towe kavi omẹ depope, onọ towe kavi otọ́ sọgan yín ahannumunọ, kavi ayọdetọ kavi depope he ylando lọ na yín, ylando lẹ po ko yín jijò na we na hiẹ ko tindo kàndejiwéma wutu. Nudepope ma sọ tin he sọgan hẹn we jai. Bo do ayi e go, onú depope he tin to aigba lọ ji lẹ po ko yín towe! Niṣẹ. Podọ whenuena hiẹ tin to Klisti Jesu mẹ gbọn baptẹm GbigbọWiwé tọn dali, na núniná Jiwheyẹwhe tọn lẹ po ko tin to Agùn Etọn mẹ. Niṣẹ. Enẹ wẹ wémakàndeji tọn lọ. Na hiẹ tọn, towe wẹ yé, Ewọ na diọ agbasa kúkú towe dogbẹ̀. Oje! Lẹn ehe pọ́n!

Mì gbọ mí ni pọ́n hlan omẹ nugbonọ azán Pẹntikọsti gbe tọn lẹ. Yé omẹ po tin to abò aga tọn lọ mẹ, bo to búdi. Yé tindo yise pẹvide, ṣogan yé sọ to búdi.” Podọ to pòpo lẹpo mẹ ogbé de tọ́n sọn Olọn mẹ,” podọ núhe nukun manọmọ de jẹ do yé ji, “Taidi ogbè jẹhọn sinsinẹn tọn, bo sọ gọ́ ohọ̀ he mẹ yé sinai te.” Bọ yé omẹ po sọ yín didiọ gbọn enẹ lọ dali, kaka jẹ whenuena búdidi yetọn lẹ...yèdọ dopo to yé mẹ to búdi, yé tlẹ gbẹ́ dọ é ma yín Falisi, kavi Sadusi de. Ṣigba whenuena Gbigbọ Wiwé jẹte bo baptizi i to Jesu Klisti mẹ, wẹ é lẹzùn olán sọ́n olán Etọn mẹ, podọ ohú sọ́n ohú Etọn mẹ, Ohó sọ́n Ohó Etọn mẹ. É lẹzùn núdida yọ́yọ́, yèdọ gbẹtọ yọ́yọ́. Enẹ lọ wẹ diọ agbasalan etọn.

Mì pọ́n núhe E wà, kẹdẹdi lé E nọ wà dó whenuena E biọ mì mẹ. E ma na hẹn we jẹgbonu bo dọ, dọmọ, “ Mẹtọdisti wẹ yẹn. Baptizi wẹ yẹn. Oje! Yẹn yọnẹn dọ, yẹn ma sọgan nù siga. Yẹn yọnẹn dọ, yẹn ma dóna tindo ehe. Yẹn ma dóna dó avọ lé hunkọ tọn lẹ gba. Yẹn ma dóna wà ehe. Yẹn ma dóna wà enẹ.” Ewọ lọ wẹ na diọ we kaka hiẹ nado wa ẹ. Podọ Ewọ wẹ na diọ agbasalan kuku mìtọn lẹ.

Mì pọ́n, E diọ agbasalan yétọn lẹ, kaka jẹ whenuena yé zlọ́n sẹpọ Olọn, kakajẹ whenuena E diọ agbasalan yétọn bọ yé yí ogbè devo he yé ma sé pọn do to ohó dọ. E diọ agbasalan yétọn lẹ, bọ yé to ogbè yọ́yọ́ Olọn mẹ tọn dó. Yé yín didiọ to Nukun Jiwheyẹwhe tọn mẹ, dogbọn baptẹm Gbigbọ Wiwé tọn dali. Huhlọn núdidiọ Jiwheyẹwhe tọn tọn baptizi yé dó enẹ lọ mẹ. Bọ yé sọ tin to otẹn he mẹ yé nọ basi sinsẹ̀n te. Yèdọ yé tin to ofi he yé sọgan basi sinsẹ̀n te. Tòhódọtọ lẹ kavi núdevode ma do tukla yé, na yé yín didiọ wutu. Yé lẹzùn omẹ gbọnvo lẹ, to whenuena yé yín bibaptizi godo.

Mì pọ́n hlan Sitefani pẹvi enẹ, É biọ otẹn he Jiwheyẹwhe de lọ mẹ, bo yín didiọ gbọn huhlọn Jiwheyẹwhe tọn mẹ; é biọ họngbo lọ mẹ wá otẹn he Jiwheyẹwhe de lọ mẹ. Yèdọ whenuena yé yí nado hu i; yé dlán zánnu do é jẹ okú, wẹ é dọ, dọmọ, “Pọ́n, yẹn mọ Olọn lẹ hùn po Jesu po to ote to adusinlọ Jiwheyẹwhe tọn mẹ.” Enẹ wẹ huhlọn didiọ tọn. É yín didiọ do otẹn Etọn mẹ.

Podọ Filipi ga mehe yín gigọ́ gbọn huhlọn didiọ tọn dali. Mí mọ ẹn finẹ to Samalia mẹ bo to vọfọ́n daho de basi. Huhlọn daho didiọ tọn he, sọawúhia to whenuena gbẹtọ fọtọ́n hunkọ to tódo é, to godo he é biọ Klisti mẹ. Bọ É sọ dọmọ, “Dinvie, Filipi, Fọ́n bo yì ohù wàji to aliho he sọ́n Jelusalẹm yì Gaza ji ehe yín zùngbomẹ. Yẹn tindo dawe de to gbonu finẹ, ehe yẹn jlo dọ hiẹ ni yì pé é. Podọ é ma sọ kànhó depope biọ lala, na é gọ́na huhlọn didiọ tọn lọ wutu. É tin to Klisti mẹ, otẹn he Jiwheyẹwhe de nado sọgan dọhó hẹ ẹ mẹ. Enẹwutu wẹ é ma do kanhó de biọ whenuena Jiwheyẹwhe dọhó hlan ẹn.

Dọmọ, “E yọn, É dọhó hlan mi bo sọ dọ, dọmọ, yẹn na jẹ gangan, ṣigba, yẹn ma yọnẹn to dinvie gba, na yẹn yín madogannọ to egbé.” Oje! É dọ hlan mi dọ, yẹn tindo Gbigbọ Wiwé, podọ to asiko de lẹ mẹ, yẹn basi mayise na enẹ lọ.”

Filipi yọ́n Ogbè Jiwheyẹwhe tọn titegbe, na é ko wá otẹn he Jiwheyẹwhe de lọ mẹ wutu. É ma dọhó de hlan Jiwheyẹwhe dogbọn enẹ tọn dali gba, dọmọ, “É yọn, yẹn tindo gbẹtọ susu to ofi, enẹwutu yẹn dóna nọ ofi. Yẹn dóna mọ tòmẹho lẹ whẹpo yẹn nado wà enẹ. Yẹn dóna yì dọhó hlan biṣọpu whẹ,” É ma dọhó depope dogbọn enẹ tọn dali gba. É sètonu na Jiwheyẹwhe, bo biọ zùngbo lọ mẹ yì!

É mọ dawe ojọ̀ Etiopia tọn de, omẹ whẹkànnọ de, ehe ja, bo to Owé Isaia yẹwhegán tọn hia. Bọ é sọ dọ, dọmọ, “Bé hiẹ tunwun onú he hiẹ to hihia?”

 Ewọ sọ dọmọ, “Nawẹ yẹn sọgan do, adavo mẹde dèana mi?”

Filipi sọ hẹji bo sinai po é po to kẹkẹ osọ́nọ lọ ji, bo ṣẹ̀ ohó dọ hlan ẹn dogbọn Oklunọ dali.

Ojọ̀ lọ sọ dọ hlan ẹn dọmọ, “Pọ́n, osìn tin to ofi, etẹ wẹ hẹn mi do ote nado baptizi?”

Filipi sọ dọmọ, “Eyín hiẹ yí ayiha towe lẹpo, po alidọn towe lẹpo po, po otùn towe lẹpo po, podọ po huhlon towe lẹpo po do yise.” Filipi sọ jẹte sọn osọ́ kẹkẹnọ lọ ji bo baptizi i.

Filipi sọ gọ̀na huhlọn didiọ tọn nẹ lọ kaka ewọ do yín zizé sẹ́ sọn é de. Mì lẹnpọ́n! Yèdọ to agbasalan kúkú etọn mẹ, awúsọhiamẹ etọn yín zizé yì agà sọn nukun ojọ̀ lọ tọn mẹ. Yẹn yí enẹ lọ sè dọ, nugbo wẹ. Enẹwutu, Jiwheyẹwhe sọgan zé é yì fidevo, yèdọ fie Ewọ dóhudo etọn te. Yè zé é yì agà.

Mì mọdona dọ, okú matlẹ sọgan yí onú nẹ lọ sọn mì de to whenuena mì tin to Klisti mẹ, yèdọ to otẹn Jiwheyẹwhe tọn mẹ.

Do ayi e go, Mọse lọsu tindo e ga. Ewọ yín yẹwhegán de ehe de Ohó Oklunọ tọn nọ wá. Podọ depope he Kole sọgan fọ́ntite bo dọmọ, “Mí dóhudo gbẹ́pipli daho de tọn. Na hiẹ tẹnpọ́n nado yín mẹwiwé dopolọ gẽ wutu.” Enẹwutu, Jiwheyẹwhe dọmọ, “Klán dewe, Yẹn na zé é mi.” Podọ enẹ ma sọ yín núde to nukun Datani po mẹhe pò lẹpo po tọn mẹ, ṣogan ewọ sọ dèdo nukọn.

Podọ whenuena Mọse kú bọ Angẹli lẹ dì i, huhlọn didiọ tọn nẹ nọte to é ji. Na owhè fẹnẹ godo, ewọ tin to aigba pagbè tọn lọ ji, bo to ohódọ hẹ Jesu. Huhlọn didiọ tọn nẹ lọ gbẹ́sọ tin to é ji. Enẹ lọ wẹ otẹn Jiwheyẹwhe tọn na sinsẹ̀n.

Hiẹ sọgan dọ, “Etẹ dọ wẹ yẹn te? Podọ nawẹ yẹn mọdona dó? Yẹwhegán de wẹ ewọ. Podọ Ohó lọ nọ wá yẹwhegán lẹ de. Ewọ sọ wẹ Ohó Jiwheyẹwhe tọn he sọawúhia to owhèta etọn mẹ. Niṣẹ.

Dinvie, bé mì mọdona? Mì ma sọgan kú, na mì ko yín mẹhe yè diọ. Ojé, eyín agùn lọ sọgan mọdona domọ, dọ, e ma yín núhe mì na wá yín gba, na mì ko yín mọ dote! Ṣigba Lẹgba wẹ to núwà nado klọ mì sọn enẹ lọ kọ̀n.

Hiẹ sọgan dọmọ, “Dinvie, yẹn na dọ hlan we. Ehe tọn wẹ yẹn.” Ṣigba ohó depope ma kàn mi po ehe tọn hiẹ yín po gba.

Enẹwutu, hiẹ dóna yín vivọ ji, bo yín vivọ dá, bo sọ yín bibaptizi gbọn Gbigbọ Wiwé dali to Jesu Klisti mẹ, nado nọ̀gbẹ̀ gbọn Ohó dopodopo dali. Podọ Gbigbọ he tin to hiẹ mẹ na dọ “niṣẹ” na Ohó Biblu mẹ tọn dopodopo. Podọ eyín gbigbọ he tin to hiẹ mẹ gbẹ́kọ̀ sọn dopo Ohó helẹ lọ tọn go, bé whenẹnu hiẹ na dè gbigbọ nẹ lọ sẹ̀ sọn ayiha towe mẹ. Na Gbigbọ Jiwheyẹwhe tọn ma sọgan diọnukunsọ Ohó Jiwheyẹwhe tọn gba. Ewọ dóna wà do Ohó Jiwheyẹwhe tọn ji. Podọ e ma yín dọ e na yise to E mẹ poun gba, ṣigba E nọ hẹn Ẹn nọ̀gbẹ̀. Mọwẹ E sọ nọ hẹn Ohó Jiwheyẹwhe tọn sọawúhia dó. Mọwẹ.

Dinvie, mì dayi mẹwiwé Alẹ̀nù Hóhó mẹ tọn lẹ go. Podọ to Gbigbọ mẹ to avọ́sinsán hóhó tọn lẹ mẹ, yé to tenọpọ́n yọ́yọ́jẹ dopo he lọ na e nido sọawúhia, bo nado tindo ayiha dagbe panukọn Jiwheyẹwhe. To Owé MATIU 27 tọn mẹ, yè dọ hlan mí dogbọn fọ́nsọnkú Jesu tọn dali. Enẹ he mí basi hùnwhẹ etọn to osẹ̀ he wáyì lẹ mẹ, yèdọ Juwáyi. Na Biblu dọ, dọmọ, “Omẹwiwé susu he ko damlọn to aigba glọ́ lẹ, fọ́n to fọ́nsọnkú Etọn whenu, bo biọ otòdaho lọ mẹ, bo sọ do yéde hia hlan omẹ susu.” Etẹwẹ yé yín? Yé wẹ awúsọhia pagbè Ohó Jiwheyẹwhe tọn tọn. Enẹ wẹ otẹn dopo gẽ he mẹ Jiwheyẹwhe nọ pé omẹ te to avọ́sinsán lọ glọ́.

Dinvie, to Owé 1 TẸSALONIKA 4:16 tọn mẹ, Biblu dọ ga dọ, mẹwiwé Alẹ̀nù Yọ́yọ́ mẹ tọn lẹ na wá po É po to whenuena É lẹ́gọ̀wá, yé mẹhe yè diọ po É po lẹ. Enẹwutu, nawẹ mì na biọ É mẹ dó? Gbọn Baptẹm Gbigbọ Wiwé he yín huhlọn Jiwheyẹwhe tọn tọn dali, podọ fie É nọ pé omẹ te to Jesu mẹ. Dinvie, Jesu wẹ aliho he Jiwheyẹwhe dè lọ.

Do ayi e go, Jesu tindo kàndeji onú he Ewọ yín tọn! Na É mọdona dọ Ewọ lọ wẹ Ovi Jiwheyẹwhe tọn. É sọ yọ́nẹn dọ Ewọ lọ wẹ Mẹhe yè ji sọn awhli to gbèji de mẹ. Podọ ga, É sọ yọ́nẹn dọ Owé Wiwé lẹpo sọawúhia gbọn Ewọ mẹ. Nado dọ, É mọdona titegbe kaka é do dọ hlan tẹmplidótọ lẹ to azán nẹ gbè dọmọ, “Mì na họ́ ẹ, ṣigba Yẹn nasọ gọ̀ ẹ dó to azán atọ̀n mẹ.” Mì lẹn enẹ pọ́n, na Jesu wẹ dọ,dọ, “Mì họ́ ẹ, ṣigba Yẹn nasọ gọ̀ ẹ dó to azán atọ̀n mẹ.” Etẹwutu? Na e yín Ohó he yè wlán dogbọn Ewọ tọn dali wutu.

Enẹwutu, Davidi dọmọ, “Yẹn ma na jo Mẹwiwé Ṣie do awúfiẹsa mẹ, kavi jo alindọn Etọn do awúfiẹsa mẹ, mọ Yẹn ma na jo Mẹwiwé Ṣie do ni jiya kavi mọ gbigble.”

Dinvie, Jesu yọ́nẹn dọ Ewọ lọ wẹ. Enẹwutu, É ma hò to ayiha Etọn mẹ. Podọ É yọ́nẹn dọ, to gànhihò kande-gbànnukun-awe mẹ, agbasa lọ na gble, podọ to ojlẹ de mẹ É yọ́nẹn dọ É na gọ̀wá ogbẹ̀ to gànhihò kande-gbànnukun-awe mẹ, enẹwutu wẹ É do dọmọ, “Mì họ́ tẹmpli he, Yẹn nasọ gọ̀ ẹ dó to azán atọ̀n mẹ.” Etẹwutu? Na Ohó lọ yín winwlán gbọn Etọn dali wutu. Yè wlán ẹn dogbọn Ewọ tọn dali, na Ewọ wẹ awúsọhia Ohó Jiwheyẹwhe tọn he yè wlán na ojlẹ nẹ lọ.

Mọwẹ, halleluya! Na awúsọhiamẹ Ohó Jiwheyẹwhe tọn tọn dóna tin to fide to egbé. Podọ mọdoplọ wẹ, na É dọhó dogbọn azán helẹ tọn dali, bo sọ dọ núhe na wá jọ to azán helẹ mẹ hlan mí. Na É ko dọ ẹ hlan mí dote. Enẹwutu, mí sọ mọdona núhe ja jijọ gbè lọ. Podọ mí sọ mọ lé yé to awúsọhia to hiẹ mẹ dó, to whenẹnu hiẹ tin to Agùn Jiwheyẹwhe tọn mẹ. Podọ enẹ mẹ vo, hiẹ sọgan ylọ dewe dọ, “Mẹtodistinọ, kavi Baptistinọ,” kavi onú mọtọnhunkọ lẹ, gba enẹ lọ ma sọgan wàzọ́n de gba. Enẹwutu, opétẹn dopo gẽ wẹ tin, enẹ wẹ to Klisti Jesu mẹ. Ojé, nawẹ yẹn na jlo dọ omẹ lẹpo ni mọdona enẹ dó, podọ nado mọdona lé yé na biọ e mẹ gbọn baptẹm dali dó. Na Asivu lọ yín apáde Asú Etọn tọn wutu. Podọ Agùn lọ yín apáde Ohó lọ tọn, yèdọ awúsọhiamẹ Etọn.

 Dinvie, agùn tẹ mẹ wẹ hiẹ tin te? Bé agùn gbẹ́pipli de mẹ wẹ hiẹ tin te? Eyín enẹ mẹ wẹ hiẹ tin te, yẹn na dọ hlan we dinvie dọ, Laodikea mẹ wẹ hiẹ tin te. Ṣigba eyín hiẹ tin to Klisti mẹ, hiẹ ko lẹzùn núdidá yọ́yọ́ de, podọ hiẹ sọ tin to Agùn Jiwheyẹwhe Ogbẹ̀nọ tọn mẹ, po awúsọhiamẹ onú dopo lẹ lọ he É wà to azán Etọn mẹ lẹ tọn po, dọ, yé nasọ sọawúhia to ojlẹ he mẹ, bo to onú dopo lẹ lọ wà, yèdọ ehe É dọ E na wà. Whenẹnu, enẹ wẹ Agùn nugbo lọ. Hiẹ na biọ e mẹ gbọn baptẹm Gbigbọ Wiwé tọn dali, e ma yín nado nọ̀ apa Etọn gba, kavi onú mọtọnhunkọ de gba, adavo nado yín bibaptizi gbọn Gbigbọ Wiwé dali do Agbasa Etọn mẹ. Mọwẹ. Otẹn didè dopo he Jiwheyẹwhe dè na mí nado basi, wẹ nado yín bibaptizi do Agbasa Etọn mẹ gbọn Gbigbọ Etọn dali.

Enẹwutu, Jesu dọ to Owé JOHANU 14:12 tọn mẹ, dọmọ, “Mẹhe yí Mi sè to whenuena é tin to Yẹn mẹ!” E ma yín núde wutu wẹ gbẹtọ lẹ do nọ dọ, dọ, azán nújawu tọn lẹ ko wáyì, e ma yín núde wutu wẹ yé do nọ dọ núhelẹ gba. Enẹwutu, Jesu dọ, dọ, “Mẹhe yí Mi sè, e ma yín mẹhe yí Mi sè to nùflo ji gba, ṣigba mẹhe yí Mi sè nugbonugbo, azọ́n he Yẹn wà, wẹ ewọ na wà ga.” Etẹwutu? Na Ogbẹ̀ Etọn wẹ wutu. Huhlọn Etọn to azọ́nwiwà Etọn mẹ he tin to mì mẹ, wẹ to huhlọnna ẹn, bo hẹn yì nado wàzọ́n he yè ko dopa yetọn. Kavi ogbẹ̀ ṣie to Ewọ mẹ, ko hẹn mi nọ̀gbẹ̀ gbọn Gbigbọ Etọn dali, nado hẹn Ohó Etọn he yín azọ́nwànú, he to azọ́nwà po huhlọn Etọn po. Yè wlán ẹn to Owé HEBLU 13:8 tọn mẹ, dọ, “Jesu Klisti dopolọ to osọ, egbé, podọ mọwẹ kakadoi.”

Do ayi e go, dinvie dọ, to Owé LUKU 17:30 tọn mẹ, mí dótóai titegbe na mí ko wá vivọnu wutu, na Jesu dopagbè onú helẹ tọn hlan ojlẹ godo tọn lẹ, dọ, Ewọ “dopolọ wẹ to osọ, egbé, podọ mọwẹ kakadoi.” É dopagbè to Owé MALAKI 4 tọn mẹ, dọ, Ewọ na “lẹ́ ayiha gbẹtọ lẹ tọn do Yise otọ́ lẹ tọn de to ojlẹ godo tọn lẹ mẹ.” É dopagbè enẹ lọ tọn. É dopa núhe Ewọ na wà tọn to ofi susu to Biblu mẹ. Na yè wlán ẹn, dọ, “Ojlẹ vude dogọ́ aihọn ma na mọ Mi ba, ṣogan mì na mọ Mi; Na Yẹn na tin po mì po, podọ to mì mẹ to whelẹponu, yèdọ kaka jẹ opòdo aihọn tọn.” Podọ mì do ayi e go to Owé LUKU 17:30 tọn mẹ, dọ, “Lé e te to azán Sọdọmi tọn lẹ mẹ!”

Bé mì mọdona núhe jọ to Sọdọmi? Mì pọ́n hlan otò Kalifọlnia tọn; e ma yín Kalifọlnia kẹdẹ gba, adavo otò Amẹlika tọn lẹpo; e ma yín otò Amẹlika tọn kẹdẹ gba, adavo aihọn lọ.

Mì do ayi alẹ ovu whenu tọn go! Etẹwutu mí do tindo... Na yẹn dọ hlan we to azán de gbè, dọ, yé ko basi tẹsi lọ to owéhọ otò Alizóna tọn mẹ to finẹ, yèdọ fie yẹn nọnọ̀. Kanwe do kanwe-kò ji to yọpọvu lẹ mẹ to owéhọ lọ mẹ wẹ yín lẹndẹnnọ to ayiha mẹ. Nawẹ ovi yetọn lẹ na wá nọ̀? Mí ma sọgan tindo whẹndo devo de gba. Mí ko wá vivọnu. Na Jesu ko dọ, dọ, onú helẹ pó na wá jọ.

Mì dayi onú gbigble he televizọn to didètọ́n bo matin to titò mẹ lẹ go! Enẹwutu, mí ko wá vivọnu. Yẹn dọmọ, ojlẹ na wá bọ gbẹtọ lẹpo na lẹzùn alẹnọ, yedọ aihọn lọ pete. Na Biblu dọ dogbọn onú mọtọnhunkọ lẹ dali, dọ, “Yé na mọ di mẹhe ma mọ” kẹdẹdilé yé dohia to televizọn mẹ dó to egbé dogbọn núdidá ehe jẹnukọnna otànhó owhèta lẹ tọn dali, ehe nọ̀ aigba ji họ̀ owhè susu, ehe yè flé bo sọ tọ́njẹgbonu hlan ... Onú pẹvi de wẹ enẹ, na núhe ja jijọ gbè. Whenuena yè na hùn Lọnzòdò bọ Satani na tọ́njẹgbonu po núdabla etọn lẹpo po, yèdọ aklekle po odà he di yọnnu lẹ tọn po, podọ adú etọn he di adú kinnikinni de tọn. Etẹwutu? Na aihọn lọ blébu na tin to alẹdida mẹ. Do ayi e go, e ma yín dinvie gba, adavo to ojlẹ pẹvi de mẹ.

Ojé, na gigo Jiwheyẹwhe tọn, na wiwá Oklunọ Jesu tọn, na Gbigbọ Wiwé wutu, na ehe mí yọ́nẹn tọn, podọ na ogbẹ̀ninọ̀ to Nukọn Jiwheyẹwhe Ogbẹ̀nọ tọn!

Jesu dọ to Owé Malku tọn mẹ to finẹ, dọ, “To azán nẹ gbè, Ovi gbẹtọ tọn na yín didohia.” Dinvie, mì do ayi e go, dọ, e ma to azọ́nwà di Ovi Jiwheyẹwhe tọn gba. Na É wá to oyín oviyínyín tọn mẹ to ninọ̀mẹ atọ̀n: tintan É wá di Ovi gbẹtọ tọn, awetọ É wá di Ovi Jiwheyẹwhe tọn podọ atọ̀ntọ, É wá di Ovi Davidi tọn. Whenuena É tin to aigba ji, É wá di Ovi gbẹtọ tọn bo yín yẹwhegán de. Na Ovi gbẹtọ tọn wẹ yẹwhegán. Jehova Lọsu na Ede ylọ yẹwhegán lẹ, yèdọ Jelemia po mẹhe pò lẹpo po, dọ, “Visunnu gbẹtọ tọn, etẹwẹ hiẹ mọ?” Podọ Jesu wá, na É dóna wá kẹdẹdilé Owé Wiwé dọ dó, yèdọ di Ovi gbẹtọ tọn. Na Mọse dọ, dọmọ, “OKLUNỌ Jiwheyẹwhe mìtọn na fọ́n yẹwhegán de tite jijlẹdo ogo é.” Podọ É dóna yín yẹwhegán de, yèdọ Ovi gbẹtọ tọn.

Ṣigba to okú Etọn po didi Etọn po, podọ fọ́nsọnkú Etọn godo, É ko to Ovi Jiwheyẹwhe tọn yín to dinvie, enẹ wẹ núhúnú lọ, yèdọ Gbigbọ Wiwé.

Ṣigba É dopagbè jẹnukọnna wiwá ojlẹ godo mẹ tọn, dọ, aihọn na taidi lé e nọ̀ to Sọdọmi whenu, to whenuena Gbẹtọ de jẹte wá to ninọ̀mẹ gbẹtọyínyín tọn de mẹ; yé omẹ atọ̀n delẹ, yèdọ angẹli awe po Jiwheyẹwhe Lọsu po ga. Enẹ wẹ Jiwheyẹwhe Lọsu. Na Biblu Lọsu dọ mọwẹ. Dinvie, É jẹte wá bo do Ede hia to finẹ, bo dogo gohọ̀ he mẹ Sala te lọ, bo sọ dọ núhe Sala to linlẹn to gohọ̀ lọ mẹ hlan Ablaham. Bé e ma yín mọwẹ? [Agùn lọ sọ yígbè dọ, “Niṣẹ.”–Ed.] Dinvie, Jesu Lọsu dọ, dọmọ, “To azán he gbè Ovi gbẹtọ tọn na yín didohia,” to ohógbè devo lẹ mẹ, “Ovi gbẹtọ tọn wẹ devizọ́nwiwà Jesu Klisti Lọsu tọn.”

Do ayi e go, agùn lọ na sọawúhia gbọn owhẹ̀sùna dali, yèdọ gbọn Lutẹ dali; gbọn klándowiwé dali, yèdọ gbọn Wẹsle dali; gbọn baptẹm Gbigbọ Wiwé tọn dali, yèdọ Pẹntikọsti; kaka e nado yì biọ pipégan Ovi gbẹtọ tọn tọn mẹ, to whenẹnu Asú po Asi po na lẹzùn omẹ dopo. Enẹwutu, Jiwheyẹwhe na sọawúhia to Asivu Etọn he yín Agùn Etọn mẹ, kaka yé omẹ awelẹ nado yín dopolọ. Na dopo wẹ yé. Dinvie, bé mì mọdona fie mí tin te?

Dinvie, mì hẹn otànhóhó po zédai lẹpo po go blo. Na yé sọgbè to azán yetọn mẹ, ṣigba omá lọ ko tọ́njẹgbonu dinvie. Ojlẹ jinukun lọ tọn ko sọ. Mọwẹ.

Enẹwutu, Jesu dopagbè núhe lẹ tọn. Dinvie, whenuena mí mọ dọ, Jiwheyẹwhe hẹn opagbè Etọn nọ̀gbẹ̀ to nukọn mítọn, bọ mí sọ mọ dọ enẹ tin to mí mẹ, podọ Gbigbọ Etọn sọ to ninọ̀ mí mẹ; enẹ lọ kẹdẹ wẹ aliho sinsẹ̀n tọn, yèdọ otẹn sinsẹ̀n tọn dopolọ gẽ he yín aliho nugbo dopo he mẹ mí sọgan basi sinsẹ̀n te, enẹwutu, yè wlán ẹn, dọ, “Enẹwutu, na owhẹ̀gbledo de matin dinvie hlan yé he tin to Klisti Jesu mẹ lẹ.” Jiwheyẹwhe wẹ dopagbè lọ. Enẹwutu, Jesu dọmọ, “Núhe Yẹn wà lẹ wẹ mì na wà ga,” podọ núhe É na wà to azán godo tọn lẹ mẹ. Lé É wá gbọn owhèta he mẹ dó, e ma yín okle kavi ozán gba, ṣigba e na taidi ojlẹ zinvlu tọn de, na É dọ, dọmọ, “To whèjai jlẹ mẹ, Hinhọ́n de na zẹ̀.”

Na owhè nọ zẹ̀ sọn whèzẹtẹn bo sọ nọ yìdò to whèyihọ̀. Owhè dopolọ wẹ nọ zẹ̀ sọn whèzẹtẹn bo sọ nọ yìdò to whèyihọ̀, nukunhúnhún ko tọ́nwhẹn po e po. E ko dasá otọ̀ atọ̀n wáyì, enẹ wẹ baptẹm vòvo atọ̀n. Mọwẹ, yèdọ sọn otò Asia tọn mẹ jẹ otò Elopea tọn mẹ; podọ sọn otò Elopea tọn mẹ jẹ otò Inglandi tọn mẹ; podọ sọn otò Inglandi tọn mẹ jẹ otò Amẹlika tọn mẹ.

Podọ dinvie, mí ko lẹ́gọ̀wá, bo sọ tin to aisinsin to ofi to whèjai he to otò Wẹst Kost tọn mẹ, to fie aliglọnnú ylando tọn lẹpo bẹ́ yédelẹ pli do to huhlọn zinvlu tọn lẹpo mẹ. Ayihun po núyiwà televizọn tọn mẹ helẹ pó, po lé sunnu lẹ to nùdonùgona yọnnu lẹ po to finẹ dó, enẹ lọ to ayiha hẹngblena yọpọyọnnu lẹ.

To jlọjẹ mẹ, bé mì ma yọ́nẹn dọ sunnu depope he donùnùgona yọnnu de dóna yí i do dà asi? Podọ to nugbo de mẹ, núyiwà gblewà tọn de wẹ enẹ. Mọwẹ nugbo. Mọwẹ mẹdaho. Etẹwẹ enẹ yín? Otán sunnu de tọn po yọnnu de tọn po wẹ to nùfló yé omẹ awelẹ tọn ji. Whenuena otán sunnu de po yọnnu de tọn po tindo kànṣiṣa de, enẹ wẹ gbẹzan gblewà tọn.

 Mì pọ́n hlan Holiwudu, lé oviyọnnu pẹvi nẹlẹ tin to gbonu finẹ to ohúnjlẹtẹn de, bọ ovisunnu lẹ to lililẹ́ do yé, po onú mọhunkọ tọn lẹpo po, bọ yé sọ yín hànjitọ agùn tọn lẹ. Podọ Ẹlvisi Plẹslis he lẹ, podọ onú mọhunkọ tọn lẹ po he mí tindo to egbé, núhùwinyan wẹ eyín na otò Amẹlika tọn, hlan onú he tọ́gbó mítọn lẹ hòavun bo kọ̀n ohùn yetọn lẹ dai na, kaka bọ yé sọ kú na ẹn.

Ṣigba ojlẹ lọ ja bọ agbọ́ na pé ahọludu lẹpo, na Ahọludu Jiwheyẹwhe tọn na yín didóai do ayiha gbẹtọ lẹ tọn mẹ, gbọn baptẹm Gbigbọ Wiwé tọn po Awúsọhiamẹ Jesu Klisti tọn po dali. Whenẹnu wẹ Klisti na wá Asivu Etọn de bo nasọ dó Ahọludu de ai to aigba ji to ofi, ehe ma na pònù gbèdé. Dinvie, nawẹ hiẹ sọgan biọ Ahọludu he lọ mẹ dó? Yè ji mì do e mẹ wẹ. Podọ nawẹ mì na yọ́nẹn dó? Enẹwutu, nawẹ hiẹ na yín ahọludu de tọn bo ma na sọgbè hẹ ahọlu lọ dó? Bé mì mọdona? Podọ Ahọlu lọ wẹ Ohó lọ. Na yè wlán ẹn, dọ, “To whẹ́whẹ́whenu wẹ Ohó lọ ko tin, Ohó lọ ko tin po Jiwheyẹwhe po, Ohó lọ wẹ Jiwheyẹwhe. Yè sọ lẹ́ Ohó lọ zùn agbasalan, É sọ nọ̀ mí ṣẹnṣẹn. Ewọ wẹ dopolọ to osọ, egbé, podọ mọwẹ kakadoi.”

Bé nawẹ yé yọ́nẹn dó dọ Ewọ wẹ Ovi gbẹtọ? É na ko pọ́n hlan gbẹtọ lẹ mẹ, bo mọ núhe yé to linlẹn. Mí omẹ pó wẹ mọdona dọ, nugbo wẹ enẹ lọ. Enẹwutu, Ewọ dopolọ wẹ to egbé. Bé mì yí enẹ lọ sè? [Agùn lọ sọ dọmọ, “Niṣẹ.”–Ed.]

Bé Billy ko má odẹ̀ wéma lẹ? Na yẹn wọnji nado kànbiọ ẹ. Bé é ko má odẹ̀ wéma lẹ lọ? [Agùn lọ yigbè, dọ, “Mọwẹ.”–Ed.] Mọwẹ.

Dinvie, yẹn na dọ hlan mì. Eyín mì dóyise sọmọ, na yẹn dóyise nado yí Jiwheyẹwhe nẹ sè, yèdọ Mẹhe dopagbè lọ, bo sọgan do Ede hia to ofi, matin awúsọhia mẹdepope tọn to agbà he ji. Enẹwutu, yẹn lẹn nado zé núyiwà lọ do pagbè Ohó Jiwheyẹwhe Ogbẹ̀nọ tọn ji. Dinvie, mí pọ́n ofi, na yẹn na do núde hia mì, dọ, mì na zán huhlọn núdidiọ tọn nẹ lọ. Enẹwutu, mì gbọ na yẹn ni do E hia mì! Omẹ nẹbi wẹ yise dọ yé tindo huhlọn núdidiọ nẹ lọ tọn? [Agùn lọ sọ dọmọ, “Niṣẹ.”–Ed.] E sọgbè, bé etẹwẹ to alọ mìtọn lẹ wà do awutunọ lẹ ji?

Do ayi e go, whenuena apọsteli lẹ mọ huhlọn núdidiọ nẹ tọn yí to Azán Pẹntikọsti tọn gbè, etẹwẹ yé wà? Yé tọ́njẹgbonu bo zé alọ do awutunọ lẹ ji, bọ yé sọ jẹ gángán. Enẹwutu, Jesu dọ to Owé MALKU 16 tọn mẹ, dọ, “E nasọ yín mọ gbọn aihọn lẹpo mẹ.” Kaka jẹ whetẹnu, bé jẹ owhèta apọsteli lẹ tọn? Na yè wlán ẹn, dọ, “Mì yì aihọn lẹpo mẹ, mì ni to yẹwhehó Wẹndagbe tọn dọ hlan gbẹtọ lẹpo. Ohia helẹ wẹ nasọ nọ hodo mẹhe yise lẹ; yé na zé alọ do azọ̀ntọ ji, yé nasọ jẹ gángán.” Enẹ lọ wẹ huhlọn núdidiọ tọn kẹdẹdilé e sọawúhia dó gbọn ohú Eliṣa tọn lẹ dali. Podọ huhlọn dopolọ wẹ sọawúhia to mẹwiwé lẹ ji bo sọ fọ́n yé dogbẹ̀. Podọ eyín huhlọn núdidiọ tọn dopo nẹ lọ tin to mí mẹ, whenẹnu eyín mì zé alọ mìtọn lẹ do azọ̀ntọ lẹ ji, yé nasọ jẹ gángán.

Yẹn payi e go to ofi dọ, yẹn ko dóalọtena wuntuntun, nado zé alọ ṣie do awutunọ lẹ ji. Mọwẹ yẹn sọ flin whenuena yẹn ma mọ susu to yé mẹ, kavi e ma yín mọ gba. Dolé, yẹn mọ susu húgan ehe yẹn ko mọ wáyì lẹ. Podọ yẹn sọ zé dẽ do awà Jiwheyẹwhe tọn mẹ bo mọ gblọndo dagbe yí, bo to didọmọ, “Oklunọ Jiwheyẹwhe È, Hiẹ do pagbè. Na opagbè Towe wẹ; e ma yín ṣie gba, Towe wẹ, podọ Hiẹ ko sọ dopagbè dọ, Hiẹ na wà ẹ. Podọ yẹn sọ mọ dọ, Hiẹ to wiwà ẹ. Yẹn sọ yise dọ, Hiẹ na sọ wà ẹ, na yẹn ko yí baptẹm dó agbasa Towe mẹ, podọ Gbigbọ Towe to ofi nado dohia dọ Nugbo wẹ.” Niṣẹ. Finẹ wẹ otẹn sinsẹ́n tọn lọ. Podọ eyín hiẹ jẹ otẹn enẹ mẹ, “onú lẹpo na bọawù na we.” Whenuena hiẹ biọ otẹn nẹ mẹ, linlẹn towe po núyiwà towe lẹpo po, po núwàtọ́ntà towe lẹpo na yín ojlo nugbo Jiwheyẹwhe tọn. Podọ eyín hiẹ zé alọ towe lẹ do onú de ji bo sọ yise, e na yín bibasi. Bé mì yí enẹ lọ sè? [Agùn lọ sọ dọmọ, “Niṣẹ.”–Ed.]

Whẹpo odẹ̀ wéma de nado yín yiylọ, kavi onú devo de, yẹn yise dọ, Jiwheyẹwhe Ganhùnupo sọgan dọ núhe hiẹ sọgan tindo kavi núhe jẹ na hiẹ ni wà po núhe ma jẹ dọ hiẹ ni wà po hlan mi. Enẹ wẹ afọdidè tintan lọ, mọwẹ, na yẹn yọ́nẹn dọ nugbo wẹ, ṣigba enẹ lọ wẹ onú titegbe he Jiwheyẹwhe jlo dọ, mí ni wà. Bé mì yí enẹ lọ sè? [Agùn lọ sọ dọmọ, “Niṣẹ.”–Ed.] Omẹ nẹbi wẹ na yí enẹ lọ sè eyín Jiwheyẹwhe basi i? [“Niṣẹ!”]

Dinvie, mẹdepope ma sinai to nukọn ṣie, ehe yẹn yọ́nẹn, yèdọ mẹhe yẹn sọgan lẹnpọ́n, kavi sọgan mọ mẹdepope he yẹn yọ́nẹn nugbo. Omẹ nẹbi wẹ yọ́nẹn to gbonu finẹ dọ, jonọ wẹ mí omẹ pó, na mì ni zé alọ mìtọn lẹ daga! Podọ mì sọ yọ́nẹn dọ, yẹn ma mọdona núdepope dogbọn mìtọn dali, mì zé alọ mìtọn lẹ daga! Podọ ga, to fidepope to gbẹtọ lẹ ṣẹnṣẹn, mẹhe yọ́nẹn dọ yẹn ma mọdona núdepope dogbọn ewọ tọn dali. Yẹn lẹn dọ ofi lẹpo wẹ, nado dọ to agà ofi. Dinvie, e sọgan yín dọ mẹdevo lẹ ma zé alọ yetọn lẹ daga. Enẹwutu, yẹn ma sọ yọ́n yé gba. Yẹn yise dọ yẹn nọ mọ Hliṣa Blẹ to aisinsin to ofi. Yẹn yise dọ, mọwẹ. Do ayi e go, zinvlu do to finẹ. Podọ hinhọ́n sọ tin to awà he ji. Ṣogan yẹn ma mọ.

Ṣigba mì pọ́n hlan ofi, na yẹn to tintẹnpọ́n nado dọ hlan mì, dọ, whenuena huhlọn núdidiọ tọn nẹ wá mì mẹ, enẹ wẹ Jesu Klisti. Na whenuena Jesu zé alọ Etọn lẹ do azọ̀ntọ lẹ ji, yé jẹ gángán.

Whenuena Jesu tindo huhlọn núdidiọ tọn nado diọ Ẹ, podọ to Gbẹtọyínyín mẹ, É sọgan pọ́n hlan gbonu finẹ bo dọ hlan gbẹtọ lẹ linlẹn he tin to yé mẹ, bo sọ dọ núhe yé to linlẹn lẹ hlan yé, podọ núhe yé ko wà lẹ. Enẹwutu, É dogodo yé bo sọ dọ onú dopolọ hlan yé, dọmọ, “Etẹwutu wẹ mì to núlẹn to ayiha mìtọn lẹ mẹ?” Podọ nawe nẹ lọ dóalọ avọ̀ Etọn go, É sọ dọmọ, “Mẹnu wẹ dóalọ ogo É?” Whenẹnu wẹ É sọ pọ́n lẹ́do bo mọ ẹn, bo sọ dọmọ, “Yẹn mọ dọ huhlọn de jẹte sọn ogo É. Enẹwutu, yise towe ko hẹn we jẹ gángán.” Enẹ wẹ Jesu Klisti. Enẹ lọ do fie agùn lọ te hia, podọ núhe huhlọn Jiwheyẹwhe tọn nugbo he nọ ná ogbẹ̀ nọ wà hlan gbẹtọ lẹ. Bé mì yí enẹ lọ sè? [Agùn lọ sọ dọ, “Niṣẹ.”–Ed.]

 Dinvie, mì gbọ mí dẹ́ ota mítọn lẹ do odò na ojlẹ vude.

Mẹvivẹ Jiwheyẹwhe È, mí ko hòavun hẹ Satani to whèjai he, gbọn miklo helẹ mẹ, e sọgan yín dọ gbẹtọ lẹ ma tlẹ mọ oda etọn to yinyọ́nẹn mẹ gba, to bibla lẹ́do to ohọ̀ he mẹ dolé. Ṣigba Jiwheyẹwhe È, yẹn hodẹ̀, dọ, Gbigbọ Wiwé na yí núhe jẹ dọ E ni yín, Oklunọ È, yèdọ nado hẹn gbẹtọ lẹ mọdona dọ mí ma yín mẹhe tindo tódidó kúkú de gba. Enẹwutu Jiwheyẹwhe È, mí tin to ogbẹ̀ dinvie, bo nọ̀gbẹ̀ gbọn huhlọn fọ́nsọnkú Klisti tọn dali. Na Jesu Klisti togbẹ̀ to mí mẹ. Mí yí enẹ lọ sè, Oklunọ.

Mí ma jlo gigo de hlan mídelẹ gba. Kẹdẹdi to Osó Nukunmẹdidiọ tọn ji, fie yè hẹn dopodopo mítọn yín didohia te; Mọse tin to finẹ, mẹhe kú bo sọ fọ́ntite; mọwẹ Elija lọsu sọ tin to finẹ ga, podọ mẹwiwé ogbẹ̀nọ̀ he na yín pipé to azán godo tọn mẹ lẹ. Ojé, yé mọ to whenuena yé pọ́n hlan godo bo mọ Jesu ṣokẹdẹ. Enẹwutu, mí yọ́nẹn Oklunọ È, na mí ma jlo dọ gbẹtọ lẹ ni mọ mí gba. Na míwlẹ matin to ofi na enẹtọn wutu gba. Enẹ lọ ni dẹn do mí!

Ṣigba Oklunọ È, e hẹn ayiha mítọn jaya to whenuena mí mọ dọ yè pagigona Jesu to ṣẹnṣẹn mítọn; whenuena mí mọ yè pagigona Ẹn, podọ whenuena mí mọ Ohó Etọn he É yín, whenẹnu wẹ mí Ẹn, mí sọgan hia Ẹ to Biblu mẹ, dọ, fie É dopagbè te dọ É na wà ẹ, bọ mí sọ mọ Ẹn bọ É wàzọ́n to gblagbla mítọn mẹ, O Jiwheyẹwhe ṣie, É hẹn mí yín whiwhẹnọ, dọ, mí yọ́nẹn dọ awúsọhiamẹ ogbẹ̀ninọ̀ Etọn ...

Mí ma kọ̀ndopọ́ hẹ núdepope kavi to núdọ̀n na núdepope gba. Mí yí Oklunọ sè poun, na Ogbẹ̀ Madopòdo. Podọ Hiẹ do ohia mí go to finẹ gbọn baptẹm Gbigbọ Wiwé tọn dali, bo ná ogbẹ̀ agbasalan mítọn lẹ, podọ ogbẹ̀ na gbigbọ mítọn lẹ, bo sọ fọ́n mí dogbẹ̀ nado mọnú, bo dọ odọdai, bo dogbè hunkọhunkọ, bo sọ mọ dọ ohia po nújawu dahodaho lẹ po yí tẹnmẹ. Etẹwutu? Na Jiwheyẹwhe Ogbẹ̀nọ wẹ. Mí tin to Agbasa nẹ lọ mẹ. Podọ whenuena eyín nulu hlan yé mẹhe dọ̀n to aihọn mẹ lẹ; ṣigba hlan mí mẹhe yise lẹ, huhlọn Jiwheyẹwhe tọn wẹ kaka jẹ Ogbẹ̀ Madopòdo mẹ. Mí dopẹ hlan We na enẹtọn Otọ́.

Dinvie, gbọ e ni yín yinyọ́nẹn to azán he gbè dọ, Oklunọ È, Hiẹ wẹ Jiwheyẹwhe, podọ Hiẹ ma diọ ayiha Towe gbèdé sọn Ohó dopodopo he Hiẹ ko dọ lẹ mẹ gba. Podọ Hiẹ dopolọ wẹ to osọ, egbé mọwẹ podọ kakadoi, podọ aliho dopo gẽ he Jiwheyẹwhe dè. Gbẹtọ dopo gẽ he mẹ Jiwheyẹwhe zé Oyín Etọn do wẹ Ovi Etọn Titi he hẹn Oyín Etọn, yèdọ Jesu; Ewọ wẹ Jiwheyẹwhe, Jehova, Whlẹngantọ, Emmanuẹl, Ohọ̀n lẹngbọpó tọn, Ewọ he ko Tin, bo ko Tin, bo ko Sọ Ja; Adọ̀ podọ Oplọ́nji, he yín Adọ̀ podọ Oplọ́nji David tọn; Sùnwhlẹvu Afọnnu tọn, Atin whànpẹnọ Zùngbomẹ tọn. O Jiwheyẹwhe È, na e jawu dolé! E ma yín núde wutu Isaia do ylọ Ẹ dọ, “Hónámẹtọ, Ahọvi Jijọho tọn, Jiwheyẹwhe Ganhùnupo, Otọ́ Madopòdo.” Ojé, mí matindo Otọ́ devo de adavo Hiẹ Oklunọ. Na Hiẹ wẹ Otọ́ mítọn. Podọ Hiẹ wẹ Onọ mítọn. Hiẹ wẹ ehe mí yín lẹpo, podọ ehe mí sọgan wá yín lẹpo. Mí ma jlo nado mọ núdevo de gba, adavo dọ, yè ni pagigona Jesu!

Otọ́ È, yẹn sọgan ko basi ehe masọgbè de to ehe mẹ to whèjai he, ṣigba yí ojlo ayiha ṣie tọn, bo dótóai hlan mi, Mẹvivẹ Jiwheyẹwhe. Podọ gbọ na e ni yín didọ to azán he gbè, dọ, yè ko pagigona Jesu Klisti to ofi to gohọ̀ he mẹ. Basi na mí Otọ́, na mí biọ núhe lẹpo to Oyín Etọn mẹ, podọ kẹdẹdilé yẹn tin to ofi to whuwhẹ de mẹ po agùn he po, nado mọ We to zọnlinzin gbọn Gbigbọ Towe dali. Niṣẹ.

Dinvie, yẹn jlo dọ mì ni wà onú dopo de na mi. Na yẹn jlo nado kàn ohó vivẹ de biọ mì. Yẹn sọ jlo dọ, mì ni gblọnna mi taidi dọ, ehe wẹ godo tọn he mì sọgan gblọnna mẹdepope to gbẹ̀zán mìtọn mẹ. Bé mì yise dọ, Nugbo wẹ? [Agùn lọ sọ dọmọ, “Niṣẹ.”–Ed.] Bé mì yise dọ agùn de kavi agùn gbẹ́pipli titònọ de ma sọgan yín yinyọ́nẹn to Nukọn Jiwheyẹwhe tọn? Bé mì yí enẹ lọ sè? [“Niṣẹ.”] Na agùn depope matin gba. Adavo yé mẹhe yè ji to Jesu Klisti mẹ, bo sọ hẹn Oyín Etọn dota lẹ! Mọwẹ. 

 

Ojlẹ he mẹ hiẹ yín jiji to finẹ wẹ yín whenuena hiẹ ko ṣẹ̀ nado hẹn Oyín Etọn to otà, e ma yín gbọn baptẹm osìnmẹ tọn kẹdẹ dali gba. Nugbo, mì sọgan yín bibaptizi to Oyín Etọn mẹ, ṣigba enẹ ma zé Oyín Etọn do mì ji gba. Oyín Etọn nọ jẹ otà mítọn ji gbọn vọji dali, e ma yín gbọn osìn dali gba. Mì mọ, mì yín bibaptizi do Oyín Jesu Klisti tọn mẹ, mọwẹ mẹdaho, yèdọ do kọndopọ Etọn mẹ; baptẹm gbọn Gbigbọ Wiwé dali do Jesu Klisti mẹ. Enẹwutu mì sọgan yín bibaptizi whlà kanwe-kò, kavi sọha depope he mì jlo, kavi alọ devo de mẹ, enẹ lọ po ma ná vògbingbọn de gba. Ṣigba eyín yè baptizi mì gbọn Gbigbọ Wiwé dali, do Agbasa Klisti tọn mẹ, whenẹnu wẹ mì na lẹzùn visunnu po viyọnnu Jiwheyẹwhe tọn po, podọ na “Ohó dopodopo nido yín nugbo!” Do ayi e go, É nọ basi enẹ na whẹ̀jijọ enẹ tọn wutu.

Kẹdẹdilé yẹn ko dọ dó to azán de gbè wáyì, whenuena Jiwheyẹwhe whàn aigba bo sọ hẹn owhè yìdò to aigba mẹ, É yọnẹn dọ detin lẹ po onú devo lẹ po tin to aigba mẹ. Podọ onú nẹlẹ sọ tin to aigba ji to asiko lọ mẹ, yèdọ mìwlẹ ga.

Podọ whenuena É fọ́n Ovi Jiwheyẹwhe tọn tite, to afọnnu juwayì tọn, bo do Gbigbọ Wiwé hlan jẹgbonu nado na ogbẹ̀ okún he yín Ogbẹ̀ Madopòdo tọn, he É ko yọ́nẹn jẹnukọnna dòdónu aihọn tọn, he na tin to ofi lẹ. É ko yọ́nẹn dọ miklo he na wàzọ́n dolé to whèjai he. É ko yọ́nẹn dọ mì na tindo jijọ̀ he mì tindo to dinvie. Na Éwọ wẹ madopòdo wutu. Mì ma sọgan lẹn ehe pọ́n po ayiha mìtọn lẹ po gba, mì dóna kẹalọyí i poun wẹ. Ṣigba mì gbọ na yẹn ni dọ ohó dopo he, dọ, Jiwheyẹwhe dopo nẹ lọ tin to ofi, to whèjai he, to whànpẹ Etọn mẹ.

Eyín mì yín agùn Mẹtodisti tọn, kavi Baptisti tọn, kavi Pẹntikọsti tọn, núdepope he mì yín, mì gboadọ do gbẹ́pipli depope go blo. Na yé ma sọgan yín agùn gbẹ́pipli tọn de gba... Na núplọ́nmẹ vòvo wẹ yé tindo wutu. Omẹ dopodopo dóna tin hlan Jiwheyẹwhe. Mì dóna yín omẹ dopodopo. Na Jiwheyẹwhe nọ wàzọ́n po omẹ dopodo po, e ma yín po agùn mìtọn po gba. Mì dóna zán ogbẹ̀zán dagbe to agùn mìtọn lẹ mẹ, kavi to piplimẹ fie mì nọ basi sinsẹ̀n te, na mì dóna zán ogbẹ̀zán dagbe he sọgbè to ofi lẹpo. Ṣigba mì pọ́n, yé ko zé zédai lẹ po onú devodevo lẹpo dóai, sọmọ bọ mì ma sọgan biọ họ̀ngbo yetọn lẹ mẹ eyín mì ma yí yé sè. Domọ, bé nawẹ Jiwheyẹwhe sọgan biọ finẹ dó, whenuena Ohó Etọn matin to finẹ to whedepopenu?

Nawẹ Lutẹ mọdona dó dogbọn baptẹm po onúgọ̀donútẹnmẹ Gbigbọ tọn po dali, to whenuena é lẹ́gọ̀ to azán nẹ gbè? Na atin lọ ma ko whẹ́n dó mọ gba. Wẹsle lọsu ma gba. Podọ mọwẹ agùn Pẹntikọsti tọn lẹ ma mọdona núhe to jijọ̀ to egbé lẹ gba. Onú dopolọ wẹ to nukọnyì to mì mẹ. Mọwẹ ete to owhèta lẹpo mẹ, bo nasọ tin to mọ kakadoi.

Podọ yẹn sọgan dohia gbọn Biblu dali, dọ, ehe wẹ owhèta olikún tọn. Mì flín, dọ, to godo vọfọ́n daho he lọ tọn ... Sọn whenẹnu agùn gbẹpipli tọn de ma ko fọ́n to agùn Pẹntikọsti tọn godo gba. Yé ma sọgan tin gba. Na apà lọ po gètin lọ po na juwáyi, bọ núdepope ma nasọ pò adavo olikún lọ kẹdẹ. Enẹ wẹ owhẹ̀jijọ lọ. Nado dọ, to ogbla owhè atọ̀n tọn mẹ, yé nọ basi vọfọ́n gbẹ́pipli lẹ tọn. Mì sọgan kànbiọ otànhódọtọ depope. Ṣigba to Ehe godo, gbẹ́pipli de ma nasọ tin ba. Yé tẹnpọ́n nado hẹn Ojikun-Godogodo tọn wá ayi mẹ, ṣigba mì mọdona núhe jọ po e po. Na e ma sọgan gba. Yèdọ gètin lọ wẹ dinvie. Mọwẹ mẹdaho. Hinhẹntọ lẹ ma sọ tin ba. Jinukún nugbo lọ wẹ. Na Klisti tin to omẹ Etọn lẹ ṣẹnṣẹn. Bé mì yí enẹ lọ sè? [Agùn lọ sọ dọmọ, “Niṣẹ.”–Ed.]

Enẹwutu, mì gbọ mí bẹ́ sọn ofi, yèdọ sọn sisósisó aigba tọn mẹ. Na yẹn ma sọgan dè núde tọ́njẹgbonu sọn finẹ to whenuena yẹn yọ́nẹn dọ, susu mìtọn tin to finẹ. Dinvie, omẹ nẹmu wẹ yise dọ, devizọ́nwàtọ Etọn wẹ yẹn? [Agùn lọ sọ dọmọ, “Niṣẹ”.–Ed.] Enẹwutu, mì yise to Jiwheyẹwhe mẹ! Omẹ nẹmu wẹ tin to ofi he yise to ninọ̀mẹ dopolọ, dọ, “Yẹn yí i sè po ayiha ṣie lẹpo po”? [“Niṣẹ.”] Dinvie, na Jiwheyẹwhe ni basi ehe na mí, na mì nido mọ huhlọn he nọ ná ogbẹ̀ omẹ lọ. Na enẹ yín onú titegbe he to alọdlẹndo ẹn.

Mọwẹ, mẹde sọgan dọ, “Ojé, ehe wẹ Enẹ lọ, yèdọ ehe kavi enẹ.” Ṣigba mì gbọ na e ni wàzọ́n.

Dinvie, e sinyẹnawuna mi titegbe nado mọdona núde dogbọn mìwlẹ tọn dali. Mì mọdona enẹ lọ. Yẹn ma yọ́n mẹdepope adavo omẹ dopo he yẹn sọgan pọ́n hlan de, enẹ wẹ yẹwhenọ Blẹ he sinai to gbonu finẹ, mẹhe tọ́nsọn whèyihọ̀ dali, yẹn yise dọ otò Alkansasi tọn mẹ kavi ofi devo de wẹ é sọn to godo finẹ. Na ewọ wẹ omẹ dopo gẽ he tin to agùn lọ mẹ to ofi, yèdọ mẹhe yẹn to mimọ dọ yẹn yọ́nẹn. Podọ Jiwheyẹwhe sọ yọ́nẹn dọ, nugbo wẹ.

Yẹn mọ to ofi, yèdọ yọpọ yọnnu he sinai to godo finẹ, bo tindo tukla gbigbọ mẹ tọn he mì to dẹ̀hona. Dinvie, bé mì yise dọ, Jiwheyẹwhe na dè tukla gbigbọ mẹ tọn nẹ lọ tọ́njẹgbonu, bo nasọ hẹn ẹn jẹ gángán? Mọwẹ, mì sọgan tindo e.

Dinvie, zé alọ towe do yọnnu he sinai to de we finẹ ji, na é tindo tukla hòmẹwlé tọn bọ yè sọ dẹ̀hona ẹn ga. Mọwẹ. Bé e ma yín mọwẹ, nọviyọnnu? Zé alọ towe lẹ dagà eyín nugbo wẹ. Do ayi e go, yẹn ma yọ́n we, mọ yẹn ma sọ mọ we pọ́n gbèdé to ogbẹ̀ ṣie mẹ gba. Yèdọ yọnnu ninọ̀mẹ vòvo awe tọn.

Dinvie, etẹwẹ enẹ yín? Bé e ma yín núhe É dopa etọn dọ, É na wà wẹ? [Agùn lọ sọ dọmọ, “Niṣẹ.”–Ed.] Mọwẹ nugbo.

Podọ yọnnu de sọ sinai bo to núpọ́n gbọn ofi; é sinai bo to pinpọ́n hlan mi. É to ahúnmẹzọ̀n jẹ. Bé hiẹ yise dọ, Jiwheyẹwhe na gbọ̀ ahúndùdù towe? A sinai finẹ bo to dẹ̀ho, dọmọ, “Yẹn jlo nado jẹ finẹ.” Bé e ma yín mọwẹ? Húnhún alọ towe dolé, yín eyín mọwẹ. Nawẹ yẹn wà dó bo do mọdona núhe hiẹ to didọ to odẹ̀ towe mẹ?

 Bé hiẹ mọdona? Sã ko yise poun. Na enẹ wẹ núhe hiẹ dóna wà lọ.

Podọ lé wẹ oviyọnnu de sinai dó to ofi dó, mẹhe na kú eyín yè ma hẹn ẹn jẹ gángán. Na é tindo ahúnmẹzọ̀n. Bé hiẹ yise dọ, Jiwheyẹwhe na gbọ̀ ahúnmẹzọ̀n lọ? Mọwẹ. Bé hiẹ yí i sè? To mimọ mẹ to ofi dọ, to vivẹnu titegbe de mẹ hiẹ sọgan zé alọ towe daga te, dinvie, bé hiẹ yise dọ Jiwheyẹwhe sọgan dọ mẹhe hiẹ yín hlan mi? Yèdọ nawe Gọnni. Dinvie, yín eyín mọwẹ, húnhún alọ towe domọ, bé hiẹ mọdona? Mọwẹ. Dinvie, yì whégbè na Jesu Klisti na hẹn we jẹ gángán!

 “Podọ eyín hiẹ sọgan yise, onú lẹpo bọawu.”

Podọ awukuzọ̀n he oviyọnnu he sinai finẹ po gbakún yũ po to ota etọn, bo sọ to pinpọ́n mi. Mọwẹ é sọ tindo ahúnmẹzọ̀n dó ga. Bé hiẹ yise dọ, Jiwheyẹwhe na hẹn we jẹ gángán? Bé hiẹ yí i sè po ayiha towe lẹpo po? Asi Milla tọn wẹ yẹn to ohódọ hlan. Bé hiẹ yí enẹ lọ sè? Na yẹn ma yọ́n nawe lọ, kavi mọ ẹn pọ́n togbẹ̀zán ṣie mẹ gbèdé, podọ Jiwheyẹwhe to Olọn mẹ mọdona dọ mọwẹ. Niṣẹ.

 “Podọ eyín hiẹ ṣogan yise!”

Dinvie, nawe whẹkannọ de sinai to ofi to godo, bo dota etọn odò. É to núplọ́n, yèdọ dogbọn mẹyinwanna de dali, mẹhe ewọ to dẹ̀hona. Podọ ewọ sọawúhia nado hodẹ̀na ẹn. Mẹyinwanna lọ matin to ofi gba, na asú etọn wẹ. Mọwẹ. Ewọ matin to ofi gba. Ṣigba é tin to whégbè. Na ewọ tọn, yè ko wàzọ́n to agbasa etọn go, bé e ma yín mọwẹ? Mọwẹ. É tindo apa to ohò etọn mẹ, po onú mọtọnhunkọ po. Mọwẹ. Bé e ma yín mọwẹ? Do ayi e go, é na mọ azọ̀nhẹngbọ̀ yí. Na yise towe dóhuhlọn dogbọn ewọ tọn dali. Bé hiẹ yise dọ enẹ na yín nugbo? Niṣẹ.

Bé hiẹ sọgan mọ dọ, Jesu Klisti wẹ dopolọ to osọ, egbé podọ mọwẹ kakadoi? Kànbiọ omẹ nẹlẹ! Na É to dindan gbọn agùn lọ mẹ. Bé hiẹ yise dọ, É tin to ofi? Bé hiẹ mọ huhlọn núdidiọ tọn nẹ lọ to dewe mẹ? Họ́ntọn lẹ emi, Ewọ Jiwheyẹwhe he na hẹn mì jẹ gángán. Bé mì yí enẹ lọ sè? [Agùn lọ sọ dọmọ, “Niṣẹ.”–Ed.]

Dinvie, bé mì sọgan wà onú dopo de na mi? Na omẹ nẹmu wẹ tin to ofi bo to awutu jẹ? Mì gbọ mí ni mọ alọ he mì zé daga lẹ! Dinvie, ogàn atọ́n ko pọ́ hihò. Dinvie, mì zé alọ mìtọn lẹ do mìnọzo lẹ ji. Dinvie, mì ma dọhó depope blo, mì sã ko zé alọ mìtọn lẹ do mìnọzo lẹ ji. Yẹn jlo dọ mì ni wà núde.

Do ayi e go, dawe he sinai to godo finẹ tindo opotẹ de to nẹgbé etọn. Mẹdaho, bé hiẹ yise dọ, Jiwheyẹwhe na dè opotẹ lọ sọn nẹgbé towe? Bé hiẹ yise dọ, Jiwheyẹwhe na hẹn we jẹ gángán? Ovisunnu dẹpẹ he, pọ́n hlan mi, bo lẹn dọ É jlo nado juwáyì. Mẹdaho, zé alọ towe daga dinvie! Mọwẹ. Eyín hiẹ yise po ayiha towe lẹpo po, Jiwheyẹwhe na dè opotẹ towe lọ sẹ̀.

Halleluya! Yẹn degbè do agùn he lọ blébu to Oyín Jesu Klisti tọn mẹ! Mì deke ayiha yín bibla po mayise po blo, mọ mì sọ dike ayiha mìtọn gọ́na hòmẹgble blo. Bé mì ma mọ Ovi gbẹtọ to ninọ̀mẹ Owẹn dọdai tọn mẹ, bo sọ lẹ́gọ̀wá Agùn Etọn mẹ whladopo dogọ́, to dọdai mẹ, bo to Jesu Klisti he yín dopolọ to osọ, egbé podọ mọwẹ kakadoi dohia? Podọ É ma ko dóalọte gbọn owhèta lẹpo mẹ kaka jẹ egbé gba. Bé mì mọdona? Na odohia de tin na enẹ lọ.

Etẹwẹ Agùn? Nawẹ yè nọ biọ E mẹ dó? Podọ whenuena hiẹ tin to E mẹ finẹ, núhe Jesu Klisti yín lẹpo wẹ hiẹ lọsu yín ga, yèdọ nado yín ovisunnu po viyọnnu Jiwheyẹwhe tọn po. Na Ewọ lẹzùn mìwlẹ, podọ na mìwlẹ nido lẹzùn Ewọ ga.

Do ayi e go, núhe tin to finẹ wẹ yín dọ, mì to obúdi nado yí I zán, kavi mì ma to gbèma po Ohó Etọn po gba. Dinvie, enẹ ma na wà dagbe de gba, podọ núdepope he hiẹ to wiwà ma kàn mi gba. Eyín mì ma biọ Ohó nẹ lọ mẹ to gbèsisọ mẹ, e ma sọgan wàzọ́n gbèdé. Dinvie, mẹnu wẹ sọgan dowhẹ̀ mi na núhe É dọ bo sọ dopa Etọn to azán he gbè, bọ e ma sọ jọ? Enẹwutu, mì hẹn mi nado biọ agùn gbẹ́pipli titonọ mìtọn lẹ mẹ blo, na e ma sọgan wàzọ́n gba.

Halleluya! Yẹn mọ bo sọ yọ́nẹn dọ, É tin to ofi. Yẹn dókàndeji dọ, É tin to ofi. Podọ yẹn sọ yọ́nẹn dinvie, dọ, huhlọn he nọ ná ogbẹ̀mẹ tin to Agùn lọ mẹ nado hẹn omẹ dopodopo he sinai to ofi lẹ jẹ gángán. Bé mì sọgan yí i sè? Bé mì sọgan to dinvie? 

Bé mì yise to odẹ̀ mẹ hlan awutunọ lẹ? Bé mì ma yise dọ, Jesu dọ, dọmọ, “Yé na zé alọ do azọ̀ntọ lẹ ji, yé nasọ jẹ gángán”? Nugbo wẹ, mì zé alọ mìtọn lẹ do mìnọzo lẹ ji to dinvie. Hiẹ hodẹ̀ na dewe blo. Ṣigba hodẹ̀ na awetọ towe. Yé nasọ hodẹ̀ na hiẹ lọsu. Dinvie mì bo tin to sisi de mẹ.

Oklunọ É, yẹn dopẹ na We, na yẹn sọgan ṣite to ohọ̀ he mẹ podọ nado lá wẹndagbe lọ ehe gbọnvo do linlẹn gbẹtọ lẹpo tọn go to egbé he, kakajẹ whenuena yé na ylọ Ẹ dọ, “oplọ́n ylankan de”, yé na ylọ Ẹ dọ, “ogan aovi lẹ tọn,” yé na ylọ Ẹ dọ “gbigbọ mawe,” kẹdẹdilé yé ko wà do, to whenuena yé ylọ Ẹ dọ, “Beẹzẹbuli.” Ṣigba na do mọ We to gblagbla plipli daho he tọn mẹ, to whèjai he, podọ pinpọ́n hlan ṣiṣẹ̀ ohó he yè dọ lẹ tọn, Enẹ wẹ Nugbo lọ.

Jiwheyẹwhe È, ehelẹ wẹ omẹ towe lẹ. Satani to tintẹnpọn nado hẹn miklo lẹ gble, podọ é sọ to tintẹnpọn nado hẹn linlẹn gbẹtọ lẹ tọn wlu, é to tintẹnpọn nado dè linlẹn yetọn sọn Ohó lọ go. Ṣigba yẹn yise dọ yé na mọ Ohó lọ yí dandan, Oklunọ È. Yẹn biọ na yé dọ, yé ni mọ Ohó lọ yí. Yẹn biọ na yé dọ, yé ni kẹalọyí Ohó lọ. Basi na yé, Oklunọ È, na yisenọ helẹ nido mọ huhlọn ogbẹ̀ tọn, podọ whenuena yé... e yín yé ma nọ̀gbẹ̀ jẹ kọlilẹ̀wá whenu towe tọn, na huhlọn ogbẹ̀ tọn he lọ nido fọ́n yé to azán godo tọn gbè.

Basi to dinvie na huhlọn ogbẹ̀ tọn lọ nido na ogbẹ̀ yise yetọn, na núhe yé to wiwà lẹ, Oklunọ È. Yisenọ nọ zé alọ do yisenọ ji, agbasa do agbasa ji, huhlọn do huhlọn ji. Podọ huhlọn Jiwheyẹwhe tọn wẹ gbọn ovisunnu kavi oviyọnnu Jiwheyẹwhe tọn ji, gbọn Ovisunnu Jiwheyẹwhe tọn dali. Jiwheyẹwhe È, gbọ na Satani ni jo omẹ helẹ do! Gbọ na yé ni jẹ gángán to whèjai he, gbọn awúsọhia fọ́nsọnkú huhlọn ogbẹ̀ tọn, to Jesu Klisti mẹ. To Oyín Jesu Klisti tọn mẹ, ni yín mọ!

Eyin mì ko yín hinhẹn zùn ogbẹ̀, whenẹnu alọ mìtọn he to gbẹtọ lẹ ji ko hẹn huhlọn ogbẹ̀ tọn wá yé ji. Bé mì ko wá ogbẹ̀ kọ̀n? Bé Klisti ko lẹzùn onú titegbe de hlan mì? Bé huhlọn Jiwheyẹwhe tọn ko sọawúhia? Bé hiẹ tin to Agùn lọ mẹ, yèdọ agùn didè Jiwheyẹwhe tọn? Nawẹ hiẹ tin to E mẹ dó, podọ nawẹ hiẹ sọgan yọ́nẹn dó dọ hiẹ ko yín hinhẹn zùn ogbẹ̀ to E mẹ? Dinvie, linlẹn towe lẹ, po gbẹtọyinyin towe lẹpo po ko tin to Klisti mẹ. Podọ Klisti tin to gblagbla gbẹtọ lẹ tọn mẹ, bo to ogbẹ̀ Etọn dohia, bo sọ to didohia dọ Ewọ tin to ofi to azán Sọdọmi tọn lẹ mẹ.

Gbẹtọ helẹ zé alọ yetọn lẹ daga, bo to didohia dọ ogbẹ̀ yetọn ko yín didiọ sọn dindan gbọn alihotó mẹ, podọ sọn ahànnumú mẹ, podọ sọn ogalilọ gbọn alihotó lẹ mẹ biọ Omẹ wiwé nugbo Jiwheyẹwhe tọn mẹ, yèdọ do ogbẹ̀ mẹ. Dinvie, alọ devizọ́nwàtọ lẹ tọn tin to yé ji. Na yé tin to Agùn lọ mẹ gbọn baptẹm Gbigbọ Wiwé tọn dali, yèdọ gbọn huhlọn dopolọ he nọ̀ ohú Eliṣa tọn lẹ ji dali. Ewọ dopolọ wẹ tin to abọ́ mìtọn lẹ ji, do alọ mìtọn lẹ ji, podọ do otà mìtọn lẹ ji, yèdọ huhlọn dopo he nọ̀ ná ogbẹ̀ mẹ lọ; É to ofi bo to Ede dohia dọ, Ewọ tin to ogbẹ̀ sọn okú mẹ, bo sọ to Ede dohia dọ Ewọ tin to ogbẹ̀, dinvie bo to onú dopolọ wà to whenuena É ... Niṣẹ!

Bé mì sọgan yí Ewọ sè dinvie? Bé mì sọgan yise dọ alọ he tin to mì ji nẹlẹ, Jiwheyẹwhe tọn wẹ yé? Bé mì sọgan yise dọ Gbigbọ nẹ lọ to mí diọ dogbẹ̀ to dinvie, bo to mí hẹn wànú di alẹnọ hlan aihọn, bé mì yise dọ, enẹ wẹ huhlọn Etọn he nọ ná ogbẹ̀ gbẹtọ? Bé mì yise dọ, mì tin to Agùn Etọn mẹ? Do ayi e go, eyín mì tin to E mẹ, bo sọ yise dọ alọ wiwé lẹ wẹ alọ he tin to mì ji nẹlẹ, yèdọ alọ he Jiwheyẹwhe degbèna lẹ; enẹwutu, yẹn degbèna mì to Oyín Jesu Klisti tọn mẹ, dọ, mì ni fọ́n to afọ mìtọn lẹ ji bo mọ azọ̀nhẹngbọ̀ mìtọn lẹ yí, yèdọ mì mẹhe to azọ̀njẹ lẹpo.

 Ojé! Yisenọ, bé mì mọ núhe yí tẹnmẹ?

Bé mì mọdona dọ, to alihogboji finẹ gbẹtọ húgan mliyọn wẹ to zọnlinzin to aliho lẹ ji, podọ to egbé, enẹ ma yín núdepope to aihọn mẹ adavo núdùdù he gọ́na núdidó lẹ kẹdẹ? Bé mì mọdona dọ, gbẹtọ nẹlẹ ko kú to ylando mẹ bo ko sọ jẹ osẹ́n mẹ, podọ gbẹ̀zán yetọn lẹ sọ dozinvlu; to agùn lẹpo mẹ, na núplọ́nmẹ pẹvi delẹ, kavi to nukunpé onú delẹ go ehe yè to yiylọ dọ, sinsẹ̀n?

Bé mì mọdona dọ, yè ko zé mì tite sọn oṣiọ lẹ mẹ do Ogbẹ̀ mẹ, bọ yè ko sọ baptizi mì do Agbasa Jiwheyẹwhe Ogbẹ̀nọ tọn mẹ, ehe ná ogbẹ̀ agbasalan mìtọn lẹ, ehe mẹ ogbè hunkọhunkọ po tùnmẹ ogbè hunkọhunkọ tọn po tin te, dọ Jesu Klisti sọawúhia to gblagbla mítọn mẹ? Etẹwutu? Na awutu ma sọgan nọte to awhànpa he hunkọ mẹ wutu. Dinvie, gbọ na yise towe ni pannukọn Ẹn, bo yí I sè! Bo sọ dọmọ, “Oklunọ Jiwheyẹwhe È, yẹn yise po ayiha ṣie lẹpo po,” bọ yè nasọ hẹn we jẹ gángán.

Bé ylandonọ lẹ tin to ofi bo jlo nado biọ Agbasa nẹ lọ mẹ? Dinvie, mì zé alọ mìtọn lẹ daga, bo dọmọ, “Pọ́n, yẹn ma ko biọ E mẹ gbèdé, podọ yẹn ma ko sọ gọ́na Gbigbọ Wiwé gbèdé, ṣigba Nọvisunnu Branham, yẹn jlo E to whèjai he. Enẹwutu, bé hiẹ na hodẹ̀na mi?” Enẹwutu, mì zé alọ mìtọn lẹ daga! Dinvie, winyanhu mì blo na mì tin to nukọn Etọn wutu! Sã ko pọ́n hlan alọ lẹ lọ!

Dinvie, mì mẹhe jlo baptẹm Gbigbọ Wiwé tọn lẹ, mì zé alọ mìtọn lẹ daga, yèdọ mì mẹhe jlo E lẹ to fidepope he mì tin te!

Dinvie, mì mẹhe ko mọ Gbigbọ Wiwé yí, he tin to apá yetọn lẹ, mì zé alọ mìtọn wiwé he nukun ma sọgan mọ do yé ji. “Eyín Gbigbọ Wiwé he zé Jesu tite sọn oṣiọ lẹ mẹ nọ̀nọ mì mẹ, e na diọ agbasa kúkú mìtọn sọn oṣiọ lẹ mẹ do Ogbẹ̀ mẹ.” Na E nọ hẹn agbasalan lẹpo wá mẹmẹglọnọ mẹ hlan Gbigbọ lọ. Dinvie, mì gbọ mí ni dẹ́ ota mítọn lẹ do odò, na omẹ dopodopo ni hodẹ̀na yé mẹhe jlo baptẹm Gbigbọ Wiwé tọn lẹ. Podọ yẹn sọ yise dọ, Jiwheyẹwhe na gọ́ dopodopo mìtọn lẹ na Gbigbọ Wiwé to dinvie.

Họ́ntọn lẹ emi, etẹwutu wẹ mí to ote? Mì na nọte dẹn to dopo azán helẹ tọn mẹ. Na ehe wẹ ojlẹ lọ. Mì sọ nọte dẹn ba blo. Na mì tin to tẹmpli he mẹ dinvie, yèdọ fie mì sọ nọ̀ nado hodẹ̀ to ozán lẹpo mẹ.

Mẹvivẹ Jiwheyẹwhe È, yẹn hodẹ̀ dọ, Hiẹ ni sọ do Gbigbọ Wiwé Towe hlan di jẹhọn sinsinyẹn tọn de na E ni gọ́ gohọ̀ lẹpo mẹ to godo alọgọ́na pipé he lọ tọn mẹ to whèjai he dọ, Hiẹ tin togbẹ̀ po gbẹtọ ewlẹ po. To Oyín Jesu tọn mẹ. Niṣẹ.