Sá ko yise, sá ko yise,

’Nú lẹpo bọawu, sá ko ...

Dinvie, na mí ni ji ohàn lọ dolé;

Dinvie yẹn yise, dinvie yẹn yise,
’Nú lẹpo bọawu, dinvie yẹn yise;
Dinvie yẹn yise, dinvie yẹn yise,
’Nú lẹpo bọawu, dinvie yẹn yise.

Dinvie, mì gbọ mí ni nọte dómọ po ota mítọn lẹpo didẹ́ do odò.

Oklunọ È, na ehe ni ma yín ohàn ṣokẹdẹ blo, ṣigba na ohàn lọ ni yín jiji sọn sisósisó ayiha mítọn tọn mẹ jẹgbonu, dọ, “Dinvie yẹn yise!” Na apọsteli lẹ dọ to gbèdopo to whenuena Jesu ko wàzọ́n huhlọnnọ susu godo;  yé dọ, dọmọ: “Oklunọ, dinvie wẹ mí yise.”

Jesu sọ gblọn bo dọmọ, “Bé mì yise dinvie?”

Yé sọ gblọn dọmọ, “Mí yise dọ Hiẹ mọdona onú lẹpo bo ma sọ dó hudo mẹdepope tọn nado plọ́n We gba.” Enẹwutu, Otọ́ È, mí yọ́nẹn to whèjai he dọ, Hiẹ ma dó hudo núplọ́nmẹ mítọn tọn gba, ṣigba míwlẹ dó hudo núplọ́nmẹ Towe tọn. Enẹwutu, mí hodẹ̀ dọ, Hiẹ ni plọ́n mí lé yè nọ hodẹ̀ dó, lé mí na wà dó, podọ lé mí na yise dó. Basi na mí Oklunọ È, gbọn sinsẹ̀n whèjai he tọn dali. Eyín mí gbọagba núdepope tọn, Oklunọ È, ná mí. Ehelẹ pó wẹ mí biọ to Oyín Jesu tọn mẹ. Niṣẹ.

Yẹn yọ́nẹn dọ susu to mì mẹ tin to ote to ofi whladopo dogọ́ to whèjai he. Podọ to gbonu, na yẹn mọ awhànpa delẹ he dọ, dọmọ, yé ma sọgan biọ họ̀mẹ, bo sọ to hladio yetọn lẹ dótó to mọto yetọn lẹ mẹ gba. Podọ dinvie, mí na tẹnpọ́n nado dowezun to núyiwá lẹ mẹ dolé mí sọgan wà dó to whèjai he, podọ to Osẹ̀gbè whèjai, mí na jo míde nado hodẹ̀ na awutunọ lẹ, mọ mí sọ tindo ohùkàn odẹ̀ tọn dolé mí sọgan tindo dopo dó to finẹ. Ṣigba mí jo sinsẹ̀n whèjai he tọn na odẹ̀hiho na awutunọ lẹ.

Podọ yẹn sọ jlo dọ mì ni whẹ́n dinvie to Núyiwà Gbigbọ Wiwé Jiwheyẹwhe tọn lẹ tọn mẹ, podọ to Yise mẹ, yèdọ Yise ojlẹ he mẹ tọn. Yise lọ! Do ayi e go, e na zé yise he ma ko sọawúhia to owhèta de mẹ do, na ehe lọ wẹ dóna yín yise bẹ́yìlọn mẹ tọn, nado yín zizé daga. Enẹwutu, mí jlo dọ, mì ni yise to whèjai he to núhe mì ko mọ, bo ko sọ sè, yèdọ Ohó he mì ko sè bọ yè ko dọyẹwhehó Etọn lọ, podọ ohia po azọ́njawu he mì ko mọ bọ yé yín wiwà lẹpo po. Dinvie, mí jlo dọ mì ni bẹ́ enẹlẹ pó plidopọ́ do ayiha mìtọn mẹ, bo hia ẹ jẹ, yèdọ yín enẹ yín Jiwheyẹwhe kavi lala.

Kẹdẹdilé Elija hóhówhenu tọn dọ dó, dọmọ, “Eyín Jiwheyẹwhe yín Jiwheyẹwhe, mì bo sẹ̀n Ẹn.” Podọ eyín Jesu yín Nukọntọ na Yisenọ lẹ to onú lẹpo mẹ, bé whenẹnu yẹn lẹn dọ mí dóna gbẹ́ onú lẹpo dai bo dọnsẹbọdo É go. Mì do ayi e go dọ, Ewọ wẹ Nukọntọ lọ, yèdọ Sunwhlẹvu Agéwàji tọn, Ewọ lọ wẹ Ganhùnupo, Ewọ lọ wẹ Kàndeji mítọn. Podọ eyín Ewọ lọ wẹ Sunwhlẹvu Agéwàji tọn ... Do ayi e go, onú dopo gẽ de wẹ tin he sọgan dlẹnalọdo Sunwhlẹvu Agéwàji tọn lọ, enẹ wẹ alidohianú he mì to zinzán na ohúnkunkun. Podọ Alidohianú he yẹn to didohia mì, na mì nido wàzọ́n hẹ ẹ, wẹ Ohó lọ, podọ Ohó lọ wẹ nọ dlẹnalọdo Jiwheyẹwhe to whelẹponu.

Mí sọ to mimọ dọ, mí to awúfiẹsa daho po whlepọ́n lẹ po mẹ gbọn, yèdọ ojlẹ awusinsinyẹn tọn po awúfiẹsa tọn po to gblagbla akọta lẹ tọn mẹ, po onú mọtọnhunkọ he to jijọ lẹpo po. Podọ fidepope he yẹn pọ́n hlan, e nọ taidi dọ ohún de tọ́n bo biọ ohù mẹ. Yẹn sọ wẹ pinplántọ Ohún lọ tọn. Podọ nawẹ mí na basi dó nado jẹ fie mí jei? Do ayi e go, agbówhẹn daho po fútúfútú otọ̀ tọn po fọ́nyì aga sọmọ bọ kiklo etọn yì aga kanwekò hú ohún ṣie. Ṣigba, mí na lùn yé tọ́n, yèdọ dopodopo yetọn, na “Gbọn Ewọ dali mí hú awhàngbatọ.” Dinvie, Ewọ wẹ Ohúngan lọ, yèdọ Ota he hẹn ohúnkàn lọ go, Ewọ lọ janwẹ na dè e tọ́n. Na mí na lùn dopodopo fútúfútú agbówhẹn nẹlẹ tọn tọ́n.

Dinvie to whèjai he, na mí nido dè mì tọ́n to whlẹndo mẹ. Mí dọnudo mì na gadidi gbejizọnlin mìtọn tọn po onú mọtọnhunkọ lẹ tọn po wutu, po lé mì dóna kùn mọto mìtọn lẹ dó, podọ tuklajijẹ mìtọn nado kùn mọto lẹ po. Podọ, enẹwutu wẹ yẹn jlo nado nọte to finẹ bo dọhó, bo sọ wà núhe yẹn sọgan wà lẹpo nado gọ́alọna mì. Ṣigba whenuena yẹn sọawúhia to ofi, yẹn nọ dovivẹnu nado basi ehe yẹn sọgan basi lẹpo, yèdọ nado gọ́alọna ojlẹ he mẹ mí tin te to dinvie. Whenuena hiẹ ná onú susu omẹ to asiko dopolọ mẹ, é ma sọgan flin yé gba. Adavo hiẹ yí onú dopo hlan omẹ lọ kaka jẹ whenuena é mọ nukunnu jẹ enẹ lọ go. Podọ eyín yé hẹn onú sinsinyẹn nẹ lọ do ayiha yetọn mẹ, bé whenẹnu wẹ onú sinsinyẹn nẹ lọ na plọ́n yé onú devo. Enẹwutu, mì gbọ mí ni yí yè ode bọ do ode go.

Dinvie, mì hodẹ̀ bo tin to adọgbo dagbe de mẹ, bo yise to whèjai he na azọ̀nhẹngbọ. Yẹn ma lẹn dọ ohókanbiọ de tin to ayiha mìtọn lẹ mẹ dogbọn asiko he mẹ mí tin te tọn dali gba. Yẹn ma sọ lẹn dọ ohókanbiọ de tin to ayiha mìtọn lẹ mẹ dogbọn vlavo eyín Jiwheyẹwhe tin to omẹ Etọn lẹ ṣẹnṣẹn dali kavi lala. Yẹn yise dọ É tin, mọwẹ mì omẹ pó sọ yise dó ga. Mayise de matin to ayiha ṣie mẹ dogbọn enẹ tọn dali gba. Na yẹn yọ́n omẹ ṣie lẹ, họntọn ṣie, họntọn Klisti tọn lẹ, ovi Klisti tọn lẹ, dọ yé yí enẹ lọ sè.

Podọ enẹ sọ yín núhẹn mi hunhòmẹ nado mọ whenuena mì yọ́nẹn dọ mì tindo Owẹn de sọn Jiwheyẹwhe de, bọ mì sọ yí i na gbẹtọ lẹ, bo sọ mọ dọ gbẹtọ lẹ to alọkẹyí I. Whenẹnu wẹ mì pọ́n hlan godo bo dọmọ, “A basi Otọ́.” Ayajijẹ tẹwẹ ehe lò, nado mọ dọ ovi lẹ to Akla he yè yí dohlan yé dù! Do ayi e go, bé mì ma mọ dọ enẹ wẹ númimọ owhè he wáyì lẹ mẹ tọn to ofi, to Gohọ̀ he lọ mẹ? Mọwẹ, yèdọ “Akla Ogbẹ̀ tọn lọ.” Nọvisunnu Nẹvili, a flin ojlẹ huhlọnnọ lọ!

Dinvie, mì gbọ mí ni gọ̀wá, eyín mì na hodo núhihia lọ kavi kàn ẹn dai, na yẹn ma yise dọ e sọgan yín núsọgbè nado basi sinsẹ̀n mahia Ohó Jiwheyẹwhe tọn gba, bo sọ má ohó lọ to kleun mẹ, eyín sinsẹ̀n azọ̀nhẹngbọ tọn de na tin kavi onú mọhunkọ tọn de. Mí omẹ pó mọdona. Dinvie, yẹn lẹn dọ, jonọ de matin to gblagbla mítọn mẹ gba. Ṣigba mí omẹ pó mọdona núhe azọ̀nhẹngbọ yín. Na ehe ma yín núhe omẹ de wà hlan we gba; adavo núhe Jiwheyẹwhe ko wà hlan we. Mọwẹ Whlẹngan tin dó, to ohùkàn dopolọ ji. Onú dopo gẽ wẹ tin, yèdọ nado hẹn gbẹtọ lẹ yise dọ enẹ lọ wẹ Nugbo lọ. Podọ Jiwheyẹwhe nọ plọ́n Ohó Etọn omẹ bo sọ nọ do E hia yé mẹhe yí I sè lẹ, na É dọ, dọmọ, “Onú lẹpo bọawu na yé mẹhe yise lẹ.”

Mì na dọ, dọmọ, “Núde ma sinẹnawu na Jiwheyẹwhe.” Bé mì yí enẹ lọ sè? Mọwẹ núde matin bo sinẹnawu na mì. “Na onú lẹpo bọawu na yé,” (Dopo wẹ Jiwheyẹwhe) “na yé he yise lẹ.” Bé mì mọdona? Enẹwutu, núdepope matin he sinẹnawu na mì, eyín mì sọgan yise.

Dinvie, to Owé tintan Ahọlu lẹ tọn mẹ, Otà 17, yẹn na hia sọn afọ etọn tintan do jẹ 7, eyín Oklunọ jlo. 

“Elija Tiṣibinu lọ; mẹhe tin sọn wáṣinu Gileadi tọn lẹ mẹ, dọ hlan Ahabi dọmọ, lé OKLUNỌ, JIWHEYẸWHE Islaẹli tọn, to ogbẹ̀, mẹhe nukọn yẹn ṣite te, ahún ma na tin kavi jikun to owhè helẹ mẹ; adavo kẹdẹdi ohó ṣie.

Ohó OKLUNỌ tọn sọ wá ede; dọmọ, hẹn we yì sọn fi, bo gọ̀ we hlan whèzẹtẹn dali; bo whla dewe hlan tọ̀pẹṣẹ ṣeliti dali ehe tin to Jọdani nukọn.

E nasọ yín, dọ hiẹ na nù sọn tọ̀pẹṣẹ lọ mẹ; yẹn ko sọ degbèna ohón lẹ nado to yìnyìn we to finẹ.

Do ayi e go, “nado to yìnyìn we to finẹ” e ma yín ofi devo de gba. “To finẹ!”

Mọwẹ é yì bo sọ wà do kẹdẹdi ohó OKLUNỌ tọn: na ewọ yì bo sọ nọ̀ tọ̀pẹṣẹ ṣediti lọ dali he tin to Jọdani nukọn. Ohón lẹ sọ to akla po olàn po hẹn wá nệ to afọnnu; podọ akla po olàn po to whèjai; ewọ sọ to tọ̀pẹṣẹ lọ nù.

    E sọ wá jọ to ojlẹ de godo, wẹ tọ̀pẹṣẹ lọ hú; na jikun de matin  to aigba lọ ji wutu.”

Na Oklunọ ni dona hihia Ohó Etọn tọn. Podọ dinvie, yẹn jlo na dè ohó de sọn finẹ, enẹ wẹ, “Núdùdù gbigbọnọ to osã etọn mẹ.” To afọnnu he, mí tindo oplọ́n dọ, “wàzọ́n na Jiwheyẹwhe, kavi tẹnpọ́n nado wàzọ́n na Jiwheyẹwhe, matin ojlẹ kavi osã, kavi tẹnmẹ, kavi gbẹtọ lọ.” Podọ dinvie, ehe wẹ: Núdùdù Gbigbọnọ To Osã Sisọ Mẹ.

Yẹwhegán he, yèdọ Elija, onú pẹvi de wẹ mí mọdona dogbọn ewọ tọn dali. Ṣigba mí yọ́nẹn dọ devizọ́nwàtọ Jiwheyẹwhe tọn de wẹ ewọ, podọ devizọ́nwàtọ Jiwheyẹwhe tọn na ojlẹ nẹ.

Podọ Jiwheyẹwhe ko zán gbigbọ he nọ̀ Elija ji whlãtọ̀n, bo sọ dopa etọn whlãwe dogọ; whlãtọ́n na ojọmiọn. É zán Gbigbọ lọ do Elija ji; yẹndawe Gbigbọ lọ tọn sọ jẹdo Eliṣa ji; podọ É sọ jẹdo Johanu Baptisti ji; bo sọ ja nado gọ̀kọ̀na Asivun lọ, yèdọ Kosi lẹ; podọ enẹ godo, É sọ ja Mọse ji nado hẹn Ju lẹ yì owhé. Mọwẹ. Whlãtọ́n helẹ wẹ Jiwheyẹwhe dopagbè nado zán Gbigbọ Elija tọn lọ, mọwẹ É ko sọ zán Ẹn dó wlãtọ̀n wáyì.

Dinvie, dogbọn yẹwhegán daho he tọn dali, mí ma mọdona fie é sọn wá gba. Ṣigba mí yọ́nẹn dọ Tiṣibinu de wẹ ewọ.

Onú pẹvi de wẹ mí mọdona dogbọn yẹwhegán lẹ tọn dali. Na mí ma yọ́n fie yé sọn wá. Kẹdẹdilé yẹn ma yọ́n mẹdepope he tọ́nsọn agùn mẹ wá kavi etẹwẹ ojọ̀tẹn yetọn he mẹ yé tọ́njẹgbonu wá yín dó. Gbẹtọ he ma nọ dibú de wẹ yé, podọ whlasusu, yé yín mẹhe ma yì wéhọ̀ mẹ gba. Podọ yé ma ko sọ wlánwé núde tọn pọ́n. Isaia po Jelemia po, yé omẹ awelẹ wlánwé onú delẹ tọn dai, ṣigba dawe Elija daho he ma wlán onú dopo dai gba. Susu to yé mẹ ma wlán núde gba; vlavo e sọgan yín dọ yé ma sọgan wlán owé wẹ. Gbẹtọ adọgbotọ lẹ wẹ yé. Mẹdepope matin to Owé Wiwé mẹ taidi yẹwhegán hóhó nẹlẹ gba. Yé funawhàn sọta ahọludu lẹ, ahọlu lẹ, mẹgbõgbõ lẹ, agùn lẹ, po onú mọhunkọ tọn lẹpo, yé sọ nọte gigli to Ohó Jiwheyẹwhe tọn mẹ, podọ mọwẹ Jiwheyẹwhe sọ suwhẹ̀na yé dó. Gbẹtọ tasinyẹntọ titegbe de wẹ dopodopo yetọn lẹ.

Podọ Elija yín dopo to yé omẹ pó mẹ. Gbẹtọ zùngbo mẹ tọn de wẹ ewọ, é tọ́nsọn zùngbo mẹ bo sọ nọnọ̀ zùngbo mẹ. Biblu dọ, dọmọ, é do awu ayú lẹngbọ tọn de, yèdọ gbẹtọ ofúnnọ de, bo sọ yí ayú kanklosọpóawenọ do gbàn adaja etọn, po nukunmẹ etọn he gọ́na ofún pò, nado dọ, gbẹtọ he dobú to nukunta na pinpọ́n de wẹ ewọ.

Ṣigba e ma yín yé omẹ pó wẹ kú gba. Lala! To azán piplimẹ Nisene tọn mẹ, susu mì mẹhe hia owé he yè ylọ, dọ, piplimẹ agùn tintan Nisene tọn, whenuena yè jlo nado basi ogbẹ́ pipli de jẹgbonu sọn opli lọ mẹ bo gbà agùn he pò lẹ súdo, podọ nado lẹzùn dopo, whenuena yè basi opli Nisene tọn lọ vọ̀, wẹ gbẹtọ adingbannọ taidi Eliṣa lẹ hunkọ biọ e mẹ sọn zùngbo mẹ, bo nọ to amà lẹ kẹdẹ dù; yèdọ gbẹtọ adingbannọ daho de. Ṣigba nukọntọ lẹ, omẹ gángán he to oglọ́ na Kọnstantẹn po enẹlẹ po, zé ogbè yetọn lẹ do aga. Na yé mẹhe yín yẹwhegán nẹlẹ yọ́nẹn dọ linkún Agùn Asivun lọ tọn dóna jẹai, mọdopolọ wẹ na Asisunọ lọ ga. Finẹ wẹ e te na owhè fọtọ́n.

Enẹwutu wẹ yé wlán do owé lẹ mẹ to egbé dọ, “Fie Jiwheyẹwhe abọẹnọ he sọgan ṣite bo to pinpọ́n, bo sọ mọ hlan lé yọpọvu finflin lẹ yín hùhù dó, podọ lé kinnikinni lẹ vúnvún yọnnu lẹ dù dó te, to whenuena É sinai to aga bo ma dọhó de dogbọn enẹ tọn dali gba?” Yé ma mọdona Ohó lọ gba. Na linkún nẹ lọ dóna flẹ jẹ aigba whẹ́. Bé nawẹ Jiwheyẹwhe dódónọ de sọgan sinai bo na to pinpọ́n lé Ovi Etọn Titi to kúkú dó gbọn, bọ yé sọ túntán do É go, po onú mọhunkọ tọn lẹpo po? Ṣigba ehelẹ pó sọgbè po Ohó lọ po, na mọwẹ e jẹ dó. Yèdọ mọwẹ kaka jẹ egbé.

Dawe he lọ, gbẹtọ huhlọnnọ de wẹ. É tindo whẹndo ylandonọ de to nukọn etọn. To ojlẹ nẹ mẹ, Ahabi wẹ ahọlu lọ, podọ otọ́ he jẹnukọnna ẹn yín omẹ ylankan de. Dayi e go, to Sọlọmọni godo, ahọlu ylankan wẹ ahọlu he wá lẹpo. Podọ dawe Ahabi he, mẹhe dùgán họ owhè kò to Samalia mẹ, wẹ ylan hú yé omẹ pó. Ewọ yín mẹhe nọ gọ́alọna núyiwà aihọn tọn lẹ, ṣogan bo yise to sinsẹ̀n mẹ. Mọwẹ é sọ tindo onú he to yìyì to aihọn mẹ lẹ dó. É sọ tindo yẹwhegán etọn fowe lẹ, yé omẹ pó sọ yín wéhọ̀mẹvi he yè plọ́n dagbedagbe. Ṣigba Jiwheyẹwhe do yẹwhegán dopo de hlan ẹn, yèdọ mẹhe mẹ ewọ mayise te, yẹwhegán nẹ lọ wẹ Elija.

Ṣigba Elija Tiṣibinu he, yín gbẹtọ sọn zùngbo mẹ tọn. Mẹhe ma yọ́nwhànpẹ depope; yèdọ omẹ fuflu de hunkọ wẹ ewọ. E sọ wá jọ dọ, whenuena Ahabi wàylan bọ Jiwheyẹwhe ma sọ sọgan yí nukun do pọ́n ylando etọn lẹ ba, wẹ Jiwheyẹwhe dọhó hlan Elija to zùngbo mẹ. Mọwẹ é sọ tọ́njẹgbonu yì aliho Samalia tọn ji, kẹdẹdilé yẹn nọ dohia dó; e sọgan yín dọ nukunmẹ etọn gọ́na owhà wéwé kẹdẹ, podọ otapipo etọn nọ to sisẹ́ to whenuena owhè vẹ́ do e ji, na é tindo nukun hóhó pẹvi lẹ, bo sọawúhia to finẹ po opò po to alọ mẹ, bo to núko to whenuena é nọ to zọnlinzin, mẹhe zinzọnlin titegbe wá ahọlu Islaẹli tọn de, bo dọ hlan ẹn, dọmọ, “Ahún ma na tin kavi jikun to owhè helẹ mẹ, adavo kẹdẹdi ohó ṣie.”

Na Jiwheyẹwhe ni ná mí gbẹtọ mọtọnhunkọ, yèdọ mẹhe mọdona núhe yè sọgan wà po LÉ WẸ OKLUNỌ DỌ po.

Dinvie, mí mọ dọ whẹpo é do wà ehe, Jiwheyẹwhe ko ylọ ẹ. Na Jiwheyẹwhe ko dọhó hlan ẹn dai, enẹwutu wẹ obú ma di i na núdepope gba. É ma dibú na owẹn etọn, na enẹ ma tlẹ sọgan jọ gba; yèdọ ewọ yọ́nẹn dọ e na jọ! É mọdona dọ Ohó Oklunọ tọn kẹdẹ wẹ, bo sọ yọ́nẹn dọ ewọ wẹ yẹwhegán Jiwheyẹwhe tọn to ojlẹ lọ mẹ. Enẹwutu, é lẹn dọ, eyín ahọlu lọ sọgan dè ota etọn sẹ, kavi zé é do ogàn mẹ, podọ núdepope he yé na wà hẹ ẹ lẹ po, enẹ lọ ma yín núdepope hlan ẹn gba; na é tindo azọ́n de, he yín “LÉ WẸ OKLUNỌ DỌ,” to nukun ahọlu lọ tọn mẹ. Dawe tasinyẹntọ na hunkọ tọn wẹ ehe!

Na Jiwheyẹwhe ma na dike ylando ni yì majiya. Dayi e go, mẹhòba dóna tin janwẹ. Bé dagbe tẹwẹ osẹ́n yín matin mẹhòba? Bé dagbe tẹwẹ e na yín nado dọ, dọmọ: “E jẹagọdo hinhọ́n nado gbà osẹ́n,” bọ osẹ́nba kavi mẹhòba de ma na jẹgodo nệ? Po mọ po, enẹ ma yín osẹ́n gba. Enẹwutu, mẹhòba tin na ylandonọ. Podọ eyín Jiwheyẹwhe do osẹ́n de bọ yè gbà osẹ́n lọ, bé whenẹnu mẹhòba dóna jẹgodona enẹ lọ.

Do ayi e go, akọta nẹ lọ ko gbà osẹ́n Etọn lẹ. Ojé, yé tindo agùn daho, yèdọ gohọ̀ sinsẹ̀n tọn. Yé tindo gbẹtọ susu he yì wéhọ̀mẹ lẹ. Mọwẹ yé sọ tindo yẹwhegán lẹ pé otò lọ mẹ dó, ehe yè plọ́n lẹ bọ yè to lilẹ́ yé pé di maṣinu. Podọ yé tindo yẹwhegán susu po susu yẹwhenọ lẹ tọn po, yé sọ tindo wékàntọ susu po agùn susu po, ṣigba yé dẹn do Ohó Jiwheyẹwhe tọn. Enẹwutu, Jiwheyẹwhe ylọ dawe de he matin to núhe yé yín lẹ mẹ, bo sẹ́ ẹ do otò yetọn mẹ po LÉ WẸ OKLUNỌ DỌ po.

Mì pọ́n lé Jiwheyẹwhe nọ pénukun Omẹ Etọn lẹ go dó. Whẹpo É do sẹ́ yẹwhegán he do po owẹn lọ po, É dọmọ, “Elija, yì bo dọ onú helẹ hlan Ahọlu Ahabi. Podọ dinvie, whenuena hiẹ wà mọ, hẹn we yì sọn ofi, na Yẹn ko wléawu otẹn de tọn dai hlan we, to ojlẹ akùdidó lọ tọn mẹ. Yẹn nasọ pénukun ogo we; Elija, eyín hiẹ sọgan dọyẹwhehó Ohó Ṣie tọn kẹdẹ, sà wà núhe Yẹn degbèna we nado wà.”

Dinvie, yẹn na dọhó do devizọ́n daho Elija tọn he lọ ji to ozán he mẹ, podọ sọha gbigbọ Elija tọn tọn po asiko mítọn po. Yẹn yise dọ pọ́ndego pipé de wẹ. E jlo mi nado gọ̀yì ojlẹ godo tọn lẹ mẹ, ṣigba yẹn jlo nado zán whenu susu na hùkàn odẹ̀ tọn.

Podọ eyín mí sọgan pọ́n hlan godo, Islaẹli ko yí otò Palẹstinu tọn to ninọ̀mẹ dopolọ he mẹ mí ko yí otò Amẹlika tọn te. Mí tin to gblagbla otò Amẹlika tọn tọn mẹ, bọ mí ko sọ yàn tòmẹnu etọn lẹ, yèdọ Indiannu lẹ, podọ mí ko sọ yí otò lọ na nútindo de. Podọ mọwẹ Islaẹli wá jẹ otò Palẹstinu tọn mẹ dó, gbọn mẹpinplán Jọṣua tọn glọ́, yèdọ gbọn oglọ́ Jiwheyẹwhe tọn, bo yàn azọ́nwàtọ Indiannu he tin to finẹ lẹ, bo sọ yí aigba lọ.

Do ayi e go, gbẹtọ huhlọnnọ lẹ wẹ ahọlu yetọn tintan lẹ; yèdọ Davidi po Sọlọmọmi po, po omẹ gángán lẹ po. Mọwẹ ga dọ, gbẹtọ huhlọnnọ lẹ wẹ otògán mítọn tintan lẹ; he dùgán do otò Waṣintọni tọn po Linkọlni tọn po ji, po otò devodevo lẹ po. Podọ to vivọnu yé omẹ pó tọn, ahọlu lẹ kavi otògán lẹ lẹzùn gbẹtọ ylankan lẹ, mọwẹ yé dótana dó po Ahabi he po. Apajlẹ daho de wẹ ehe hlan ojlẹ mítọn mẹ. Podọ gbẹtọ lẹ yinwanna nado gọ́alọna núyiwà aihọn mẹ tọn lẹ, sọmọ bọ yé ma jlo nado sè Ohó nugbo Oklunọ tọn lọ ba gba.

Mì sọgan lẹn dọ, gbẹtọ na hunkọ tọn wẹ devizọ́nwàtọ nugbo Jiwheyẹwhe tọn sọgan taidi to nukun gbẹtọ he nọ gọ́alọna núyiwà aihọn mẹ tọn lẹ dó! “Etẹwutu? Na é hùnalẹ wutu bo matin to ede mẹ. Onú mọtọnhunkọ ma sọgan jọ gbèdé.” Do ayi e go, sinsẹ̀nnọ wẹ omẹ nẹlẹ pó, yèdọ sinsẹ̀nnọ dagbe lẹ. Mọwẹ yé sọ tindo gbẹtọ dagbe lẹ dó. Yé sọ yín sinsẹ̀nnọ titegbe lẹ.

Na é yọ́nẹn dọ, núhe húgan núyọ́nẹn gbẹtọ tọn de dóna tin, podọ núhe húgan owẹn poun de, ehe húgan yẹwhehó Ohó lọ tọn didọ poun, nado gbà ayiha osé tọn he tin to yé mẹ lẹ. Enẹwutu, ewọ yọ́nẹn dọ, é dóna hẹn LÉ WẸ OKLUNỌ DỌ nado do whẹ̀dida hlan gbẹtọ lẹ ji, mọwẹ é mọdona enẹ lọ dó to whenuena é tọ́njẹgbonuyì po LÉ WẸ OKLUNỌ DỌ po. Podọ enẹ wẹ LÉ WẸ OKLUNỌ DỌ lọ. Owhẹ̀dida wẹ nado gbẹ́ Enẹ lọ. Mọwẹ mí sọ to enẹ lọ mọ dó to azán mítọn lẹ mẹ ga. Podọ ga, mì nọ mọ enẹ lọ to ojlẹ lẹpo mẹ. Na enẹ tọn wutu, núdepope ma sọ pò ba, adavo whẹ̀dida to whenuena hiẹ dása ohùkàn lẹblanu tọn lọ.

Dinvie, apajlẹ he go wẹ yẹn to na zé Elija jlẹdo, yèdọ agùn egbé tọn. Jẹnukọnna whẹ̀dida, é kẹalọyí owẹn he lọ. Na Elija, yè yìn in dogbọn núdùdù agbasa tọn dali, na jikun ma to na jà dinvie wutu na owhè atọ̀ndá, yèdọ kẹdẹdi Ohó Jiwheyẹwhe tọn, kavi kaka jẹ whenuena Elija na degbè etọn. “Elija, ohó depope he hiẹ dọ, mọwẹ e na yín dó.” Enẹwutu, é zinzọnlin jẹ ahọlu lọ de, bo dọmọ: “Ahún lọsu ma na tin adavo kẹdẹdi ohó ṣie.” Bé enẹ ma yín gbèdidè? Yèdọ owẹn de wẹ!

Podọ dinvie, mí na zé enẹ lọ jlẹdo akùdidó gbigbọnọ ojlẹ egbé tọn tọn go. Mí omẹ pó wẹ mọdona dọ, akùdidó gbigbọnọ daho de tin to aigba egbé tọn ji, to ninọ̀mẹ gbigbọ tọn de mẹ. Do ayi e go, mì omẹ pó wẹ mọdona dọ yẹwhegán lẹ ko dọ dọdai jẹnukọnna Wiwá Klisti tọn awetọ lọ, dọmọ: “Na yẹn na do ohùvẹ́ de hlan aigba lọ mẹ, ohùvẹ́ akla tọn de ma wẹ gba, ṣigba sisè Ohó Jiwheyẹwhe tọn lẹ tọn.” Podọ dinvie wẹ azán nẹ lọ, dọmọ, “Sisè Ohó Jiwheyẹwhe tọn lẹ tọn.” Dinvie, akùdidó agbasamẹ tọn he to apajlẹ akùdidó gbigbọmẹ tọn de dohia.

Ylando po mayise po he gbọn mẹplọ́ntọ lalonọ lẹ, po mẹhe nọ gọ́alọna núyiwà aihọn mẹ tọn lẹ po dali to agùn mẹ, ko hẹn whẹ̀dida he ja lọ wá otẹn he mẹ. Na yé tọ́nsọn Ohó Jiwheyẹwhe tọn po yẹwhegán lọ po tọn mẹ, nado gọ̀do núyọ́nẹn aihọn tọn he yé nọ gọ́alọna to Ohó lọ mẹ tọn po de.

Mì dayi e go dọ to ojlẹ nẹ lọ mẹ, Jiwheyẹwhe nọ zé núde tite. Na Ewọ ma nọ wà núdepope adavo dọ, É ni do e hia hlan omẹ Etọn lẹ jẹnukọn, podọ gbọn yẹwhegán Etọn lẹ dali wẹ É nọ do e hia gbọn.

Ṣigba Elija to whenẹnu, tindo otẹn whiwhla de, ehe Jiwheyẹwhe ko dè nệ nado yì finẹ. Enẹ lọ wẹ núhe mí jlo na mọ to dinvie jẹnukọnna ohùkàn odẹ̀ tọn. Jiwheyẹwhe dè otẹn whiwhla de na Elija. Do ayi e go, e ma yín agùn wẹ wléawu etọn hlan ẹn gbèdé, mọ ahọlu lọsu ma sọ wléawu etọn dai hlan ẹn, mọ ewlọsu ma sọ dè na ede gba, ṣigba Jiwheyẹwhe dè otẹn whiwhla de na Elija nado nọ yìn in to ojlẹ akùdidó tọn lẹpo mẹ, ofie yè wléawuna ẹn te na núdùdù etọn, podọ azán de bọdo azán de go. É ma dibúna núhe na jọ to osọ kavi dibú dọ núddùdù etọn lọ na vọ gba. Na Jiwheyẹwhe dọmọ, “Yẹn ko sọ degbèna ohọ́n lẹ nado to yìnyìn we.” Onú họakuẹ tẹwẹ ehe, yèdọ apajlẹ otẹn mítọn whiwhla tọn to Klisti mẹ.

Do ayi e go dọ, gbẹ́pipli aihọn tọn po núhe to jijọ egbé lẹ po, nọ dọmọ: “Azán nújawu tọn lẹ ko juwáyì.” Podọ yè ko dè huhlọn daho Jiwheyẹwhe tọn sọn agùn lẹ mẹ, na e taidi dọ, yé ma sọ tindo núde adavo “ogànvệ he to núdọ, kavi ajogàn gbègángánnọ de.” Mí yọ́nẹn dọ nugbo wẹ enẹ lọ. Enẹwutu, “Yé tindo ohia jijọ-di-Jiwheyẹwhe tọn, ṣigba yé mọ́n huhlọn Etọn.”

Onú dopolọ wẹ Davidi wà to afọnnu egbé po kẹkẹ osọ́nọ lẹ po, dọ omẹ nẹlẹ họnyì sọn Ohó lọ de. Whenuena yè do Ohó lọ hia yé bo sọ yì I na yé, yé ma jlo E gba; enẹwutu wẹ yé tọ́nsọn Ohó lọ mẹ.

Mọwẹ gbẹtọ nẹlẹ wà dó to asiko Elija tọn mẹ, yé tọ́nsọn Ohó lọ mẹ. Do ayi e go, yé lẹn dọ yé tindo Ohó lọ, ṣigba lala.

Do ayi e go dọ, whenuena É jlo nado hò mayisenọ lẹ, É dè aliho na yisenọ lọ. Mọkẹdẹ wẹ É nọ wà dó to whelẹponu. Whenuena É jlo nado yí osìn do và aihọn, É dè aliho na Noe nido họngán. Podọ to whenuena É jlo nado và Egiptinu lẹ to Ohù Vệ mẹ, É dè aliho na omẹ Etọn lẹ nado tọ́n gbọn Ohù Vệ lọ mẹ wáyì. Nawẹ Jiwheyẹwhe nọ dè aliho Etọn dó! Podọ fie aliho de matin te, Ewọ wẹ Aliho nẹ lọ. Yèdọ Ewọ wẹ Aliho lọ.

Dinvie, mí mọ dọ mí pannukọn dopo to ojlẹ daho lẹ mẹ, ehe otànhó lẹ ma ko mọdona de. E ma yín apáde awhànfunnu bọnpu de tọn po to ota etọn po wẹ mí na dibúna gba, adavo agùn lọ. Na ojlẹ he mẹ mí tin te wẹ mí dóna pọ́n hlan.

Do ayi e go dinvie dọ, Jiwheyẹwhe dè aliho de na Elija nido lùn in tọ́n. Podọ mọwẹ É ko sọ wléawu aliho de tọn na ovi Etọn he yise nido lùn hòmẹgble po núhe ja lẹ po tọ́n dó.

Enẹwutu, Jiwheyẹwhe ma na yín dódónọ nado dawhẹ̀na omẹ nẹlẹ bo na sẹ́ mẹhòba do yé, bo và Sọdọmi po Gomọla súdo, bo sọ siyọ́ Kapẹnaümi do ohù ṣẹnṣẹn, nado gbléwhẹ̀do akọta nẹlẹ, podọ Sọdọmi po Gomọla po; nado jó míwlẹ do ga to mọdopolọ wiwà mẹ matin mẹhòba gba. Na míwlẹ to gbèsisọ mẹ na owhẹ̀dida lọ kẹdẹdilé yéwlẹ te dó.

Whenuena onú helẹ sọawúhia, yèdọ núyiwà whenẹnu tọn lẹ, Jiwheyẹwhe fọ́n dawe de to ojlẹ nẹ mẹ nado hòavun hẹ huhlọn nẹlẹ, ṣigba yé gbẹ́ nado tùntóai hlan ẹn. Na yé lẹn dọ alẹnọ de wẹ ewọ, bo dọmọ: “Podọ é ma sọ to ede mẹ ba. Na gbigbọ mawé de wẹ to azọ́nwà gbọn é mẹ wutu, yèdọ nulunọ de sọn zùngbo mẹ, mẹhe zùngbo lọ ko hẹn zùn alẹnọ.” Gãnṣo, é tindo Ohó Oklunọ tọn.

Do ayi e go, “Ohó lọ ma yín núhe yé dọ E yín to egbé gba.” Podọ yé sọ nọ ga, dọ, “Otànwéma de wẹ Biblu.” Yẹn lẹn dọ mì ko mọ ehe pọ́n, dọ, dinvie, yé to didọ, dọmọ: “Atin sinsẹ́n wẹ Evi dù,” yèdọ “atin sinsẹ́n he di apũ de.” Podọ ga dọ, “Mọse ma plán ovi Islaẹli tọn lẹ gbọn Ohù Vệ mẹ gba. Ṣigba yé tò palo lẹ ode do ode ji jẹ awà awetọ ji dọn, bo tọ́n jẹ awà awetọ ji.” Yín e yín mọ, bé nawẹ otọ̀ lẹ wà gbọn bo do má dawe, bọ yé sọ gbọn aigba húhú ji yì? Ojé, ohógbè nẹlẹ matindo oyọ́nẹn depope gba. Ṣigba, mì mọdona dọ, azán mọtọnhunkọ lẹ tọn wutu wẹ hòmẹgble Jiwheyẹwhe ja ota gbẹtọ nẹlẹ tọn ji. Na mọwẹ e jọ dó.

Yé nọ dọ, dọ onú mọtọnhunkọ lẹ de matin gba, yèdọ agùnvi lẹ lọsu mayise to azọ́njawu lẹ mẹ gba. Na yé nọ dọ, dọmọ: “Yẹn na ná we Dọla fọtọ́n eyín hiẹ sọgan do azọ́njawu de hia mi. Do azọ́njawu hia mi!” Nugbo, yé ma tlẹ sọgan mọ ẹn eyín onú fọtọ́n donu ao tlẹ jọ to nukọn yetọn. Enẹwutu, yé ma sọgan mọ ẹn gba.

Mì nọ dọ, dọmọ: “Enẹ ma sọgan jọ.” Ojé, lala, mọ ma wẹ gba.

Do ayi e go, Eliṣa tin to Dotani to asiko de mẹ, bọ awhàn Silia tọn lẹ wá bo lẹ́do otò lọ pé nado wlé é, na yé yọ́nẹn dọ ewọ mẹ wẹ huhlọn otò lọ tọn tin te, enẹ wẹ númọtọ lọ. Dopo to yé mẹ dọ hlan ahọlu Silia tọn lọ, dọmọ: “Bé hiẹ yọ́nẹn dọ, Eliṣa yẹwhegán lọ he tin to Islaẹli mẹ, nọ dọ na ahọlu Islaẹli tọn ohó he hiẹ to didọ to adọzánbó towe mẹ?”

 

Whenẹnu wẹ ahọlu Silia tọn lọ dọ, “Mì yì wlé dawe nẹ lọ wá! Na ewọ wẹ to aliglọ́nna mí.” Podọ awhànfuntọ Silia tọn lẹpo sọ lẹ́do Dotani. Yé sọ lẹ́do e pé.

Podọ Gehazi, mẹmẹsi yẹwhegán lọ tọn, fọ́n tite bo dọmọ, “Ṣo, mẹmẹsi ṣie! Na mí na wà dó na awhànpa de po osọ́ lẹ po, po kẹkẹ lẹ po tin lẹ́do mí pé?”

Eliṣa sọ gblọn dọ, “A dibú blo: na yé he tin to mí de lẹ yín susu hú yé he tin to yé de.” Bé mì mọdona?

Gehazi sọ pọ́n lẹ́do bo dọmọ, “Yẹn ma mọ mẹdepope.”

Enẹwutu, Eliṣa hodẹ̀ bo dọmọ, “Yẹn vẹ we Oklunọ Jiwheyẹwhe, hùn nukun yọpọsunnu he tọn lẹ na é nido mọ.” Nukun etọn lẹ sọ hùn, bọ osó lẹ sọ gọ́na Angẹli lẹ po kẹkẹ osọ́nọ lẹ po to aisinsin lẹ́do pé, yèdọ Huhlọn he nukun ma mọ lẹ.

Eliṣa sọ zinzọnlin jẹ gbonu finẹ, bọ Biblu dọ, dọmọ: “Ewọ sọ yí nukunnumamọ do hó yé.” É sọ zinzọnlin jẹ yé de; na yé yín nukuntọnnọ hlan ẹn. É sọ kànbiọ yé dọmọ, “Bé Eliṣa din wẹ mì te?”

Yé sọ gblọn bo dọmọ, “Mọwẹ, ewọ wẹ mí to dindin.”

Eliṣa sọ dọmọ, “Mì wá na yẹn ni dọ fie é te hlan mì,” mọwẹ é sọ plán yé biọ omọ̀ de mẹ dó, yèdọ fie awhànpa Isalẹli tọn lẹ tọ́njẹgbonu bo wlé yé te.

Na enẹwutu, Biblu dọ, dọmọ: “Ewọ sọ yí nukunnumamọ do hò yé.” Enẹwẹ gblọndo lọ. Podọ to egbé, yè sọ yí nukunnumamọ do hò gbẹtọ lẹ to gbigbọ mẹ, ṣogan Oklunọ Jiwheyẹwhe jẹte wá gblagbla gbẹtọ lẹ tọn mẹ bo wà onú susu, podọ É ko sọ hẹn núhe É ko dopa yetọn lẹ ṣẹ̀, ṣigba yé ma sọ sọgan mọ Ẹn gba. Na yé tọnnukun to gbigbọ mẹ wutu; na yé ma sọ yọ́n Jiwheyẹwhe gba wutu, mọ yé ma sọ yọ́n Huhlọn daho Etọn lọ gba. Do ayi e go dinvie dọ, kẹdẹdilé yé wà dó to ojlẹ Eliṣa tọn lẹ mẹ, mọwẹ yé sọ to wiwà dó to egbé ga. Na yé nọ dọ to egbé dọ, “Azọ́njawu de matin gba, onú mọtọnhunkọ de matin lala, na whinwhan wẹ enẹ lẹpo.”

Onú dopolọ wẹ yé sọ dọ do Elija go ga, na whenuena yè zé é yì aga wẹ Eliṣa yí otẹn etọn, mẹhe yín dawe winyanwinyan de, yèdọ tapipanọ de, mẹhe yọpọ flinflin lẹ jẹgodona bo to vivlẹ ẹ, bo to didọ han ẹn, dọ, “Hiẹ otapipanọ, etẹwutu wẹ hiẹ ma do hẹji hẹ Elija?” Mì mọ, jẹnukọn gbẹtọ lẹ ma tlẹ yí I sè to whenuena onú popo ko yín wiwà. Podọ yè ko zé omẹ huhlọnnọ Jiwheyẹwhe tọn he do Olọnmẹ gbọn kẹkẹ miyọnnọ de dali, bọ gbẹtọ lẹ lọ ma sọ yí I sè. Mọwẹ yé jo yọpọ flinflin yetọn lẹ do dó, bọ yé jẹgodona dawe he lọ, dọmọ: “Hiẹ otapipanọ, etẹwutu wẹ hiẹ ma hẹji yì?’Bé mì mọdona? Podọ to whenẹnu é hodẹ̀do yọpọ flinflin lẹ lọ bọ beali-asi awe tọ́njẹgbonu wá bo tlẹn ovi kande-nukun-awe sọn yé mẹ.

Dinvie, mì dayi e go dọ, lé e te to whenẹnu wẹ e te to egbé, na yé nọ zé tùnmẹ yéde titi tọn gọ́na Ohó lọ. Dinvie, eyín yé jlo na wà mọ, enẹ pò to yé si, ṣigba yé nọ tẹnpọ́n nado hẹn mí yí tùnmẹ yetọn lẹ sè. Enẹwutu wẹ Biblu dọ, dọmọ, “Ohó Jiwheyẹwhe tọn he ma yín tùnmẹ mẹde titi tọn gba.” Na Jiwheyẹwhe nọ dọ tùnmẹ Ede Titi tọn. Jiwheyẹwhe nọ hẹn Ohó Etọn ṣẹ̀ podọ enẹ sọ wẹ tùnmẹ Etọn. Kẹdẹdilé yẹn nọ dọ dó to whepoponu dọ, É dọ to whẹ́whẹ́whenu dọ, “Gbọ hinhọ́n ni tin,” bọ hinhọ́n sọ tin. Yè madó na tún enẹ lọ mẹ gba; enẹ lọ sọ jọ. É dọmọ, “Dayi e go, awhli de na mọhò,” é sọ mọhó. É sọ dọ Ewọ “na túntún Gbigbọ Etọn jẹgbonu,” É sọ wà mọ. Podọ É sọ dọ núhe É na wà “to azán godo tọn lẹ mẹ,” É sọ to wiwà yé! Enẹ lọ ma dó hudo tùnmẹ depope tọn gba; na Jiwheyẹwhe to tùnmẹ Ede Titi tọn ná. Podọ núdepope he dawe nulunọ de sọgan dọ, enẹ ma hẹn Jiwheyẹwhe dote to alọ depope mẹ gba.

Whenuena Jesu tin to aigba ji, É zán ojlẹ susu bo hòavun hẹ mayise kẹdẹdilé mí tindo to egbé, podọ ehe sọgan húgan mọ. Ṣigba enẹ lọ ma hẹn Ẹn dote gba, É sọ yì nukọn to azọ́n Etọn wiwà lẹ mẹ, bọ Jiwheyẹwhe sọ hẹn núhe É wà lẹpo wá ṣiṣẹ̀ mẹ. Enẹwutu, É dọmọ, “Yẹn matin na Dẽ gba. Na dopo wẹ Yẹn po Otọ́ po; Ewọ to ninọ̀ Yẹn mẹ. E ma yín Yẹn wẹ to azọ́n helẹ wà gba, adavo Otọ́ he tin to Yẹn mẹ, yèdọ Otọ́ he nọnọ̀ Yẹn mẹ lọ. Podọ eyín Yẹn ma wàzọ́n Etọn lẹ, mì yí Mi sè blo; ṣigba eyín Yẹn wàzọ́n lẹ lọ bọ mì ma yí Mi sè, mì bo yí azọ́n lẹ lọ sè.” Bé mì mọdona? To ohógbè devo lẹ mẹ, “Mì nọ dindona Owé Wiwé lẹ,” na É dọmọ, “na mì lẹn dọ yé mẹ wẹ mì tindo Ogbẹ̀ Madopòdo te, yèdọ gbọn Owé Wiwé lẹ pinplọ́n do otamẹ mẹ. Podọ Owé Wiwé lẹ Lọsu dèkunnuna Mi.” Niṣẹ! Ohógbè nahunkọ tọn wẹ ehe! É sọ dọmọ, “Owé Wiwé wẹ dọ Mẹhe Yẹn yín hlan mì.”

Podọ Owé Wiwé lẹ wẹ dọ hlan mì ojlẹ he mẹ mí tin te, po núhe mì mọ dọ yé yín wiwà lẹ po, na Jiwheyẹwhe Lọsu tin to omẹ Etọn lẹ ṣẹnṣẹn wutu. Etẹwutu, núdepope ma sọgan f ọ́n oṣiọ adavo Jiwheyẹwhe ṣokẹdẹ. Podọ Jiwheyẹwhe kẹdẹ wẹ sọgan wàzọ́n he É to wiwà dinvie lẹ. Na Biblu dọ, dọmọ: “Ewọ dopolọ wẹ to osọ, egbé, mọwẹ podọ kakadoi.”

Dinvie, mí mọ dọ núyiwà he to nukọnyì to gbẹtọ lẹ mẹ wẹ yín dọ, yé nọ dọ, dọmọ: “Ojé, ojlẹ nẹlẹ ko juwáyì, núde matin he yín azọ́njawu wiwà gba. Na gbẹtọ lẹpo nọ mọ whinwhàn gbọn ayajijẹ yetọn dali.”

Mì dotó yẹwhegán Elija nẹ lọ, he dáwha jẹgbonu hlan yé, podọ hlan núyọ́nẹn yetọn lẹ tọn. Do ayi e go, é dọhó taidi Jiwheyẹwhe Lọsu. Yèdọ Elija lọ dọhó di Jiwheyẹwhe Lọsu, dọ, “Ahún ma na tin kavi jikun to owhè helẹ mẹ; adavo kẹdẹdi ohó ṣie.” Niṣẹ! Mọwẹ dawe. Yẹwhegán lọ ko tin to nukọn Jiwheyẹwhe tọn na whenu dindẹn de!

Dẹnsọlé yẹwhegán Alẹ̀nù Hóhó mẹ tọn lẹ nọ nukọn Jiwheyẹwhe tọn dó, mọwẹ yé nọ taidi Ohó lọ dó, Owẹn yetọn wẹ Ohó lọ Lọsu. Mì dayi e go, é dọ dọmọ, “LÉ WẸ OKLUNỌ DỌ.” Podọ whenuena omẹ nẹlẹ he tindo owẹn yetọn lẹ sọn Jiwheyẹwhe de, e sọgan tin jẹagọdo linlẹn yéwlọsu lẹ tọn go, bọ yé sọgan nọ ma mọdona lé e jẹ dọ yé ni mọdona dó gba. Ṣigba yé nọ dọ Ohó Jiwheyẹwhe tọn lọ, dọ, “LÉ WẸ OKLUNỌ DỌ.”

“Jikun ma na tin finẹ, adavo kẹdẹdi ohó ṣie.” Ojé, ohógbè nahunkọ tọn wẹ ehe! Ewọ ko tin to nukọn Jiwheyẹwhe tọn bo ko sọ yín hinhẹn ṣẹ̀ to gbèsisọ mẹ. Do ayi e go dọ, enẹ lọsu sọ sọgbè hẹ Owé AMỌSI 3:7 tọn, dọ, “Nugbonugbo OKLUNỌ Jiwheyẹwhe ma na wà núde, adavo Ewọ dè aṣli Etọn hia hlan devi Etọn yẹwhegán lẹ.” Yẹwhegán lọ sọ dọmọ, “Jikun de ma na tin finẹ gba!”

Yé sọ to vivlẹ ẹ ko, bo lẹn dọ é hùnalẹ. Ṣigba mì mọdona dọ, é tindo LÉ WẸ OKLUNỌ DỌ, dọ jikun ma na tin. Podọ whẹpo Elija do wà mọ, Jiwheyẹwhe do e hia hlan Elija yẹwhegán Etọn. Podọ yẹwhegán he yè dè bo sọ yín didohia de wẹ ewọ, na gbẹtọ nẹlẹ nido tindo lẹnvọjọ. Ṣigba sọlé e jẹ dọ e ni yín mọ, yé vlẹ ẹ ko, bo to didọ, dọmọ: “Ojé, mí tindo jikun susu! Podọ ozínhọ̀ lẹ sọ gọ́ bọ otọ̀ lẹ sọ to sisà dagbedagbe.”

Biblu dọ, dọmọ: “Ahún ma tlẹ tin na owhè atọ̀n e lán osùn ṣidopo.” Enẹwutu, otọ̀pẹṣẹ lẹ po osìn lẹ po hú to ofi lẹpo. Enẹ ma yín dawe lọ gba, ṣigba Jiwheyẹwhe wẹ dọhó gbọn ewọ mẹ. “YẸN LỌ” wẹ wà enẹ, bọ mí omẹ pó sọ mọdona.

Mí mọdona dọ whenuena mẹhe Jiwheyẹwhe dohlan de wá, yèdọ mẹdidè sọn Jiwheyẹwhe de he tindo LÉ WẸ OKLUNỌ DỌ nugbo lọ, dopolọ wẹ owẹn lọ po wẹnzagùn lọ po. Na yè do é hlan nido dọ LÉ WẸ OKLUNỌ DỌ, Ohó de bodọ Ohó de go, enẹwutu, dopolọ wẹ ewọ po owẹn etọn po.

Gbẹtọ gbẹ́pipli agùn titònọ tọn de po ohógbè gbẹ́pipli agùn titònọ tọn lẹ po, “dopo” wẹ ewọ po agùn etọn po. Mọwẹ núyọ́nẹntọ de po núyọ́nẹn etọn he yè plọ́n ẹn gbọn gbẹ́pipli agùn titònọ lẹ tọn dali po, dopo wẹ ewọ po owẹn etọn po; yèdọ agùn he nọ plọ́n núyọ́nẹn aihọn tọn po núyọ́nẹntọ etọn po. E sọgbè dómọ.

Enẹwutu, whenuena gbẹtọ de sọawúhia po LÉ WẸ OKLUNỌ DỌ po, dopo wẹ ewọ po Owẹn lọ po. Podọ whenuena Elija sọawúhia po LÉ WẸ OKLUNỌ DỌ po, ewọ po owẹn etọn lẹzùn dopo. Kẹdẹdi Jesu, whenuena É wá, Ewọ wẹ Ohó lọ kẹdẹdilé Owé JOHANU 1 tọn dọ dó. Enẹwutu, dopo wẹ Ohó Jiwheyẹwhe tọn po wẹnzagùn owhèta lọ tọn po to whelẹponu. Mọwẹ.

Jesu wẹ Ohó he yè ko dọ dọdai etọn. Ewọ lọ wẹ yẹwhegán lẹ dọhó etọn dọ, É na wá, yè dọmọ: “Dayi e go, awhli de na mọhò, bo nasọ ji visunnu de.” Eyín mí na gọ̀yì whẹ́whẹ́whenu, mí na mọ dọ Jiwheyẹwhe dọ hlan yé, dọ, “Okún yọnnu lọ tọn na só ota odàn lọ tọn, hiẹ na só afọgbẹn etọn.” Yè ko ná dọdai helẹ pó. Mọwẹ Davidi dáwha yẹwhegán helẹ tọn to owhèta lẹ mẹ, bo to ohó dọ dogbọn Jesu tọn dali. Ewọ lọ wẹ Ohó he sọawúhia lọ! Halleluya!

Dinvie, bé mì mọdona fie yẹn jlo nado yì? Yẹn dọhó hẹ mì hézéhézé to afọnnu he. Bé mì ma mọ aṣẹpipa Jiwheyẹwhe Ogbẹ̀nọ tọn to Agùn Ogbẹ̀nọ lọ, he yín Asivu lọ mẹ? Awutunọ lẹ jẹ gángán, podọ oṣiọ lẹ sọ fọ́ntite, bọ osẹ́kunọ lẹ zinzọnli, podọ nukuntọnnọ lẹ mọnú, Owẹndagbe lọ tọ́njẹgbonu to huhlọn Etọn mẹ, na dopolọ wẹ wẹnzagùn lọ po Owẹn lọ po. Podọ Ohó-Jesu lọ tin to Agùn lọ mẹ.

Ohó Jiwheyẹwhe tọn tin to Elija mẹ to whenuena é hẹjiyì finẹ po “LÉ WẸ OKLUNỌ DỌ” po, bo dọmọ, “Jikun ma na tin gba.” Ehe ma yín Elija gba; ṣigba Jiwheyẹwhe to Elija mẹ.

Whlasusu wẹ yẹn ko dọ, taidi yọnnu Núyọ́nẹntọ Yisenọ de he dọ na mi to gbèdopo. Mọwẹ yẹn ko sọ dọ whlasusu dogbọn etọn dali. Nọviyọnnu lọ dọmọ, “Mẹdaho Branham, etẹwutu wẹ hiẹ do nọ tindo kàndeji susu nado dọhó do Jesu ji dolé?”

Yẹn sọ gblọn bo dọ hlan ẹn dọmọ, “Enẹ wẹ onú dopo he yẹn lẹn dọ, yẹn na wá dogbè etọn.”

Yọnnu lọ sọ dọmọ, “Bé hiẹ tẹnpọ́n nado nọ hẹn Ẹn yín WiWénọ wẹ?”

Yẹn sọ gblọn dọ, “Wiwénọ wẹ Ewọ.”

Yọnnu lọ sọ dọmọ, “Ojé, yẹwhegán de wẹ, mọwẹ É sọ yín gbẹtọ dagbe de dó, ṣigba Ewọ ma yín Wiwénọ gba.”

Podọ yẹn sọ gblọn bo dọmọ, “Do Owéfọ dopo hia mi fie dohia dọ, Ewọ ma yín Omẹ Wiwé te!”

 

Yọnnu lọ sọ gblọn dọmọ, “Yè dọ to Owé JOHANU tọn mẹ dọ, É ‘viavi’ to whenuena É yì yọdo Lazalọsi tọn kọ̀n.”

Yẹn sọ dọmọ, “nugbo É viavi. Na gbẹtọ de podọ Mẹwiwé de wẹ Ewọ. Gbẹtọ de wẹ Ewọ whenuena É viavi; ṣigba É dóna yín Jiwheyẹwhe nado fọ́n oṣiọ tite.” Mọwẹ. Yẹn sọ dọ, dọmọ: “Gbẹtọ de wẹ Ewọ to whenuena húvẹ hù I; ṣigba Ewọ yín Jiwheyẹwhe to whenuena É ná núdùdù gbẹtọ fọtọ́n donu atọ́n po akla awe po, po owhevi atọ́n po.” Mọwẹ. “Gbẹtọ de wẹ Ewọ to whenuena É damlọn to vatlẹ mẹ; ṣigba Jiwheyẹwhe tin to Ewọ mẹ nado dóalọtena agbówhẹn ohù tọn.” Etẹwutu? Na dopo wẹ Ewọ po Ohó Etọn po wutu.

Do ayi e go, Jesu dọmọ, “Yẹn po Otọ́ ṣie po, dopo wẹ mí. Na Otọ́ ṣie to ninọ̀ Yẹn mẹ wutu.” Ewọ wẹ Jiwheyẹwheyínyín to agbasa mẹ.

Yẹn lẹn dọ e sinyẹnawu to azán he wáyì mẹ, whenuena yẹn jlo nado dọhó do Owhèta Agùn Ṣinawe Lẹ Tọn ji. Nado bẹ́, yẹn ma sọgan jlẹ lé Jesu nọte to gblagbla owhèta nẹlẹ tọn mẹ po owhà lẹ po to ota Etọn gba, dọ, “Odà Etọn wé di Sekanfún.” Na yẹn ma mọdona lé odà gbẹtọ owhè gbànnukun-atọ̀n mẹ tọn sọgan wé di osìn agó dó gba.

Yẹn sọ ylọ núyọ́nẹntọ dagbe he yín agùn Pẹntikọsti tọn de, yèdọ mẹvivẹ họntọn de. Nọvisunnu Jakọbu Moọ wẹ ewọ. Mẹhe yín zìnzìntọ bo sọ peve to núyọ́nẹn mẹ. Nọvisunnu lọ sọ dọ, dọmọ: “Nọvisunnu Branham, enẹ wẹ Jesu he yè pagigona. Mọwẹ É te to whenuena yè pagigona Ẹn.” Yẹn sọ dọmọ, lala na yẹn ma yí enẹ lọ sè gba. Lala.

Yẹn sọ dọmọ, “Nọvisunnu Moọ, a basi.”

Whenẹnu yẹn biọ abò mẹ finẹ nado dọhó hlan Jiwheyẹwhe. Do ayi e go, yẹn hùn Owé Wiwé ṣie nado flin In ohó Daniẹli tọn, to ofie é dọ te, dọ, “Podọ é sọ wá Hóhótọ Azán lẹ tọn de, Mẹhe odà ota Etọn tọn wé taidi lẹngbọfún wéwé.” Yẹn sọ dọmọ, “Oklunọ È, yẹn ma yọ́n núhe yẹn sọgan dọ gba, podọ azọ́n nẹlẹ pó tin to ota ṣie ji.” Do ayi e go dinvie dọ, to owhè dopo kavi awe he wáyì lẹ mẹ, yèdọ jẹnukọnna hùnhùn Hiadonu Ṣinawe lẹ tọn, yẹn sọ to dẹ̀hò to finẹ, dọ, “Oklunọ È, etẹwẹ ehe?”

Podọ yẹn sọ pọ́n to nukọn ṣie, dawe sunnu whẹdatọ de ṣite to nukọn ṣie, he tindo odà wéwé de to ota etọn. Owhẹdatọ azán hóhó mẹ tọn lẹ tọn nọ ṣinyọn odà wéwé nẹ nado dohia dọ yé tindo aṣẹpipa he yì aga de.

Podọ whenuena yẹn mọ Jesu po odà wéwé nẹ lọ po, yẹn sọ dọmọ, É hẹn nugbo he mí yọ́nẹn nẹ lọ wá ṣiṣẹ̀ mẹ, dọ Ewọ lọ wẹ tindo Aṣẹpipa he yì aga lọ. Mọdopolọ wẹ Jiwheyẹwhe dèkunnu dó to Osó Nukunmẹdidiọ tọn ji, dọmọ, “Ehe wẹ Ovi yinwanna Ṣie, mì nọ sè Etọn; enẹ wẹ Aṣẹpipa he yì aga lọ!”

Podọ to bibẹ́nu Hiadonu Ṣinawe lẹ tọn, whenuena Angẹli ṣinawe lẹ sọawúhia to ninọ̀mẹ pilamidi tọn nẹ mẹ, É ṣite to finẹ bo dọ hlan mi dọ, yẹn ni gọ̀yì godo bo dọhó do Hiadonu Ṣinawe lẹ ji, É nasọ tin po yẹn po. É do núhe Hiadonu nẹlẹ yín hia mi, yèdọ onú whiwhla nẹlẹ. Yẹn nọ lẹn dai dọ hiadonu lẹ yín titlẹ to Owé lọ godo, yé sọ yín núhe yè ma wlán do Owé lọ mẹ gba, ṣigba yè hẹn enẹ lọ yín yínyọ́nẹn dọ É ma sọgan hùn hiadonu he yè ma wlán do Owé lọ mẹ gba. Ṣigba yè whlá núde to Owé lọ mẹ. “Eyín mẹdepope na depò sọn E mẹ kavi dedogọ́ Ẹ ...” Enẹwutu núdabla de tin to Owé lọ mẹ to owhèta agùn ṣinawe lẹ tọn mẹ. Dopodopo yetọn lẹ nọ dè núdabla he kàn baptẹm osìnmẹ tọn de tọ́n, po onú devodevo he yé ko wà jẹagọ sọn azán he ko wáyì lẹ mẹ.

Do ayi e go, whenuena yè zé enẹ lọ yì aga, núpọ́nnú dahodaho lẹ he tin to otò Kalifọnia tọn mẹ jẹ otò Mẹsiko tọn mẹ, yèdọ ehe yì aga hú otò Tuksọni tọn, podọ gbọn ofi lẹpo, yé dè Fọto lọ. Fọto lọ sọ jawu na mimọ. Podọ Nọvisunnu Flẹdi Sotimanu he tin to finẹ, yèdọ mẹhe sinai to finẹ po Nọvisunnu Gene Nọlmani po, po yẹn po tin to finẹ to whenuena yè zé enẹ lọ yì aga. Yé dè Fọto nẹ lọ, ṣigba yé ma mọdona núhe E yín gbọn alọ depope mẹ gba. To ojlẹ he wáyì de mẹ to madẹnmẹ, mẹdopodopo to didọmọ: “Pọ́n pẹvi de! Enẹ lọ di onú ehe, podọ awà Angẹli Etọn lẹ tọn he yé bọ̀ dai to finẹ lẹ.”

To azán dopo de ji, yẹn lẹ́ hlan adusilọ ṣie mẹ bo to pinpọ́n, bo mọ Jesu Klisti to finẹ to pipé mẹ dilé dawe he yè nọ ylọ Hofmannu dè apajlẹ Etọn dó. É nọte to finẹ po odà wéwé de po to ota Etọn to finẹ, bo to pinpọ́n hlan aigba ji, bo sọ to didohia dọ Ewọ lọ wẹ Aṣẹpipa he yì aga lọ. Olọn lẹ degbè Etọn, Biblu sọ degbè Etọn ga, mọwẹ Owẹn lọ Lọsu degbè Etọn dó ga. Yé omẹ pó dọhó dopolọ. Aṣẹpipa he yì aga lọ po odà wéwé po to ota Etọn; mì na mọ hlan otán yũ Etọn to oglọ́ Etọn. Podọ susu mìtọn ko mọ fọto lọ. Mí tindo e to godo finẹ. Mì lẹ́ fọto lọ hlan apá dopo to adusilọ mẹ, bo pọ́n hlan ẹn. É tin to finẹ to gbèsisọ mẹ kẹdẹdilé e te, eyín yè ko dè fọto Etọn. Podọ yé to pinpọ́n hlan Ẹn sọn awà he ma sọgbè de mẹ. Enẹwutu, mì dóna pọ́n hlan Ẹn sọn awà he sọgbè de mẹ. Podọ Oklunọ Jiwheyẹwhe kẹdẹ wẹ sọgan do awà he sọgbè lọ hia. Enẹwutu, mì lẹ́ Ẹ hlan adusilọ mẹ bo pọ́n Ẹn hlan. Podọ É tin to finẹ to gbèsisọ mẹ kẹdẹdilé yè dè fọto Etọn to aga finẹ dó.

Tintan he yẹn mọ Ẹn, Ota Etọn taidi ... Hofmannu. Yẹn ma ko mọ enẹ pọ́n gbèdé. Podọ to osẹ̀gbè to sinsẹ̀nhọ̀ Billy tọn mẹ to owhè he wáyì lẹ mẹ, yẹn sọ mọ ẹn. Sọn whenẹnu fọto nẹlẹ tin to ohọ̀ ṣie mẹ.

Podọ Jiwheyẹwhe he yẹn mọ to ofi to aslọ mẹ to aga, to númimọ he mẹ, podọ to whenẹnu yẹn tin taidi ovi pẹvi de to gbonu fie azọ́nwhé he tin te, mọwẹ É taidi. Podọ to ofi to Olọn lẹ mẹ, owhè gbànnukun-atọ̀n godo wẹ yè degbè etọn, dọ enẹ wẹ nugbo lọ. Mọwẹ É taidi; e ma yín núpaṣa de kavi linlẹn gbẹtọ de tọn gba.

Kẹdẹdi to Vatikan, yé tindo apajlẹ didè Klisti tọn to aga finẹ, po otán wéwé lẹ po, po ogbì lẹ po to aláka Etọn lẹ go, he tindo tedidi alọkikẹ odá hunkọ tọn, ehe lilẹ́do onù Etọn dolé, bọ yè sọ ylọ enẹ dọ Klisti lọ.

Enẹ lọ hẹn mi flin núdètọ Glẹki tọn de, he yẹn mọ to agùn Katoliki tọn de mẹ, bo to núhe Adam po Evi po taidi dohia; yé taidi gbékanlin lẹ kavi onú devo lẹ. Enẹ lọ wẹ linlẹn agbasalannọ lẹ sọgan dọn sọn onú gbigbọnọ lẹ mẹ. Yẹn lẹn dọ sunnu whànpẹnọ taidi Adam hunkọ tọn de ma ko sọawúhia to aigba ji gbèdé gba, podọ yọnnu he yọnwhànpẹ bo sọ sọgbè to ninọ̀mẹ lẹpo mẹ wẹ Evi.

Whenuena linlẹn agbasalan tọn lẹ zé onú lẹpo dai to núpinpọ́n yéde titi tọn lẹ mẹ, whenẹnu wẹ Jiwheyẹwhe nọ do huhlọn Etọn hia to aigba ji, podọ gbọn Enẹ lọ dali É nọ hùn onú lẹ lọ dohia. Enẹ lọ wẹ núhe jọ to ojlẹ Ahabi tọn lẹ mẹ.

Dinvie, mí mọ dọ Elija lọ sọgan dọhó nẹ lọ, na wẹnzagùn lọ po Owẹn ojlẹ lọ mẹ tọn po, podọ Ohó lọ, dopolọ wẹ yé omẹ pó. Yèdọ yẹwhegán lọ po Ohó lọ po, po Owẹn lọ po; wẹnzagùn lọ po Owẹn lọ po, dopolọ wẹ yé. Enẹwutu wẹ Jesu dọ, dọmọ, “Eyín yẹn ma wàzọ́n he yè wlán dogbọn Ṣie tọn dali lẹ, whenẹnu mì yí Mi sè blo.” Mọwẹ. Dopo wẹ gbẹtọ de po owẹn etọn po.

To egbé, gbẹtọ lẹ ma nọ yí azọ́n he Jiwheyẹwhe to wiwà sè na yé ma kẹalọyí Owẹn Jiwheyẹwhe tọn wutu. Na yé ma yí Owẹn lọ sè wutu.

Ṣigba yé mẹhe ma yise to ojlẹ Jiwheyẹwhe tọn he mẹ mí tin te to egbé, Núdùdù he yè whlá wẹ onú helẹ yín hlan yé. Dinvie, mì lẹnpọ́n, na Jiwheyẹwhe whlá Ẹ sọmọ bọ eyín yé tlẹ pọ́n hlan Ẹn, yé ma sọgan mọ Ẹn hlan gba. Kẹdẹdilé Eliṣa yí nukunnumamọ do hò awhànpa Silianu lẹ tọn dó, mọdopolọ wẹ Jiwheyẹwhe vànukunna mayisenọ lẹ sọn Núdùdù nugbo ovi yisenọ lẹ tọn kọ̀n dó.

Sọlé yè ylọ Noe dọ, “alẹnọ” dó to whenuena é to ohún alki de whè, ṣogan nukun etọn lẹ yín hùnhùn do Ohó Jiwheyẹwhe tọn po pagbè lọ po go. Onú he yé ylọ dọ alẹ lọ, wẹ whlẹn Noe po whédo etọn po gán. Bé mì mọdona? Yèdọ onú dopolọ. Núhe gbẹtọ lẹ to vivlẹko lọ wẹ núhe mí to bibiọ to odẹ̀ mítọn mẹ. Podọ núhe gbẹtọ lẹ nọ ylọ dọ, “alẹ,” wẹ míwlẹ nọ ylọ dọ, “Onú Daho de!” Mọwẹ ga dọ, núhe aihọn nọ ylọ dọ, “onú daho,” wẹ Jiwheyẹwhe nọ ylọ dọ, “Núlulu!” Podọ núhe aihọn nọ ylọ dọ, “núlulu,” wẹ Jiwheyẹwhe nọ ylọ dọ, “Onú Daho!” Ehe lọ wẹ vogbingbọn he tin to Onú he sọgbè lọ po ehe jẹagọ lọ po ṣẹnṣẹn. Jesu Klisti dopolọ to osọ, egbé, mọwẹ podọ kakadoi.

Do ayi e go, é yì ofi whiwhlá etọn lọ mẹ gbọn titò Jiwheyẹwhe tọn dali, gbọn oylọ Jiwheyẹwhe tọn dali, podọ gbọn Ohó Jiwheyẹwhe tọn dali. Mọwẹ Elija biọ ofi whiwhlá etọn lọ mẹ dó gbọn núyọ́nẹn Jiwheyẹwhe tọn he yín titò Etọn dali, po oylọ he é tindo gbọn gbẹ̀zán etọn dali po, podọ kẹdẹdi Ohó lọ. Eyín mí ma biọ e mẹ domọ, bé nawẹ mí sọgan jẹ finẹ dó?

Mì sọ dayi e go dọ, jẹnukọnna bibẹ́nu akùdidó tọn, Elija yì biọ ofi whiwhlá he lọ mẹ na ogbẹ̀ etọn wutu. Ehe lọ wẹ pọ́ndego de dọ, whẹpo whẹdida nado wá aigba ji, Agùn lọ na ko yín yiylọ tọ́njẹgbonu dote, bọ Asivu lọ na ko sọ yín didètọ́n jẹgbonu dote, bo na to ote to aga whẹpo whẹdida nado wá aigba ji. Yèdọ Asivu lọ na to ote bo to Núdùdù Jiwheyẹwhe tọn dù, bo nasọ to ayajẹ to dona Jiwheyẹwhe tọn lẹ mẹ. Gbẹtọ lẹpo to linlẹn yetọn mẹ ko yọ́nẹn dọ, mí pannukọn ojlẹ owhẹdida tọn.

Mì pọ́n! Nọvisunnu Bankis, susu to mì sunnu he tin to ofi to whèja helẹ mẹ, tin to finẹ to osó nẹ lọ ji to afọnnu nẹ lọ.

Podọ yẹn sọ jlo nado dọhó do osó nẹ lọ ji to afọnnu Sẹ̀gbè he ja tọn, eyín Oklunọ jlo. Yẹn mọ núdohiamẹ daho de dogọ́, ehe yẹn ma sọgan nọ ma dọ to whèjai he. Bé mì mọdana? Podọ to whelẹponu, e gbẹ́sọ to nukọnyì do e ji, ode bọdo ode go. Bé mì mọdona? E ma sọgan dóalọte gbèdé, na LÉ WẸ OKLUNỌ DỌ wẹ.

Dopodopo mìtọn he tin to ofi, fọtọ́n donu fọtọ́n hunkọ ko sè to kasẹti lẹ ji dọ, yẹn dọ “LÉ WẸ OKLUNỌ DỌ, mọwẹ e na yín.” Yèdọ hójlawéma po núsẹ́dó tẹnmẹ lẹ po ko sọ dọ, mọwẹ e yín. Gbẹtọ lẹ ma mọdona núhe e yín, ṣigba yé mọ ẹn poun wẹ. Yé ma mọdona núhe e yín ṣigba yé mọ ẹn, yèdọ Ohó nugbo he yè hẹn ṣẹ̀ lọ.

Do ayi e go, mí nọte to finẹ to otọ̀ lọ tó, to azán nẹ gbè whenuena Angẹli Oklunọ tọn lọ jẹte wá odò, to owhè gbànnukun-atọ̀n he wáyì lẹ mẹ kavi to owhè fọtọ́n-fẹ̀nẹ-kantọ̀n e lán atọ̀ntọ (1933) mẹ, É jẹte wá odò bo ko sọ dọhó núhe É ko wà lẹ tọn. To kọlilẹ́ Etọn whenu, gbẹtọ susu he tin to finẹ to otọ̀ lọ tó lẹ dọ, dọmọ: “Etẹwẹ enẹ lẹ yín, Billy?”

Yẹn sọ dọmọ, “Enẹ lọ ma yín na yẹn tọn wutu gba; adavo na mìwlẹ wutu. Na yẹn yise; ṣigba mìwlẹ mayise gba.” Whenẹnu wẹ yẹn bẹ́ zọnlin ṣie bo dèdo.

Whenẹnu wẹ mẹplọ́ntọ de dọ hlan mi, dọmọ: “Bé hiẹ to didọ hlan mi dọ, hiẹ mẹhe ma yì wéhọ̀mẹ húgan ohọ̀ atọ́n mẹ, na dá gbọn aihọn lẹpo mẹ bo hodẹ̀na tòhódọtọ lẹ po mẹgbógbó lẹ po, po ahọlu lẹ po, podọ núhe pò lẹpo po? Podọ ojé, wọnji sọn Enẹ lọ go!”

Do ayi e go, yẹn ma sọgan wọnji sọn E go gba, na Enẹ lọ yín kinkàn do ayiha ṣie mẹ. Dinvie, to owhè gbànnukun-atọ̀n he wáyì lẹ mẹ, núhe É dọ lẹpo ko sọawúhia kẹdẹdilé É dọ dó. Ewọ wẹ Jiwheyẹwhe he ma nọ gbọvọ gbèdé. É nọ hẹn Ohó Etọn go to whelẹponu. Enẹwutu, mì yín mayisenọ gbèdé hlan Ohó Etọn blo!

Do ayi e go, e biọ e mẹ gbọn titò Jiwheyẹwhe tọn he yín núyọ́nẹn Etọn dali, gbọn oylọ Jiwheyẹwhe tọn po Ohó Etọn tọn po dali, bo sọ biọ e mẹ jẹnukọnna asiko akùdidó tọn lọ.

Dinvie, mí yọ́nẹn dọ whẹdida ko to sisẹ̀pọ.

Whenuena mí nọte to osó lọ ji to azán nẹ gbè, yèdọ Nọvisunnu Bankis Wudu he tin to ofi po yẹn po, zinzọnlin hẹ́ osó lọ ji. E sọgan yín dọ, yẹn nasọ vọ́ ẹ dọ hlan mì dogọ́, nado hẹn yise mìtọn lódo to ohùkàn odẹ̀ tọn he na sọawúhia to ṣẹ́ju ao kavi fọtọ̀n mẹ. Whenẹnu yẹn dè afọ jẹnukọnna Nọvisunnu Bankis. To ojlẹ nẹ mẹ, yẹn lẹn dọ é jo Nọviyọnnu Lubi do to whenuena é to awutujẹ. É sọ jẹgodona mi, yẹn dayi nukunmẹ etọn go dọ, é di vệ. Yẹn sọ pọ́n hlan godo, bo lẹn dọ, e sinyẹnawuna ẹn nado hẹ́ osó lọ ji, whenẹnu wẹ yẹn to yìyì dẹdẹ. To zùngbo lẹ ṣẹnṣẹn, to osó lẹ ji aga domọ, to ofi he Angẹli Oklunọ tọn lẹ sọawúhia te. Mí sọ yì nukọn to aliho lọ ji, fie yé sọawúhia te to osùn pẹde he wáyì jẹnukọnna enẹ lọ mẹ.

Whenuena yẹn hẹ́ osó lọ ji, Gbigbọ Jiwheyẹwhe tọn dọhó hlan mi. Podọ whenuena yẹn lẹ́ bo pọ́n hlan osó lọ ji aga, É dọ hlan mi, dọmọ, “Yí osé nẹ, bo dọ hlan ẹn, dọ, ‘Lé WẸ OKLUNỌ DỌ, to ojlẹ pẹvi de mẹ dinvie, hiẹ na mọ Gigo Jiwheyẹwhe tọn.’”

Yẹn sọ yí osé lọ, bo dọmọ, “Nọvisunnu Bankis, yẹn ma mọdona núhe wutu,” bo dlán osé lọ hlan aga, bọ yẹn sọ, dọmọ: “LÉ WẸ OKLUNỌ DỌ, hiẹ na mọ Gigo Jiwheyéwhe tọn.”

Ewọ sọ dọmọ, “Dogbọn Luby tọn dali wẹ?”

Yẹn sọ gblọn dọmọ, “Lala, yẹn ma lẹn dọ enẹ lọ tindo núde nado wà po hiẹ Bankis kavi Luby, kavi mẹdepope to mì omẹ awelẹ mẹ gba. Podọ yẹn lẹn poun dọ, Enẹ wẹ LÉ WẸ OKLUNỌ DỌ, dọ, núde to na jọ.”

To afọnnu awetọ, whenuena mí tin to ote finẹ, susu to yé sunnu nẹlẹ mẹ, yẹn ma mọdona sọha yetọn he tin to aisinsin to ofi dinvie gba. Mí omẹ wiawe kavi wiẹnẹ, kavi fọtọ̀n mítọn hunkọ tin to finẹ. To ajiji, devizọ́nwàtọ de zinzọnlin wá dẽ, bo dọmọ, “Nọvisunnu Branham, oyín ṣie wẹ lé po lé.” É sọ dọ hlan mi dọmọ, “Yẹn yín dopo to mẹhe nọ gọ́alọna devizọ́n towe to otò Kalifọlnia tọn mẹ.”

Yẹn sọ gblọn dọmọ, “Hòmẹ ṣie hùn nado pé we, Duglas Mak-Họjis.” Ewọ sọ dọhó dopolọ ga. Mí sọ ná alọ mídelẹ.

É sọ domọ, “Dinvie, yẹn jlo nado kànhó de biọ we.” Dọmọ, mẹhe yè nọ ylọ dọ Lọy Lobẹsin yín mẹhunnukun de to ofi; Nọvisunnu Wudu po Tẹly po, po Billy po, podọ Nọvisunnu Mak-Anally po, podọ yẹn ma yọ́n yé mẹhe ṣite to finẹ lẹ gba. Podọ é sọ dọmọ, “Yẹn jlo nado kànhó de biọ we.” Ewọ sọ dọmọ, “Bé Oklunọ ko do númimọ lọ hia we taidi ehe?”

Yẹn sọ dọmọ, “Mọwẹ nọvisunnu, ṣigba yẹn jẹgbonuwá ofi sọn E mẹ nado yí gbọjẹ.”

Yẹn pọ́n hlan dolé, yẹn sọ mọ dọtẹ kiklo de he to pinpọ́n hlan ẹn, bo dọmọ, “Yẹwhenọ Mak-Họjis, nukun he to dùdù we nẹ, na hẹn nukun towe gblé to madẹnmẹ. Na owhè awe he wáyì lẹ mẹ wẹ yẹn ko to azọ́n wà na we, ṣigba dinvie, yẹn ma sọ sọgan wà núde na we dogbọn enẹ lọ tọn dali gba.”

Yẹn sọ lẹ́ pannukọn ẹn, bo dọmọ: “Núhe wutu hiẹ do kàn enẹ biọ mi, wẹ yín dọ, dọtẹ towe dọ hlan we to azán nẹ gbè dọ, ‘Nukun to dùdù we.’” Podọ to ogàn widopo afọnnu tọn mẹ, ewọ sọ ṣinyọn mẹpọ́nnú. Yẹn sọ domọ, “E ma yín owhè wutu hiẹ do ṣinyọn mẹpọ́nnú gba, adavo na nukun towe tọn wutu. Na é ko dọ hlan we dọ, ‘nukun towe na và wutu.’”

Dawe Mak-Họjis lọ sọ ṣẹ̀ avivi bo dọ, “Mọwẹ.”

Do ayi e go, yẹn sọ lẹ́ nado to zọnlinzin po fẹli de po to alọ ṣie mẹ. (Yẹn sọ pọ́n hlan ẹn bo mọ ẹn to ote finẹ bo to pinpọ́n mi, nukun etọn awelẹ sọ hùn hézéhézé.) Yẹn sọ dọmọ, “Ṣigba LÉ WẸ OKLUNỌ DỌ, nukun towe ma na và ba.” Yẹn tin to wẹnyangbenu po é po to osã he wáyì lẹ mẹ, é sọgan mọnú húgan mi, podọ húgan mẹdepope to omẹ susu lẹ mẹ.

Yẹn sọ mọ yọnnu mẹho de he to awu etọn dọn hlan odò gbọn awà yẹli etọn tọn de dali. Nawe lọ sọ dọmọ, “Ovisunnu ṣie, eyín hiẹ mọ Nọvisunnu Branham, dọ hlan ẹn dọ, é ni hodẹ̀ na afọ ṣie lẹ.” Whenẹnu wẹ yẹn pọ́n hlan odò bo mọ núde taidi dọ, nútitẹ pẹvi delẹ lẹ́do afọ etọn pé.

Whenẹnu wẹ yẹn sọ dọmọ, “Nawe owhànọ de wẹ onọ towe. ‘Ovisunnu ṣie,’ a mọdona? É ko dọ hlan we whẹpo hiẹ do yì sọn finẹ, dọ, eyín hiẹ mọ mi, hiẹ ni dọ hlan mi dọ, yẹn ni hodẹ̀ na afọ etọn lẹ. Na nútitẹ pẹvi delẹ tin lẹ́do afọ etọn pé wutu.” Do ayi e go, agbọpe ovisunnu lọ.

Ewọ sọ dọmọ, “Nugbo wẹ.”

Yẹn sọ dọmọ, “Dọ hlan ẹn dọ, é ni ma dibú blo. Na azọ̀n etọn na gbọ̀.”

Podọ yẹn sọ ṣẹ̀ zọnlinzin pé. Whenẹnu wẹ yẹn sè Ogbè Jiwheyẹwhe tọn to didọmọ, “Yawu tọ́nsọn aliho lọ ji.”

Lọy Lobẹsin nọte to finẹ, bo yọ́nẹn dọ awhàngán hóhó de wẹ ewọ, yẹn sọ zé alọ ṣie do abọ́ etọn ji, bo dọmọ, “Nọvisunnu Lọy, whlá dewe plaun kẹdẹdilé hiẹ sọgan wà dó!”

Ewọ sọ dọmọ, “Etẹwẹ jọ?”

Yẹn gblọn bo dọmọ, “Tọ́nsọn aliho lọ ji, bo whlá dewe!”

Do ayi e go, yẹn sọ ṣẹ̀ zọnlinzin pé bo zé fẹli ṣie dai, bo sọ lẹ́do, podọ yẹn sọ hùn gbakun ṣie. Whenẹnu wẹ Gigo Jiwheyẹwhe tọn sọawúhia finẹ gbọn jẹhọn sinsinyẹn de dali to osó lọ ji, bo to apáde osó lẹ tọn gbà, jẹhọn lọ sọ to onú lẹ fúfú bo sọ whàn aigba, bo to nukàn lẹ họ́liai; e sọ yì aga hú awàgba atọ̀n kavi ẹnẹ, kavi atọ́n hunkọ na ota ṣie. Ninọ̀mẹ etọn sọ tin di jẹhọn ahizinọ de; e sọ fúfú onú lẹ whladopo dogọ́. Mọwẹ e sọ sọawúhia dó whlãtọ̀n.

Enẹwutu, whenuena E yì whlãtọ̀ntọ, Nọvisunnu Bankis sọ wá dẽ, bo dọmọ, “Bé enẹ lọ tọn dọ wẹ hiẹ te?”

Yẹn sọ dọmọ, “Mọwẹ.”

É sọ dọmọ, “Etẹwẹ enẹ yín?”

Yẹn sọ gblọn bo dọmọ, “Jiwheyẹwhe sọawúhia to jẹhọn sinsinyẹn helẹ mẹ.” Podọ yẹn ma sọ mọdona eyín É jlo dọ yẹn ni dọ hlan gbẹtọ lẹ kavi lala.

120. Whenẹnu wẹ yẹn yì nukọn bo hodẹ̀ vude. Whenẹnu wẹ É dọ hlan mi dọ, yẹn sọgan dọ hlan gbẹtọ lẹ, dọ, “Owhẹdida de wẹ ja Whèyihọ̀ dali.” Do ayi e go, mì pọ̀n hlan Whèyihọ̀ dali to egbé! Mì sọ do ayi núhe jọ to gànyiho ẹnẹ helẹ tọn mẹ godo ga: yèdọ vivàsudo otò Alaska tọn tọn. Podọ dinvie, onú lẹpo to odò yì. Na mí to whẹdida mẹ biọ. Mọwẹ yè sọ dè lẹblanu sẹ̀ dó.

Opẹ hlan Jiwheyẹwhe, dọ mí tindo Nùdùdù whiwhla, he yín Nùdùdù gbigbọ mẹ tọn, dọ mí tin to ogbẹ̀ to dagbewà po lẹblanu núdohiamẹ Jesu Klisti tọn lẹpo po mẹ, to asiko azán godo tọn helẹ tọn mẹ, Mẹhe to Ede hẹn ṣẹ̀ to gblagbla omẹ Etọn lẹ tọn. Niṣẹ! Na mọwẹ yé biọ e mẹ dó. Elija biọ e mẹ jẹnukọnna akùdidó lọ. Mì dopẹna Jiwheyẹwhe dọ mí ko biọ e mẹ whẹpo whẹdida nido sọawúhia. Ojlẹ tintọ́n  jẹgbonu po gigọ̀ biọ e mẹ tọn po wẹ dinvie, yèdọ nado tọ́njẹgbonu sọn agùn pipli nẹlẹ mẹ bo biọ Klisti mẹ, podọ ehe wẹ ojlẹ tintọ́n jẹgbonu po gigọ̀ biọ e mẹ  po tọn na yisenọ nugbo lẹpo.

Whenuena yè ylọ ẹ, é sọ nọte to finẹ. Do ayi e go, é ma sọ tọ́nsọn otọ̀pẹṣẹ lọ kọ̀n kaka Jiwheyẹwhe do ylọ ẹ.

Podọ to vivọnu akùdidó lọ tọn, É ylọ ẹ nado jẹgbonuwá sọn finẹ, jẹ owhé nawe asúṣiọsi de tọn gbè. Bo do ayi e go dọ, é dawhá ylọ asúṣiọsi he. Podọ asúṣiọsi he lọ matindo núwàdopọ́ ede titi tọn po mayisenọ lẹ po gba; enẹwutu wẹ é ma do yí ohia kanlin lọ tọn to whenu akùdidó lọ tọn mẹ gba. Enẹwutu, É ylọ Elija nado pékọna asúṣiọsi he lọ. Ṣigba é tindo linfín pẹvi de, he yín núpẹvi he pò to alọ etọn mẹ. Podọ Elija sọ dọmọ, “Ṣigba bo ná mi sọn finẹtọn mẹ aklahihi de whẹ. Na LÉ WẸ OKLUNỌ DỌ, odla linfín tọn lọ ma to na jẹvọ́, kaka jẹ azán lọ gbè he Oklunọ Jiwheyẹwhe do jikun hlan aigba lọ ji.” Enẹwutu, mì nọ zé Jiwheyẹwhe po Ohó Etọn po do nukọn!

Do ayi e go, núdùdù tin to odla lọ mẹ. Whedepopenu he é yì nado yí núdùdù, núdùdù tin to odla lọ mẹ.  Mọwẹ amì sọ tin to aboun lọ mẹ dó to whedepopenu he é dó hudo amì lọ tọn. Etẹwutu? Na núdùdù lọ nọte na Klisti to núdùdù-niná mẹ. Linkún lẹ lọ dóna tin to gbèsisọ mẹ whẹpo yè nido lì dopodopo yetọn. Linkún núdùdù he lọ tọn dóna yín dopolọ, nado dohia dọ dopolọ wẹ to osọ, egbé, mọwẹ kakadoi. Enẹ wẹ Ohó he yín Akla Ogbẹ̀nọ he jẹgodona owẹn lọ nado hẹn Ohó lọ ṣẹ̀.

Họntọn lẹ emi, mọwẹ e te to egbé. Mọdopolọ wẹ e te to egbé ga, dọ, Akla Ogbẹ̀nọ he ovi lẹ to dùdù wẹ hodo Owẹn Jiwheyẹwhe tọn lọ, nado pékọna yé to asiko akùdidó tọn mẹ. Dinvie, bé etẹwẹ e na yín eyín É sọawúhia to ṣẹnṣẹn mítọn mẹ to egbé? É na wà kẹdẹdilé É ko wà dó wáyì to whenuena É sọawúhia to agbasalan mẹ to aigba ji. Kẹdẹdilé Asivu lọ yín apáde Asisúnọ lọ tọn dó, mọdopolọ wẹ Agùn yín hlan Klisti ga. Na “Azọ́n he Yẹn wà wẹ mì na wà ga.” Podọ Ohó lọ wẹ ko sọ wà azọ́n lẹ lọ. Enẹwutu, É dọ hlan mí dọ, núhe É wà wẹ mí na wà ga.

Mí sọ do ayi e go to ofi dọ, eyín Ohó lọ wá mí de bo sọ nọnọ̀ mí mẹ, kẹdẹdilé É wà hlan Elija dó to azán nẹ gbè, onú dopolọ he É ko wà lọ wẹ É na wà, bo nasọ dọhó do Onú whiwhla Jiwheyẹwhe tọn he yè whlá do aihọn lọ ji tọn ga. Podọ whladopo dogọ́, É hẹn Owẹn lọ po wẹnzagùn lọ po yín dopo. Dinvie, yè ko wléawu Núdùdù Gbigbọnọ lọ tọn dai, E ko sọ tin to osã sisọ mẹ. Podọ dopodopo mìtọn lẹ sọgan tindo Núdùdù he lọ, eyín mì dojlo Etọn, podọ eyín mì tin to gbèsisọ mẹ nado klán mìde sọn mayisenọ ojlẹ he mẹ tọn lẹ go, eyín mì wléawu nado biọ Klisti mẹ, podọ nado biọ Pagbè Etọn mẹ.

Enẹwutu, mì flin pagbè Etọn he tin to Owé MALAKI 4 tọn mẹ, po Owé LUKU 17:30 tọn po, po Owé JOHANU 14:12 tọn po mẹ, podọ lé susu Owéfọ lẹ tọn to didọ dó, to Owé JOẸLI 2:28 tọn mẹ, po núhe Ewọ na wà lẹpo po to azán godo tọn helẹ mẹ. Podọ lé yẹwhegán lọ dọ dó, dọ, Hinhọ́n de na tin to ojlẹ godo tọn lẹ mẹ, lé E na wàzọ́n dó, podọ núhe E na wà, na Owé Wiwé lẹpo to alọdlẹndo azán godo tọn helẹ lọ. Podọ enẹ wẹ Klisti lọ! Dinvie, eyín hiẹ sọgan whlá dewe do Ewọ mẹ, yèdọ do ofi Whiwhlá nẹ lọ mẹ, fie hiẹ sọgan dù bo sọ mọ dagbe podọ lẹblanu Jiwheyẹwhe tọn yí te. Podọ eyín mì to azọ̀njẹ, azọ̀nhẹngbọ tin to finẹ.

Mì flin Elija dọ, whenuena é dù núdùdù-niná nẹ lọ vọ́, Klisti wẹ Mẹhe é yí do pékọna whédo asúṣiọsi lọ tọn. Do ayi e go dọ, to godo mẹ, whenuena é ylọ miyọn jẹte sọn olọn, po núhe pò lẹpo po, mọwẹ é sọ dohia dọ Jiwheyẹwhe wẹ ko do é hlan dó; enẹ lọ wẹ Gbigbọ yẹwhegán tọn.

Do ayi e go, to zùngbo mẹ, whenuena é to amlọndọ to atin glọ́, Angẹli de sọawúhia po núdùdù mọtọnhunkọ dopolọ po, bo dà akla delẹ bo yí do pékọna ẹn. To ojlẹ pẹde godo, É sọ hẹn ẹn damlọn devo, bo fọ́n ẹn, po akla delẹ po to finẹ. Podọ huhlọn he akla helẹ to niná ẹn, hẹn ẹn nado zinzọnlin họ̀ azán kande. Gigo hlan Jiwheyẹwhe! Na Ewọ wẹ dopolọ to osọ, egbé, mọwẹ podọ kakadoi. Nawẹ mí yinwanna Ẹn sọ, yèdọ Núdùdù Gbigbnọ lọ to osã Etọn mẹ!

Enẹwutu, “E ma jẹ yè ni zé akla yọpọvu lẹ tọn hlan avùn lẹ gba.” Bé Jesu ma dọ ohó dopolọ hlan nawe Silofenisiannu lọ? Na yè do É hlan Omẹ Etọn titi lẹ de. Nugbo. Ṣigba Omẹ Etọn titi lẹ de wẹ É wá... Na É ma yì Kosi lẹ de gba.

Podọ dinvie to egbé, É wá Kosi lẹ de to ojlẹ yetọn mẹ.

Mì nọ dọmọ, “Etẹwutu wẹ Owẹn lọ ma do yì jẹ otẹn dahodaho helẹ mẹ, jẹ vọfọ́n dahodaho helẹ mẹ, nado dọ to ṣẹnṣẹn agùn titònọ lẹ tọn?”

Na Núdùdù lọ ma yín yetọn wutu wẹ gba. E ma yín Núdùdù he yè ylọ dọ agùn tọn gba. Ṣigba Núdùdù Asivu lọ tọn wẹ. Núdùdù Gbigbọnọ lọ to osã Etọn mẹ. Na E na hẹn hòmẹ wlé wá na yé. Na E yín huhlọnnọ húgan yé wutu. Bé mì mọdona? Mì ma sọgan yí hlan yé gba. Ṣigba hlan ovi lẹ, Akla wẹ, Ogbẹ̀ wẹ, podọ Jesu Klisti dopolọ to osọ, egbé, mọwẹ podọ kakadoi.

Ojlẹ na yì do mí eyín mí ma biọ ohùkàn odẹ̀ tọn mẹ dinvie, enẹwutu, mì gbọ mí ni do ota mítọn lẹ do odò na ojlẹ vude.

Mẹvivẹ Jiwheyẹwhe È, Núdùdù to osã sisọ mẹ, yèdọ Núdùdù Gbigbọnọ lọ. Enẹ lọ wẹ núhe aihọn ma mọdona gba. Kẹdẹdilé mí sè Oklunọ mítọn dọhó dó to ozán nẹ mẹ, kavi to Samalia to azán nẹ ji, yèdọ otẹn dopolọ he mẹ Elija zinzọnlin wá bo dọmọ, “Ahún ma na tin adavo kẹdẹdi ohó ṣie.” Finẹ lọ wẹ Jesu sọawúhia te bọ núplọ́ntọ Etọn lẹ dọ hlan Ẹn.                                                         Dọmọ, “Mẹplọ́ntọ, etẹwutu wẹ Hiẹ ma dùnú?”

Ewọ sọ dọmọ, “Yẹn tindo Núdùdù he mì ma yọ́nẹn.”

Nugbo, Oklunọ È, Núdùdù Etọn wẹ nado wà ojlo Jiwheyẹwhe tọn, nado mọ awúsọhiamẹ azọ́n Jiwheyẹwhe tọn tọn to ojlẹ Etọn mẹ. É tin to finẹ nado mọ dọ, e ko yín wiwà. Enẹwutu, É do dọmọ, “Yẹn ma sọgan wà núde dẽdenu adavo núhe Otọ́ dohia mi. Na núhe Otọ́ dohia mi wẹ Yẹn nọ wà.”

Podọ mọwẹ e te to egbé Otọ́. Agùn lọ, Yisenọ nugbo lọ, he yín Agbasa yisenọ lẹ tọn, wẹ tindo jlọjẹ nado dù Núdùdù lọ, yèdọ Núdùdù Gbigbọnọ lọ, ehe mẹgbógbó lẹ ma mọdona núdepope dogbọn Etọn dali gba. Aihọn ma mọdona núdepope dogbọn Núdùdù he lọ tọn dali gba Otọ́. Ṣigba Agùn Towe, omẹ Towe lẹ, yèdọ Asivu Ovisunnu Towe tọn yinwanna Ẹn.

Mí tindo jlọjẹ nado hẹnazọ̀ngbọna agbasa mítọn lẹ to whenuena dọtẹ lẹ ma sọgan wà núde. Podọ mí tindo jlọjẹ hlan ehe. Na eyín dopo to Núdùdù Jiwheyẹwhe tọn lẹ mẹ, ehe É ná hlan Agùn Etọn, ehe É dopagbè Etọn hlan azán godo tọn mẹ hlan ovi Etọn yisenọ lẹ. Podọ, Otọ́ È, gọ́alọna mí na mí nido yín ovi yisenọ lẹ, na onú lẹpo bọawuna yisenọ lẹ. Basi na mí, Mẹvivẹ Jiwheyẹwhe È. Oyín Jesu tọn mẹ wẹ mí biọ ehelẹ pó te. Niṣẹ.

Yẹn flin dọ, Billy dọ hlan mi dọ yé má odẹ̀ wéma delẹ. Yẹn na jlo dọ mẹde ni dọ wékun he yè wlán do odẹ̀ wéma lọ mẹ hlan mi. [Mẹde dọ wékun, “C”–Ed.] Wékun “C”, e yọ́n, mì gbọ mí ni yí wékun “C” lọ jẹnukọn, na mí nido ṣẹ̀ do ohùkàn mítọn ji. Mì mọdona dinvie, na mí nido dóalọtena odẹ̀ winwlán he tin to wékun “C” lọ mẹ. Dinvie, yẹn na tẹnpọ́n dolé. Yẹn ma mọdona eyín mí sọgan pé e go nabo basi i kavi lala. Kavi mí sọgan basi odẹ̀yiylọ de; ṣigba mì nọ̀ aisinsin mọ. Na enẹ lọ ma dọhó de na mi gba. Eyín mì na jlo nado wá agbà lọ kọ̀n, kavi sọgan ylọ odẹ̀, awelẹ ma yín núdepope gba. Podọ Gbigbọ Wiwé kẹdẹ go wẹ yẹn dotudo. Yẹn dotudo É go na É nido plán Ohó he yẹn ko dọ lọ.

Nọvisunnu Jọji Laiti, yẹn yí I sè. Do ayi e go, whenuena yẹn tin to jọunja mẹ, yẹn nọ yì owhé towe gbè to owhè he wáyì lẹ mẹ, to finẹ, yẹn nọ sè finfan ohẹ̀ nẹ tọn to atin lọ ji. Yẹn sọ yí Owẹn dopolọ sè. Mọwẹ yẹn sọ yise dó dọ, Owẹn dopolọ wẹ.

Mọwẹ, na yẹn mọ dọ yé to tẹnmẹ din to ofi na ohùkàn odẹ̀ tọn de. Enẹwutu, mẹhe tindo odẹ̀ wéma wékun “C” tọn lẹ whẹ́whẹ́ ni wá nukọn fi, hinhẹn sọn omẹ tintan, awetọ, atọ̀ntọ, ẹnẹtọ, podọ atọ́ntọ ji. Eyín mì ma sọgan fọ́nṣite, mì bo zé alọ mìtọn lẹ daga, whenẹnu omẹ devo lẹ na plán mì wá agbà nukọn. [Omẹ de sọ dọhó hlan Nọvisunnu Branham–Ed.] Etẹwẹ enẹ lọ yín? Nugbo wẹ. Dinvie, odẹ̀ wéma “C” hinhẹn sọn omẹ tintan, awetọ, atọ̀ntọ, ẹnẹtọ, podọ atọ́ntọ ji. Mì do ayi e go, mì mẹhe matindo odẹ̀ wéma lẹ...

Dinvie, yẹn matindo hùkàn odẹ̀ tọn he to asiko he wáyì lẹ mẹ gba. Mẹnu lẹ wẹ flin azọ́n ṣie to whenuena mí gbá Sinsẹ̀nhọ̀ he? Ehe yín dọ, “Wàzọ́n wẹndagbejlatọ tọn.” É ma dọ yẹn yín wẹndagbejlatọ de gba. Ṣigba é dọmọ, “Wàzọ́n wẹndagbejlatọ tọn,” pọ́n, ojlẹ lọ ja whenuena onú nẹ lọ na yín didiọ dó.” Yèdọ ojlẹ lọ ja dinvie. Mọwẹ.

Enẹwutu, hiẹ ma sọgan ṣaka devizọ́n vòvo awe kavi atọ̀n dopọ́, yèdọ mẹplọ́ntọ po wẹndagbejlatọ po dopọ́ to ojlẹ dopolọ mẹ gba. Na hiẹ ma sọgan to yẹwhegán yín bo sọ to mẹplọ́ntọ yín to asiko dopolọ mẹ gba, mì mọdona, na azọ́n vòvo po devizọ́n vòvo po wẹ mì tindo.

Ṣigba Oklunọ ná mi núhe yẹn sọgan wà to Owẹn ṣie mẹ. Ṣogan É dọ hlan mi dọ, “Wàzọ́n wẹndagbejlatọ tọn, do devizọ́nwiwà towe hia to gigọ́ mẹ, na ojlẹ lọ ja whenuena gbẹtọ lẹ ma na tùntóai hlan Oplọ́n he pégan.” Eyín enẹ lọ ma ṣẹ̀ to dinvie, agùn titònọ lẹpo na gbẹ́ mi dai. Yé ma to na doakọ́nna Oplọ́n he pégan gba. “Ṣigba to wantúntún yetọn titi mẹ, yé he tlitó, yé na bẹ́ mẹplọ́ntọ pli na yéde; yé na lẹ́ otó yetọn sọn nugbo mẹ. Podọ Janne po Jambele po diọnukunsọ Mọse, na onulu yetọn na sọawúhia.” Bé mì mọdona? Mọwẹ, yèdọ núhe yé ma yín!

Podọ Jiwheyẹwhe he tin to Olọn mẹ yọ́nẹn dọ, yè zé enẹ lọ do osé lọ mẹ to lọnglọ́nẹn Sinṣẹ̀nhọ̀ lọ tọn mẹ, sọn owhè fọtọ́n-fẹ̀nẹ-kantọ̀n e lán wiatọ̀ntọ (1933) mẹ, ehe yè wlán do apáwhé Biblu tọn mẹ, tin to aimimlọn finẹ. Mì pọ́n lé yè basi i dó. Podọ mì do ayi núhe ja jijọ gbè go. Núhe yè ma yín, mọwẹ. Enẹwutu, “Mì jo yé do, na onulu yetọn na sọawúhia kẹdẹdilé ninọ̀mẹ Jambele po Janne po tọn te.” Ojlẹ nẹ lọ mẹ wẹ mí tin te dinvie.

Yẹn mọ agùn lọ to whenuena mí to osé lọnglọ́nẹn tọn lọ dóai, bọ gbẹtọ lẹ tin to vẹsẹnù lẹ̀do pé, bo sọ nọte to adowà Sinsẹ̀nhọ̀ lọ tọn lẹ dali. Finẹ wẹ mí tin te. Podọ yé sọ dọ, whenuena e hẹjiyì, gbẹtọ otò daho he lọ tọn lẹ, dọmọ, “To gblagbla osùn ṣidopo tọn mẹ...” Po míwlẹ po, mí basi dọla dopo po sẹnti (cents) ṣinatọ̀n po na didó Gohọ̀ lọ tọn, podọ gbẹtọ susu aligbóji tọn lẹ wà mọ bo sọ mágbè dọ finọ̀tẹn yetọn wẹ e na yín. Ṣigba e sọ yín lẹngbọpa hlan Lẹngbọvu Jiwheyẹwhe tọn lẹ.

Dinvie, mí tindo odẹ̀ wéma tintan, awetọ, atọ̀ntọ, ẹnẹtọ, atọ́ntọ, ṣidopotọ, ṣinawetọ, ṣinatọ̀ntọ, ṣinẹnẹtọ, podọ aotọ. Odẹ̀ wéma wékun “C” tọn, ṣidopotọ, ṣinawetọ, ṣinatọ̀ntọ, ṣinẹnẹtọ, podọ aotọ. Mọwẹ.

Dinvie, “Yẹn Oklunọ lọ ko do e, mọ Yẹn nasọ to osìnhú i okle po ozán po, na mẹde nikã wá bo dọn yé sún sọn alọ Ṣie mẹ.” Mẹṣako tẹwẹ ehe! Na agùn titònọ gbẹ́pipli de matin nado sọgbè hẹ Ẹ gba. Mọ agùn depope ma yínwanna Ẹn to otò he mẹ gba. Podọ ga, agùn Pẹntikọsti tọn de matin to otò he mẹ, he tindo núde nado pékọna Ẹn gba. Yèdọ omẹ lẹpo sọ jẹagọdo baptẹm osìn mẹ tọn, po núhe pò lẹ po ga. Hẹnnumẹ ṣie lẹ, po otọ́ ṣie lọsu po gbẹ́ mi dai na owẹn lọ tọn wutu, yen sọ yí avọ̀ ṣie do apò de mẹ bo tọ́njẹgbonuyì sọn finẹ biọ otò Niwu Albani tọn mẹ.

Ṣigba gbọn awufiẹsa ṣie lẹ po tuklajijẹ lẹpo mẹ,

Kiklo wẹ ojọmiọn Towe;

Na yẹn dóna ganjẹ ojọmiọn Etọn go,

Yẹn ko tindo owhè kande-fọtọ̀n-nukun-dopo, podọ to madẹnmẹ yẹn na dása otọ̀ lọ.

Podọ na ojlẹ dopodopo he to yìyì.

Whenuena yẹn na tin to finẹ họ̀ owhè fọtọ́n donu ao,

Bo to ohàn pipa tọn ji hlan Ẹn;

Mí nasọ doyẹyigona Ẹn 

Di whenu mí ṣẹṣẹ yise.

Ojé! Na yẹn yinwanna Jesu sọ! Na onú popo wẹ É yín na mi!

Ojé! E yọ́n! Fitẹ wẹ yẹn na nọte do, bé osọha aotọ wẹ? Bé mí sọgan yí pẹvide dogọ́? E yọ́n! Fitẹ wẹ mí tin te dai, aotọ kavi fọtọ̀ntọ? E yọ́n. Wékun C, hinhẹn sọn sọha aotọ jẹ fọtọ̀ntọ, fidepope mì tin te, mì ni fọ́nṣite bo wá. Mì dọ? Eyọ́n! Odẹ̀ wéma wékun “C” tọn, sọn osọha fọtọ̀ntọ jẹ okòtọ. Enẹ na yín omẹ aotọ hunkọ. Dinvie, podọ mì mọ fie hùkàn odẹ̀ tọn lọ tin te, enẹwutu mí ma jlo dọ tẹnmẹ ni ján gba.

Dinvie, mì tùntóai hlan mi; na mí ma na dẹn. Ṣigba, dinvie, ojlẹ ko yì, whenu lọ ko sọ! Yẹn jlo dọ mì omẹ pó ni yinwanna Oklunọ lọ. Yẹn jlo dọ mí omẹ pó ni jẹ finẹ nado mọdona vivẹ ojlẹ he lọ tọn. Mì gbọ mí ni yì. Na mì ni tùntóai hlan mi.

Etẹwẹ mí to tintẹnpọ́n nado wà to ofi? Mí to Ohó Jiwheyẹwhe tọn hia gbọn wékun lẹ mẹ. Na Elija wà onú dopolọ,  bo zinzọnlin gbọn osó ji whenuena é yọ́nẹn dọ Jiwheyẹwhe dọ hlan ẹn, dọ, é ni wà mọ. É sọ dọmọ, “Dinvie, mì gbọ mí ni do Jiwheyẹwhe hia, Jiwheyẹwhe he siọ gbọn miyọn dali, gbọ Ewọ ni yín Jiwheyẹwhe.”        

Podọ Hitinu nẹlẹ sọ to awugblena yédelẹ, ojé! Hitinu nẹlẹ ma yọ́nẹn dọ miyọn ma na jẹte gba, bọ yé sọ dáwha gángán bo sọ dèdo.

Ṣigba na Elija tọn, ewọ yọ́nẹn dọ miyọn na jẹte, na é tindo núdohiamẹ sọn Oklunọ de wutu.

Mì nọ dọmọ, “Bé é tindo núdohiamẹ wẹ?”

Mọwẹ! Whenuena Elija gọ̀ onú lẹpo do otẹn yetọn lẹ mẹ, wẹ é dọmọ, “Oklunọ È! Yẹn to núhe lẹpo wà to Ohó Towe ji.” Whenenu wẹ miyọn flẹ́. Whenuena Ohó Jiwheyẹwhe tọn yín mimọ to wékun lẹ mẹ, whenẹnu wẹ e yín azọ́n Jiwheyẹwhe tọn nado wà núhe pò lẹ. Na Ewọ tọn wẹ nado dọ na we dọ, hiẹ ni gọ̀ ẹ do finẹ. Bo sọ tindo kandeji dọ, Ewọ wẹ ylọ we nado gọ̀ ẹ do finẹ. Bé mì mọdona? Podọ, eyín hiẹ yín omẹ mọtọnhunkọ, Ewlọsu na pénukun do núhe pò lẹ go.

Dinvie, mẹdelẹ tin to ofi to hùkàn odẹ̀ tọn lọ mẹ, mẹhe yẹn na hodẹ̀ na lẹ... Dinvie, whẹpo mí nado bẹ́, mì dóna tò kaka yì sọ́ ado lọ.

Dinvie, mì omẹ nẹmu wẹ tin to ofi he to awutujẹ, bo matindo odẹ̀ wéma? Na mì ni zé alọ mìtọn lẹ daga. Mì mọ, yèdọ omẹ lẹpo wẹ zé alọ daga. Yẹn yise dọ, É na basi i eyín Ewọ wẹ dopolọ to osọ, egbé, mọwẹ podọ kakadoi. Mọdopolọ wẹ Ewlọsu basi hùkàn odẹ̀hiho tọn lọ dó. Do ayi e go, gbẹtọ lẹ wá Ede to hùkàn odẹ̀hiho tọn lọ mẹ, yèdọ agùn daho lẹ lọ, É sọ zé alọ Etọn lẹ do yé ji bo dona yé. Whenuena É to yìyì, É nọte bo kànbiọ dọ, “Mẹnu wẹ dóalọ ogo É?” É sọ lẹ́ pannukọn nawe de, bo dọ hlan ẹn, dọ, etẹwutu wẹ hiẹ dóalọ ogo É? Whenẹnu wẹ É dọ hlan ẹn, dọ, zẹntin ohùn tọn towe ko dóalọte, na yise towe ko hẹn we jẹ gángán.          

Eyín nawe lọ ko dọmọ, “E yọ́n, Oklunọ È, yẹn ma yọ́nẹn, na yẹn ko to awutu he jẹ sọn azán dindẹnmẹ,” núde ma na ko jọ gba. Lala, núde ma na ko jọ gba. 

Eyín É ko dọ hlan nawe Silofianinu nẹ dọ, “Na ohó he hiẹ dọ tọn wutu, gbigbọ mawé ko tọ́nsọn viyọnnu towe mẹ,” podọ eyín nawe lọ ko sọ dọ, dọmọ: “E yọ́n, dinvie Oklunọ È, bé hiẹ na basi dolé?” Bé whenẹnu, gbigbọ mawé lọ ma na tọ́nsọn viyọnnu lọ mẹ gba. Ṣigba é dónukun nado mọ ovi etọn dolé Jesu ko dọ dó.

Do ayi e go, Jesu dọ hlan mí, dọ, “Eyín mì sọgan yise! Eyín mì sọgan dọ hlan osó he dọ, ‘hiẹ ni sẹtẹn sọn ofi,’ bo ma na hanú to ayiha mìtọn mẹ; ṣigba bo na yise dọ núhe É dọ na yín mọ, é na tindo onú depope he é dọ. Enẹwutu yẹn dọ hlan mì, núdepope he mì biọ, whenuena mì hodẹ̀, mì ni yise dọ mì mọ yé yí, mì nasọ tindo yé.” Opagbè nahunkọ tọn wẹ ehe!

Dinvie, dawe yẹwhehódọtọ podọ wẹndagbejlatọ lọ ma doyise to enẹ lọ mẹ gba. Na é zinzọnlin jẹ họ̀họ̀ntonù bo pọ́n hlan ohọ̀ lọ mẹ, kavi bo nọte to finẹ, bo nọ to didọmọ, “Yé omẹ he to azọ̀nhẹngbọ na omẹ to mọ wà gbọn whinwhan Gbigbọ Wiwé tọn dali,” podọ to enẹgodo wẹndagbejlatọ lọ nọ tọ́nyì sọn finẹ. Bé mì mọdona? Ṣigba é ma mọdona dọ, Núdùdù whiwhlá lọ wẹ ehe lọ gba. Mọ é ma sọ yọ́nẹn dọ ehe wẹ núwhiwhla de sọn é de. É ma yọ́nẹn gba. E blawu, yèdọ ayiha he to omẹ́, agbatọnọ, nukuntọnnọ he ma mọdona núde dogbọn Núdùdù whiwhlá lọ tọn dali gba. Bé mì mọdona? E ylan titegbe. 

Jiwheyẹwhe È, gbọ na yẹn ni kú jẹnukọn, ṣigba Hiẹ dike e yín mọ hlan mi gbèdé blo. E pọnte hlan mi dọ yẹn do ko kú, húdọ e ni do jọ do ogo é domọ. Podọ yẹn sọ lẹn dọ, ehe wẹ ojlo omẹ dopodopo tọn, bé e ma yín mọwẹ? [Agùn lọ sọ yígbè, dọ, “Niṣẹ.”] 

Ṣigba, dinvie, Jiwheyẹwhe ko dopagbè onú nẹlẹ tọn hlan mí to azán godo tọn lẹ mẹ. Yè wlán ẹn dọ Jesu Klisti na jẹte wá bo na do Ede hia to agbasalan gbẹtọ tọn de mẹ, yèdọ dilé É wà dó hlan Sọdọmi dali. Nugbo wẹ. Podọ yè sọ wlán ẹn dọ, aihọn lọ na gọ̀wá nọ̀ ninọ̀mẹ Sọdọmi tọn. Enẹwutu, Jesu Klisti dọmọ, “Lé e te to ojlẹ nẹ lọ mẹ, mọkẹdẹ wẹ e na te to azán he gbè Ovi gbẹtọ tọn na sọawúhia.” Mì mọdona? Dawe he jẹte wá to ninọ̀mẹ gbẹtọ de tọn mẹ nẹ, mẹhe yè ylọ dọ, “Elohim,” hlan Ablaham jẹnukọnna wiwá ovi pagbè tọn he. Mì dayi núhe e yín go, na Ablaham dọ, dọ, Jiwheyẹwhe wẹ. Podọ Biblu sọ dọmọ, omẹ atọ̀n wẹ wá é de, mẹhe tindo afínfín to awù yetọn lẹ go, to whẹntintọ́n de mẹ, sinai bo dùnú taidi gbẹtọ. Mọwẹ Jesu sọ dọmọ, “Whenuena aihọn na gọ̀wá ninọ̀mẹ Sọdọmi tọn mẹ, wẹ Ovi gbẹtọ tọn nasọ sọawúhia whladopo dogọ́,” to whenẹnu É ma yín Ovi Jiwheyẹwhe tọn gba. Yèdọ Ovi gbẹtọ tọn na do Ede hia.

Dinvie, mì payi e go, onúhe yẹwhegán godo tọn Malaki dọ, dọmọ, “Dayi e go, yẹn na do Elija yẹwhgán lọ hlan mì, mìwlẹ nasọ nọ lẹ́ ayiha ovi lẹ tọn do otọ́ yetọn lẹ de.” Bé mì mọdona? Owẹn he na hẹn yé wá Biblu mẹ, bọ Ovi gbẹtọ tọn na do Ede hia to azán nẹ lọ gbè. Podọ to azán nẹ lọ gbè, whenuena angẹli whèta agùn ṣinawetọ lọ tọn na ṣẹ̀ pẹnkún ji, yè na hẹn núdabla Jiwheyẹwhe tọn lẹ zọn yínyọ́nẹn to azán nẹ gbè. Whenẹnu wẹ yè na hùn Ohiadonu Ṣinawe lẹ. Mọwẹ núdabla agùn helẹ tọn po onú lẹ po na sọawúhia dó.

Mì mọdona, na yé ma yọ́nẹn wutu. Enẹwutu wẹ Jesu dọ, dọmọ: “Mì Falesi, nukuntọ́nnọ lẹ!” Bo sọ dọmọ, “Eyín nukuntọ́nnọ de do alihia nukuntọ́nnọ de, bé yé omẹ awelẹ ma na na jai do odò mẹ wẹ?” Mì mọdona, enẹwutu wẹ gbẹtọ nẹlẹ ma do mọ Enẹ lọ gba.

Núdabla lọ wẹ yín dọ, dopodopo agùn nẹlẹ tọn ko basi gbẹ́pipli de do Hiadonu nẹlẹ mẹ, podọ enẹ wẹ dopo to núwhiwhla he jẹagọ to nukun Jiwheyẹwhe tọn mẹ. Bé mì mọdona, Dọtẹ Li? Pọ́n! Mọwẹ. Enẹ wẹ núhe tin to finẹ lọ. Yèdọ dopo to núwhiwhla lẹ lọ mẹ. Yé bẹ́pli, mì mọdona, podọ enẹ lọ jẹagọdo ojlo Jiwheyẹwhe tọn mlẹnmlẹn. Podọ enẹ nasọ yín hùnhùndohia to azán godo tọn lẹ mẹ, bo plán gbẹtọ lẹ, e ma yín hlan zédai de kavi hlan agùn gbẹ́pipli tọn de gba, ṣigba nado lẹ́gọ̀do Ohó Nugbo lọ go. Enẹwutu, Ohó Nugbo lọ na wá gbẹtọ delẹ de, bọ Ovi gbẹtọ tọn na do Ede hia to gblagbla yetọn mẹ, “dopolọ to osọ, egbé, mọwẹ podọ kakadoi.”

O Jiwheyẹwhe ṣie! Ô! yẹn yinwanna enẹ lọ. Yẹn yinwanna nado dọhó do É go. Mọwẹ yẹn yinwanna nado nọ hẹn Ẹn klo to gbẹtọ lẹ nukọn. Na yẹn tọn, yẹn ma tlẹ sọgan hẹn Ẹn klo gba; na É ko klo dote. É yí ji sọmọ bọ mẹdepope ma sọagn húgan Ẹn, mọ É sọ sisó sọmọ bọ mẹdepope ma sọgan mọ odò Etọn, podọ É gblo sọmọ bọ mẹdepope ma sọ sọgan lẹ́do É, gãnṣo mì tindo họ̀nù de hlan Ẹn to ayiha mìtọn mẹ. Bé mì ma na kẹalọyí I wẹ? Nawẹ Oklunọ mítọn dabla dolé! E yọ́n.

Dinvie, mì gbọ mí omẹ pó ni nọ̀ gũn. Dinvie, mí ko dọhó dogbọn Ehe tọn dali. Podọ dinvie, núhe to Enẹ mẹ lọ, bé nugbo wẹ? Dinvie, e sọgan yín dọ jonọ delẹ tin to ofi. Enẹwutu, yẹn sọgan dọ hlan mì dọ, eyín Klisti yín dopolọ, to osọ, egbé podọ mọwẹ kakadoi, bé etẹwẹ É sọgan wà to ojlẹ he lọ mẹ? É na wà onú dopolọ he É wà to whenuena É tin to aigba ji fi. Bé e ma yín mọwẹ? Na yise gbẹtọ lẹ lọ tọn na dóalọ awùgbo Etọn go, bọ É nasọ lẹ́ pannukọn mì kẹdẹdilé É wà hlan nawe nẹ dó to dòtọ̀ kọ̀n, bo sọ wà to ofi devo lẹ, bo sọ yọ́n linlẹn yetọn lẹ.

Dinvie, mì nọ dọ, dọ: “Bé É sọgan hẹnazọ̀ngbọna mi?”

É dọ to Ohó Etọn mẹ dọ, É ko wà enẹ dote. Ṣigba núhe tin to finẹ wẹ nado hẹn Ede zùn yínyọ́nẹn dọ, É tin to ofi.

Dinvie, eyín É sọawúhia mí to agbasalan mẹ, mí na mọ Klisti di gbẹtọ owhè gbànnukun-atọ̀n mẹ tọn de kẹdẹdilé mẹhe yè ylọ dọ Hofimanu dè fọto Etọn dó, po ohùn po kùnkùn sọn alọ Etọn mẹ, po onú mọtọnhunkọ lẹ po, po ogànpa lẹ po gbọn agbasa Etọn lẹpo go, yẹn ma na yígbèna enẹ gba. Lala, lala. Whenuena É na wá na Ede, “Nukun lẹpo na mọ Ẹn, odẹ́ lẹpo na yígbè Etọn; podọ kẹdẹdilé owhè nọ zẹ sọn Whèzẹtẹn yì Whèyihọ̀ dó, mọkẹdẹ wẹ e na te.” Bé mì mọdona? Mí mayise to plọ́ngiglọ́ nẹlẹ mẹ kavi to otànhóhó gbẹtọ lẹ tọn mẹ gba. Mí yise dọ Jiwheyẹwhe wẹ Ohó lọ.

Ṣigba whenuena É zé Ede whla do agbasalan de mẹ, yèdọ agbasalan yẹn po mìwlẹ po tọn mẹ , bo nọ ná mì núnina lẹ, podọ yẹn ga, mọwẹ É nọ do Ede hia gbọn núniná nẹlẹ mẹ dó. Enẹ wẹ Núdùdù whiwhla lọ. Alọdepope he mẹ É do Ede hia gbọn yẹn dali dó, mì dóna yí I sè, mì dóna tindo núniná yise tọn de, mìlọsu ga, na mì nido yí I sè. Bé mì yí enẹ lọ sè? [Togùn lọ dọ, “Niṣẹ.”-Ed.] Podọ dinvie, eyín É do Ede hia to ninọ̀mẹ mọtọnhunkọ mẹ, bé mì na yí I sè? [“Niṣẹ.”] Po ayiha mìtọn lẹpo po, bé mì na yí I sè? Ojé! na e yọ́nwhànpẹ sọ, mì sã to ote pọ́n Ẹn, mì sã to ote pọ́n Ẹn nado sè núhe É na dọ.

Do ayi e go, mẹde tin to ote to ofi. Yẹn ma ko mọ ẹn pọ́n to ogbẹ̀ ṣie mẹ, kẹdẹdilé yẹn mọdona dó. Taidi mẹdagbe, huhlọnnọ, podọ mẹgángán de, nado jlẹ é sọgan yín mọ, yẹn ma yọ́nẹn. Ṣigba é tin to ote to finẹ. Dinvie, yẹn sọgan yì zé alọ do dawe nẹ ji bo hodẹ̀ nệ, bo sọ kànbiọ ẹ eyín é yise. É sọgan nọte ofi, bo dọ hlan mi, dọmọ: “Yẹn jlo dọ hiẹ ni hodẹ̀ na omẹ lé. Yẹn tindo awutu he yè nọ ylọ dọ,“sasu.” Yẹn sọ tindo awutu tafẹnmẹ tọn to whelẹponu podọ awutu apà to homẹ tọn,” kavi awutu devode. Yẹn ma mọdona gba. É sọgan dọ depope to onú ne lẹ mẹ.

Yẹn sọgan dọ e yín, nọvisunnu. “Podọ yẹn na zé alọ ṣie lẹ do oji we bo hodẹ̀ na we.” Enẹ lọ na sọgbe talala. Na enẹ lọ wẹ onú he mí wà to owhèta he wá yì lẹ mẹ. Bé e ma yín mọwẹ?

Ṣigba, mì flindọ, Jesu dọmọ, vogbingbọn na tin taidi lé e te to wiwá Etọn whenu de tọn, kẹdidelé e te to azán Sọdọmi tọn lẹ mẹ dó. Podọ di Dawe nẹ he wá finẹ, He sinai bo do godo avajahọ̀ he mẹ Sala tin te, É sọ dọ, dọmọ, (yé ma to oyín towe na ylọ dọ “Ablam” ba gba ) ṣigba “Ablaham.”

Mì mọdona, Ablam wẹ oyín etọn dai, Ṣigba é mọ númimọ de ehe mẹ Jiwheyẹwhe dọ hlan ẹn dọ, “Yẹn na diọ oyín towe.”

Podọ dinvie, Oklunọ Lọsu wẹ tin to ofi to ninọ̀mẹ gbẹtọ tọn de mẹ, bo to dùdù bọ sọ to nùnù po é po. É sọ kanbiọ ẹ dọ, “Ablaham, fie wẹ asi towe Sala te? Salai ma wẹ gba, ṣigba Sala.

É sọ gblọn bo dọmọ, “É tin to avaja mẹ, to godo towe.”

Oklunọ sọ dọ, dọmọ, “Yẹn na dlá we pọ́n kẹdẹdi pagbè ṣie, he Yẹn ko do hlan we to owhè kòatọ́n (25) he wáyì lẹ mẹ.”

Enẹwutu Sala konú to ede hòmẹ. Oklunọ sọ dọmọ, “Pọ́n, Sala konú to avaja lọ mẹ, bo dọmọ, “Nawẹ ehe sọgan yín  dó?” Bé onú de sinẹnawuna Jiwheyẹwhe wẹ? Mì mọdona? Nùde matin. Lala.

Dinvie É dọ, dọmọ, Jesu dopagbè dọ, “Ewọ, Ovi gbẹtọ tọn,” he yín Ohó lọ, (bé mì yise?) É na wá to azán godo tọn lẹ mẹ bo na do Ede hia to ojlẹ he mẹ aihọn lọ na taidi Sọdọmi po Gomọla po mẹ te. Bé mì yí enẹ sè?

Whẹpo mí nado hodẹ̀, mì omẹ he tin to họ̀mẹ ofi lẹ, mì hodẹ̀ bo pọ́n eyín Ovi gbẹtọ tọn wẹ dopolọ to osọ, egbé, mọwẹ podọ kakadoi. Mì kànbiọ, bé mọwẹ É yín, mì dọ “Oklunọ, dawe he ma yọ́n mi gba, ṣigba yẹn yọ́nẹn dọ, Hiẹ wẹ dopolọ to osọ, egbé, mọwẹ podọ kakadoi.” Bo pọ́n eyín É ma na dọ núhe eyín na we.

Mọwẹ, mẹmẹsunnu. Dinvie mì zé otà mìtọn lẹ do aga na ojlẹ vude.

 Ovi pẹvide tin to godo ṣie. Mẹhe agbasa etọn gblọ bo to ovàzọ̀n jẹ dinvie, yèdọ viyọnnu pẹvide. Mì ma nọnọ̀ ofi gba. Na Ovi lọ to hòmẹzọ̀n jẹ. Mì sã yise.

Dinvie, bé núhe É dọ, dọ, É na wà lọ wẹ enẹ ya? Jiwheyẹwhe he tin to Olọn mẹ yọ́nẹn dọ yẹn ma mọ dawe he pọ́n gbèdé togbẹ̀ ṣie mẹ.

Podọ dawe he tin to ofi, he taidi omẹ huhlọnnọ, podọ mẹgángán de. Ṣigba mì mọ oyẹ̀ he tin to otà etọn? Enẹ dohia dọ, adavo Jiwheyẹwhe hẹnazọ̀n etọn gbọ, Ewọ ma sọgan jẹ gángán gba. É tindo awutu ahúnmẹ tọn. Na awutu lọ tin to ovẹ́go towe mẹ. 

Do ayi e go, Ovisunnu gbẹtọ tọn tin to ofi dinvie.

 

É tindo tukla de to ayiha etọn mẹ dogbọn ovisunnu pẹvi de tọn dali, yèdọ ovi pẹvi de. Bé e ma yín mọwẹ? Bé hiẹ yise dọ Jiwheyẹwhe sọgan dọ núhe to wiwà ovi lọ na mi? [Nọvisunnu lọ sọ dọmọ, “Yẹn yọ́nẹn dọ É sọgan wà ẹ”-Ed] É sọgan. Ewọ tindo ninọ̀mẹ adigbénọ tọn de hunkọ. Na é tọ́nsọn awutu adigbé tọn mẹ to madẹnmẹ. [“Yèdọ afọnnu he.”] Mọwẹ, to afọnnu ehe. Podọ bé hiẹ yise dọ, hiẹ na nọ̀gbẹ̀ nado sọgan pénukun ovisunnu lọ go, na ewọ nido jẹ gángán? [“Mọwẹ.”]

Fie wẹ Ṣali Kọzi te? Fie wẹ ewọ te? Ṣali, Fitẹ wẹ hiẹ te? Yẹn lẹn dọ, é nọ̀ ofi to ozán mẹ. Ṣali sọ dọmọ, yẹn tin to ofi. Gahli, fie wẹ hiẹ te? Lahli, bé Gahli tin to ofi wẹ? Ovisunnu etọn tindo awutu dopolọ, yèdọ awutu dopolọ hunkọ. Fie wẹ hiẹ te, Lahli? Wá fi na ojlẹ pẹvi de. E yọ́n, hiẹ ko sọawúhia to ofi. Ovisunnu pẹvi he tindo awutu dopolọ. Podọ họ́ntọn ṣie vivẹ wẹ otọ́ etọn po onọ etọn po.Yẹn yì finẹ to owhè he wáyì lẹ mẹ, podọ onú nọ jẹ visunnu he ji sọmọ bọ é nọ họ́liai. Enẹ wẹ adigbé. Yẹn mọ awutu nẹ lọ hlan visunnu pẹvi lọ ji, bo dọ hlan Jiwheyẹwhe dọ É ni hẹnazọ̀ngbọna ẹn. Na sọn ojlẹ nẹ mẹ, é ma ko mọ depope yí gba. Otọ́ etọn wẹ dawe nẹ; onọ etọn sọ etọn sinai to fide to ofi; podọ visunnu pẹvi lọ sọ tin to ofi.

Bé mì yise dinvie, mẹmẹsunnu? (A basi Lahli!) Bé hiẹ yise, mẹmẹsunnu? Na Jiwheyẹwhe Olọn tọn ni ná we onú dopolọ, podọ na hiẹ nido nọ̀gbẹ̀ bo pénukun ovi lọ go. Na Jiwheyẹwhe ni dona we!

Mì gbọ mí ni hodẹ̀!

Mẹvivẹ Jiwheyẹwhe È, gọ́alọna ẹn! Yẹn hodẹ̀ dọ lẹblanu po ojọmiọn towe po ni tin to é ji, na Hiẹ ni sọ dona ẹn. To Oyín Jesu tọn mẹ.

Gọ̀yì otò Luwisiana tọn mẹ dinvie, po ayajẹ po, mì pa Jiwheyẹwhe na ewọ tọn.

O mọwẹ, na otò Luwisiana tọn mẹ wẹ é tọ́nsọn, nugbo mọwẹ, to Otọ̀ Ṣali tọn kọ̀n. Mọwẹ. Mì mọdona, yẹn sọgan mọdona linlẹn towe to dinvie. Mì pa Jiwheyẹwhe!

E yọ́n, a to onú dagbe de biọ, na hiẹ jlo nado tindo ovi. A ko tindo ovi delẹ dote, ovi awe, ṣigba hiẹ sọ jlo devo. Na Jiwheyẹwhe Olọn tọn ni basi na we, nọviyọnnu ṣie. Wá ofi, na yẹn jlo nado zé alọ do oji we.

Mẹvivẹ Jiwheyẹwhe È, na hlan yọnnu lọ kẹdẹdi ojlo ayiha etọn mẹ tọn, na mọwẹ e jẹ dó wutu. To Oyín Jesu tọn mẹ. Niṣẹ.

Dinvie, yì bo tindo ovi towe.

Jiwheyẹwhe dagbenọ de wẹ Jiwheyẹwhe. Bé mì yí enẹ lọ sè? [“Agùn lọ sọ dọmọ, Niṣẹ.”] Na É mọdona húdo mítọn lẹpo. É nọ ná mí húdo mítọn lẹ eyín mí tindo yise to ewọ mẹ. Na É dọmọ, “Eyín hiẹ sọgan yise!”

Yẹn ná we alọ to ofi de pọ́n. Yẹn ma sọ flin ofi lọ gba, ṣigba yẹn ko ná we alọ pọ́n. Yẹn ma sọgan do ayi e go dándán gba, ṣigba mí ko pé to fide. Etẹwẹ mí to ofi nado wà? Mí tin to ofi nado hodẹ̀. E yọ́n, ṣigba é matin to ofi gba. É tin to otò Jọjia tọn mẹ, bo tin to awutu mẹ. E ma yín awutu agbasalan tọn, ṣigba awutu gbigbọ mẹ tọn wẹ; yèdọ nọvi towe. Bé hiẹ yise dọ Jiwheyẹwhe sọgan basi i ehe, na enẹwutu wẹ hiẹ do sọawúhia to ofi? Bé hiẹ yise? Enẹwutu, wá ofi na mí ni hodẹ̀ dopọ́.

Mẹvivẹ Jiwheyẹwhe È, ná dawe he ojlo ayiha etọn mẹ tọn, na ewọ nido yì bo mọ dawe nẹ, é to awhádo hlan Jiwheyẹwhe. Mí biọ núhe lẹpo to Oyín Jesu tọn mẹ. Niṣẹ.

Na Jiwheyẹwhe ni dona we. Hiẹ yín mayisenọ blo. Yise po ayiha towe lẹpo po.

Nawẹ hiẹ basi dó? E ma yín dọ yẹn ma pégo nado ná we alọ to whenẹnu gba, to whenuena hiẹ dèalọ towe tọ́njẹgbonu, yẹn dayi núde go. Yèdọ oyẹ he dozin bo sọ di yũ de. Enẹwutu wẹ yẹn ma do ná we alọ. Yẹn yọ́nẹn dọ eyín yẹn ko hẹn alọ towe go, yẹn na ko mọ ẹn gbọn ninọ̀mẹ he lọ dali, mì mọdona? Ṣigba ahúnmẹzọ̀n de wẹ. Bé hiẹ yise dọ Jiwheyéwhe pégo nado hẹnazọ̀n towe gbọ? Awutu lọ tin to anọ́ amiọn tọn mẹ na we. Bé hiẹ jlo nado gọ̀yì otò Kalolina tọn mẹ nado pa Oklunọ na azọ̀nhẹngbọ towe tọn wutu? Bé hiẹ mọdona núhe yẹn to didọ? Dinvie, mí ni hodẹ̀.

Mẹvivẹ Jiwheyẹwhe È, to Oyín Jesu Klisti tọn mẹ, Omẹ dopo he tin to ofi dinvie; bọ ovi lẹ to dùdù Akla Jiwheyẹwhe tọn, na ovi he lọsu ni jaya to yise mẹ, gbọn Akla Jiwheyẹwhe tọn he É yí hlan ẹn dinvie dali na azọ̀nhẹngbọ etọn. Dinvie, na é ni yì bo nọ̀ jijọho mẹ, to oyín Jesu tọn mẹ. Niṣẹ.

Na Jiwheyẹwhe ni dona we, Nọvisunnu. Yise po ayiha towe lẹpo po.

Nawẹ hiẹ na basi dó?

Bé ehe ma yín ojlẹ dagbe de? E taidi dọ budisi de biọ gbẹtọ lẹ mẹ. Kavi e sọ dọnú to otó ṣie mẹ dolé, [Nọvisunnu Branham kúnwhé do miklo lọ mẹ, dọ, whio!-Ed.] Taidi ogbè whékúnkún tọn, dolé, dọ, “Whio,” mì mọdona. Akla yọpọvu lẹ tọn wẹ. Bé mì mọdona? Na mìwlẹ tọn wẹ, yèdọ mì wẹ e tin hlan. E ma yín yẹn gba. Mìwlẹ wẹ e tin hlan. Yẹn dopẹ to ojlẹ he mẹ titegbe, yẹn tin to jijọho kẹdẹdilé yẹn mọdona dó; ṣigba Akla wẹ É yín hlan mi ga to whenuena yẹn tindo húdo Etọn. Podọ Akla wẹ É yín hlan mìwlẹ ga. Ewọ wẹ na ná mì kàndeji. Na mì mẹhe ma tlẹ to awutu jẹ lẹ, e nọ hẹn ayiha mítọn pannukọn Jiwheyẹwhe to aga.

Mọkẹdẹ wẹ e te to osã he lọ mẹ, núhe É dọ É na wà, dọ, “Dilé e te to azán Sọdọmi tọn lẹ mẹ, mọkẹdẹ wẹ e na te to wiwá Ovi gbẹtọ tọn whenu, yèdọ whenuena Ovi gbẹtọ tọn na sọawúhia.” Bé mì mọdona? “Podọ do ayi e go, yẹn na do Elija yẹwhegán lọ hlan mì whẹpo azán daho osinọ Oklunọ tọn lọ nado wá. É bo nasọ lẹ́ ayiha gbẹtọ lẹ tọn do Otọ́ lọ de.” Bé mì mọdona?

“Podọ whenẹnu wẹ dódónọ lẹ na zinzọnlin gbọn afín mẹylankan lẹ tọn mẹ” Yé na fiọ di ozòhọ̀ de. Mí mọ dọ mọwẹ yé na fiọ dó. Podọ miyọn po aigba whinwhan lẹ po nasọ pé aihọn lẹpo ji, bọ olọn lẹ nasọ yí miyọn.

Osé Hóhó tọn É, wà lẹblanuna mi, podọ to whenẹnu.

Nawẹ hiẹ basi dó?  Nugbo, onú dopo gẽ wẹ hiẹ tindo, dọ, hiẹ tindo tukla yọnnu tọn po onú devo lẹ po. Hiẹ yín homẹgblenọ, podọ owhèta homẹgble tọn nẹ. Awusinyẹn lẹpo sọ tin. Ṣigba hiẹ tindo ojlo de ga, enẹ wẹ nado mọ Gbigbọ Wiwé yí. Nugbo wẹ. Enẹ lọ wẹ. Bé hiẹ yise dọ ... Bé hiẹ ko sọ yígbè onú lẹpo tọn? Bé hiẹ yise dọ eyín yẹn zé alọ do oji we bo biọ sọn Jiwheyẹwhe de dọ, É ni wà ẹ, Gbigbọ Wiwé na wá oji we? [Nọviyọnnu lọ sọ dọmọ, “Mọwẹ.”–Ed.] Bé hiẹ yí enẹ sè? [“Mọwẹ Mẹdaho.”] Mí ni hodẹ̀.

Mẹvivẹ Jiwheyẹwhe È, yẹn zé alọ ṣie lẹ do nawe he ji to ninọ̀mẹ apọsteli lẹ tọn mẹ, bo sọ biọ dọ ewọ ni mọ baptẹm Gbigbọ Wiwé tọn yí. Na é ni mọ Ẹn yí to Oyín Jesu Klisti tọn mẹ. Niṣẹ.

198 .Hiẹ basi mayi blo. Na hiẹ wẹ E tin hlan, podọ towe wẹ. Akla ovi lẹ tọn wẹ.

Hiẹ tindo ninọ̀mẹ dabla de to whenuena yẹn dọmọ, “tukla yọnnu tọn,” bé e ma yín mọwẹ? Na enẹ núhe hiẹ tindo lọ ga. Dinvie, bé hiẹ yise dọ, hiẹ na jẹ gángán? Enẹwutu, yì dinvie bo dopẹna Oklunọ.

Nawẹ hiẹ basi dó? Bé hiẹ yise po ayiha towe lẹpo po? Bé hiẹ yise dọ, hiẹ na dùnú kẹdẹdilé hiẹ ko nọ dù dó to azán he wáyì lẹ mẹ? E yọ́n. Yì dinvie bo dọ, “Oklunọ, Hiẹ basi na yẹn yise wutu.” Awúsọhiamẹ Oklunọ tọn lọ.

Bé hiẹ yise dọ tukla nẹgbé towe tọn na jó we do, bọ hiẹ nasọ jẹ gángán? E yọ́n, dinvie yì bo to didọmọ, “A basi Mẹvivẹ Jiwheyẹwhe,” mọwẹ Jiwheyẹwhe nasọ basi i dó.

Bé hiẹ yise dọ, hiẹ sọgan jẹ gángán, podọ Oklunọ na hẹn we jẹ gángán; bọ hiẹ ma nasọ tindo awutu húplomẹ tọn ba, bo na jẹ gángán bo nasọ nọ̀ jijọho? Bé hiẹ yí enẹ lọ sè? Yì bo to opẹdona Ẹn, dọ, “Oklunọ È, yẹn yise po ayiha ṣie lẹpo po, yèdọ mọwẹ yẹn sọ yí I sè dó.”

Mì mẹhe tin to gbonu finẹ lẹ, etẹwẹ mì yise dogbọn Ewọ tọn dali?

Hiẹ mẹhe tin to ofi, zé alọ towe do yọnnu he tin to apá towe ji, bo dọ hlan ẹn dọ, awutu he tin to húplomẹ po okàn mẹ lẹpo po na jó we do.

Na Jiwheyẹwhe ni dona we! Na hiẹ yise dọ hiẹ ko jẹ gángán dinvie wutu. Enẹwutu, yì owhé dinvie, bo dopẹna Jiwheyẹwhe! Na Jiwheyẹwhe ni dona we! Tọ́njẹ aliho towe ji, bo dọmọ, “Oklunọ Jesu, A basi.”

Nawẹ hiẹ basi dó? [Nọviyọnnu lọ sọ dọmọ, “Yẹn dopẹna Oklunọ.”–Ed.] Bé hiẹ sọ yise ga dọ, tukla nẹgbé towe tọn nẹ na jó we do? Ewọ sọ dọmọ, [“Yẹn yise.”] Podọ hiẹ nasọ jẹ gángán? Yọnnu sọ dọmọ, [“Jesu, A basi.”] Yì dinvie, bo dọ, “Oklunọ, A basi.” Yọnnu lọ sọ dọmọ, [“Jesu, A basi.”]

Nawẹ hiẹ basi dó? [Nọviyọnnu lọ dọmọ, “Yẹn to afọ ṣie dọn gbọn aigba.”–Ed.] Ojé, etẹwutu? [“Todin.”] Yẹn yọ́n oyín towe [“Totẹnu.”] to whenuena yẹn yín mẹplọ́ntọ to agùn Batist tọn ji. Yèdọ [“Totẹnu”]. Enẹ wẹ [“Dẹla Totẹnu.”] Nọviyọnnu Dẹla Totẹnu. Dinvie hiẹ tindo awúfiẹsa to nẹgbé towe. Ewọ sọ dọ, [“Mọwẹ.”] E na wá yọ́n. Bé hiẹ yise dọ É na hẹn we jẹ gángán? [“Mọwẹ.”] Bé hiẹ do ayi núhe jọ to agùn Baptist tọn he tin to otò Mill tọn mẹ to owhè he wáyì lẹ mẹ go? Nọviyọnnu lọ sọ dọmọ, [“Mọwẹ, yẹn flin!”] É gbẹ́sọ to Jiwheyẹwhe dopolọ yín to egbé. Nọviyọnnu lọ gblọn bo dọmọ, [“Jiwheyẹwhe, A basi!”] Na Jiwheyẹwhe ni dona we, nọviyọnnu.

Jọji Lait, fie wẹ hiẹ te? Bé hiẹ flin?

Bé hiẹ yise dọ hiẹ na jẹ gángán, eyín yẹn zé alọ ṣie lẹ do oji we po amìsisá he po? Wá ofi! To Oyín Jesu Klisti tọn mẹ, na ewọ ni mọ azọ̀nhẹngbọ yí! Niṣẹ. Sã doyise!

Dinvie, bé mì omẹ pó yise po ayiha mìtọn po? [Agùn lọ sọ dọmọ, “Niṣẹ.”–Ed.]

Dinvie, na enẹ yín núhọakuẹ dó, nado flin onú hóhó lẹ, yèdọ nado mọ viyọnnu nẹ! Yẹn ma sọ flin oyín etọn gba, ṣigba [Omẹ de dọ, “Totẹnu” wẹ oyín etọn.] Mọwẹ, Totẹnu wẹ oyín etọn. Ojé, viyọnnu etọn wẹ Bẹdi, mọwẹ. Mọwẹ nugbo. Mì lẹn dọ yẹn yì aga hú dẽ blo, na yẹn taidi onú pẹvi de, mì mọdona. Yẹn ma sọgan dèana etọn gba.

Ṣigba nọviyọnnu, tukla nẹgbé towe tọn ko dóalọte. Yì dinvie bo dopẹna Oklunọ, bo dọmọ, “A basi Oklunọ.”

Bé hiẹ sọ yise ga dọ tukla ayiha towe mẹ tọn na dóalọte? [Awutunọ lọ dọ, “Mọwẹ.”–Ed.] Enẹwutu, yì bo jaya, bo dọmọ, “Oklunọ Jesu, A basi,” bo yí I sè. Nugbo wẹ. Sã doyise, a hanú blo.

Wá oviyọnnu. Bé hiẹ yise po ayiha towe lẹpo po? Na onú susu wẹ to wiwà we. Hiẹ tindo awutu nẹgbé tọn ga. Bé hiẹ yise dọ Jiwheyẹwhe na hẹn jẹ gángán? Mọwẹ. Yì bo to ayajẹ. Na Ewọ wẹ nọ hẹnmẹ jẹ gángán. Enẹwutu, dopẹna Oklunọ. Na Jiwheyẹwhe ni dona we, nọviyọnnu.

Oyínjla, Sọnni. [Ovisunnu lọ sọ dọmọ, “Oyínjla!”–Ed.] Bé hiẹ yise dọ Jiwheyẹwhe na dóalọtena fifiẹ visunnu nẹ tọn, bo nasọ hẹn jẹ gángán? Bé hiẹ yí i sé? Nugbo wẹ. Oyínjla, họ́ntọn ṣie, gbọ ma na alọ we.

Mẹvivẹ Jiwheyẹwhe È, dè onú ylankan nẹ sọn ovisunnu he mẹ, na ewọ nido nọ̀gbẹ̀ to jijọho mẹ to Oyín Jesu tọn mẹ. Niṣẹ.

Na Jiwheyẹwhe ni dona we, nọvisunnu. Bé hiẹ yí enẹ lọ sè? Hiẹ na jẹ gángán. Enẹwutu, a domayise blo.

Hiẹ whè nado jẹ awutu ahúnmẹ tọn. Bé hiẹ yise dọ Jiwheyẹwhe na hẹn we jẹ gángán? [Awutunọ lọ sọ dọmọ, Mọwẹ mẹdaho.”–Ed.] Enẹwutu, yì bo dọ, “A basi Oklunọ, na A hẹnazọ̀ngbọna mi.”

Bé hiẹ yise dọ Jiwheyẹwhe na hẹn hòmẹzọ̀n towe gbọ, bo sọ hẹn we jẹ gángán? Enẹwutu, dè do nukọn bo to ayajẹ, to didọmọ, “Oklunọ, A basi.”

É gbẹ́sọ to Jiwheyẹwhe yín, bé Ewọ ma sọ to mọ yín wẹ? [Agùn lọ sọ dọ, “Niṣẹ.”–Ed.] Onú dopo he hiẹ dóna wà wẹ yín dọ, hiẹ ni doyise. Bé e ma yín mọwẹ? Bé hiẹ yí Ovi gbẹtọ tọn sè to azán godo tọn lẹ mẹ?

Onú de jọ to ofi to ojlẹ pẹvi he wáyì lẹ mẹ, bọ yẹn to tintẹnpọ́n nado yọ́n ofi he e jọ te. Na mẹde doyise bo wà núde. Kavi, e sọgan yín dọ yẹn na mọ yé to Osẹ̀gbè he ja, kavi whedepopenu he yẹn sọgan. Devo sọ die. Na alọ towe yín zizé daga. Bé hiẹ yise dọ Jiwheyẹwhe na dóalọtena awutu ahúnmẹ tọn nẹ, bo hẹn we jẹ gángán, bo sọ hẹnazọ̀ngbọna viyọnnu towe, bé hiẹ yí I sè? Asi Nẹf tọn, bé hiẹ yise dọ Jiwheyẹwhe na ... Leo Nẹf. Yẹn ma yọ́n we, ṣigba enẹ wẹ oyín towe. Na hiẹ tindo awutu ahúnmẹ tọn, bọ viyọnnu towe sọ tindo awutu adọvi mẹ tọn. Bé hiẹ yise dọ é na jẹ gángán? Yise towe ko hẹn we jẹ gángán. Yise po ayiha towe lẹpo po.

Mì omẹ he tin to osìn mẹ finẹ, bo to hòmẹzọ̀n jẹ lẹ, Jesu Klisti na hẹnazọ̀n mìtọn lẹ gbọ.

Bé mì yise? [Agùn lọ sọ dọ, “Niṣẹ”–Ed.] Ewọ dopolọ wẹ to osọ, egbé, mọwẹ podọ kakadoi. Dinvie, mì gbọ mí ni zé alọ mítọn lẹ do mínọzo lẹ ji. Ojé! Mì lẹn ojlẹ he mẹ mí tin te pọ́n, podọ asiko he mẹ mí tin te ga. Dinvie, mì do ayi e go dọ, mí tin to nukọn Jesu Klisti, Ovi Jiwheyẹwhe tọn tọn. Na É dopa dọ É na wà ehe to azán godo tọn lẹ mẹ. Enẹwutu, yẹn zé alọ ṣie lẹ do duku helẹ ji.

Mẹvivẹ Jiwheyẹwhe È, yẹn hodẹ̀ dọ Hiẹ ni dona duku helẹ na azọ̀nhẹngbọ gbẹtọ lẹ tọn gbọn Oyín Jesu Klisti tọn mẹ.

Dinvie, alọ mìtọn lẹ to mìnọzo lẹ ji, na awutugonu Agbasa Klisti tọn wẹ dopodopo mìtọn lẹ. Gbigbọ Wiwé dopolọ he dopa nado do onú whiwhla ayiha mẹ tọn lẹ hia, bo nasọ wà onú helẹ, É tin to mì mẹ. Enẹwutu, mì yín apáde to Ewọ mẹ, podọ Ewọ yín apáde to mì mẹ. Dinvie, É dọ ehe dọ, “Ohia helẹ wẹ nasọ nọ hodo mẹhe yise lẹ.” Enẹ wẹ mìwlẹ. “Eyín yé zé alọ yetọn lẹ do azọ̀ntọ lẹ ji, yé nasọ jẹ gángán.” Dinvie, hiẹ hodẹ̀na dewe titi blo, ṣigba hodẹ̀na mẹhe ji a zé alọ towe lẹ do, na yé to dẹ̀hona we wutu. Dinvie, mì gbọ mí ni hodẹ̀ dopọ́, podọ na omẹ madogánnọ de tin to ohọ̀ he mẹ fi blo. Etẹwutu wẹ mí na do nọte dẹn, mẹvivẹ sunnu, mẹvivẹ yọnnu, na Ewọ tin to ofi, yèdọ Gbigbọ Wiwé he yín Jiwheyẹwhe, Ehe mí ko dọhó Etọn.

Mẹvivẹ Jesu, mí mọdona Awúsọhiamẹ Towe. Na Hiẹ hẹn ovi pẹvi he ko kú nẹ gọ̀wá ogbẹ̀ to azán nẹ gbè gbọn odẹ̀ yise tọn dali. Mẹvivẹ Jiwheyẹwhe È, gbẹtọ susu tin to ofi he de mí ma yì na ojlẹ lọ tọn wutu, ṣigba yé zé alọ do yénọzo lẹ ji. Na yisenọ wẹ yé. Mí sinai to Nukọn Oklunọ Jesu Klisti tọn, Mẹhe yè zétite sọn oṣiọ lẹ mẹ, dopolọ to osọ, egbé, mọwẹ podọ kakadoidoi.

Enẹwutu, yè ko dù do oji we Satani! Jesu Klisti ko dù do oji we! Na É ko tite sọn oṣiọ lẹ mẹ bo tin to gblagbla mítọn mẹ to whèjai he, bo to Owẹn azán godo mẹ tọn lẹ tọn hẹn ṣẹ̀. Enẹwutu, hiẹ Satani, tọ́njẹgbonu sọn gbẹtọ helẹ mẹ! Bo jó yé do to Oyín Jesu Klisti tọn mẹ! Na “To Oyín Ṣie mẹ, yé na yàn gbigbọ mawé lẹ jẹgbonu,” enẹwutu, hiẹ ni jẹgbonu. To Oyín Jesu Klisti tọn mẹ, jó agùn he lọ do!

Dinvie, mì mẹhe mọ azọ̀nhẹngbọ mìtọn yí lẹ, mì fọ́nṣite to afọ mìtọn lẹ ji. Mì mẹhe mọ azọ̀nhẹngbọ mìtọn yí lẹ, mì fọ́nṣite to afọ mìtọn lẹ ji. Mì zé alọ mìtọn lẹ daga dinvie, bo na Ẹn pipa!

Enẹwutu, mì dọ hlan Jiwheyẹwhe dinvie dọ, “Yẹn mọ azọ̀nhẹngbọ yí.” Yẹn lọsu mọ azọ̀nhẹngbọ ṣie yí. [Agùn lọ sọ dọmọ, “Yẹn mọ azọ̀nhẹngbọ ṣie yí to dinvie.”–Ed.] Na Hiẹ Klisti wẹ dopolọ to osọ, egbé, mọwẹ podọ kakadoi. [Agùn lọ sọ dọmọ, “Hiẹ Klisti wẹ dopolọ to osọ, egbé, mọwẹ podọ kakadoi.”] Dinvie, yẹn yí We sè. [Agùn sọ yígbè dọ, “Dinvie, yẹn yí We sè.”] Na Hiẹ ni gọ́alọna mi na mayise ṣie. [Agùn lọ sọ dọmọ, “Na Hiẹ ni gọ́alọna mi na mayise ṣie.”] Niṣẹ. [Agùn lọ sọ dọ, “Niṣẹ.”]

Yẹn na pa Ẹ, yẹn na pa Ẹ,
Mì pa Lẹngbọ he yè hù na ylandonọ lẹ;
Na gbẹtọ lẹpo ni ná gigo E,
Na Ohùn Etọn ko klọ diho lẹpo sẹ̀.

Bé mì ma yinwanna Ẹn? [Agùn lọ sọ dọmọ, “Niṣẹ.”–Ed.] Enẹwutu, mì gbọ mí ni pa Ẹ. Na omẹ lẹpo ni zé alọ daga, bo na pipa Ẹ, na nọvisunnu lọ ni wá nado klitana.